Read Imbabura Highland Quichua MATEO 27 Bible Online

MATEO 27 - Imbabura Highland Quichua bible

MATEO 27

¹Ña punllayajujpimi, curacunata mandajcunaca, israelcunata mandaj rucucunapash, Jesusta huañuchingapaj tucuilla parlarinajurca.

²Chai jipami Jesustaca huatashpa apashpa, mandaj Poncio Pilatopaj maquipi churanajurca.

³Jesustaca, ña huañuchi tucugrijujta ricushpami, paita japichij Judas runaca llaquirijurca. Shina llaquirishpami, chai quimsa chunga culquicunataca, curacunata mandaj curacunaman, mandaj rucucunamambash, tigrachingapaj rirca.

⁴Judas runaca, paicunata cashnami nirca: —Ima nalitapash na ruraj runaguta huañuchinajuchun japichishpami, juchata rurashcani— nircami. Ashtahuangarin shina nijpica: —¿Ñucanchica imata ricunatata charichiyari? ¡Canllari imapash tucungui!— ninajurcami.

⁵Shina nijpimi Judas runaca, Diospaj huasi ucupi, chai culquita shitashpa llujshishpa rirca. Chaimanda rishpaca, paillata sipirishpami huañurca.

⁶Chai culquicunataca, curacunata mandajcuna tandachishpami, cashna ninajurca: “Cai culquica, runata yahuarta jichashpa huañuchinajuchun jatujpi cushca culquimi. Shinamandami mandashca shimipi nijunshna, Diospaj huasipi tiaj cajonbica, na churanalla” ninajurcami.

⁷Paicunapura parlarishpami, mangata ruraj runapaj alpata chai culquihuanga randirca. Chai alpataca, caru llactamanda shamujcuna huañujpi pambachunmi randirca.

⁸Shinamandami chai alpataca, cunangaman: Yahuar Pamba nishpa shutichishca.

⁹Chashna rurajpimi, Profeta Jeremías villashca pactarca. Paica, cashnami villajurca: “Quimsa chunga culquicunatami japinajurca. Chai culquicunaca, israelcuna valichishpa churashca juyashcami carca.

¹⁰Jatun Dios ñucaman villashcashnami, chai culquihuanga, mangata ruraj runapaj alpata randinajurca” nijurcami.

¹¹Mandaj Pilatoca, paipaj ñaupajpi Jesús shayajujpimi: —¿Canllu, Judá llactapi causajcunata jatun Mandaj cangui?— nishpa tapurca. Shina tapujpimi, Jesusca: —Canllata ñamari chashna ningui— nirca.

¹²Jesusca, curacunata mandajcuna, mandaj rucucuna ninanda juchachinajujpipash, imatapash na tigrachircachu.

¹³Shinamandami Pilatoca: —Canda cashna ninanda juchachishpa villanajujtaca, ¿nachu uyangui?— nishpami tapurca.

¹⁴Shina tapujpipash Jesusca, upalla uyashpa, shuj shimillatapash na tigrachircachu. Shina upalla uyajpimi, mandaj Pilatoca ninanda manllarirca.

¹⁵Pascua fiesta punllapica, maijanda cacharipai nishpa gentecuna mañajpipash, shuj prezu tiajuj runata cacharinatami, mandaj Pilatoca yachan carca.

¹⁶Chai punllacunapimi, Barrabás shuti runaca, prezu tiajurca. Paitaca, nali runa cajpimi, tucuicuna rijsishcapacha carca.

¹⁷Pilatoca, chai tandanajushca gentecunatami cashna nishpa tapurca: —¿Maijandata cacharichun munanguichi, Barrabás shuti runata, na cashpaca Quishpichij Cristo nishca Jesustachu cacharichun munanguichi?— nircami.

¹⁸Jesustaca, paicuna ninanda na ricunayachishcamandalla, paipaj ñaupajman apamushcatami Pilatoca yacharca.

¹⁹Mandashpa tiarinapi Pilato tiajujpimi, paipaj huarmica cashna shimita cachamurca: “Imatapash cashcatapacha ruraj chai runagutaca, ama canga imatapash ninguichu. Cunan tutami, chai runaguta muscushpa, ninanda llaquirishpa na ushajurcani” nishpami, cachamushca carca.

²⁰Ashtahuangarin: “Barrabás runataca cacharishpa, Jesustaca huañuchilla” ninajuchunmi, curacunata mandajcunaca, mandaj rucucunapash, gentecunata ninanda yachachinajurca.

²¹Mandaj Pilatoca cashna nishpami, paicunaman tigrachirca: —Cai ishcaipura runacunamandaca, ¿maijandata cacharichun munanguichi?— nircami. Shina nijpimi, gentecunaca: —Barrabastami cacharichun munanchi— ninajurca.

²²Shina ninajujpimi: —Quishpichij Cristo nishca Jesustaca, ¿imatata rurasha?— nishpa, Pilatoca tapurca. Shina tapujpica, tucuilla gentecunami: —¡Chai runaca, chacatai tucuchun!— nishpa caparinajurca.

²³Chashna caparinajujpimi: —Cai runaca, ¿ima nalitata rurashcayari?— nishpa, Pilatoca tapurca. Shina tapujpicarin: —¡Chai runaca, cruzpi chacatai tucuchun!— nishpami, ashtahuan ninanda caparinajurca.

²⁴Chashna ashtahuan ashtahuan caparinajujpimi, imata ruraitapash na ushashpa, yacuta apamuchun Pilatoca mandashpa, gentecunapaj ñaupajpi maquita maillashpa cashna nirca: —Cangunapaj jahuami, imatapash cashcatapacha ruraj cai runagutaca huañuchigrinchi. Na ñucapaj jahuachu— nircami.

²⁵Shina nijpica: —Chai yahuarca, ñucanchipaj jahua, ñucanchi huahuacunapaj jahua cachun— nishpami, tucuilla gentecuna caparinajurca.

²⁶Shina caparinajujpimi Pilatoca, Barrabás runatara cacharirca. Ashtahuangarin Jesustaca, ninanda astichishpami, cruzpi chacatanajuchun soldadocunaman curca.

²⁷Shina cujpimi soldadocunaca, Pilato mandashpa tiajuj huasiman Jesusta aparca. Shina apashpami, Jesusta chaupipi churashpa shayarichun, tucui soldadocunata cayarca.

²⁸Paicunaca, Jesús churajushcata surcuchishpami, morado fachata fachalichirca.

²⁹Umapipash, ahuashca cashatami churachirca. Vara caspitapash, ali lado maquipi charichishpa, paipaj ñaupajpi cungurishpami: —¡Judá llactapi causajcunata jatun Mandaj, canga juyaillamari ricujungui!— nishpa, na cazushpa asinajurca.

³⁰Paicunaca, t'ucashpa churashpami, varata quichushpa Jesustaca, umapi huactanajurca.

³¹Chashna na cazushpa asishca jipami, chai fachataca surcuchishpa, paipaj churajunata churachirca. Chashnami Jesustaca, chacatangapaj apanajurca.

³²Jesusman cruzta apachishpa rinajushpaca, Cirene pueblomanda Simón shuti shuj runatami tuparirca. Chai runatami, cruzta apachun mandarca.

³³Shinallata Gólgota shuti lomamanmi chayarca. Gólgota nishpaca, Uma Tullu nijunmi.

³⁴Chaiman chayajpimi, jayajhuan chapushca vinota Jesusman ufiachingapaj munarca. Ashtahuangarin malishpa ricushpaca, na ufiarcachu.

³⁵Jesusta chacatashpaca, paicunapura suerteta rurashpami, paipaj churajunata chaupirinajurca. Chashna chaupirijpimi, Profeta runagu villajushca pactarca. Chai villaj runaguca, cashnami nijurca: “Ñuca churajunataca, paicuna purami chaupirirca. Ñuca churajuna jahuapillatami, suerteta ruranajurca” nijurcami.

³⁶Chai jipami soldadocunaca, Jesusta cuidashpa chaipillata tianajurca.

³⁷Pai chacatariajuj cruz jahuapipash, imamanda huañuchijushcatami tablapi escribishpa churanajurca. Chai tablapica: “CAICA, JUDÁ LLACTAPI CAUSAJCUNATA JATUN MANDAJ JESUSMI” nijurcami.

³⁸Chai jipami shuhua runacunataca, ishcai purata shujtaca, ali ladoman, shujtaca lluqui ladoman, Jesuspaj ladopi chacatarca.

³⁹Chaita yalijcunaca, umata muyuchishpami, nalicachishpa cashna rimanajurca:

⁴⁰—Canga: ‘Diospaj huasita urmachishpapash, quimsa punllapilla shayachishallami’ nircanguica. Can ama huañungapaca, canllata quishpiriyari. Taita Diospaj Churipacha cashpaca, cruz jahuamanda uriajuyari— ninajurcami.

⁴¹Shinallatami curacunata mandajcunapash, mandashca shimita yachachijcunapash, fariseocunapash, mandaj rucucunapash, Jesustaca na cazushpa asishpa, cashna nishpa rimanajurca:

⁴²—Shujcunataca, quishpichircallami. Paillata quishpiritaca, na ushanllu. Israelcunata jatun Mandaj cashpaca, cunanllata cruz jahuamanda uriajujpimi crinchiman.

⁴³‘Taita Diospaj Churimi cani’ nishpami, paica Taita Diosta yariashpa purijurca. Dios llaquishpaca, cunanllatamari paitaca quishpichinman— ninajurcami.

⁴⁴Jesushuan chacatariaj shuhua runacunapash, chashnallatami paitaca nalicachishpa rimanajurca.

⁴⁵Chaupi punllamanda chishi quimsa horascamanmi, tucui cai pachaca yana yana tucurca.

⁴⁶Ña quimsa horas tucujujpimi: “Elí, Elí, ¿lama sabactani?” nishpa, Jesusca ninanda caparirca. Chai shimicunaca: “Ñuca Taita Dios, ñuca Taita Dios, ¿imashpata ñucatalla saquinguiyari?” nijunmi.

⁴⁷Chashna caparijta uyashpami, chaipi shayanajuj puramanda huaquingunaca: —Eliastamari cayajun— ninajurca.

⁴⁸Chashna caparijhuanmi, chai puramanda shuj runaca, esponjata apangapaj calparca. Chaitaca, vinagrepi mutiyachishpami, sucus pundapi churashpa, Jesús ufiachun shimipi churarca.

⁴⁹Ashtahuangarin caishujcunaca: —Saquilla. Paita cacharingapaj Elías shamunllu, imami, ricushunchi— ninajurcami.

⁵⁰Ashtahuangarin Jesusca, cutin ninandapacha caparishpami, paipaj espirituta Diosman mingashpa huañurca.

⁵¹Jesús huañujhuanga, Diospaj huasi ucupi huarcushpa quilpashca tiajuj jatun fachami, jahuamanda uraiman llujshijta chaupipi liquirirca. Alpa mamapash ninanda cuyupimi, rumicunapash chaupirirca.

⁵²Huañushcacunata pambashca utujucunapash pascarijpimi, Diospajlla causashpa huañushcacunaca, ashtacacuna causarirca.

⁵³Chaicunaca, Jesús causarishca jipami, utujucunamanda llujshishpa, Diospajlla tiajuj Jerusalén puebloman shamunajurca. Paicunaca, ashtaca gentecunamanmi ricurinajurca.

⁵⁴Patsaj soldadota mandajmi, shuj soldadocunandi, Jesusta cuidashpa tiajurca. Paicunami, alpa mama cuyushpa ima tucujtapash ricushpa, ninanda manllarinajurca. Shina manllarishpami: —Cai runaguca, Taita Diospaj Churipachami cashca— ninajurca.

⁵⁵Chaipica, ashtaca huarmicunami Jesustaca, carumandalla ricushpa shayanajurca. Paicunaca, Jerusalenman Jesús shamujujpica, Galilea llactamandapacha catishpami servishpa shamushca carca.

⁵⁶Paicuna purapica, Magdala shuti pueblomanda Mariapash, Jacobopaj, Josepaj mama Mariapash, Zebedeo shuti runapaj mamapashmi shayanajurca.

⁵⁷Ña tutayajpimi, Arimatea shuti pueblomanda shuj ninan charij José shuti runaca shamurca. Paipash, Jesusta catijllatami carca.

⁵⁸Chai runagumi, Jesús huañushcata pambagringapaj, Pilatota mañangapaj rirca. Shina mañajpimi, Jesús huañushcata cugrichun, shujcunata mandashpa Pilatoca cacharca.

⁵⁹Jesús huañushcata japishpaca, shuj mushuj yura fachahuanmi, Joseca pilluchirca.

⁶⁰Shina pilluchishpami, jacapi pai pambaringapaj utujuchishca mushuj utujupi Jesús huañushcataca churarca. Shuj jatun rumita suchuchishpa, chai utuju punguta quilpashpaca, rircallami.

⁶¹Chai utuju pungu ñaupajpica, Magdala shuti pueblomanda Mariandi, shuj Mariandimi tiarishpa quedarca.

⁶²Cayandi punlla alichishca jipaca, curacunata mandajcunapash, fariseocunapash, Pilatopaj ñaupajman tandanajurca.

⁶³Paicunaca, cashnami ninajurca: —Mandaj taitalla, chai llulla runaca, causajushpallata imata nirijushcatami yarinajunchi. Chai runaca: ‘Ñucata huañuchijpipash, quimsa punllahuanga causarishallami’ nirijurcami.

⁶⁴Chai runa pambariajuj utujuta quimsa punllacaman cuidachun, soldadocunata cachapai. Na cuidajpica, paipaj yachajujcunara tuta shamushpa, chai huañushcataca shuhuashpa apanman. Chashna apashpaca: ‘Huañushcacunapaj chaupimanda causarircami’ nishpami, tucui gentecunaman llullashpa villanajunga. Shina villanajujpica, chai runa causajushpallata llullashpa purijushcatapash yalimari tucunga— ninajurcami.

⁶⁵Shina ninajujpimi Pilatoca, cashna nirca: —Cai soldadocunataca, pushashpa richilla. Paicunataca, canguna munashcashna chai utujuta ali cuidachun churagrichi— nircami.

⁶⁶Shina nijpi rishpami, chai utujuta quilpashca rumipica, ali ali sellanajurca. Cuidaj soldadocunatapashmi churarca.