Read Imbabura Highland Quichua MARCOS 3 Bible Online

MARCOS 3 - Imbabura Highland Quichua bible

MARCOS 3

¹Jesusca, cutinmi tandanajuna huasiman yaicurca. Chaipica, maqui chaquishpa curparishca runapashmi tiajushca carca.

²Samana punlla cajpipash, cai runata alichijpica juchachishpa llaquichingapajmi, chaipi tianajuj gentecunaca, Jesusta ricurianajurca.

³Shina ricunajujpimi Jesusca, maqui chaquishpa curparishca tiajuj runagutaca: —Jatarishpa, cai chaupiman shamui— nirca.

⁴Shina cayashpallami, chai ucupi tiajcunataca cashna nirca: —Mandashcapi nijunshna samana punllapica, ¿alita ruranachu ali, na cashpaca nalita ruranachu ali? ¿Causaita caranachu ali, na cashpaca huañuchinachu ali?— nishpami tapurca. Shina tapujpica, imatapash na nishpa upalla tianajurcallami.

⁵Shina tianajujpimi Jesusca, tucuillata ricushpa fiñarirca. Paicuna shinlli shungu cajta ricushpami, ninanda llaquirishpa, chai huañujuj runataca: —Maquita chutai— nirca. Shina nijpi chai runa maquita chutajpica, ñapash ali tucurcallami.

⁶Shina alichijpimi fariseocunaca, chai ucumanda llujshishpaca, mandaj Herodespaj puracunahuan tandanajushpa, Jesusta huañuchishumbacha nishpa parlarinajurca.

⁷Ashtahuangarin cucha manñamanmi Jesusca, paipaj yachajujcunandi rirca. Paitaca, Galilea llactamandapash, Judea llactamandapash ashtaca gentecunami catishpa rinajurca.

⁸Jerusalén pueblomandapash, Idumea shuti llactamandapash, Jordán yacu chimbaman tiaj llactamandapash, Tiro shuti, Sidón shuti muyundi pueblocunamandapashmi shamunajurca. Jesusca, imagutapash juyaillami rurajun nijta uyashpami, ashtaca ashtaca gentecuna Jesuspajman shamunajurca.

⁹Gentecuna shina ninanda jundamushpa llapimungamandami, canoata apamushcalla charichun Jesusca, paipaj yachajujcunata mandashca carca.

¹⁰Huañunajuj gentecunataca, ashtacacunatami alichishca carca. Huañuchij llaquihuan causajcunaca, ashtacacunami, Jesustaca quichurishpa t'angajpi, maquihuan tacaringapajllapash munanajurca.

¹¹Mapata rurachij aya jundashca gentecunapash Jesusta ricushpaca, paipaj ñaupajpi cungurishpami: —Canga, Taita Diospaj Churimari cangui— nishpa, ninanda caparinajurca.

¹²Ashtahuangarin ama ashtahuan chashna caparichunmi Jesusca, chai ayacunataca jarcashpa rimarca.

¹³Chai jipami Jesusca, urcuman rirca. Chaipimi, pai agllangapaj munashca runacunatalla cayajpi paicunaca, Jesuspajman shamunajurca.

¹⁴Chai chunga ishcaicunataca, paita cumbashpa purichunmi, Jesusca agllarca. Shinallata villashpa purichun cachangapajmi agllarca.

¹⁵Shinallata huañujujcunata alichingapaj, ayacuna jundashca causanajuj gentecunamanda ayacunata llujchingapaj ushaita charichumbashmi agllarca.

¹⁶Jesusca, paicunata agllashpami, Simón runataca, Pedro shutita shutichirca.

¹⁷Jacobotapash, Juandapash huauqui puratami agllarca. Paicunaca, Zebedeo shuti runapaj churicunami carca. Paicunatami, Boanerges shutita shutichirca. Boanerges nishpaca, culun ninshna manllachijcuna nijunmi.

¹⁸Shinallata Andresta, Felipeta, Bartolometa, Mateota, Tomasta, Alfeopaj churi Jacobota, Tadeota, Simón runatapashmi agllarca. Simón runaca, cananita purami carca.

¹⁹Shinallata Judas Iscariote runatapashmi agllarca. Chai runami Jesustaca, huañuchijcunaman japichirca. Paicunami huasiman shamunajurca.

²⁰Cutin chai huasiman ashtaca gentecuna shamurca. Shinamandami paicunaca, imashna micuitapash na ushanajurca.

²¹Jesustaca: “Juizumi tucurin yarin” ninajurcami. Shina ninajujta uyashpami, paipaj familiacunaca Jesusta pushangapaj shamurca.

²²Ashtahuangarin mandashca shimita yachachijcunapashmi, Jesusmanda shamushca carca. Paicunami cashna ninajurca: —Cai runaca, ayacunata mandaj Beelzebú shuti diablopaj ushaita charishpami, ayacunata llujchishpa cachajun— ninajurcami.

²³Shina ninajujpimi Jesusca, paicunata cayashpaca chimbapurashpa parlocunahuan cashna nishpa rimarca: —¿Imashnata Satanasca, Satanastallata llujchishpa cachaitaca ushangayari?

²⁴Mandajuj llactapi causajcuna paicunapura fiñanajushpa shicanyarijpica, chai mandajuj llactaca tucurinmanmi.

²⁵Shinallata shuj huasipi causajcuna, paicunapura fiñanajushpa shicanyarishpaca, chai huasi ucu purapi causajcuna tucurinman.

²⁶Shinallata Satanás mandajuj ayacuna, paicunapura fiñanajushpa shicanyarishpaca, pai mandashpa tiajunaca tucurinmanmi.

²⁷Shuj ninan shinlli runapaj huasiman shuhuangapaj yaicushpa, chai runata nara huatashpaca, imata shuhuaitapash na ushanllu. Ashtahuangarin paita huatashpallami, imata charishcatapash shuhuai ushan.

²⁸Na llullashpami, cangunataca cashna nini: Ima juchata rurashcatapash, nali shimicunata rimashcatapash, gentecunamandaca Dios anchuchingami.

²⁹Ashtahuangarin Diospaj jucha illaj Espirituta nali shimicunahuan rimashcataca, causaita causaicaman napacha cungangachu. Chashnacunaca, causaita causaicaman llaquichi tucunatapachami charin— nijurcami.

³⁰Paicunaca Jesustaca: “Nali aya jundashca runami” ninajurcami. Shina nijpimi paicunataca, Jesusca chashna nijurca.

³¹Jesús yachachijuj huasimanmi, paipaj mamapash, paipaj huauquicunapash shamurca. Paicunaca, na yaicumui ushashpami, Jesusta cayachipai nishpa cacharca.

³²Jesushuan muyundi tianajuj gentecunami, cashna ninajurca: —Canda mascangapajmi cambaj mamapash, huauquicunapash shamushca. Canllapimi shayanajun— ninajurcami.

³³Shina nijpimi, Jesusca: —¿Pita ñuca mama? ¿Pita ñuca huauquicuna?— nishpa tapurca.

³⁴Shina nishpallami Jesusca, paihuan tianajuj gentecunata ricushpa, cashna nirca: —Caicunami ñuca mama, caicunami ñuca huauquicuna.

³⁵Taita Dios munashcata tucui pactachijcunallami, ñuca huauqui, ñuca pani, ñuca mama— nircami.