Read Imbabura Highland Quichua MARCOS 10 Bible Online

MARCOS 10 - Imbabura Highland Quichua bible

MARCOS 10

¹Capernaum pueblomanda llujshishpaca, Jordán yacuta chimbashpami, Judea llactaman Jesusca chayagrirca. Paipajman ashtaca gentecuna shamujpimi Jesusca, pai yachachishpa purinshnallata cutin yachachijurca.

²Shina yachachijujpimi fariseocuna shamushpa, Jesusta cashna ninajurca: —Maijan runapash, paipaj huarmita jichushpaca, ¿ñucanchita mandashca shimipi nijunshna alichu canga?— ninajurcami. Paicunaca, imata tigrachijpipash juchachingapajmi, chashna tapunajurca.

³Shina tapujpimi: —Cangunata Moisés mandashca shimipica, ¿imatata nijun?— nishpa, Jesusca tapurca.

⁴Shina tapujpimi fariseocunaca, cashna nirca: —Moisesca, huarmita jichushpa saquina cartata cushpaca, jichunallami nishcami carca— ninajurcami.

⁵Shina nijpimi Jesusca, paicunataca cashna nirca: —Canguna shinlli shungucuna cajpimi, chashna jichunallami nishpa Moisesca mandarca.

⁶Ashtahuangarin Taita Diosca, tucuita rurai callarishpaca, jaritapash, huarmitapashmi rurarca.

⁷Shinamandami jarica, taitata mamata saquishpa, paipaj huarmihuan causangapaj tandanajunga.

⁸Shina tandanajushpami, ishcai cashpapash, shujlla aicha tucushpa causanajunga. Chashna cashpami, ashtahuanga na ishcai cashpa, shujlla tucushpa causanajun.

⁹Chashna cashpami, Taita Dios tandachishcataca, maijan runapash na shicanyachi ushan— nircami.

¹⁰Paipaj yachajujcunaca Jesushuan, huasi ucupi tianajushpami, pai imata yachachishcataca cutin yachachihuai ninajurca.

¹¹Shina nijpimi Jesusca, paicunata cashna nijurca: —Maijan runapash, paipaj huarmita jichushpa shujhuan cazarashpaca, huainayashpami causajun.

¹²Shinallata maijan huarmipash, paipaj cusata jichushpa shujhuan cazarashpaca, huainayashpallatami causajun— nijurcami.

¹³Chai jipami, huahuacunapaj uma jahuapi maquita churachun nishpa, Jesuspajman apamunajurca. Ashtahuangarin huahuacunata apamujcunataca, paipaj yachajujcunaca jarcashpami rimanajurca.

¹⁴Chashna rimanajujta ricushpami, Jesusca fiñarishpa, paipaj yachajujcunata cashna nirca: —Huahuacuna ñucapajman shamunajujtaca, na jarcashpa saquinallami canguichi. Taita Dios mandajuj llactaguca, cai huahuacunashna shamujcunapajllami.

¹⁵Na llullashpami, cangunataca cashna nini: Taita Dios mandajuj llactagupi causangapaca, cai huahuacunashnami munanana canguichi. Na chashna munashpaca, Dios mandajuj llactaguman yaicuitaca na ushangachu— nircami.

¹⁶Shina nishpallami Jesusca, huahuacunata marcashpa, paicunapaj uma jahuapi maquita churashpa bendiciajurca.

¹⁷Chaimanda llujshishpa ñanda rijujpimi, shuj runaca calpamushpa, Jesuspaj ñaupajpi cungurirca. Shina cungurishpaca: —Causaita causagrinata ñuca charingapaca, ¿imatata rurana capani, aliguta Yachachij?— nishpami tapurca.

¹⁸Shina tapujpimi Jesusca, chai runata cashna nirca: —¿Imashpata ñucataca, aliguta yachachij cangui nihuangui? Pipash alica, na tianllu. Taita Diosllami, alica tian.

¹⁹Dios mandashca shimicunapi cashna nijujtaca, canllata yachanguimi. ‘Cazarashca jahua ama shujhuan causanguichu, ama pitapash huañuchinguichu, ama shuhuanguichu, shujcunatapash ama chashnapachami nishpa juchachishpa villanguichu, ama umachinguichu, cambaj taitata mamatapash alicachingui’ nijunmi— nircami.

²⁰Shina nijpimi, chai runaca cashna nirca: —Mandashca shimipi chashna nijujtaca, huahuamandapachami tucuillata pactachijupani, Yachachij— nircami.

²¹Shina nijpimi, chai runataca ninanda llaquishpa ricushpa Jesusca, cashna nirca: —Cashnata pactachinarami cangui. Cunanga, can imata charishcatapash tucuillata jatushpa, chai culquitaca imagutapash na charijcunaman caragri. Chashna carashpaca, jahua pachapimi charij cangui. Cruzta aparinshna ñucata catingapaj tigramugrilla— nircami.

²²Jesús chashna nijpica, chai runaca ninan charij cashcamandaca, ninanda llaquirishpa rircallami.

²³Shina rijpimi Jesusca, muyundita chai gentecunata ricujurca. Shina ricujushpami, paipaj yachajujcunaman cashna nijurca: —¡Ninan charijcunaca, Taita Dios mandajuj llactagupi causangapaca, napacha ucha yaicui ushangachu!— nijurcami.

²⁴Chai shimicunata nijpimi paipaj yachajujcunaca, ninanda manllarirca. Ashtahuangarin Jesusca, paicunataca cashnatapashmi nirca: —Ñuca huahuacunalla. Imata ninanda charishpapash, chaitalla yariashpa causajcunapaca, Taita Dios mandajuj llactaguman yaicungapaca, ninan shinllipachami.

²⁵Dios mandajuj llactaguman shuj charij runa yaicungapaj randica, camello nishca animalrapashmi, shuj auja utujutaca fangalla yaliman— nircami.

²⁶Shina nijpicarin paipaj yachajujcunaca, ashtahuan manllarishpami, paicunapura cashna ninajurca: —Shinaca, ¿pita quishpiri ushangayari?— ninajurcami.

²⁷Shina ninajujpimi Jesusca, paicunata ricushpa cashna nirca: —Gentecunapaca napacha ushanallachu. Ashtahuangarin Taita Diospaca, na chashnachu. Taita Diospaca, imata ruraitapash ushanallami— nircami.

²⁸Shina nijpimi Pedroca, cashna nirca: —Ricui, ñucanchica imaguta charishcatapash tucuita saquishpamari, candaca catinajunchi— nircami.

²⁹Shina nijpimi Jesusca, cashna nijurca: —Na llullashpami, cangunataca cashna nini: Ñucatapash, ali villaitapash catijushpami, huasita, huauquicunata, panicunata, taitata, mamata, huahuacunata, alpacunata maijan cashpapash saquinga.

³⁰Chashna tucuita saquishpa, ñucata catijushcamanda llaquichi tucushpapash, huasicunata, huauquicunata, panicunata, mamacunata, huahuacunata, alpacunata saquishca cashpapash, cai pachapica patsajcaman yalitami japinga. Jipa causaipicarin, causaita causagrinatami japinga.

³¹Ashtahuangarin ashtacacuna pundapi churai tucushpa causajcunaca, huashamanmi churai tucunajunga. Shinallata huashaman churai tucushpa causajcunaca, pundapimi churai tucunajunga— nijurcami.

³²Jesusca, Jerusalenman vichai rijushpami, paipaj yachajujcunataca catichishpa, ñanda rijurca. Paicunaca, manllarishca cashpami, ninanda manllashpa rinajurca. Shinamandami Jesusca, paipaj chunga ishcai yachajujcunatalla, ashaguta ladoman pusharca. Paicunamanmi, gentecuna paita imata ruranatapash, cashna nishpa villajurca:

³³—Ricuichi, Jerusalenmanmi rinajunchi. Chaipimi, Runa Aichayu tucushca ñucataca, curacunata mandajcunapajman, mandashca shimita yachachijcunapajman japishpa apahuanga. Paicunami, ñucataca huañunapachami cangui nishpa, na Israel runacunaman japishpa cuhuanga.

³⁴Paicunami, ñucataca asishpa ricushpa, astishpa, t'ucashpa churanga. Chai jipami huañuchihuanga. Huañuchijpipash, quimsa punllahuanga causarishallami— nijurcami.

³⁵Chai jipami, Zebedeopaj churicunaca Jacobondi, Juandi, Jesuspajman quimirirca. Paicunaca: —Yachachij, ñucanchi mañashcaguta, ¿nacha uyahuanguiman?— ninajurcami.

³⁶Shina nijpimi: —Cangunaca, ¿imagutata rurachun munanguichi?— nishpa, Jesusca tapujurca.

³⁷Shina tapujpimi, paicunaca cashna nijurca: —Can punchapambagu tiarishpaca, ¿nacha ñucanchitaca, shujtaca ali ladoman, shujtaca lluqui ladoman tiachinguiman?— ninajurcami.

³⁸Shina nijpimi Jesusca, cashna nirca: —Na yachaimandami, chashna mañahuanguichi. ¿Cangunaca, ñuca ufiana vasomanda ufiai ushanachu canguichi? Na cashpaca, ¿ñuca bautizarinashna bautizari ushanachu canguichi?— nircami.

³⁹Shina nijpimi, paicunaca: —Ari, ushapashunllami— ninajurca. Shina nijpimi Jesusca, cashna nirca: —Ñuca ufiana vasomanda ufianguichipachami. Ñuca bautizarinashna bautizaritapash ushanguichimi.

⁴⁰Shina rurajpipash ali ladopi, lluqui ladopi tiarichunga, na ñuca cunachu cani. Ashtahuangarin maijanda tiachingapajpash, ñuca Taitami ña alichishcalla charijun— nircami.

⁴¹Chai ishcai purahuanlla Jesús parlanajujta uyashpami, caishuj chungapura yachajujcunaca Jacobotapash, Juandapash ninanda fiñarca.

⁴²Ashtahuangarin Jesusca, paicunata cayashpami cashna nijurca: —Llactacunata jatun mandajcunami, shuj llactapi causajcunataca ninanda mandashpa charin. Shinallata mandaj puracunapash, ashtahuan mandai ushajllami, caishujcunatapash mandashpa charin. Chaitaca, cangunallata yachanguichimi.

⁴³Ashtahuangarin canguna purapica, na chashna cangachu. Canguna purapi maijambash mandaj tucungapaj munashpaca, cangunata servishpa causachun ninimi.

⁴⁴Canguna purapi maijambash ashtahuan punda mandangapaj munashpaca, tucuicunata servishpa causachun ninimi.

⁴⁵Runa Aichayu tucushca ñucapash, ñucata servihuaichi ningapaca, na shamurcanichu. Ashtahuangarin shujcunata servishpa, ashtacacunata ñuca huañushpa quishpichingapajmi shamurcani— nijurcami.

⁴⁶Chai jipami Jesusca, paipaj yachajujcunandi, ashtaca ashtaca gentecunandi, Jericó shuti puebloman shamunajurca. Jericó pueblomanda llujshishpa rinajujpimi, shuj ñausa runaguca, culquita mañashpa ñan ladopi tiajushca carca. Chai runaca, Timeo shuti runapaj churi Bartimeo shutimi carca.

⁴⁷Paica: “Nazaret pueblomanda Jesusmi shamujun” nijta uyashpami: —¡Ñaupa taita Davidpaj Churi Jesús, ñucataca llaquihuayari!— nishpa, capari callarirca.

⁴⁸Shina caparijujpimi upallayachun, ashtacacuna jarcanajurca. Shina jarcajpipash: —¡Davidpaj Churi, ñucataca llaquihuayari ninimi!— nishpami, ashtahuan shinllita caparirca.

⁴⁹Shina caparijujpi Jesús shayarishpami, chai runaguta pushamuchun mandarca. Shina mandajpi, chai ñausa runaguta pushagrishpaca: —Cunanga cushijushpa jatari. Candaca shamuilla ninmari— ninajurcami.

⁵⁰Shina nijpica, pai jahualla churajushcatapash shitashpa jatarishpami, chai runaguca Jesuspajman chayamurca.

⁵¹Shina shamujpimi: —Canga, ¿imagutata rurachun munangui?— nishpa, Jesusca tapurca. Shina tapujpica: —Ñuca ñavigu ricuchun alichihuai, Yachachij— nishpami, chai ñausa runaguca mañarca.

⁵²Shina nijpimi Jesusca, cashna nirca: —Aliguta can crishcamandami, ña quishpirishcangui. Cunanga rilla— nircami. Shina nijpimi chai runaguca, ñapash ricurca. Shina ricushpaca, Jesusta catishpa chai ñandallata rircallami.