Read Imbabura Highland Quichua MATEO 6 Bible Online

MATEO 6 - Imbabura Highland Quichua bible

MATEO 6

¹Shujcuna ricuchun yashpalla runacunapaj ñaupajpi, imatapash cashcatapacha ruranamandaca cuidarinami canguichi. Chashna rurashpaca, jahua pachapi tiajuj cangunapaj Taita caranataca, napacha japi ushanachu canguichi.

²Imagutapash na charijcunaman carashpaca, ama tucuicunaman parlanguichu. Mishqui shimi nali shungucunami, carashcataca tandanajuna huasicunapi, ñangunapi parlashpa purin. Gentecuna alicachihuachun yashpallami, chashnaca parlanajun. Na llullashpami, cangunataca cashna nini: Chashnacunaca, caipillatami paicuna japinataca ña japinajun.

³Ashtahuangarin cambaj ali lado maquihuan imaguta carashcataca, cambaj lluqui maquipash ama yachachun.

⁴Can chashna pacalla carashcamandaca, pacalla carajujta ricujuj cambaj Taitami, tucuicuna ricujta canman caranga.

⁵Diosta mañajushpaca, ama mishqui shimi jayaj shungucuna mañanshnaca mañanguichu. Gentecuna ricuchun yashpallami, tandanajuna huasicunapi, ñan tigranacunapi shayarishpa mañanajun. Na llullashpami, cangunataca cashna nini: Chashnacunaca, caipillatami paicuna japinataca ña japinajun.

⁶Ashtahuangarin ñavipi na ricurij cambaj Taitataca, huasi ucuman yaicushpa, pungutapash vicharishpa mañangui. Chashna pacalla mañajujta ricujuj cambaj Taitami, tucuicuna ricujta canman caranga.

⁷Diosta mañanajushpaca, ama chai shimicunatallata cutin cutin tigrashpa mañanguichu. Diosta na cazujcunallami, chashna mañajpimi uyanga yashpa, cutin cutin chaitallata tigrashpa mañanajun.

⁸Cangunaca, na paicunashna ruranachu canguichi. Ashtahuangarin canguna nara mañajpillatami, cangunapaj Taitaca canguna imaguta minishtijtapash ña yachan.

⁹Chaimandami, cashna nishpa mañana canguichi: ‘Jahua pachapi tiajuj ñucanchi Taitalla, cambaj jucha illaj shutiguca, alicachi tucushca cachun.

¹⁰Can mandanaca, ucha chayamuchunmi munanchi. Imashnami jahua pachapica can munashcashna ruranajun, chashnallata cai pachapipash, can munashcashna ruranajushpami ali canman.

¹¹Punllandi ñucanchi micunagutaca, cunan punllapash carahuailla.

¹²Ñucanchita ima nalita rurashcacunata ñucanchi cungashcashnallata, ñucanchi ima juchata rurashcatapash cungapailla.

¹³Juchata rurana munaicunamandapash jarcahuangui. Ashtahuangarin ima nalimandapash huacaichihuangui. Tucuita mandanapash, ninan ushaipash, ninan punchapambagu canapash, causaita causaicaman cambajmi. Shina cachun’ nishpami, mañana canguichi.

¹⁴Cangunata shujcuna ima nalita rurashcata cungajpica, jahua pachapi tiajuj cangunapaj Taitami, cangunapaj juchacunatapash anchuchinga.

¹⁵Ashtahuangarin cangunata imatapash nalita rurajcunata na perdonajpica, cangunapaj Taitapash, canguna rurashca juchacunataca na anchuchingachu.

¹⁶Canguna na micushpa chishanajushpaca, na llaqui llaqui tianajunachu canguichi. Mishqui shimi jayaj shungucunami, Diosta yarinchimi nishpaca, na micushpa llaqui llaqui chishanajun. Paicunaca, na micushpa chishanajujta gentecuna ricuchun nishpallami, llaqui llaqui ricunajun. Na llullashpami, cangunataca cashna nini: Chashnacunaca, caipillatami paicuna japinataca ña japinajun.

¹⁷Ashtahuangarin na micushpa Diosta mañajushpaca, cambaj umata aceitehuan javirishpa, ñavitapash maillaringui.

¹⁸Can na micushpa chishajujta gentecunaman na ricuchingapajmi, chashna rurana cangui. Ñavipi na ricurij, pacalla tiajuj cambaj Taitallami, chaitaca ricunga. Chashna rurashcamandaca, pacalla ricujuj cambaj Taitallami tucuicuna ricujta canman imagutapash caranga.

¹⁹Cangunaca, na cai pachapi charijyangapajlla, imatapash ninanda mirachinachu canguichi. Cai pachapica, polilla jurucuna micushpa tucuchinllami, ismushpapash tucurinllami. Shuhuacunapash, huasita utujushpa apanllami.

²⁰Ashtahuangarin jahua pachapi charij cangapajmi, imagutapash aliguta rurana canguichi. Jahua pachapica, polilla jurucunapash na micushpa tucuchinllu, na ismushpa tucurinllu. Shuhuacunapash, na allashpa apanllu.

²¹Maipi imata charishpapash, shungupica chaita yariashpami purinajunguichi.

²²Cambaj ñavica, cuerpopaj michagushnami. Shinamandami, cambaj ñavi ali cajpica, cuerpogupash tucuilla michashnallapacha punchayachijunga.

²³Ashtahuangarin cambaj ñavi yapa nali cajpica, cambaj tucuilla cuerpomi yana yana tutapishna causajunga. Cambaj cuerpopi tiajuj michagu yanayajpica, ¿nachu chashnallata ashtahuan ninanda yanayanga?

²⁴Pipash ishcai amota servitaca, na ushanllu. Ishcai amota servijushpaca, shujtaca na ricunayachishpa, shujtallami juyanga. Na cashpaca shuj amotalla cazushpami, shujtaca yangapi churashpa puringa. Shinallatami cangunaca, Taita Diostapash, imata charishcacunatapash, ishcandita servitaca na ushanguichi.

²⁵Chaimandami cangunataca, cashna nini: ‘Imata micushpata, imata ufiashpata, imata churajushpata causashun’ nishpaca, na chaitalla yarishpa musparinachu canguichi. Cangunapaj causaica, micunatapash ashtahuan yali aligumi. Shinallata cuerpogupash, churajunataca ashtahuan yali aligumi.

²⁶Alasyu animalcunata ricushpami, yarina canguichi. Paicunaca, na tarpunajunllu, granotapash na tandachishpa alichinajunllu. Paicuna micuchunga, jahua pachapi tiajuj cangunapaj Taitami caramujun. ¿Nachu cangunaca, chaicunatapash ashtahuan yali valishca canguichi?

²⁷Canguna puramandaca, ashtahuan jatunyangapaj ninanda munajushpapash, ¿maijanshi chuscu chunga picha centimetrotallapash mirachita ushanguichi?

²⁸¿Imashpata, imatata churajushun nishpa, chaitalla yarinajunguichi? Lirio sisacuna pambapi viñashcata ricushpami, yarina canguichi: Chai sisacunaca, na imatapash ruranllu, na puchanajunllu.

²⁹Ashtahuangarin cangunataca, cashnami nini: Salomonga, ninan charij cashpapash, na chai sisacunashna churajuita usharcachu.

³⁰Taita Diosmi, jihuagutapash juyailla viñachishpa sisachin. Shina juyailla cajpipash, cayapaca cuchushpa, tulpapi rupachinllami. Na tucui shunguhuan crishpa causajcuna, ¿nachu cangunamangarin churajunaguta caramunga?

³¹Cangunaca cashnami ninajunguichi: ‘¿Imatashi micushun? ¿Imatashi ufiashun? ¿Imatashi churajushun?’ ninajunguichimi. Na chashna nishpa musparinachu canguichi.

³²Chashnaca, Diosta na rijsijcunallami chaicunatalla yariashpa causanajun. Ashtahuangarin canguna chaicunata minishtijujtaca, jahua pachapi tiajuj cangunapaj Taitaca ña yachanmi.

³³Ashtahuangarin Taita Dios mandajuj llactagupi causanatara, imagutapash cashcatapacha rurashpa causanatarami, pundaca mascana canguichi. Shina causajpica, tucui chaicunata canguna munashcataca jahuan jahuan caramujungallami.

³⁴Shina cashcamanda cangunaca, na cayandi punllamanda yarishpa musparinachu canguichi. Punllandimi llaquicunaca tian. Ima llaqui shamushpapash, punllandi yalijunllami.