Read Imbabura Highland Quichua MATEO 3 Bible Online

MATEO 3 - Imbabura Highland Quichua bible

MATEO 3

¹Chai punllacunallatami, Bautizaj Juanga, Judea llacta jichushca pambapi, villashpandi shamujurca:

²Paica cashnami nijurca: “Juchayu cashcamanda ninanda llaquirishpa, Diospajman tigrarichi. Jahua pachamanda shamuj mandanaca, ñami pactamushca” nircami.

³Profeta Isaiasca, cai Juanmandami cashna nishpa villajurca: “Jichushca pambapi caparijuj runaguca, cashnami nin: ‘Jatun Diosman ñanda alichipaichi. Quingu quingu chaqui ñangunatapash, derechapaichi’ ninmi” nijurcami.

⁴Juanga, camello nishca animalpaj milmata rurashca churajunata churajushpa, cara chumbita chumbilishcami carca. Shinallata langosta nishca jurucunata, sachapi tiaj balun mishquitami micushpa causajurca.

⁵Paita uyangapaca, Jerusalenmandapash, tucuilla Judea llactamandapash, Jordán yacu muyundicunapi tiaj tucuilla llactamandapashmi shamunajurca.

⁶Paicunapaj juchacunata villajpimi Juanga, Jordán yacupi bautizajurca.

⁷Fariseocunapash, saduceocunapash bautizahuai ningapaj, ashtacacuna shamunajujta Juan ricushpaca, cashnami nijurca: “¡Cangunaca, culebrashna nali gentecunapaj miraicunamari canguichi! ¿Pita cangunataca, Dios ninanda fiñarishpa llaquichinamandaca, pacajunguichillami nishpa yachachircayari?

⁸Cangunaca, tucui shunguhuambacha ninanda llaquirishcatami, grano fucunshna ricuchina canguichi.

⁹Cangunaca, na cangunapaj shungu ucupilla: ‘Abrahammi ñucanchi taita’ ninajunachu canguichi. Cangunataca cashnami nini: Taita Diosca, caipi sirij rumicunatapash Abrahambaj huahuacuna cachun rurai ushanmi.

¹⁰Quirucunapaj sapipi jachata churashcallami tiajun. Nali fucuj tucui quirucunataca, jachahuan fitishpa urmachishpami, rupajuj ninapi shitanga.

¹¹Ñucami cangunataca, llaquirishpa Diospajman tigrarishcata ricuchij cachun, yacupilla bautizajuni. Ashtahuangarin ñucapaj jipa shamujmi, ñucatapash yali ushaita charin. Ñucaca, paipaj chaquipi churajushcata apaitallapash na ushanachu cani. Paimi cangunata, Diospaj jucha illaj Espirituhuan, ninahuan bautizanga.

¹²Paica, trigota huairachinata chaririajmi shayajun. Chaihuanmi, trillana pambapi jupata agllanshna, trigota huairachinga. Shina huairachishpami, granocunata alichina huasipi trigota alichinshna alichinga. Jupataca, na huañushpa rupajuj ninapimi rupachinga” nijurcami.

¹³Jordán yacupi Juan bautizajujpimi Jesusca, bautizai tucungapaj Galilea llactamanda shamurca.

¹⁴Ashtahuangarin Jesustaca, na bautizangapaj munashpami, Juanga cashna nirca: —¿Canrachu ñucata bautizahuai ningapaj shamungui? Canmari, ñucata bautizana cahuangui— nircami.

¹⁵Shina nijpimi Jesusca, cashna nirca: —Imatapash cashcatapacha ruranataca, tucuitami pactachina canchi. Ama imatapash nijushpa bautizahuailla— nircami. Shina nijpimi, Jesustaca bautizarca.

¹⁶Jesús bautizai tucushpa yacumanda llujshijushpaca, jahua pacha ñapash pascarijtami ricurca. Taita Diospaj Espiritupash, palomagushna paipaj uma jahuaman urai shamujtami ricurca.

¹⁷Jahua pachamandapash, cashna rimajmi uyarimurca: —Caimi, ñuca juyashca Churigu. Paimandami ninanda cushijuni— nijmi uyarirca.