Read Imbabura Highland Quichua MARCOS 14 Bible Online

MARCOS 14 - Imbabura Highland Quichua bible

MARCOS 14

¹Pascua fiestapi, levadura illaj tandata micuna punllacuna chayangapaca, ishcai punllallami tiarca. Chai punllacunami, curacunata mandajcunapash, mandashca shimicunata yachachijcunapash, Jesusta imashnallapash umachishpa, japishpa huañuchingapaj parlarinajurca.

²Paicunaca cashnami ninajurca: —Gentecuna jatarishpa ama caparinajuchunga, fiesta punllacunapica na japinachu canchi— ninajurcami.

³Jesusca, Betania pueblopica, lepra ung:uihuan huañujushca Simonbaj huasipimi carca. Chai runapaj huasipi Jesús micujujpimi, shuj huarmica mishquillagu ashnajuj nardo nishca jambita, alabastro nishcata rurashca uchilla fundugupi apashpa shamurca. Chai jambica, ninan valishca, ashtahuan ali jambimi carca. Chai fundugupaj umata faquishpami, Jesuspaj umapi talishpa javirca.

⁴Chaita ricushpami, chaipi tianajuj puramanda huaquingunaca fiñarishpa, cashna ninajurca: —¿Imashpata chai mishquilla ashnajujtaca, chashna yangata tucuchijunyari?

⁵Chaitaca, quimsa patsaj yali denario nishca culquipaj jatushpami, chai culquitaca imagutapash na charijcunaman carashpa ali canman carca— nishpami, chai huarmitaca ninanda nalicachinajurca.

⁶Ashtahuangarin Jesusca, cashnami nirca: —¿Imashpata cai huarmitaca nalicachinguichi? Saquichilla. Ñucapaj ali cachunmi, cashna rurangapaj shamushca.

⁷Imagutapash na charijcunaca, ima horapash tiangallami. Paicunaman carangapaj munashpaca, ima punllapash caranguichillami. Ashtahuangarin ñucami cangunahuanga, na unaicaman causana cani.

⁸Cai huarmica, ñuca huañushpa pambai tucuna cajpimi, pundata cai mishquillagu ashnajujtaca, ñucapi talishpa javingapaj shamushca. Paica, pai imata rurai ushashcagutallami rurashca.

⁹Na llullashpami, cangunataca cashna nini: Cai ali villaita tucui cai pachapi villajushpaca, cai huarmita yarinajuchumbash, pai imaguta rurashcatapashmi villanga— nircami.

¹⁰Chai jipami, chunga ishcai yachajuj puramanda Judas Iscariote shuti runaca, Jesusta japichishallami nishpa parlangapaj curacunata mandajcunapajman rirca.

¹¹Chaita yachashpaca, chai curacunaca cushijushpami, culquita cupashunllami ninajurca. Shina nijpimi, imashna japichinata yariaj Judas runaca purijurca.

¹²Fiestata rurangapaj callari punllapimi, levadura illaj tandataca micunata yachan carca. Shinallata pascua punllapica, ninanda cushijushpa, llamaguta huañuchinatami yachan carca. Chai punllapimi: —Pascua punllapi cushijushpa can micuchunga, ¿maipita alichigrichun munangui?— nishpa, paipaj yachajujcunaca Jesusta tapunajurca.

¹³Shina tapujpimi, paipaj yachajuj puramanda ishcai purata Jesusca, cashna nishpa cacharca: —Puebloman ripaichi. Chaiman chayashpaca, yacu funduta aparishca shuj runagutami tuparinguichi. Chai runagutaca, catishpa ringuichilla.

¹⁴Pai maiman yaicujpipash catishpa yaicushpa, huasiyu dueñotaca cashna ninguichi: ‘Ñucanchita Yachachijmi: Pascua punllapi cushijushpa micunataca, ¿maijan ucupita ñuca yachajujcunandi micupashun? nishpa tapuchun cachamupan’ ninguichi.

¹⁵Shina nijpimi, chai huasiyu dueñoca, jahua altibajopi ña alichishcalla shuj jatun ucuta cangunaman ricuchinga. Chai ucupica, ñucanchi micungapaj alichinguichilla— nishpami cacharca.

¹⁶Chai puebloman paipaj ishcai yachajujcuna chayashpaca, Jesús imashna nishcashnami tarigrirca. Chai huasi ucupimi, pascua punllapi cushijushpa micungapaca alichinajurca.

¹⁷Ña tutayashcapimi Jesusca, paipaj chunga ishcai yachajujcunandi, chai huasiman chayamurca.

¹⁸Ña chai huasi ucupi micushpa tianajushpami Jesusca, paipaj yachajujcunataca cashna nirca: —Na llullashpami, cangunataca cashna nini: Ñucahuan micushpa tianajuj canguna puramanda shujmi, ñucata japichigrihuan— nircami.

¹⁹Shina nijpimi paicunaca, ninanda llaquirishpa: —¿Ñucachu candaca japichina capani?— nishpa, shuj shuj tapunajurca.

²⁰Shina tapujpimi Jesusca, paicunata cashna nirca: —Cangunaca, chunga ishcai purami ñucahuanga, cai platopillata tandata micunajunguichi. Canguna puramanda ñucahuan tandata mutiyachishpa micujujllatami, ñucataca japichigrihuan.

²¹Escribishcapi nijunshnami, Runa Aichayu tucushca ñucataca huañuchinajunga. Runa Aichayu tucushca ñucata japichij runaca ¡aij, imachari tucunga! Chai runaca, na huacharishca cashpachari ali canman carca— nircami.

²²Ña micunajushpami, Jesusca tandata japishpa, Diosta pashi nirca. Chai tandata chaupishpa paicunaman carashpaca: —Japishpa micuichi. Caica ñuca cuerpomi— nircami.

²³Shinallata copatapash japishpami, Diosta pashi nirca. Chai copata cujpimi, tucuicuna chai copamanda ufianajurca.

²⁴Jesusca cashnatapashmi nirca: —Caica, ashtaca gentecunata quishpichingapaj jicharina ñuca yahuarmi. Caihuanmi Diosca, gentecunahuan shuj mushujta ari nishcata pactachigrin.

²⁵Na llullashpami, cangunataca cashna nini: Cai uvas vinotaca, cunanamdapacha cutinga na ufiashachu. Taita Dios mandajuj llactagupimi, shuj mushuj vinotaca ufiashun— nircami.

²⁶Paicunaca, candanaguta candashca jipami, Olivos shuti urcuman rinajurca.

²⁷Shina rinajushpami Jesusca, paipaj yachajujcunata cashna nirca: —Cunan tutallatami tucui cangunaca, ñucata na crishpa pandaringuichi. Escribishcapica cashnami nijun: ‘Michijtaca chugrichishami. Shinamandami llamacunaca, caita chaita calpanga’ nijunmi.

²⁸Ashtahuangarin ñucaca causarishpami, cangunata ñaupashpa, Galilea llactaman risha— nircami.

²⁹Shina nijpimi Pedroca, cashna nirca: —Caishujcuna canda na crishpa tucuilla pandarinajujpipash, ñucaca napacha pandarishachu— nircami.

³⁰Shina nijpimi Jesusca, cashna nirca: —Na llullashpami, candaca cashna nini: Cunan tutallatami, canga gallopash nara ishcaicaman candajpillata, ñucataca na rijsinichu nishpa, quimsacaman nigringui— nircami.

³¹Shina nijpimi Pedroca, cashna ninanda nirijurca: —Canhuan huañuchi tucunapacha cashpapash, na rijsinichutaca, napacha nishachu— nijurcami. Caishuj yachajujcunapash, tucuillami chashnallata ninajurca.

³²Getsemaní shuti pushtumanmi Jesusca, paipaj yachajujcunandi shamurca. Chaiman chayamushpaca: —Diosta ñuca mañagringacaman cangunaca, caipi tianajuichilla— nircami.

³³Shina nishpallami Pedrotapash, Jacobotapash, Juandapash, Jesusca pushashpa rirca. Ña rinajushpami ninanda llaquirishpa, ninan llaqui tucurca.

³⁴Shina ninan llaqui cashpami, Jesusca cashna nirca: —Ñuca almapimi, huañunashna ninanda llaquirini. Cangunaca, ama puñushpa caipi shuyaichilla— nircami.

³⁵Shina nishpaca ashaguta rishpallami, alpapi cungurishpa, Diostaca cashna nishpa mañarca: —Imashnallapash cai llaquicunata na apashpa yalinalla cajpica, yalichihuai.

³⁶Ñucata juyaj Taitalla, cambaca tucuita rurai ushanallami capan. Jayajta ufianshna cai llaquita ñuca apanataca jarcahuayari. Shina cashpapash ama ñuca munashcata rurapaichu, ashtahuangarin cambaj munaita pactachipai— nircami.

³⁷Chai jipa tigramushpaca, puñunajujtami japij shamurca. Chaimandami Pedrotaca, cashna nirca: —Simón, canga puñujushcanguishnaca. ¿Ashagutallapash nachu rijchariaj tiajuita ushangui?

³⁸Cangunata imapash nalita rurana munai ama japij shamuchunga, rijchariashpa Diosta mañaichi. Cangunapaj espirituca, Diosta mañangapaj munanmi. Ashtahuangarin cangunapaj cuerpomi shaijunlla— nircami.

³⁹Jesusca cutin tigrashpami, pundalla ima nishpa mañashcashnallata mañajurca.

⁴⁰Mañashpa tigramushpaca, cutin puñunajujtami, paipaj yachajujcunataca japij shamurca. Paicunaca, ninan puñuihuan cashpami, ñavita pascaitapash na ushanajurca. Chaimandami paicunaca, imata tigrachitapash na ushanajurca.

⁴¹Quimsacaman rishpa tigramushpaca, cashnami nirca: —Cunanga, ña puñushpa samaichilla. Ricuichi, Runa Aichayu tucushca ñucami, juchayu runacunapaj maquipi churai tucugrini. Ña chaillata puñupaichi.

⁴²Jatarishpa ucha jacuchi. Ricuichi, ñucata japichij runaca ñami chayamujun— nircami.

⁴³Chashna nijujhuanmi Judas runaca, ñapash chayamurca. Paica, chunga ishcai yachajuj purami carca. Paihuanga, ashtaca runacunami espadacunahuan, caspicunahuan shamurca. Chai runacunaca, curacunata mandajcuna, mandashca shimita yachachijcuna, mandaj rucucunapash cachamujpimi shamunajurca.

⁴⁴Jesusta japichingapaj shamujuj Judasmi, paihuan shamunajuj runacunataca, cashna nishpa yachachishcalla carca: —Maijanda ñuca muchajpipash, chaita japishpaca, ama cacharishpa prezu apanguichi— nishcami carca.

⁴⁵Jesuspajman, Judas runa ña chayamushpaca: —Yachachij, Yachachij— nishpami quimirishpa mucharca.

⁴⁶Shina nishpa muchajhuanmi Jesustaca, prezu apangapaj ñapash japirca.

⁴⁷Shina japijhuanmi, chaipi shayanajuj puramanda shuj runaca, ñapash espadata surcushpa, curacunata mandajta servijtaca, rinri muchurijta huactarca.

⁴⁸Paita japingapaj shamushca runacunataca, Jesusca cashnami nijurca: —¿Shuhuatashnachu japingapaj cangunaca, espadacunahuan, caspicunahuan shamunguichi?

⁴⁹Punllandimi Diospaj huasi ucupica, cangunapash ricujta yachachijurcani. Chaipi yachachijujpipash, ñucataca na japishpa saquircanguichillami. Ashtahuangarin Dios escribichishca Shimipi nijuj pactachunmi, cangunaca cashna shamushcanguichi— nijurcami.

⁵⁰Chaipimi Jesuspaj yachajujcunaca, paitalla saquishpa, tucuilla pacajushpa calpanajurca.

⁵¹Jesusta apanajujpica, shuj chaira viñai huambragupashmi, fachata pillurishcalla catishpa rijurca. Chai huambragutapashmi, prezu apangapaj japinajurca.

⁵²Ashtahuangarin chai huambraguca, fachata saquishpami, lluchulla pacajushpa calparca.

⁵³Jesustaca, curacunata mandajpajmanmi apanajurca. Chaimanmi, curacunata mandajcuna, mandaj rucucuna, mandashca shimita yachachijcuna tucuilla tandanajurca.

⁵⁴Jesusta apanajujpica Pedroca, caru carullami curacunata mandajpaj huasi ucu patioman yaicurca. Chaiman yaicushpami, huasita cuidajcunahuan ninapi cunushpa tiajurca.

⁵⁵Chai huasi ucupimi, curacunata mandajcunapash, mandaj puracunalla tandanajuj runacunapash tianajurca. Paicunaca, Jesusta huañuchingapaj llullashpa villajcunataca, imashna cashcata villapaichi ninajurca. Ashtahuangarin imatapash nalita rurashcataca, na tarircachu.

⁵⁶Ashtacacunami Jesustaca juchachishpa, imatapash llullashpalla villanajurca. Paicunaca, na shuj shimitalla villashpami, maitapash ninajurca.

⁵⁷Huaquin runacuna shayarishpaca, Jesusta fiñashpa juchachishpami, cashna nishpa llullanajurca:

⁵⁸—Ñucanchica, cai runataca cashna nijujtami uyarcanchi: ‘Diosta yaringapaj, runacunalla rurashca cai huasitaca urmachishpami, ñucaca shuj huasita quimsa punllapi shayachisha. Chaica, na runacuna rurashcachu canga’ nijtami uyarcanchi— ninajurcami.

⁵⁹Chashna ninajushpapash, na shuj shimilla tucurcachu.

⁶⁰Shina ninajujpimi, curacunata mandajpash, tucuicunapaj chaupipi shayarishpa, cashna nishpa tapurca: —Chashna ninanda canda juchachijpipash, ¿nachu imallatapash tigrachina cangui?— nircami.

⁶¹Shina tapujpipash Jesusca, imatapash na tigrachishpa, upalla shayajurcallami. Shina na tigrachijpimi, chai mandajca cutin cashna nishpa tapurca: —¿Canllu ninanda alicachi tucujuj Diospaj Churi, Quishpichij Cristo cangui?— nircami.

⁶²Shina nijpimi Jesusca, cashna nirca: —Ari, ñucapachami capani. Runa Aichayu tucushca ñucataca, ninan ushaita charij Taita Diospaj ali lado maquiman tiajujtami, cangunaca ricuhuanguichi. Jahua pachamanda, fuyupi shamujtapashmi ricuhuanguichi— nircami.

⁶³Shina nijpimi, curacunata mandajca ninanda fiñarishpa, pai churajushcata liquishpa, cashna nirca: —¿Shujcuna paimanda villachunga, pitapash tapunarachu canchi?

⁶⁴Diosta nali shimicunata rimajujtaca, cangunallata ñami uyanguichi. Cangunaca, ¿ima ninguichita?— nircami. Shina nijpimi, tucui paicunaca: —Cai runaca, llaquichi tucushpa huañunapachami— ninajurca.

⁶⁵Chashna nishpami huaquingunaca, ñavipi t'ucai callarirca. Paipaj ñavita huatashpami: —Pita huactanajunchi, yachai— ninajurca. Chai huasita cuidajcunapash, Jesustaca ñavipimi huactanajurca.

⁶⁶Pedroca, ucu patiopimi tiajurca. Chaimanmi, curacunata mandajta servij cuitsa puracunamanda, shuj cuitsaca shamurca.

⁶⁷Nina ladopi Pedro cunushpa tiajujta, chai cuitsa ricushpa rijsishpami: —Cambashmari, Nazaret pueblomanda Jesushuan purijurcangui— nirca.

⁶⁸Ashtahuangarin paica, na rijsinichu nishpami cashna nirca: —Chai runataca, rijsitapash na rijsinichu. Can imata nijujtapash na yachanichu— nircami. Shina nishpalla, ñanman llujshina punguman chayajujpimi, galloca candarca.

⁶⁹Chai cuitsaca, Pedrota cutin ricujushpallatami: —Cai runaca, Jesusta catij purapachamari— nishpa, chaipi cajcunaman villajurca.

⁷⁰Ashtahuangarin Pedroca cutinmi: —Napacha rijsinichu— nishpa tigrachirca. Chai jipallami, canllapi shayajcunapash Pedrotaca, cutin cashna ninajurca: —Canga, chai runata catij purapachamari cangui. Galilea llactamanda cashpami, chai llacta rimaitapacha rimajungui— ninajurcami.

⁷¹Shina nijpimi Pedroca, cashna nirca: —Chai runataca, rijsitapash na rijsinichu. Maijandachari chashna nihuanguichipash— nishpami, juramentushpa nalicachishpa rimajurca.

⁷²Chashna nijhuanmi galloca, cutin candarca. Shinamandami Pedroca, Jesús villashca shimicunata yarirca. Jesusca, cashnami nishca carca: “Narapash gallo ishcaicaman candajpillatami canga, quimsacaman ñucataca, na rijsinichu nihuangui” nishcami carca. Chashna yarishpami Pedroca, ninanda huacai callarirca.