Read Imbabura Highland Quichua MATEO 9 Bible Online

MATEO 9 - Imbabura Highland Quichua bible

MATEO 9

¹Chai jipallami Jesusca, canoapi tiarishpa, pai causajushca puebloman cuchata chimbarca.

²Chaiman chayajpimi, cashna tucurca: Na cuyuri ushajuj runatami, camapi sirijujta apamunajurca. Paicunataca, tucui shunguhuan crishpa shamunajujta Jesús ricushpami, chai na cuyuri ushajuj runataca cashna nirca: —Ñuca huahualla, cunanga shinlli tucuilla. Cambaj juchacunataca, ñami anchuchishca— nircami.

³Shina nijpimi, mandashca shimita yachachij puramanda huaquingunaca, paicunapaj shungu ucupilla cashna ninajurca: “Cai runaca, Diostami nali shimicunata rimajun” ninajurcami.

⁴Chashna yarinajujta Jesús yachashpami, paicunataca cashna nirca: —¿Imashpata cangunapaj shungupica, chashna nalitara yarinajunguichi?

⁵Cai runagutaca: ‘Cambaj juchacunataca, ñami anchuchishca’ ¿ninachu ali? Na cashpaca: ‘Jatarishpa rilla’ ¿ninachu ashtahuan ali canga?

⁶Runa Aichayu tucushca ñucataca, juchacunata anchuchi ushachunmi, Diosca cai pachaman cachamuhuarca. Chaitaca cunanmi, cangunaman ricuchisha— nishpami, chai na cuyuri ushajuj runagutaca: —Cunanga jatari, cambaj jatanata apashpa, huasiman rilla— nirca.

⁷Shina nijpimi chai runaguca, jatarishpa huasiman rirca.

⁸Shina ali tucujta ricushpami, gentecunaca ninanda manllarirca. Gentecunaman ninan ushaita caraj Taita Diostaca, punchapambagumi cangui ninajurcami.

⁹Jesusca, chaimanda rijushpami, Mateo shuti runaguta ricurca. Paica, impuestota japina huasipimi tiajurca. Paitami Jesusca: —Ñucata catihuai— nirca. Shina nijpica, jatarishpa catishpa rircallami.

¹⁰Chai jipami, cashna tucurca: Jesusca, Mateopaj huasipi mezapi micungapaj tiajujpimi, impuestota japishpa causanajuj ashtaca runacunapash, juchayu gentecunapash shamushca carca. Chai shamushcacunami Jesushuan, paipaj yachajujcunahuan tandanajushpa, mezapi micungapaj tiarinajurca.

¹¹Shina tianajujta fariseocuna ricushpami, Jesuspaj yachajujcunataca cashna ninajurca: —¿Imashpata cangunata Yachachijca, impuestota japishpa causajcunahuan, juchayu runacunahuan micushpa tiajun?— ninajurcami.

¹²Chashna ninajujta Jesús uyashpami, paicunataca cashna nirca: —Nanaita na charijcunaca, jambij runataca na mascanllu. Huañujujcunallami jambij runataca mascan.

¹³“Shuj gentecunata llaquishpa causachunmi munani. Animalcunata huañuchishpa ñucaman carachunga, napacha munanichu” nishpa, escribishcapi ima nijujta yachajungapaj richi. Imatapash cashcatapacha rurajcunata cayangapaca, na shamurcanichu. Ashtahuangarin juchayu gentecuna ninanda llaquirishpa, Diospajman tigrarichun cayangapajmi shamurcani— nijurcami.

¹⁴Chai jipallami, Bautizaj Juanbaj yachajujcunaca, Jesuspajman shamushpa, cashna tapunajurca: —Ñucanchipash, fariseocunapash, tauca punllacunatami na micushpa paita mañashpa chishanchi. Cambaj yachajujcunaca, ¿imashpata micushpa chishan?— ninajurcami.

¹⁵Shina nijpimi Jesusca, cashna nijurca: —¿Boda huasipica, cazarajuj noviohuan tianajushpaca, llaquilla chishai ushanllu? Shina cajpipash cusata apana punllacunaca chayamungami. Chai punllacunami na micushpa chishanajunga.

¹⁶Mauca churajuna liquirishcataca, mushuj telahuanga pipash na siranllu. Shina sirajpica, mauca churajunataca mushuj tela aisashpami, ashtahuan liquin.

¹⁷Shinallata chaira rurashca vinotaca, mauca cara muchilapica na churanllu. Chashna churajpica, chaira rurashca vinoca muchilata liquishpa jicharishpami, muchilandi tucurin. Shinamandami chaira rurashca vinotaca, mushuj cara muchilapi churana. Shina churajpica vinondi, muchilandi ali tiajunllami— nijurcami.

¹⁸Shina villajujpimi, shuj mandaj runaca, Jesuspajman shamushpa cungurishpa cashna nirca: —Ñuca ushigumi, chairalla huañupan. Paipaj uma jahuapi, cambaj maquiguta churangapaj ripashunyari. Shina churajpica causaripangami— nircami.

¹⁹Shina nijpimi jatarishpa Jesusca, paipaj yachajujcunandi, chai runaguta catishpa rinajurca.

²⁰Shina rijujpimi, huashata catimushpa shuj huarmica, Jesús jahualla churajushca pundapi tacarirca. Paica, chunga ishcai huatata yahuar shamujujpi, huañujujlla causajuj huarmimi carca.

²¹Chai huarmica, paipaj shungupica cashnami yajurca: “Jesuspaj churajushcapi tacarishpalla, ali tucushallami” yajurcami.

²²Chai huarmita tigrarishpa ricushpami, Jesusca cashna nirca: —Ñuca huahualla, cushijuita japilla. Canga, ñuca alichi ushanata tucui shunguhuan crishpami, ña ali tucushcangui— nircami. Shina nijpimi, chai huarmica ali tucurca.

²³Chai mandaj runapaj huasiman Jesús chayashpaca, gaitata huacachinajujta, gentecuna ninanda caparishpa huacanajujtami ricurca.

²⁴Chai gentecunataca: —Caimanda llujshipaichi. Cai cuitsaguca, na huañushcachu. Puñuitallami puñujun— nircami. Shina nijpimi Jesustaca, asishpa ricunajurca.

²⁵Chai gentecunata tucuilla llujchishca jipaca, Jesusca ucuman yaicushpami, chai cuitsagutaca maquimanda japirca. Shina japijhuanmi, chai cuitsaguca jatarirca.

²⁶Chaita rurashcataca, tucui chai llactapimi uyanajurca.

²⁷Jesús chaimanda llujshishpa rijujpica, ishcaipura ñausa runacunami caparishpa, cashna nishpa catimunajurca: —¡Davidpaj Churi, ñucanchitaca llaquihuayari!— ninajurcami.

²⁸Huasiman Jesús chayajpica, ishcandi ñausa runacunami, paipaj ladoman quimirirca. Paicunatami Jesusca: —¿Cangunata ñuca alichinata crishpachu shamunguichi?— nirca. Shina nijpimi: —Ari cripanchimi, Apunchi Jesús— ninajurca.

²⁹Shina nijpimi: —Canguna crishcashna, ali tucuichi ninimi— nishpami Jesusca, paicunapaj ñavipi tacarirca.

³⁰Shina tacarijpimi, paicunapaj ñavica pascarirca. Paicunatami: —Ricuichi, caitaca pipash na yachanachu— nishpa, Jesusca shinllita rimarca.

³¹Ashtahuangarin paicuna ña rishpaca, Jesús alichishcataca, caipi chaipimi chai tucui llactapica villanajurca.

³²Chai runacuna ña llujshinajujpicca, aya jundashca cashpa na rimai ushajuj runagutami, Jesuspajman apamunajurca.

³³Chai na rimai ushaj runaguca, ayata Jesús llujchijhuanmi, rimai callarirca. Chaita gentecuna ricushpaca, ninanda manllarishpami cashna ninajurca: —Israel llactapica, cashnapacha rurajtaca, ima horapash na ricushcachu canchi— ninajurca.

³⁴Ashtahuangarin fariseocunaca, cashnami ninajurca: —Cai runaca, ayacunata mandajpaj ushaihuanmi, ayacunataca llujchishpa cachan— ninajurcami.

³⁵Jesusca, tucui pueblocunapi uchilla llactacunapi purijushpami, tandanajuna huasicunaman yaicushpa yachachijurca. Dios mandajuj ali villaitapashmi villajurca. Shinallata tucui nanaihuan, tucui ung:uihuan huañujuj gentecunatapashmi, chai llactapica alichijurca.

³⁶Chai gentecunataca, michij illaj, jichushca llamacunashna causanajujta ricushpami Jesusca, paicunata ninanda llaquirca.

³⁷Shina llaquishpami Jesusca, paipaj yachajujcunata cashna nirca: —Granota tandachinaca, ashtaca ashtacami. Ashtahuangarin tandachijcunaca huaquingullami.

³⁸Shinamandami granocunata tandachijcunata cachamuchunga, granocunapaj Dueñota ninanda mañana canguichi— nijurcami.