Read Imbabura Highland Quichua MARCOS 16 Bible Online

MARCOS 16 - Imbabura Highland Quichua bible

MARCOS 16

¹Samana punlla ña yalijpimi, mishquillagu ashnajuj jambicunata randingapaj, Magdala shuti pueblomanda Mariandi, Josepaj mama Mariandi, Salomé shuti huarmindi rinajurca. Paicunaca, Jesuspaj cuerpogupi talishpa javingapajmi randinajurca.

²Indi ña llujshishca domingo tutamandatami chai huarmicunaca, Jesusta pambashca utujuman chayanajurca.

³Paicunaca: —Utuju punguta quilpashca rumitaca, ¿pita ladoman suchuchinga?— nishpandimi rinajurca.

⁴Ashtahuangarin paicuna chayashpa ricujpica, utuju punguta quilpashca rumitaca suchuchishcatami ricunajurca. Chai rumica, jatumbachami carca.

⁵Chai utuju ucuman yaicushpaca, ali ladoman shuj huambragu tiajujtami ricunajurca. Chai huambraguca jatun, yuraj churajunata churajushcami carca. Paita ricushpaca, ninandami manllarinajurca.

⁶Ashtahuangarin chai huambraguca, paicunataca cashnami nirca: —Na manllarinachu canguichi. Cangunaca, chacatai tucushpa huañushca, Nazaret pueblomanda Jesustami mascaj shamushcanguichi. Paica causarircami. Paita maipi churashca pushtuta ricuichi, illanmi.

⁷Cunanga, paipaj yachajujcunamambash, Pedromambash ucha villagrichi. Pai villashcashnami, Galilea llactaman cangunata ñaupashpa rijun. Chaipimi ricunguichi— nircami.

⁸Shina nijpimi chai huarmicunaca, utujumandaca llujshishpa, manllaihuan chujchushpandi calpanajurca. Shina ninanda manllarishpami, pihuambash na rimashpa upalla rinajurca.

⁹Domingo tutamandata nara ali punllayajpillata, causarishca jipami Jesusca, Magdala shuti pueblomanda Mariamanra punda ricurirca. Chai Mariamandami, canchis ayacunata Jesusca llujchishca carca.

¹⁰Chai huarmimi, Jesusta cumbashpa purishcacuna yachachun, paicunaman villagrirca. Paicunaca huacashpa, llaqui llaquimi tianajurca.

¹¹Paicunaca, Jesús causarishcata chai huarmi ricushcata villajujtaca, na crinajurcachu.

¹²Ashtahuangarin chai jipami, shuj tucushpa paipaj yachajuj, ishcai puramanlla ñanda pambaman rinajujpi Jesusca ricurirca.

¹³Shina ricurijpimi, caishujcunaman villangapaj tigranajurca. Paicuna villajpipash, na crinajurcachu.

¹⁴Ña puchucaipica, mezapi micushpa tianajujpimi, chunga shuj yachajujcunaman Jesusca ricurirca. Shina ricurishpaca, causarishcata ricujcuna villajujpipash, na crishpa shinlli shungucuna tucushcamandami, shinllita rimajurca.

¹⁵Shinallata paicunataca, cashnatapashmi nijurca: “Richi, tucui cai pachapi causajcunaman cai ali villaita villagrichi.

¹⁶Canguna villajpi crishpa bautizai tucushpaca, quishpichi tucungami. Ashtahuangarin na crishpaca, ninanda llaquichi tucungapachami.

¹⁷Ñucata crijcunataca, imatapash juyaillata rurashpa ricuchishcacunaca, paicunahuanmi puringa: Ñuca shutipi rimashpami, ayacunataca gentecunamanda llujchinajunga. Shinallata mushuj rimaicunatami rimanajunga.

¹⁸Culebracunata maquihuan japishpapash, na imapash tucungachu. Venenota ufiashpapash, na imapash tucungachu. Huañujujcunapaj jahuapi maquita churajpipash, ali tucunajungami” nijurcami.

¹⁹Chashna villashca jipami, Apunchi Jesusca jahua pachaman apai tucurca. Chaipimi, Taita Diospaj ali ladopi tiarirca.

²⁰Chai yachajujcuna llujshishpa rishpaca, tucui llactacunapimi villanajurca. Paicuna villanajuchunga, Apunchi Jesús shinllitapacha ayudajpimi, juyailla ricuchinacunata ruranajurca. Shina cachun.