Read Imbabura Highland Quichua MATEO 5 Bible Online

MATEO 5 - Imbabura Highland Quichua bible

MATEO 5

¹Ashtaca ashtaca gentecunata ricushpami, Jesusca urcuman vichai rirca. Chaipi tiarijpimi, paipaj yachajujcunaca, paipaj ladoman shamunajurca.

²Chaipimi Jesusca, paicunaman yachachishpa cashna nijurca:

³“Diosmanda yachajungapaj, paicunapaj shungupi ninanda munajcunaca, ninandami cushijun. Jahua pachamanda shamuj mandanaca, paicunapajmi.

⁴Llaquihuan huacashpa causajcunaca, ninandami cushijun. Paicunami cushijuita japinga.

⁵Na ñapash fiñarijllacunaca, ninandami cushijun. Paicunami, cai pachata paicunapaj cachun japinga.

⁶Yarjachinshna, yacunayachinshna imatapash cashcatapacha ruranata munajcunaca, ninandami cushijun. Paicunami, imatapash cashcatapacha ruranataca, na munangacaman japinga.

⁷Shujcunata llaquishpa juyajcunaca, ninandami cushijun. Paicunami, Dios llaquinata japinajunga.

⁸Shungupi ima mapapash illajcunaca, ninandami cushijun. Paicunami, Taita Diostaca ricunga.

⁹Fiñanajushpa causajcunata alichijcunaca, ninandami cushijun. Paicunaca: ‘Taita Diospaj huahuacunami’ ni tucungami.

¹⁰Imatapash cashcatapacha rurashcamanda llaquichi tucushpa causajcunaca, ninandami cushijun. Jahua pachamanda shamuj mandanaca, paicunapajmi.

¹¹Ñucata catinajujpi cangunata na ricunayachishpa catiriashpa llaquichijpi, imatapash llullashpa nalicachijpica, ninanda cushijunguichi.

¹²Ninandapacha cushijunguichilla. Canguna juyailla japinaca, jahua pachapimi. Profetacunatapash, chashnallatami catiriashpa llaquichinajurca. Paicunaca, cangunapaj pundami causanajurca.

¹³Cangunami, cai pachapi causajcunapaca cachigushna canguichi. Cachi huaglijpica, ¿imahuanshi mishquilla micunagu tucunga? Huaglishpaca, imapajpash nalichu. Ashtahuangarin ñambi shitajpi gentecuna sarungapajllami canga.

¹⁴Cangunami, cai pachapi causajcunata punchayachijuj michagushna canguichi. Urcu jahuapi shayachishca puebloguca, na pacalla tiajunllu.

¹⁵Michata japichishpaca, cajón ucupica na churanllu. Ashtahuangarin candeleropimi churan. Shina churajpimi, huasi ucupi tiajcunataca tucuillata punchayachin.

¹⁶Cangunapash, gentecunapaj ñaupajpica, chashnallatami michagushna punchayachina canguichi. Canguna aliguta rurashpa causanajujta ricushpami, shuj gentecunapash jahua pachapi tiajuj cangunapaj Taitataca, ninanda alicachinajunga.

¹⁷Mandashca shimicunata, Profetacuna villashca shimicunata yangapi churashpa tucuchingapaj shamushcataca, na yarinachu cahuanguichi. Ashtahuangarin chaicunata pactachingapajmi shamurcani.

¹⁸Na llullashpami, cangunataca cashna nini: Jahua pacha, cai pacha tucuringacamambash, mandashca shimicunaca shuj puntollapash, shuj tildellapash na anchuringachu. Tucuilla pactangacaman tiajungallami.

¹⁹Mandashca shimicunapi shuj uchillagu tiajujta na cazushpa, shujcunatapash chashnallata rurachun yachachijushpaca, jahua pachapi Dios mandajuj llactapimi, paica uchillami ni tucujunga. Ashtahuangarin mandashca shimicunata cazushpa, shujcunamambash chashnallata cazuchun yachachijushpaca, jahua pachapi Dios mandajuj llactapimi, paica jatunmi ni tucujunga.

²⁰Cangunamanmi cashna villajuni: Mandashca shimita yachachijcunatapash, fariseocunatapash yali imatapash cashcatapacha na rurashpa causashpaca, jahua pachapi Dios mandajuj llactaman yaicuitaca, napacha ushanachu canguichi.

²¹Cangunapaj ñaupa taitacunata, cashna nishcataca uyarcanguichimi: ‘Ama huañuchinguichu. Maijambash huañuchishpaca, juezpajman apai tucushpami, ninanda llaquichi tucunga’ nircami.

²²Ashtahuangarin ñucami, cangunataca cashna nini: Maijambash paipaj huauquita fiñashpa rimashpaca, juezpaj ñaupajman apai tucushpa, llaquichi tucunatami charin. Maijambash paipaj cumbata: ‘Tundu’ nishpaca, mandaj puralla tandanajushcacunapaj ñaupajpimi, llaquichi tucunga. Maijambash paipaj huauquita: ‘Muspa runa’ nishpaca, ucu pachapi rupajuj ninaman shitai tucungapajmi purijun.

²³Shinamandami, Taita Diosman imagutapash carangapaj, altarman apashpa ña chayajushpa, cambaj huauqui canda fiñashca purijushcata yaringui.

²⁴Shina yarishpaca, carangapaj apamushcataca altar ñaupajpi saquishpa, cambaj cumbahuanra ali tucungapaj ringui. Chai jipaca, Diosman carangapaj apamushcataca caragringuilla ninimi.

²⁵Canda fiñaj runa canda cayaj cachashpa juezpajman apajujpica, ñanda rijushpallata, ucha paihuan ali tucungui. Paihuan can na ali tucujpica, pactarallapash candaca juezpaj maquipi churanman. Juezca candaca, llaquichij runamanmi cunga. Chai runaca, prezuna huasipimi churanga.

²⁶Na llullashpami, cashna nini: Prezuna huasipica, canmanda cuna culquita tucuilla cungacamanmi, na llujshi ushashpa tiajungui.

²⁷‘Cazarashca jahua ama shujhuan causanguichu’ nishcataca uyarcanguichimi.

²⁸Ashtahuangarin ñucami, cangunataca cashna nini: Maijambash shujpaj huarmitara ñucapaj cashcanman yashpa ricujushpaca, ñami paipaj shungupi yarishpallata, chai huarmihuan huainayashca.

²⁹Shina cashcamanda, cambaj ali lado ñavi imatapash ricushpa nalita rurachingapaj munajpica, surcushpa shitangui. Cambaj tucuilla cuerpohuan ucu pachaman shitai tucungapaj randica, cuerpomanda shuj parteguta shitanami ashtahuan ali.

³⁰Shinallata cambaj ali lado maqui imatapash japishpa, nalita rurachingapaj munajpica, muchushpa shitangui. Cambaj tucuilla cuerpohuan ucu pachaman shitai tucungapaj randica, cuerpomanda shuj parteguta anchuchinami ashtahuan ali.

³¹Cashnatapashmi nishca carca: ‘Maijambash paipaj huarmita jichungapaj munashpaca, jichushpa saquina cartata cushpa, jichushpa saquinallami’ nishcami carca.

³²Ashtahuangarin ñucami, cangunataca cashna nini: Napash huainayajpita, paipaj huarmita shuj runa yangamanda jichushpaca, cusallatami cazarashca jahua shujhuan causachun saquijun. Shinallata cusa jichushca huarmihuan pipash cazarashpaca, cazarashca jahuami shujhuan causajun.

³³Cangunapaj ñaupa taitacunaman, cashna nishpa villashcatapash uyarcanguichimi: ‘Na llullashpa juramentunachu cangui. Ashtahuangarin can juramentushcataca, Jatun Diospaj ñaupajpi pactachinami cangui’ nircami.

³⁴Ashtahuangarin ñucami, cangunataca cashna nini: Imamandapash na yangataca juramentunachu canguichi. Jahua pacha nishpapash, na juramentunachu canguichi. Jahua pachaca, Taita Dios mandashpa tiajunami.

³⁵‘Cai pacha’ nishpapash, na juramentunachu canguichi. Cai pachapica, Taita Diosmi sarujun. ‘Jerusalén’ nishpapash, na juramentunachu canguichi. Chai puebloca, jatun Mandajpaj pueblomi.

³⁶‘Ñucamandallata’ nishpapash, na juramentunachu cangui. Cambaj ajchata yurajman, yanaman tigrachitaca, shujllatapash napacha ushanguichu.

³⁷Ashtahuangarin imata rurangapajpash, usharina cajpillami: ‘Ari’ nina canguichi. Na usharina cajpica: ‘Na’ ninami canguichi. Imatapash ashtahuan mirachishpa nirijujpica, diablomi yarichijun.

³⁸‘Pipash fiñashpa ñavita surcujpica, paitapash ñavita surcunami. Shinallata quiru llujshijta huactajpipash, paitapash quiru llujshijta huactanami’ nishcataca uyarcanguichimi.

³⁹Ashtahuangarin ñucami, cangunataca cashna nini: Cangunata llaquichijpica, na tigrachishpa saquinguichilla. Pipash canda ali lado ñavipi huactajpica, shuj ladopipash huactachun ricuchinguilla.

⁴⁰Túnica nishca cambaj churajunata pipash quichungapaj munashpa fiñashpa rimajpica, cambaj jahualla churajunatapash apachun saquinguilla.

⁴¹Pipash canda imatapash apachishpa, shuj kilómetro chaupitashna apajujpica, quimsa kilometroshna ringui.

⁴²Pipash canda imagutapash mañajpica, caranguilla. Shinallata imagutapash mañachi ningapaj shamujpipash, ama mitsashpa mañachinguilla.

⁴³‘Cambaj cumba runagutaca juyangui, ashtahuangarin canda na ricunayachij runataca fiñangui’ nishcataca uyarcanguichimi.

⁴⁴Ashtahuangarin ñucami, cangunataca cashna nini: Cangunata fiñajcunatapash, juyanami canguichi. Imapash tucushpaca, alichari canman nijcunatapash bendicianami canguichi. Cangunata na ricunayachij gentecunamambash, aligutami rurana canguichi. Cangunata catiriashpa llaquichij gentecunamandapash, Diosta mañanami canguichi.

⁴⁵Chashna causashpami, jahua pachapi tiajuj cangunapaj Taitapaj huahuacunapacha canguichi. Paillatami inditaca, nali causajcunamambash, ali causajcunamambash punllayachijun. Shinallata paillatami tamiatapash, imatapash cashcatapacha rurashpa causajcunaman, imatapash cashcatapacha na rurashpa causajcunamambash tamiachimujun.

⁴⁶Cangunata juyajcunatalla juyashpa causashpaca, ¿ima alitashi japinguichi? ¿Nachu impuestota japijcunapash, paicunapura juyarishpa causan?

⁴⁷Shinallata huauqui puralla alillachu capangui nirinajushpaca, ¿shujcunapaca ima alitata rurashpa causanguichi? ¿Nachu Diosta na cazujcunapash, paicuna puralla alillachu capangui ninajun?

⁴⁸Jahua pachapi tiajuj cangunapaj Taitaca, ima pandatapash na rurajmi. Shinallata cangunapash, ima pandatapash na rurajcuna caichi.