Read Imbabura Highland Quichua MARCOS 2 Bible Online

MARCOS 2 - Imbabura Highland Quichua bible

MARCOS 2

¹Tauca punllacuna jipami Jesusca, cutinllata Capernaum puebloman yaicurca. “Jesusca huasipimi tiajun” nijtami, tucuicuna ñapash yachanajurca.

²Shina yachashpaca, ñapash huasi ucuman jundamushpami, ashtaca ashtaca gentecuna pungupipash, maipi shayaritapash na ushaita jundamurca. Paicuna uyachunmi Jesusca, Diospaj Shimita villajurca.

³Chaimanmi na cuyuri ushajuj runagutaca, chuscupura tucushpa huandushpa apamurca.

⁴Paicunaca, gentecuna ninanda jundashca cajpimi, Jesuspaj ñaupajman apaitaca na usharca. Shinamandami, Jesús yachachijuj huasi jahuata pascashpa, na cuyuri ushajuj chai runataca, mandashpa sirijushca jatanacunandi uraiman uriajuchirca.

⁵Tucui shunguhuan crishpa shamushcata ricushpami, chai na cuyuri ushajuj runagutaca, Jesusca cashna nirca: —Ñuca huahualla, cambaj juchacunaca ñami anchuchi tucushca— nirca.

⁶Shina nijtaca, mandashca shimita yachachij puramandaca, huaquingunapash uyanajurcami. Paicunaca, shungupillami cashna yarinajurca:

⁷“¿Imashpata cai runaca, shina nijun? Paica, Diostami nali shimicunata rimajun. ¿Juchacunataca, pita anchuchi ushan? Taita Diosllamari anchuchi ushan” nishpami yarinajurca.

⁸Paicunapaj shungu ucupi chashna yarinajujta, paipaj espiritupi Jesús yachashpami, chai yachachijcunataca cashna nijurca: —¿Imashpata cangunapaj shungupica, chashnatara yarinajunguichi?

⁹Na cuyuri ushajuj cai runagutaca: ‘Cambaj juchacunaca anchuchishcami’ ¿ninachu ali canga? Na cashpaca: ‘Jatari, can mandashpa sirijushcata apashpa rilla’ ¿ninachu ashtahuan ali canga?

¹⁰Runa Aichayu tucushca ñucaca, juchacunata anchuchingapaj ushaita cai pachapi charijta yachachunmi, (na cuyuri ushajuj chai runataca, cashna nini):

¹¹—Cunanga candaca cashnami nini, jatari. Can mandashpa sirijushcata apashpa, huasiman rilla ninimi— nircami.

¹²Shina nijpimi chai runaca ñapash jatarishpa, pai mandashpa sirijushcatapash apashpa, tucuicuna ricujta llujshishpa rirca. Shina ricushpami gentecunaca, ninanda manllarirca. Shina manllarishpami, cashna ninajurca: —Chashnataca, ima horallapash na ricushcachu canchi— nishpami, Taita Diostaca punchapambagumi cangui ninajurca.

¹³Chai jipami, Galilea cuchaman Jesusca cutin tigrarca. Paitaca, ashtaca gentecuna catishpa rinajurca. Chaipimi paica, tucuicunaman yachachijurca.

¹⁴Jesusca, chaimanda rishpami, Alfeo shuti runapaj churi Leví shuti runaguta ricurca. Paica, impuestota japina huasipimi tiajurca. Paitami Jesusca: —Ñucata catihuai— nirca. Shina nijpimi paica jatarishpa, Jesusta catishpa rirca.

¹⁵Chaipimi cashna tucurca: Jesusca, paipaj yachajujcunandi rishpami, Leví shuti runapaj huasipi micungapaj tiarirca. Chaipica, impuestota japishpa causanajuj ashtaca runacunapash, juchayu gentecunapashmi, chaiman shamushcacunaca tandanajushpa micungapaj tiarirca. Jesustaca, ashtacacunami chaiman catishpa rishca carca.

¹⁶Shina tianajujta, mandashca shimita yachachijcunapash, fariseocunapash ricushpami, Jesuspaj yachajujcunataca, cashna ninajurca: —¿Imashpata cangunata yachachij runaca, impuestota japishpa causajcunahuan, juchayu runacunahuan micushpa tiajun?— ninajurcami.

¹⁷Chashna ninajujta Jesús uyashpami, paicunataca cashna nirca: —Nanaita na charijcunaca, jambij runataca na mascanllu. Huañujujcunallami jambijtaca mascan. Imatapash cashcatapacha rurajcunata cayangapaca, na shamurcanichu. Ashtahuangarin juchayu gentecunata cayangapajmi shamurcani— nircami.

¹⁸Bautizaj Juanbaj yachajujcunapash, fariseocunapaj yachajujcunapash, na micushpami chishanajurca. Chaimandami huaquingunaca, Jesuspajman shamushpa cashna tapunajurca: —Juanbaj yachajujcunapash, fariseocunapaj yachajujcunapash, na micushpami chishanajun. Cambaj yachajujcunaca, ¿imashpata micushpa chishan?— ninajurcami.

¹⁹Shina nijpimi Jesusca, paicunata cashna nijurca: —¿Boda huasipica, cazarajuj noviohuan tianajushpaca, na micushpa chishai ushanllu? Novio paicunahuan tianajujpica, paicunaca na micushpa chishaitaca na ushanllu.

²⁰Cusata apana punllacunaca chayamungami. Cusata apashca punllacunami, na micushpa chishanajunga.

²¹Mauca churajunata liquirishcataca, mushuj telahuanga pipash na siranllu. Shina sirajpica, mauca churajunataca, mushuj tela aisashpami, ashtahuan liquin.

²²Shinallata chaira rurashca vinotaca, mauca cara muchilapica, pipash na churanllu. Chashna churajpica, chaira rurashca vinoca muchilata liquishpa jicharishpami, muchilandi, vinondi tucuringa. Chaimandami chaira rurashca vinotaca, mushuj cara muchilapi churana— nijurcami.

²³Samana punllapimi Jesusca, paipaj yachajujcunandi trigo pambata yalijurca. Chaipimi paipaj yachajujcunaca, trigo umata fitishpandi rinajurca.

²⁴Chashna fitinajujta fariseocuna ricushpami, Jesustaca cashna ninajurca: —Ricui, cambaj yachajujcunaca, ¿imashpata samana punllapica na chashna ruranachu nishpa mandashcata na cazushpa, chashna ruranajun?— ninajurcami.

²⁵Shina nijpimi Jesusca, paicunata cashna nijurca: —Davidca, paihuan purijcunandi micunata na tarishpa, ninanda yarjachishpa purinajushpaca, ¿imatalla rurashcataca cunangamanllu nara leyinguichi?

²⁶Paicunaca yarjachishpami, Taita Diospaj huasiman yaicushpa, Diosman carashca tandata micunajurca. Chai punllacunapica, Abiatar shuti curami, curacunataca mandajurca. Chai tandataca, mandashca shimipi nijunshna, na micunallachu carca. Chaitaca, curacunallami micui ushana carca— nijurcami.

²⁷Cashnatapashmi Jesusca nijurca: —Samana punllataca, gentecuna samachun nishpami, Diosca rurarca. Gentecunataca, samana punllata yariashpa causachunga, na rurarcachu.

²⁸Runa Aichayu tucushca ñucami, samana punllatapash mandaita ushani— nijurcami.