Read Imbabura Highland Quichua MARCOS 4 Bible Online

MARCOS 4 - Imbabura Highland Quichua bible

MARCOS 4

¹Jesusca, cutin cucha manñapi yachachijujpimi, ashtaca gentecuna paipajman tandanajumurca. Shinamandami, cuchapi tiajuj canoata japishpa Jesusca chaipi tiarirca. Chai gentecunaca, tucuillami cucha manñapi carca.

²Chaipimi Jesusca, ashtaca parlocunahuan chimbapurashpa yachachijurca. Paicunata yachachishpaca, cashnami nijurca:

³“Aliguta uyahuaichi. Shuj tarpuj runami, tarpungapaj llujshirca.

⁴Chai runa tarpujpica, huaquin muyucunaca ñambimi urmarca. Ñambi urmashca muyutaca, alasyu animalcunami shamushpa micurca.

⁵Shinallata huaquin muyucunaca, ashalla alpa tiaj rumilla alpapimi urmarca. Na jundu alpa cajpimi, ñapash viñarca.

⁶Ashtahuangarin uchilla sapita charishpami, ninanda indijpica, anguyashpa chaquirca.

⁷Shinallata huaquin muyucunaca, casha viñana chaupipimi urmarca. Cashacuna yalishpa viñashpa ismuchijpimi, imallapash na fucurca.

⁸Ashtahuangarin huaquin muyucunaca, ali alpapi urmashpami, juyailla llujshimushpa viñashpa, aliguta fucurca. Huaquingunaca shujmandallami quimsa chungata, huaquingunaca sucta chungata, huaquingunaca patsajta granurca” nijurcami.

⁹Jesusca, chashna nishpallami: “Uyangapaj rinrita charishpaca, aliguta uyaichi” nirca.

¹⁰Gentecuna tucuilla rijpimi Jesusca, paipaj chunga ishcai yachajujcunandi, caishuj cumbashpa purijcunandi chaipi quedarca. Paicunami, imashpa Jesús chimbapurashpa parlashcacunata tapunajurca.

¹¹Shina tapujpimi Jesusca, cashna nijurca: —Taita Diosca, pai mandajuj llactagumandaca pipash na yachai ushashcatami cangunamanlla yachachin. Ashtahuangarin chaishuj gentecunataca, parlocunallahuan chimbapurashpami imatapash yachachijuni.

¹²Ricushpapash na ricushcashna cachun, uyashpapash na uyashcashna cachunmi, cashna yachachijuni. Paicuna yuyaita japishpa ama Diospajman tigrarichun, paicunapaj juchatapash Diosca ama cungachunmi, cashna yachachijuni— nijurcami.

¹³Jesusca, paita tapujcunatami cashna nijurca: —Chimbapurashpa parlashcataca, ¿narachu cangunapash yachai ushanguichi? Shuj parlocunahuan chimbapurashpa yachachijpicarin, ¿imashnashi yachajui ushanguichi?

¹⁴Tarpuj runaca, Diospaj Shimita villaj runami.

¹⁵Ñambi urmashca huaquin muyucunaca, caicunami: Haquin gentecunaca, Diospaj Shimita villajujpica, paicunapaj shungupi tarpujpishnami uyanajun. Ashtahuangarin chai uyashcataca, Satanás shamushpami, ñapash cungachin.

¹⁶Shinallata rumilla alpapi urmashca muyucunaca, caicunami: Huaquin gentecunaca, Diospaj Shimita villajujpica, ninanda cushijushpami chasquin.

¹⁷Ashtahuangarin shina chasquishpapash, sapita na charij yurashna cashpami, ashacamanlla catinajun. Paicunaca, jatun llaquicuna japijpi, na cashpaca Diospaj Shimita catinajujpi catiriashpa llaquichijpica, nitijanshna pandanllami.

¹⁸Casha chaupipi urmashca muyucunaca, caicunami: Huaquin gentecunaca, Diospaj Shimita villajujpica, aligutami uyanajun.

¹⁹Shina uyashpapash, cai causaipajlla imatapash charingapajmi munanajun. Ña charishpapash, ashtahuan charingapaj munashpami, pandachi tucunajun. Diospaj Shimitaca, chai tucui munaicuna shamushpami cungachin. Shinamandami paicunaca, grano na fucunshnalla tucunajun.

²⁰Ali alpapi tarpushca muyucunaca, caicunami: Huaquin gentecunaca, Diospaj Shimita uyashpami shungupi alichinajun. Shina cashpami huaquingunaca, shujlla muyumanda quimsa chungata fucunshna mirachin. Shujcunaca, sucta chungata fucunshnami mirachin. Ashtahuan shujcunaca, patsajta fucunshnami mirachin— nijurcami.

²¹Jesusca cashnatapashmi nirca: “¿Michataca cajón ucupi, na cashpaca cama ucupi churangapachu japichin? ¿Nachu candeleropi churangapaj japichin?

²²Michaman na llujchi tucuna imapash pacallacunaca, na tianllu. Michaman na llujshichun, pacashcallapash na tianllu.

²³Maijambash uyangapaj rinrita charishpaca, aliguta uyaichi” nircami.

²⁴Jesusca cashnatapashmi nijurca: “Ñuca imata villajujtapash, aliguta uyashpa yaringuichi. Shujcunaman canguna imashna carajpipash, chashnallatami Diosca cangunamambash caranga. Ñuca villajujta canguna uyashpa cazujpicarin, ashtahuanmi caranga.

²⁵Ashtacata charijcunamanmi, ashtahuan caranga. Ashtahuangarin na charijpica, ashaguta charishcatapash quichungami” nijurcami.

²⁶Jesusca, ashtahuan cashnatapash nircarami: “Taita Dios mandajujca, shuj runa paipaj alpapi muyuta tarpujpi viñajunshnami.

²⁷Chai tarpuj runaca, tutayajpica puñushpa, punllayajpica jatarishpami causan. Ashtahuangarin chai tarpushca muyu llujshishpaca, chai runaca na yachajtami, viñashpa viñashpa catin.

²⁸Chai muyutaca, alpami viñachin. Pundaca, jihuashnallami llujshimun. Shina viñajpica, espigami llujshimun. Chai jipaca, caspagu tucushpa granogumi jundan.

²⁹Ña fucujpica, granocunata tandachina punllacuna chayamujpimi, cuchungapaj rinlla” nijurcami.

³⁰Jesusca, cashnatapashmi nijurca: “Taita Dios mandajujtaca, ¿imahuanda chimbapurashun, na cashpaca ima parlohuan chimbapurashpata, chaitaca yarishunchi?

³¹Diosca, mostaza nishca muyuguta, shuj runa tarpushcatashnami mandajun. Chai muyuguca, cai pachapi tucui tiashca muyucunatapash yali jamzi jamzigumi.

³²Ashtahuangarin chai muyuta tarpujpi viñashpaca, tucui jihuatapash yali jatundami viñan. Chashna viñashpa malquicunapash jundajpimi, alasyu animalcuna llanduna tucun” nijurcami.

³³Jesusca chimbapurashpa, tauca parlocunahuanmi Diospaj Shimitaca yachachijurca. Gentecuna yachajui ushangacamanllami parlajurca.

³⁴Paicunataca, chimbapurana parlocunahuanllami Jesusca, imagutapash yachachijurca. Paipaj yachajujcunamanllami, imashpa chashna parlashcatapash tucuita yachachijurca.

³⁵Chai punllallata ña tutayagrijujpimi, paipaj yachajujcunataca Jesusca: “Cuchata chimbashunchi” nirca.

³⁶Shina nijpimi, tucuilla gentecunata cayacaman nishpa paipaj yachajujcunaca, Jesús tiajuj canoallapita tiarishpa rinajurca. Huaquingunaca, shuj canoacunapi tiarishpami, Jesustaca cumbashpa rinajurca.

³⁷Ña rinajujpica, ninan huaira ñapash jatarishpami, yacutaca caiman chaiman shitajurca. Shinamandami, canoaman jundamui callarijpi, canoaca ña huashajugrijurca.

³⁸Jesusca, huashaman saunata churashpami, chai canoa ucupi puñujurca. Shina puñujujpimi, rijcharishpa cashna ninajurca: —¡Ñucanchica, ñami huashajushpa huañugrinchi! Ñucanchitaca, ¿nachu llaquingui, Yachachij?— ninajurcami.

³⁹Shina nijpimi Jesús jatarishpaca, huairatapash cuchatapash jarcashpa rimashpa, cashna nirca: —Upalla, casilla caichi— nircami. Shina nijpimi huairapash chulunyashpa, cuchapash casilla tucurca.

⁴⁰Chashna tucujpimi Jesusca, paipaj yachajujcunata cashna nirca: —¿Imashpata cashna ninanda manllaringuichi? ¿Imashpata ñucataca, na crihuanguichi?— nircami.

⁴¹Shina nijpimi ninanda manllarishpa, caishuj chaishuj parlarishpa cashna ninajurca: —Cai runataca, ¿ima cajpita huairapash, cuchapash cazun?— ninajurcami.