Read Imbabura Highland Quichua MATEO 7 Bible Online

MATEO 7 - Imbabura Highland Quichua bible

MATEO 7

¹Pitapash na yangamanda juchachinachu canguichi. Na chashna rurajpimi, Diospash cangunataca na llaquichinga.

²Shujcunata imashnami nalicachinguichi, chashnallatami cangunatapash Diosca llaquichinga. Shujcunata imata rurajpipash, chashnallatami cangunamambash Diosca rurashpa tigrachinga.

³Cambaj huauquipaj ñavipi uchilla jupashna tiajujtara ricungapaj randica, ¿imashpata na cambaj ñavipi caspishna tiajujtara ricungui?

⁴Cambaj ñavipi shuj jatun caspishna tiajujtara nara anchuchishpaca, ¿imashnata cambaj huauquitaca: ‘Shuyai, cambaj ñavipi uchilla jupashna tiajujta anchuchisha’ nitaca ushanguiyari?

⁵¡Mishqui shimi, jayaj shungumi cangui! Cambaj ñavipi jatun caspishna tiajujtara anchuchiyari. Chai jipami, cambaj huauquipaj ñavipi uchilla jupashna tiajujtaca ali ricushpa, anchuchi ushangui.

⁶Imagutapash Diospajlla cachun carashcataca, alcushna causanajuj gentecunaman na caranachu canguichi. Cangunapaj juyailla perlastapash, cuchishna causaj gentecunamanga, na shitanachu canguichi. Paicunaca sarushpa tucuchinman.

⁷Diosta mañaichi, paica carangallami. Mascaichi, taringuichimi. Punguta huactachishpa cayaichi, paica pascangallami.

⁸Diosta tucui mañajcunaca, japingami. Mascajcunapash taringami. Punguta huactachijcunapash, pascajpi yaicungami.

⁹Canguna puramandaca, maijan runata cangunapaj huahuagu shuj tandaguta mañajpica, rumita caranguichiman?

¹⁰Na cashpaca, piji aichaguta carahuai nijpica, ¿maijanda culebrata caranguichiman?

¹¹Cangunaca, nalicuna cashpapash, huahuacuna mañajpica imatapash aligutami caranata yachanguichi. Jahua pachapi tiajuj cangunapaj Taitacarin, paita mañajcunamanga, ¿nachu ashtaca alicunata caranman?

¹²Shuj gentecuna imatapash aliguta canguna rurachun munashpaca, chashnallatami cangunapash shujcunaman aliguta rurana canguichi. Mandashca shimipipash, Profetacuna villashca shimipipash, chashnallatami mandajun.

¹³Quichiji pungutami, yaicuna canguichi. Chingaita chingachun pushajuj punguca anchomi, ñambash anchomi. Chaitaca, ashtaca gentecunami yaicushpa purinajun.

¹⁴Ashtahuangarin causaita causangapaj yaicuna punguca quichijimi, ñambash quichijimi. Chai ñandaca, huaquingunallami tarin.

¹⁵Llullashpa villanajuj profetacunamandaca, cuidarinami canguichi. Paicunaca, llamagushna ali ricurishpapash, shungu ucupica shuhuanata yachaj millai atujcunashnami.

¹⁶Ima cajpipash grano fucunshna cajta ricushpami rijsinguichi. ¿Uvastaca, casha yurapi fucushcatachu pallan? Na cashpaca, ¿jigostapash cashapi fucushcatachu pallan?

¹⁷Shinami tucui ali yuragupica, juyailla fucun. Ashtahuangarin nali yurapica, ima aligupash na fucunllu.

¹⁸Ali yuragupica, imapash nalica na fucui ushanllu. Shinallata nali yurapica, imapash aliguca na fucui ushanllu.

¹⁹Tucuilla nali fucuj yuracunataca cuchushpami, ninapi shitashpa rupachin.

²⁰Chashnami ima cajpipash, grano fucunshna cajta ricushpa rijsinguichi.

²¹Ñucataca: ‘Apunchi Jesús, Apunchi Jesús’ nishpami purinajun. Shina ninajushpapash, na tucuicuna jahua pachapi Dios mandajuj llactaman yaicui ushangachu. Ashtahuangarin jahua pachapi tiajuj ñuca Taita munashcata pactachijcunallami, yaicui ushanga.

²²Chai punllapica, ashtacacunami cashna ninajuhuanga: ‘Apunchi Jesús, Apunchi Jesús, ¿nachu cambaj shutipi canmanda villanajurcanchi? ¿Nachu cambaj shutipi rimashpa, ayacunatapash llujchircanchi? ¿Nachu cambaj shutipi rimashpa, imagutapash rurashpa ricuchircanchi?’ ninajuhuangami.

²³Shina ninajujpimi, cashna nisha: ‘Cangunataca, ima horapash na rijsishcanichu. Caimanda anchurichi, nalita rurajcuna’ nishami.

²⁴Ñuca yachachijuj cai shimicunata uyashpa cazuj runataca, aligutapacha yarishpa paipaj huasitaca jatun rumi jahuapi huasichij runahuanmi chimbapurasha.

²⁵Huasichishca jipaca, ninanda tamiajpipash, yacu ninanda shamujpipash, huaira ninanda huactamujpipash, chai huasica jatun rumi jahuapi huasichishca cashcamandaca, na urmarcachu.

²⁶Ashtahuangarin maijambash ñuca yachachishcata uyashpapash na cazuj runataca, t'iyu alpa jahuapi huasichij, juizu illaj runahuanmi chimbapurasha.

²⁷Shina huasichishcataca, ninanda tamiashpa, yacupash ninanda jatarishpa, huairapash ninanda huactamushpaca, chai huasitaca urmachircallami. Tucuilla urmashpami, llaquinayaita tucurirca” nijurcami.

²⁸Jesús chashna juyailla shimicunata rimashca jipaca, gentecunaca pai chashna yachachijujta uyashpami, ricunman quedanajurca.

²⁹Ashtahuangarin Jesusca, yachachina ninan ushaita charishpami yachachijurca. Mandashca shimita yachachijcunashnaca na yachachijurcachu.