Read Imbabura Highland Quichua MATEO 26 Bible Online

MATEO 26 - Imbabura Highland Quichua bible

MATEO 26

¹Cai tucuita villajushca jipami Jesusca, paipaj yachajujcunaman cashna nirca:

²—Pascua fiesta punlla chayangapaca, ishcai punllalla tiajtaca, cangunallata yachanguichimi. Chai punllapimi, Runa Aichayu tucushca ñucataca, cruzpi chacatashpa huañuchinajuchun japichihuanga— nircami.

³Chashna nijujpica, chai punllallatami curacunata mandajcunandi, mandashca shimita yachachijcunandi, israelcunata mandaj rucucunandi, curacunata mandaj Caifás mandashpa tiaj huasi patiopi tandanajurca.

⁴Paicunaca, Jesusta imashna umachishpa japishpa huañuchingapajmi parlarinajurca.

⁵Shina parlarishpapash: “Gentecuna jatarishpa, ñucanchita ama imatapash nishpa juchachinajuchunga, fiesta punllacuna yalijpirami japina canchi” ninajurcami.

⁶Jesusca, Betania pueblopimi lepra ung:uihuan huañujushca Simonbaj huasipi carca.

⁷Chaipi cajpimi shuj huarmica, ashtaca valishca mishquillagu ashnajuj jambiguta, alabastro nishcamanda rurashca uchilla fundugupi apashpa, Jesuspajman chayamurca. Chai huarmica, Jesús micushpa tiajujpimi, chai mishquillagu ashnajujta umapi talishpa javirca.

⁸Chaita paipaj yachajujcuna ricushpami, ninanda fiñashpa cashna ninajurca: —¿Imashpata chai huarmica, chashna yanga tucuchijunyari?

⁹Chai mishquillagu ashnajujtaca, ashtaca culquipaj jatushpa, imagutapash na charijcunaman carashpachari ali canman carca— ninajurcami.

¹⁰Chashna ninajujta uyashpami Jesusca, paipaj yachajujcunata cashna nirca: —¿Imashpata cai huarmitaca nalicachinguichi? Ñucapaj ali cachunmi, cashna aliguta rurashca.

¹¹Imagutapash na charijcunaca tiangallami. Ashtahuangarin ñucami, cangunahuanga na unaicaman caipi casha.

¹²Cai huarmica, ñuca huañushpa pambai tucunalla cachunmi, cai mishquillagu ashnajujtaca, ñucapi talishpa javingapaj shamushca.

¹³Na llullashpami, cangunataca cashna nini: Cai pachapica, maipi cashpapash cai ali villaita villajushpaca, cai huarmita yarichumbashmi, pai imata rurashcatapacha villanga— nircami.

¹⁴Chai jipami, Jesuspaj chunga ishcai yachajuj puramanda shuj, Judas Iscariote shuti runaca, curacunata mandajcunapajman rirca.

¹⁵Paimi, chai curacunataca cashna nirca: “Cangunaman Jesusta ñuca japishpa cujpica, ¿imatashi cuhuanguichiman?” nircami. Shina nijpimi paicunaca, quimsa chunga culquigutami cupashun ninajurca.

¹⁶Chai horasmandami Jesustaca, imashna japichi ushanata yarishpa, Judas runaca purijurca.

¹⁷Levadura illaj tandata micuna callari fiesta punllapimi, Jesuspaj yachajujcunaca paipajman quimirishpa, cashna tapurca: —Pascua punllapi cushijushpa can micuchunga, ¿maipita alichinajuchun munangui?— ninajurcami.

¹⁸Shina nijpimi Jesusca, paicunata cashna nirca: —Jerusalén puebloman ripaichi. Chaipica, shuj runagupaj huasiman chayashpa, cashna ninguichi: ‘Ñucanchita Yachachijmi: Ñuca huañuna punllami ña chayamujun. Chaimandami, pascua punllapi cushijushpa micunata, cambaj huasigupi ñuca yachajujcunahuan micungapaj munani nijun’ ninguichi— nishpami cacharca.

¹⁹Jesús mandashcashna rurashpami paipaj yachajujcunaca, pascua punllapi cushijushpa micunata micungapaj alichinajurca.

²⁰Ña tutayajpimi Jesusca, paipaj chunga ishcai yachajujcunahuan micungapaj tiarirca.

²¹Ña tianajushpami Jesusca, paicunata cashna nirca: —Na llullashpami, cangunataca cashna nini: Canguna purapi tiajujllatami, ñucataca huañuchijcunaman japichigrihuan— nircami.

²²Shina nijpimi ninandapacha llaquirishpa: —¿Ñucachu candaca japichina capani, Apunchi Jesús?— nishpa, paipaj yachajujcunaca shuj, shuj tapui callarirca.

²³Shina tapujpimi Jesusca, paicunataca cashna nirca: —Ñucahuan cai platopillata maquita satishpa micujujmi, ñucataca japichigrihuan.

²⁴Escribishcapi nijunshnami, Runa Aichayu tucushca ñucataca huañuchinajunga. Runa Aichayu tucushca ñucata japichij runaca, ¡aij imachari tucunga! Chai runaca, na huacharishca cashpachari, ali canman carca— nircami.

²⁵Shina nijpimi: —Yachachij, candaca ¿ñucachu japichina capani?— nishpa, Jesusta japichigrijuj Judas shuti runaca tapurca. Shina tapujpimi, Jesusca: —Canllatami chashna nishcangui— nirca.

²⁶Ña micunajushpami, Jesusca tandata japishpa, Diosta pashi nirca. Chai tandata chaupishpa, paipaj yachajujcunaman carashpaca: —Japishpa micuichi. Caica ñuca cuerpomi— nircami.

²⁷Shinallata copatapash japishpami, Taita Diosta pashi nishca jipaca, cashna nishpa curca: —Cai copamandaca, tucuicuna ufiachi.

²⁸Caica, ashtaca gentecunapaj juchacunata anchuchingapaj, jicharina ñuca yahuarmi. Caihuanmi Taita Diosca, gentecunahuan shuj mushujta ari nishcata pactachigrin.

²⁹Cangunataca, cashnami nini: Cai uvas vinotaca, cunanmandapacha cutinga na ufiashachu. Ñuca Taita mandajuj llactapi cangunahuan tiajushpami, shuj mushuj vinotaca ufiashun— nircami.

³⁰Paicunaca, candanaguta candashca jipami, Olivos shuti urcuman rinajurca.

³¹Shina rinajushpami Jesusca, paipaj yachajujcunata cashna nirca: —Cunan tutallatami tucui cangunaca, ñucata na crishpa pandaringuichi. Escribishcapica, cashnami nijun: ‘Michijtaca chugrichishami. Shinamandami llamacunaca, caita chaita calpanga’ nijunmi.

³²Ashtahuangarin ñuca causarishpami, cangunata ñaupashpa Galilea llactaman risha— nircami.

³³Shina nijpimi Pedroca, cashna nirca: —Caishujcuna canda na crishpa tucuilla pandarinajujpipash, ñucaca napacha pandarishachu— nircami.

³⁴Shina nijpimi Jesusca, cashna nirca: —Na llullashpami, candaca cashna nini: Cunan tutallatami, gallo nara candajpillata, ñucataca na rijsinichu nishpa, quimsacaman nigringui— nircami.

³⁵Shina nijpimi Pedroca, cashna nirca: —Canhuan huañuchi tucunapacha cashpapash, na rijsinichutaca napacha nishachu— nircami. Caishuj yachajujcunapash, tucuillami chashnallata ninajurca.

³⁶Getsemaní shuti pushtumanmi Jesusca, paipaj yachajujcunandi chayagrirca. Chaiman chayashpaca, cashna nirca: —Chaipi Diosta ñuca mañagringacaman cangunaca, caipi tianajuichilla— nircami.

³⁷Shina nishpallami Pedrotapash, Zebedeo shuti runagupaj ishcai churitapash, Jesusca pushashpa rirca. Ña rijushpami, ninan llaqui japijpi ninandapacha llaquirirca.

³⁸Shinamandami Jesusca, paicunata cashna nirca: —Ñuca almapimi, huañungashna ninanda llaquirini. Cangunaca, ñucashnalla ama puñushpa, caipi shuyanajuichilla— nircami.

³⁹Shina nishpaca, ashaguta rishpallami, alpapi cungurishpa, Diostaca cashna nishpa mañarca: —Ñuca Taitalla, cai copata ufianshna cai llaquita imashnallapash na apashpa yalinalla cajpica, yalichihuailla. Ashtahuangarin ama ñuca munashcata rurapaichu, cambaj munaita pactachipai— nircami.

⁴⁰Chai jipalla, paipaj yachajujcunapajman tigramushpaca, puñunajujtami japij shamurca. Chaimandami Pedrotaca, cashna nirca: —Shuj horasta ñucahuan rijchariajuitaca, ¿nachu usharcangui?

⁴¹Cangunata imapash nalita rurana munai ama japij shamuchunga, rijchariashpa Diosta mañaichi. Cangunapaj espirituca, Diosta mañangapaj munanmi. Ashtahuangarin cangunapaj cuerpomi shaijunlla— nircami.

⁴²Jesusca, cutin tigrashpami: —Ñuca Taitalla, cai copata ufianshna cai llaquita apanapacha cajpica, can munashcata pactachipailla— nishpa, caihuanga ishcaicaman mañarca.

⁴³Shina mañashpa tigramushpaca, cutin puñunajujtami paipaj yachajujcunataca, japij shamurca. Paicunaca, ninan puñuihuan cashpami, ñavita pascaitapash na ushanajurca.

⁴⁴Jesusca, paicunata saquishpa cutin rishpami, pundalla ima nishpa mañashcashnallata mañajurca. Chaihuanga, ña quimsacamanmi mañarca.

⁴⁵Jesusca, paipaj yachajujcunapajman tigramushpami, cashna nirca: —Cunanga, ña puñushpa samaichilla. Ricuichi, ñuca japi tucuna horasca, ñami chayamushca. Runa Aichayu tucushca ñucami, juchayu runacunapaj maquipi churai tucugrini.

⁴⁶Ricuichi, ñucata japichij runaca, ñami chayamujun. Jatarishpa, ucha jacuchi— nircami.

⁴⁷Chashna nijujhuanmi Judas runaca, Jesuspajman ñapash chayamurca. Paica, Jesuspaj chunga ishcai yachajuj purami carca. Paihuanga, ashtaca gentecunami espadacunahuan, caspicunahuan shamurca. Chai runacunaca, curacunata mandajcuna, israelcunata mandaj rucucuna cachamujpimi shamunajurca.

⁴⁸Jesusta japichingapaj shamujuj Judas runami, paihuan shamunajuj runacunataca, cashna nishpa yachachishcalla carca: —Maijandami ñuca muchani, chaita prezu japishpa apanguichi— nishcami carca.

⁴⁹Jesuspajman, Judas runa ñapash quimirimushpaca: —¿Alillachu capangui, Yachachij?— nishpallami mucharca.

⁵⁰Shina muchajpimi: —Cumba runa canga, ¿imapajta shamungui?— nishpa, Jesusca tapurca. Shina tapujhuanmi Jesustaca, ñapash chai runacuna prezu japirca.

⁵¹Ashtahuangarin Jesushuan shayanajuj puramanda shuj runaca, ñapashmi espadata surcurca. Shina surcushpami, curacunata mandajta servijtaca, rinripi muchurijta huactarca.

⁵²Shina muchujpimi Jesusca, chai runataca cashna nirca: —Cambaj espadataca, maipi tiajushcapillata churai. Espadahuan macanajujcunaca, espadahuanllatami huañuchi tucunajunga.

⁵³Ñuca Taitata mañajpica, huaranga huaranga angelcunatami, ñucata mitsachun cunanllata cachamunman. Chaitaca, ¿nachu yachangui?

⁵⁴Ashtahuangarin angelcunata cachamujpica, Dios escribichishca Shimipi cashna japi tucunapachami nishpa villajujca, ¿imashnashi pactanman?— nircami.

⁵⁵Chaipillatami, paita japingapaj shamushca runacunata Jesusca, cashna nijurca: —¿Shuhuatashnachu japingapaj cangunaca espadacunahuan, caspicunahuan shamunguichi? Punllandimi, Diospaj huasi ucupica, cangunapash ricujta yachachishpa tiajurcani. Chaipica, na japishpa saquircanguichillami.

⁵⁶Ashtahuangarin Dios ima nishcata villajcunaman, Diosllata escribichishca Shimipi nijushca pactachunmi, cangunaca cashna japingapaj shamushcanguichi— nijurcami. Chaipimi Jesuspaj yachajujcunaca, paitalla saquishpa, tucuilla pacajushpa calpanajurca.

⁵⁷Jesusta prezu japishpaca, curacunata mandaj Caifás shuti curapajmanmi aparca. Chaipimi, mandashca shimita yachachijcunapash, mandaj rucucunapash, tandanajushca tianajurca.

⁵⁸Ashtahuangarin Pedroca, Jesusta apajujpica caru carulla catishpami, curacunata mandajpaj huasi patiocaman rirca. Chaiman yaicushpaca, Jesusta imata rurajtapash ricungapajmi, chai huasita cuidajcunahuan tiajurca.

⁵⁹Chaipica, curacunata mandajcuna, mandaj rucucuna, mandaj puralla tandanajuj runacunami tianajurca. Paicunaca, Jesusta huañuchingapaj nishpami, llullashpa villajcunata mascanajurca.

⁶⁰Ashtaca runacuna Jesusmanda llullashpa villanajujpipash, nalita rurashcataca na tarircachu. Ashtahuangarin chai jipaca, ishcaipura runacunami, Jesusmandaca llullashpa villangapaj chayamurca.

⁶¹Paicunami cashna ninajurca: —Cai runaca: ‘Taita Diospaj huasita urmachishpapash, quimsa punllapilla cutin shayachi ushashallami’ nirca— ninajurcami.

⁶²Shina ninajujpimi, curacunata mandaj jatarishpaca: —Caicuna canda cashna ninanda juchachinajujpipash, ¿nachu imatallapash tigrachina cangui?— nircami.

⁶³Ashtahuangarin Jesusca, upalla shayajurcallami. Shinamandami chai curacunata mandajca, cashna tapurca: —Causajujlla Taita Diospash ricujunmi. Ama llullashpa, juramentushpa villailla. Canga, ¿Taita Diospaj Churi, Quishpichij Cristochu cangui?— nircami.

⁶⁴Shina nijpimi Jesusca, cashna nirca: —Canmi cashna nishcangui: Cashnatapashmi, cangunataca nini: Runa Aichayu tucushca ñucataca, ninan ushaita charij Taita Diospaj ali lado maquiman tiajujtami, cangunaca ricuhuanguichi. Shinallata jahua pachamanda fuyupi shamujtapashmi ricuhuanguichi— nircami.

⁶⁵Shina nijpimi, curacunata mandajca ninanda fiñarishpa, paipaj churajushcataca liquishpa, cashna nirca: —¡Diostami nali shimicunata rimashca! Shujcuna paimanda villachunga, ¿pitapash tapunarachu canchi? Pai imata nirijujtapash, cunan cangunallata ña uyanguichimi.

⁶⁶Cangunaca, ¿ima ninguichita?— nishpami tapurca. Shina tapujpimi: —Chai runaca nali cashcamandaca, huañunapachami— nishpa, paicunaca tigrachirca.

⁶⁷Chashna nishpallami Jesustaca, ñavipi t'ucashpa huactanajurca. Huaquingunaca, lado ñavipi huactashpami,

⁶⁸cashna ninajurca: —Quishpichij Cristo cashpaca, yachayari. ¿Candaca, maijanda huactarcanchi?— nishpa tapunajurca.

⁶⁹Pedroca, huasi canlla patiopi tiajujpimi, shuj servij cuitsa quimirishpa cashna nirca: —Cambashmari, Galilea llactamanda Jesushuan purijurcangui— nircami.

⁷⁰Ashtahuangarin paica na rijsinichu nishpami, tucuicunapaj ñaupajpi cashna nirca: —Can imata nijutapash na yachanichu— nircami.

⁷¹Shina nishpalla ñan punguman chayajujpimi Pedrotaca, shuj cuitsapash ricurca. Chai cuitsami: —Cai runapashmari, Nazaret pueblomanda Jesushuan purijurca— nishpa, chaipi shayanajujcunaman villajurca.

⁷²Ashtahuangarin Pedroca, cutinmi: —Chai runataca, rijsitapash na rijsinichu— nishpa juramenturca.

⁷³Chai jipallmi, chai shayanajuj puracunamanda Pedropajman quimirishpa, cashna ninajurca: —Cambash, chai runata catij purallatami cangui. Can chaipura cajtaca, cambaj rimaipillatamari rijsinchi— ninajurcami.

⁷⁴Shina nijpimi: —Chai runataca, rijsitapash na rijsinichu— nishpa, ninanda nalicachishpa juramentui callarirca. Shina nijujhuanmi, galloca candarca.

⁷⁵Shinamandami Pedroca, Jesús villashca shimicunata yarirca. Jesusca, cashnami nishca carca: “Narapash gallo candajpillatami, canga ñucataca quimsacaman na rijsinichu nihuangui” nishcami carca. Chaita yarishpami Pedroca, canllaman llujshishpa ninandapacha llaquirishpa huacarca.