Read Imbabura Highland Quichua MATEO 4 Bible Online

MATEO 4 - Imbabura Highland Quichua bible

MATEO 4

¹Chai jipami Jesustaca, nali yuyaita diablo cuchun, jichushca pambaman Diospaj Espíritu aparca.

²Jesusca, chuscu chunga punlla, chuscu chunga tutata na micushca cashpami, ninanda yarjachirca.

³Nali yuyaita cuj diablo, Jesuspajman shamushpaca cashnami nirca: —Taita Diospaj Churipacha cashpaca, cai rumicunata tandaman tigrachi— nircami.

⁴Shina nijpimi Jesusca, cashna nishpa tigrachirca: —Escribishcapica cashnami nijun: ‘Gentecunaca, na tandahuanlla causangachu. Ashtahuangarin Taita Dios rimashca tucuilla shimicunahuanmi causanga’ nijunmi— nircami.

⁵Shina nijpimi diabloca, Jesustaca Diospajlla puebloman pusharca. Chaipica, Diospaj huasi jahuamanmi vitsiachirca.

⁶Chaipimi, Jesustaca cashnami nirca: —Taita Diospaj Churipacha cashpaca, caimanda ucuman urmai. Escribishcapica cashnami nijun: ‘Canda cuidachunga Taita Diosca, paipaj angelcunatami cachamunga. Paicunami, rumipi can ama nitijachunga, paicunapaj maquipi charinajunga’ nijunmi— nircami.

⁷Shina nijpimi Jesusca, cashna nirca: —Cashnatapashmi escribishcapica nijun: ‘Canda Mandaj Taita Diostaca, ama can munashcata rurachun mandanguichu’ nijunmi— nircami.

⁸Jesustaca, cutinmi shuj jatun urcu jahuaman, diabloca pusharca. Chai urcumandaca, cai pachapi muyundi tucui llactacunatapash, chai llactacuna juyailla cajtapashmi ricuchirca.

⁹Paitaca cashnami nirca: —Ñucata cungurishpa ninanda alicachijpica, caicunataca tucuillatami canman cusha— nircami.

¹⁰Shina nijpimi Jesusca, cashna nirca: —Satanás, caimanda anchuri. Escribishcapica, cashnami nijun: ‘Canda Mandaj Taita Diostalla ninanda alicachingui. Paitalla servishpa causangui’ nijunmi— nircami.

¹¹Shina nijpimi diabloca, Jesuspaj ladomanda anchurishpa rirca. Chai jipallami angelcuna shamushpa, Jesusta servinajurca.

¹²Bautizaj Juandaca, prezuna huasipi churashcata uyashpami Jesusca, Galilea llactaman tigrarca.

¹³Paica, Nazaret pueblotaca saquishpami, Capernaum shuti pueblopi causangapaj shamurca. Chai puebloca, Galilea cucha manñapimi tiajun. Chai cuchaca, Zabulón shuti, Neftalí shuti llactacunapimi tiajun.

¹⁴Jesusca, Profeta Isaías villashca pactachunmi, chai pueblopi causangapaj shamurca. Isaiasca, cashna nishpami villajurca:

¹⁵“Zabulón shuti, Neftalí shuti llactacuna. Cangunaca, mama cuchaman rina ñambimi, Jordán yacu chimba ladoman tianajunguichi. Na israelcunami, Galilea llactapica causanajun.

¹⁶Yana yana tutapishna causajcunaca, ninanda punchayachijuj michagutami ricurca. Huañui japinalla llandupishna chai llactapi causanajujtaca, michagumi punchayachirca” nijurcami.

¹⁷Chai punllacunamandapachami, Jesusca cashna nishpa villai callarirca: “Juchayu cashcamanda ninanda llaquirichi. Jahua pachamanda shamuj mandanaca, ñami pactamushca” nijurcami.

¹⁸Jesusca, Galilea cucha manñapi purijushpami, pijita japishpa causanajuj ishcai huauqui puracunata ricurca. Shujca, Pedro ni tucushca Simonmi carca, shujca Andresmi carca. Paicunaca, linllihuanmi pijita japinajurca.

¹⁹Paicunatami, Jesusca cashna nirca: “Ñucata catihuaichi. Cangunataca, pijita japishpa tandachinshna, gentecunata tandachijcuna cachunmi rurasha” nircami.

²⁰Shina nijpimi, pijita japinajushca linllicunata chai pushtupi saquishpa, Jesusta catinajurca.

²¹Jesusca, chaimanda ashaguta rishpallami Jacobohuan, Juanhuan ishcandi huauqui puracuna tianajujta ricurca. Paicunaca, paicunapaj taita Zebedeohuanmi, canoapi tiarishpa linllicunata huatanajurca. Paicunatapashmi Jesusca cayarca.

²²Shina cayajpimi cangunatapash, paicunapaj taitatapash chai pushtupi saquishpa, Jesusta catinajurca.

²³Galilea llactapica, israelcuna tandanajuna huasicunaman yaicushpami, tucui pueblocunapi Jesusca yachachijurca. Jahua pachamanda mandajuj ali villaitapashmi villajurca. Shinallata tucui ung:uicunata, tucui nanaicunata charij gentecunatami alichijurca.

²⁴Chaitaca, tucuilla Siria llactamanmi uyanajurca. Shina uyarijpimi, nanaicunata tucui charijcunata, shuj shuj ung:uicunahuan llaquinayaita causajcunata, aya jundashcacunata, ñapash shitarishpa tucurijllacunata, suchucunata apamunajurca. Shina apamujpimi, Jesusca alichijurca.

²⁵Shinamandami Galilea llactamanda, Decápolis shuti llactamanda, Jerusalenmanda, Judea llactamanda, Jordán yacu chimba ladomandapash, ashtaca ashtaca gentecuna Jesusta catinajurca.