Read Imbabura Highland Quichua MARCOS 13 Bible Online

MARCOS 13 - Imbabura Highland Quichua bible

MARCOS 13

¹Diospaj huasi ucumanda Jesús llujshijujpimi, paipaj yachajuj puramanda shujca, cashna nirca: —Yachachij, ricui. Cai huasicunaca, rumicunahuanlla rurashcamari— nircami.

²Shina nijpimi Jesusca, cashna nirca: —¿Cai jatun huasicunatachu ricunajunguichi? Caipica, shuj rumillapash na chai jahuan, chai jahuan quedangachu. Tucuillami urmachi tucunga— nircami.

³Shina nishpallami, Diospaj huasi chimba ladopi tiajuj Olivos shuti urcupi tiarirca. Chaipimi Pedrohuan, Jacobohuan, Juanhuan, Andreshuan paicunalla, Jesustaca cashna nishpa tapunajurca:

⁴—¿Ima horata chashna ninan llaquicunaca tianga? ¿Ima llaquita ricushpata, can villashcacuna pactajujtaca yachashun? Chaitaca villayari— ninajurcami.

⁵Shina nijpimi Jesusca, paicunaman cashna nishpa tigrachirca: —Pipash cangunatara umachinman. Aliguta yarishpa causanguichi.

⁶Ashtacacunami: ‘Quishpichij Cristomi cani’ nij tucushpa, ñuca shutipi shamunga. Paicunaca, ashtaca gentecunatami umachinajunga.

⁷Ashtahuangarin jatun macanajuicuna tiajta, ninan macanajuimi shamugrin nijta uyashpapash, na musparinachu canguichi. Chashna llaquicunaca tianapachami. Chashna cashpapash, tucurimui punllapachaca nara chayamungachu.

⁸Shuj llactapi causajcunahuan, caishuj llactapi causajcunahuanmi macanajui jataringa. Llactata mandaj puracunapash macanajungami. Tauca llactacunatami, alpa mama chujchushpa tucuchinga. Ninan yarjaipash, ninanda caparinajuipashmi tianga. Chai llaquicunaca, callarillami canga. Ashtahuan jatun llaquicunami shamunga.

⁹Ashtahuangarin cangunaca, aliguta yarishpa causanguichi. Cangunata japishpaca, mandajcunapaj ñaupajmanmi apanajunga. Shinallata tandanajuna huasicunapimi astinga. Ñucata catinajushcamandami, llactata mandajcunapaj ñaupajman, jatun mandajcunapaj ñaupajman apai tucunguichi. Paicunamambash, chashnapachami nishpa villai ushanguichimi.

¹⁰Tucurimui punllacuna nara chayamujpillatami, ali villaitaca tucui llactacunapi causajcunaman villanapacha.

¹¹Mandajcunapaj ñaupajman cangunata apashpa cujpica, imatashi nisha yashpa, na manllarinachu canguichi. Chaitaca, yaritallapash na yarinachu canguichi. Ashtahuangarin Dios imata yarichishcatami, chaipica rimanguichi. Diospaj jucha illaj Espíritu yarichijpimi, na cangunapaj munai rimanguichi.

¹²Huauquillatami, paipaj huauquitaca, huañuchijcunaman cunga. Shinallata taitallatami, paipaj churitaca huañuchijcunaman cunga. Shinallata huahuacunapash, paipaj taitata mamata fiñashpa jatarishpami huañuchinajunga.

¹³Ñuca shutipi catinajujpimi cangunataca, tucui gentecuna na ricunayachinga. Ashtahuangarin tucurimui punllacaman llaquicunata apajcunallami quishpichi tucunga.

¹⁴‘Ninanda millanayachi tucushpa tiajujmi, llaquinayaita tucuchijunga’ nishpami, Profeta Danielca escribirca. Chashna nishcashna, chaica napash tiajuna pushtupimi tiajunga. Chaita ricushpaca, Judea llactapi causajcunaca, urcucunapi pacajungapaj richun ninimi. (Cashna villashcata leyijca, aliguta yarichun ninimi).

¹⁵Chai punlla chayamujpica, huasi jahuapi tiajujca, huasi ucuman ama yaicuchun. Huasi ucumanda imata apangapajpash, ama yaicuchun ninimi.

¹⁶Pambapi purijujpash, paipaj jahualla churajunata apangapaca, ama tigrachun ninimi.

¹⁷Chai punllacunapica, vijsayu huarmicunapash, llullu huahuata viñachijuj huarmicunapash, ¡aij, imachari tucunga!

¹⁸Chai punllacunaca, ama tamia punlla cachunmi, Taita Diostaca ninanda mañariana canguichi.

¹⁹Chai punllacunapica, ninan manllanayai llaquicunami tianga. Cai pachata Taita Dios churashca punllamandapacha, cunangaman chashna llaquicunaca, na tiarcachu. Jipamambash, chashna llaquicunaca na tiangachu.

²⁰Llaquichina punllacunata Taita Dios na saquichijpica, shujllapash na quishpirinmanllu. Ashtahuangarin pai agllashcacunata juyashpallami Jatun Diosca, chai llaqui punllacuna ama unaicaman tiachun ucha saquichishca.

²¹Chai punllacunapimi huaquingunaca: ‘Ricuichi, Quishpichij Cristomi caipi’ ninajunga. Na cashpaca, huaquingunaca: ‘Ricuichi, chaipimi’ ninajungami. Chashna ninajujpipash, napacha crinachu canguichi.

²²Chai punllacunapica: ‘Ñucami, Quishpichij Cristo cani’ nishpa, ‘Ñucami, Dios ima nishcata villaj cani’ nishpami, llullashpa villajcuna tianga. Paicunaca, pipash na rurai ushashcatami, imatapash manllarinayaita rurashpa ricuchinajunga. Chashna rurashpami, Taita Dios agllashcacunatapash pandachi ushashpaca, pandachinajunga.

²³Ashtahuangarin cangunaca, aliguta ricushpami causana canguichi. Nara chashna tucujpillatami, cunambillata tucuita cangunaman villajuni— nijurcami.

²⁴Chashna ninan llaqui punllacuna yalishca jipami, indipash yana yana tucunga. Lunapash, cai pachataca na punchayachingachu.

²⁵Luzerocunapash jahuamanda urmamungami. Shinallata ninan ushaihuan jahuapi tiajujcunapash, ninandami cuyunga.

²⁶Chai jipallami, Runa Aichayu tucushca ñucataca, fuyupi shamujujta tucuicuna ricunga. Ninan ushaihuan, punchapamba shamujtami ricunga.

²⁷Shina shamushpami, ñuca angelcunata cachamusha. Paicunami, ñuca agllashcacunataca, tucui cai pacha tucuri chuscundi ladomanda tandachimunga.

²⁸Jigos yurahuan chimbapurashpa parlashcatami, aliguta yachajuna canguichi: Chai yurapi malquicuna viñashpa, llullu fangacuna jundajta ricushpami, tamia pascarina punllacuna chayamujtaca yachanguichi.

²⁹Chashnallatami chai tucuita ricushpaca, ñuca shamunaca ña pungupi cajta yachana canguichi.

³⁰Na llullashpami, cangunataca cashna nini: Cunan viñaicuna nara huañujpillatami, ñuca villajushca shimicunaca pactanga.

³¹Jahua pachapash, cai pachapash tucuringami. Ashtahuangarin ñuca rimashca shimicunaca, napacha tucuringachu.

³²Ashtahuangarin ima punlla ima horas chashna tucunataca, pipash na yachanllu. Jahua pachapi tiaj angelcunapash, na yachanllu. Diospaj Churi cashpapash, na yachanichu. Ñuca tigramunataca, ñuca Taitallami yachan.

³³Ricuichi, ima punllacuna chashna tucunata na yachaimandami, na puñushpa chapariashpa, Diosta mañashpa causana canguichi.

³⁴Caru llactaman shuj runa rijushpaca, paita servijcunamanmi huasita mingashpa rin. Imata rurachumbash, paicunamanmi saquin. Pungupi cuidajtapash, aliguta ricuriapangui nishpami mandan. Shinallatami ñuca tigramunapash canga.

³⁵Huasiyu runa ima horas tigramunata na yachashcamandaca, na puñushpami chapariana canguichi. Paica, ña amsayajujpi cashpapash, chaupi tuta cashpapash, gallo candai horas cashpapash, indi llujshinallapi cashpapash, shamungallami.

³⁶Cungashcapi shamushpaca, canguna puñunajujta ama japij shamuchunmi, chashna shuyana canguichi.

³⁷‘Na puñushpa chaparaichi’ nishpaca, na cangunatalla ninichu, tucuicunatami chashna nijuni— nijurcami.