Read Imbabura Highland Quichua MATEO 8 Bible Online

MATEO 8 - Imbabura Highland Quichua bible

MATEO 8

¹Jesús, urcumanda ña urai shamujujpica, ashtaca ashtaca gentecunami catimunajurca.

²Shina shamujpimi, lepra ung:uihuan huañujuj runaca, ñapash Jesuspaj ñaupajpi cungurimurca. Shina cungurishpaca: —Apunchi Jesús, can munashpaca mapa illajta saquihuai— nircami.

³Shina nijpimi Jesusca, maquita chutashpa chai runata tacarishpa: —Ari, mapa illaj cachunmi munani— nirca. Shina nijpimi, chai lepra ung:uica ñapash chingarca.

⁴Shinamandami Jesusca, chai runataca cashna nirca: —Ricui, can ali tucushcataca, pimambash ama villanguichu. Ashtahuangarin curapajman rishpa ricurigri. Chaipica, Diosman carangui nishpa Moisés mandashcashnallata, curacuna ricushpa yachajuchun, imagutapash Diosman caragri— nircami.

⁵Capernaum shuti puebloman Jesús yaicujpimi, patsaj soldadota mandaj runaca, ninanda mañashpa:

⁶cashna nijurca: —Apunchi Jesús, ñucata servij huambragumi, na cuyuri ushaj ung:uihuan llaquinayaita huasipi sirijupan— nircami.

⁷Shina nijpimi, Jesusca: —Ñuca rishpa alichishallami— nirca.

⁸Shina nijpimi, patsaj soldadota mandaj runaca, cashna nijurca: —Apunchi Jesús, canda ñuca huasiman pushangapaca, jatun pinganayaimi capani. ‘Ali tucui’ nishpa can rimajpillata, ñucata servij huambraguca ali tucupangallami.

⁹Shuj mandajcuna mandajpimi, ñucapash causajupani. Shinallatami ñucapash, soldadocunataca mandajuni. Shuj soldadota: ‘Ri’ nishpa mandajpica, rinllami. Shinallata: ‘Shamui’ nijpipash, shamunllami. Ñucata servij runata: ‘Caita rurai’ nijpica, ruranllami— nijurcami.

¹⁰Shina nijta uyashpami Jesusca, ninanda cushijushpa, paita catijcunataca cashna nijurca: —Na llullashpami, cangunataca cashna nini: Israel llactapipash cai runagushna alipacha crijtaca, shujtallapash na tarishcanichu.

¹¹Cangunataca, cashnatapashmi nini: Indi llujshimuj ladomanda, indi huashajuj ladomandami, jahua pachapi Dios mandajuj llactaman ashtaca gentecuna shamunajunga. Paicunaca, Abraham, Isaac, Jacobo shuti runacunahuanmi tiarinajunga.

¹²Ashtahuangarin Dios mandajuj llactaguman yaicugrina gentecunarami, yana yana pushtuman shitai tucunga. Chaipica huacashpa, quirutapash canirishpami tianajunga— nijurcami.

¹³Shina nishpallami Jesusca, patsaj soldadota mandajtaca, cashna nirca: —Cambaj huasiman tigrailla. Can crishcashnallatami, ucha ali tucuchun nini— nircami. Shina nijpimi chai horasllata huambraguca, ali tucushca carca.

¹⁴Pedropaj huasiman Jesús chayashpaca, Pedropaj suedra tabardillo ung:uihuan, na jatari ushashca camapi sirijujtami ricurca.

¹⁵Chai mamagupaj maquita Jesús tacarijhuanmi, tabardillo ung:uica ñapash anchurirca. Chashna anchurijpimi, chai mamaguca jatarishpa, paicunaman micunaguta cararca.

¹⁶Ña tutayajujpimi, aya jundashca ashtaca gentecunataca, Jesuspajman pushamunajurca. Jesusca, shimihuan rimashpallami, chai gentecunamanda ayacunataca llujchirca. Tucui ungushcacunatami alichirca.

¹⁷Profeta Isaías punda villajushpaca, cashnami nijurca: “Paillatami, ñucanchipaj ung:uicunatapash, ñucanchi nanaicunatapash aparca” nijurcami. Chashna nishca pactachunmi, Jesusca alichijurca.

¹⁸Jesusca, ashtaca gentecuna paipaj muyundipi jundariajta ricushpami, cuchata chimbachun, paipaj yachajujcunataca mandarca.

¹⁹Chaipica, mandashca shimita yachachij shuj runa chayamushpami: —Yachachij, can maita rijujpipash catipashallami— nijurca.

²⁰Shina nijpimi Jesusca, cashna nirca: —Añascunapash, paicuna causana utujuta charinmi. Jahuata rij alasyu animalcunapash, tazinda charinmi. Ashtahuangarin Runa Aichayu tucushca ñuca maigupi siririshpa samanatallapash na charinichu— nircami.

²¹Paipaj yachajuj puramanda shuj runaca, Jesustaca cashnami nirca: —Apunchi Jesús, ñuca taitatara pambashpa tigramugringapaj saquihuangui— nircami.

²²Shina nijpimi Jesusca, cashna nirca: —Ñucata catihuai. Huañushcashna causajcunaca, paicunapurallata huañushcata pambanajuchun saquilla— nircami.

²³Canoapi Jesús tiarijpimi, paipaj yachajujcunapash catishpa rinajurca.

²⁴Ña cuchata rinajujpica, ninan huaira ñapash shamushpami, cucha yacutaca caiman chaiman shitajurca. Shinamandami yacuca, canoapi jundamui callarirca. Ashtahuangarin Jesusca, puñujurcallami.

²⁵Shina puñujujpimi paipaj yachajujcuna shamushpa, Jesusta rijchachishpaca: —¡Apunchi Jesús, quishpichihuai, huashajushpa huañugrinchimari!— ninajurca.

²⁶Shina nijpimi Jesusca, cashna nirca: —Na tucui shunguhuan crij runacuna, ¿imashpata cashna ninanda manllaringuichi?— nishpami jatarirca. Shina jatarishpami huairatapash, cuchatapash jarcashpa rimarca. Shina rimajpimi, casillagupacha tucurca.

²⁷Shinamandami chai runacunaca, ninanda manllarishpa: —¿Caica ima runa cajpita, pai rimajtaca huairapash, cuchapash cazun?— ninajurca.

²⁸Cuchata chimbashpaca, Gadara shuti llactamanmi, Jesusca chayarca. Chaipimi, aya jundashca ishcaipura runacunaca, huañushcata pambana utujucunamanda llujshimushpa, Jesusta tuparingapaj shamurca. Chai runacunaca, manllanayai millai cajpimi, chai ñanda yalitaca, pipash na ushan carca.

²⁹Chai runacunaca, ninanda caparishpami cashna ninajurca: —Taita Diospaj Churi Jesús. Canga ñucanchihuanga, ¿imatata ricunata charingui? Ninanda llaquichina punllapash nara chayajpillataca, ¿imapajta ñucanchitaca llaquichingapaj shamungui?— ninajurcami.

³⁰Chai ladolla pambapica, ashtaca ashtaca cuchicunami micushpa purinajurca.

³¹Shina cajpimi, chai ayacunaca: —Cai runacunamanda ñucanchita llujchishpaca, chai cuchicunapi yaicuchun saquihuai— nishpa, ninanda mañanajurca.

³²Shina nijpimi, Jesusca: —Richilla— nirca. Shina nijpica, chai runacunamanda ayacuna llujshishpaca, cuchicunapi yaicujtami rirca. Shina yaicujhuanmi, chai ashtaca cuchicunaca, jaca jahua patamanda cuchaman huashajushpa huañunajurca.

³³Cuchicunata michijcunaca, puebloman calpashpami, ima tucushcatapash tucuita gentecunaman villanajurca. Shinallata aya jundashca runacuna ima tucushcatapashmi villanajurca.

³⁴Shina villajpimi, chai pueblomandaca tucuilla gentecuna Jesuspajman shamurca. Jesusta ricushpaca: “Cai ñucanchi llactamandaca ripailla” ninajurcami.