Read Imbabura Highland Quichua MARCOS 12 Bible Online

MARCOS 12 - Imbabura Highland Quichua bible

MARCOS 12

¹Chai jipallami Jesusca, chimbapurashpa parlana shimicunahuan cashna nijurca: “Shuj runagumi, paipaj alpapi uvascunata tarpurca. Chai tarpushca alpataca, muyunditami patata rurashpa jarcarca. Chaipillatami, uvasta cutana pushtutapash rurarca. Shinallata shuj jatun torretapashmi rurarca. Shina rurashpallami, alpata trabajaj shuj runacunaman chai alpata partido cushpa, caru llactaman rirca.

²Ña fucuna punllacuna pactajpimi, chai alpayu runaca, uvas fucushcaguta chaupiguta carai nishpa apamugrichun, alpata trabajaj chai runacunapajman, paita servij runaguta cacharca.

³Ashtahuangarin chai runacunaca, chai servij runagu chayajpica japishpami, macashpa imatapash na cushpa tigrachirca.

⁴Chashna tigrachijpimi, chai alpayu runaca, cutin shuj servijta cacharca. Paitapash rumicunahuan umata faquishpami, ninanda rimashpa pingaichishpa tigrachirca.

⁵Chashna tigrachijpimi, chai alpayu runaca, cutinllata shuj servijta cacharca. Paitacarin huañuchircami. Shina huañuchijpipash, chai alpayu runaca, ashtahuan tauca runacunatami cacharca. Paicunatapash, huaquingunataca macashpa, huaquingunataca huañuchishpami saquirca.

⁶Tucuicunapaj jipaca, chai alpayu runaca, paipaj juyashca shujlla churigutami cachangapaj charirca. ‘Ñuca churigutaca, nachari imatapash rurangachu’ yashpami, paipaj churigutapacha cachamurca.

⁷Ashtahuangarin alpata trabajaj chai runacunaca, pai purami cashna ninajurca: ‘Paillami, cai alpata japinga. Paita huañuchingapaj shamuichi. Pai huañujpica, chai alpaca ñucanchipajmi canga’ ninajurcami. Shina nishpami, paicunapura parlarinajurca.

⁸Chai churigutacarin japishpa huañuchishpami, uvas chagramandaca llujchishpa shitarca.

⁹Chashna rurashcamandaca, chai alpayu runaca, ¿imatashi ruranga? Pai shamushpaca, chai alpata trabajaj runacunataca huañuchishpami, uvas chagratapash shujcunaman cunga.

¹⁰Dios escribichishca Shimipi ima nijujtapash, ¿nachu leyishcanguichi? Chaipica, cashnami nijun: ‘Huasichij runacuna na munashpa shitashca rumillatami, huasichi callaringapaj, pirca tigranapi churana rumi tucushca.

¹¹Chaitaca, Jatun Diosmi rurashca. Chaita ricushpaca, ninandami manllarinchi’ nijunmi” nijurcami.

¹²Cai chimbapurashpa parlashcataca, chai mandajcunata uyachishpami, Jesusca parlajurca. Chaita yachashpami paicunaca, Jesusta prezu japingapaj munarca. Ashtahuangarin gentecunata manllashpami, na japi ushashpa saquishpa rinajurca.

¹³Chai jipami, huaquin fariseocunatapash, mandaj Herodespaj puracunamandapash Jesuspajman cachamurca. Imata tapujpipash, nalita tigrachijpica juchachingapajmi, paicunaca shamurca.

¹⁴Shina shamushpami, cashna ninajurca: —Yachachij, can na llullashpa yachachijujtaca yachapanchimi. Canga, pi mandachumbash na minishtinguichu. Gentecuna imashna cajtapash na ricujunguichu. Ashtahuangarin Taita Dios munashcashna causachunmi, pimambash na llullashpa yachachijungui. Cesarman impuestota cunaca, ¿ñucanchita mandashca shimipi nijunshna alichu, nachu ali? ¿Cunallachu canchi, nachu cuna canchi?— nishpami tapunajurca.

¹⁵Ashtahuangarin shimihuanlla cashna juyailla rimaj tucushpa tapunajujta yachashpami, Jesusca cashna nirca: —¿Imashpata cangunaca, imata tigrachijpipash juchachingapaj shamunguichi? Chai culquita apamuichi, ricusha— nircami.

¹⁶Paicuna culquita cujpi ricushpaca: —¿Pipaj ñavita, pipaj shutita, cai culquipica tiajun?— nishpami, Jesusca tapurca. Shina tapujpimi: —Cesarpajmi— ninajurca.

¹⁷Shina nijpimi Jesusca, paicunata cashna nirca: —Cesarpaj cajpica, Cesarmanllatami cuna canguichi. Ashtahuangarin Taita Diospaj cajtaca, Taita Diosmanmi cuna canguichi— nircami. Shina nijpica ninandami manllarinajurca.

¹⁸Chai jipami saduceocunaca, Jesuspajman shamurca. Paicunaca: “Huañushcacuna na causaringachu” nishpa purijcunami. Paicunami Jesustaca, cashna nishpa tapurca:

¹⁹—Yachachij. Ñucanchita mandashpami Moisesca, cashna nishpa escribishca: ‘Shuj runaca, huahuacunata nara charishpallatami, paipaj huarmitaca saquishpa huañunga. Chai huarmitaca, paipaj cati huauqui cazarashpa, punda huauquipaj randi huahuacunata charichun’ nishcami.

²⁰Ñucanchi llactapica, canchis huauqui puracunami tiarca. Punda huauqui cazarashpaca, huahuacunata nara charishpallatami, huarmitaca saquishpa huañurca.

²¹Shinallata chai huarmitaca, cati huauquimi cazararca. Paipash, huahuacunata nara charishpallatami huañurca. Chaipaj jipa huauquipash, shinallatami huahuacunata nara charishpallata huañurca.

²²Chashnami, canchispura huauquicuna chai huarmitaca, cati cati cazaranajurca. Chai huarmitaca, huahuacuna illajta saquishpami tucuilla huañurca. Chai jipaca, chai huarmipashmi huañurca.

²³Huañushcacuna causarimui punllapica, ¿maijambajta huarmi canga? Chai huarmitaca, chai tucui canchis purami cazararca— nishpami tapunajurca.

²⁴Shina tapujpimi Jesusca, paicunaman cashna nishpa tigrachirca: —Cangunaca, ¿nachu Dios escribichishca Shimitapash, pai ninan ushaita charijtapash na yachashpa, chashna pandanguichi?

²⁵Huañushcacunapaj chaupimanda causarishpaca, pipash na cazarangachu. Cazaranajunaca, napacha tiangachu. Ashtahuangarin jahua pachapi tiaj angelcunashnami canga.

²⁶Huañushcacuna causarinataca, Taita Diosmi: ‘Ñucami, Abrahambaj, Isaacpaj, Jacobopaj Taita Dios cani’ nishpa, zarza nishca yura rupajuj chaupimanda, Moisesman villarca. Moisés escribishca libropi chashna nijujtaca, ¿cangunaca narachu leyishcanguichi?

²⁷Taita Diosca, huañushcacunapaj Taita Diosca na canllu. Ashtahuangarin causajcunapaj Taita Diosmi. Shina cashcamanda cangunaca, ninandapachami pandanajunguichi— nijurcami.

²⁸Imata tapujpipash Jesusca, aligutami tigrachijurca. Chaita uyajushpami, mandashca shimita yachachij puramanda shuj runaca, Jesuspajman quimirishpa cashna tapurca: —Mandashca shimicunaca, ¿maijanda ashtahuan yali ali capan?— nishpami tapurca.

²⁹Shina tapujpimi Jesusca, cashna nishpa tigrachirca: —Mandashca shimicunamanda tucuitapash ashtahuan yali aliguca, cashnami nijun: ‘Uyaichi, israelcuna. Jatun Diosca, ñucanchi Taita Diosmi, shujlla Jatun Diosmi tian.

³⁰Cambaj Jatun Taita Diostaca, tucui shunguhuan, tucui almahuan, tucui yuyaihuan, cambaj tucui ushaihuambash juyangui’ nijunmi. Chashna nishpa mandashca shimimi, tucuita yali ashtahuan aliguca tiajun.

³¹Chaipaj cati mandashca shimipash, chashnallatami nijun: ‘Cambaj cumba runagutaca, imashna can juyarinshnallata juyangui’ nijunmi. Cai ishcai mandashca shimicunata yali ashtahuan shuj aliguca, na tianllu— nijurcami.

³²Shina nijpimi, mandashca shimita yachachij runaca, cashna nijurca: —Canga, aligutami nihuangui, Yachachij. Can nishcashnapachami, Taita Diosca shujlla tiapan. Ashtahuan shuj diosca, na tianllu.

³³Taita Diostaca, tucui shunguhuan, tucui yuyaihuan, tucui almahuan, tucui ushaihuanmi juyana. Shinallata cumba runagutapash, quiquin juyarinshnallatami juyana. Shina causanami, Taita Diosman animalcunata cushpa tucuillata rupachishcatapash, imaguta carashcacunatapash ashtahuan yali ali capashca— nijurcami.

³⁴Chai runa alipacha yachajushca cashpa, chashna tigrachijta ricushpami, Jesusca cashna nirca: —Canga, Taita Dios mandajujmandaca, na carupi causajunguichu— nircami. Chashna nijpimi Jesustaca, pipash na ashtahuan tapui usharca.

³⁵Diospaj huasi ucupi yachachijushpami Jesusca, cashna nirca: —Mandashca shimita yachachijcunaca, ¿imashpata: ‘Quishpichij Cristoca, ñaupa taita Davidpaj churimi canga’ ninajun?

³⁶Davidllatami, Diospaj jucha illaj Espíritu yarichijpi cashna nijurca: ‘Jatun Diosca, ñucata Mandajtami cashna nirca: Canga, ñuca ali ladoman tiajuilla. Canda na ricunayachijcunata can saruchun, cambaj chaquipi ñuca churangacaman tiajuilla’ nijurcami.

³⁷Quishpichij Cristotaca, Davidllata: ‘Jatun Diosmi cangui’ nijujpica, ¿imashpata Davidpaj churi cangayari?— nijurcami. Shina nijpimi, ashtaca gentecuna ashtahuan uyangapaj munanajurca.

³⁸Gentecunata Jesús yachachijushpami, cashna nijurca: —Mandashca shimita yachachijcunataca, napacha catinachu canguichi. Paicunaca, chaqui pundacaman churajunata churajushpami, cushijushpa purinajun. Paicunaca, plazacunapipash, alillachu capangui nijpi purinatami munan.

³⁹Tandanajuna huasicunapipash, paicunata alicachishpa ricunajuchunmi, ñaupajpi tiarinajun. Shinallata boda huasicunapipash, alipilla tiarishpami purinajun.

⁴⁰Sapalla huarmicunapaj huasicunatapashmi langashna tucuchinajun. Chashna rurashpaca, alipi ricuringapaj yashpami, Taita Diostaca unai unaita mañaj tucunajun. Paicunaca, chashna cashcamandami, ashtahuan ninanda llaquichi tucunajunga— nijurcami.

⁴¹Diospaj huasi ucupi culquita carashpa churana cajón chimba purapimi, Jesusca tiajurca. Chai cajonbica, mashna culquita gentecuna churajtami ricujurca. Charij gentecunaca ashtacacunami, ninanda carashpa churanajurca.

⁴²Shinallata imagutapash na charij, shuj sapalla mamagu shamushpaca, ishcai yura culquigutami churarca. Chai culquiguca, ashtahuan uchilla culquigumi carca.

⁴³Chashna churajta ricushpami Jesusca, paipaj yachajujcunata cayashpa cashna nijurca: —Na llullashpami, cangunataca cashna nini: Cai sapalla huarmiguca, imagutapash na charij cashpapash, caishuj gentecuna culquita carashpa churashcataca yalitami, cajonbica churarca.

⁴⁴Caishujcunaca charij cashpapash, puchutallami churanajurca. Ashtahuangarin imagutapash na charij cai sapalla huarmiguca, pai micunaguta randingapaj charijushca tucuilla culquigutamari carashpa churan— nijurcami.