Read Imbabura Highland Quichua MARCOS 5 Bible Online

MARCOS 5 - Imbabura Highland Quichua bible

MARCOS 5

¹Paicuna chai cuchata ña chimbashpaca, Gadara shuti llactamanmi shamurca.

²Canoamanda llujshijhuanmi, mapata rurachij aya jundashca shuj runaca, pambana utujumanda llujshishpa Jesustaca tuparimurca.

³Chai runaca, pambana utujupillami causajurca. Paitaca, cadenahuanllapash pipash na huatai ushanllu carca.

⁴Chai runaca, cutin cutinmi grillocunahuan, cadenacunahuan huatai tucushpa causarca. Ashtahuangarin paita huatashca cadenacunataca, fiti fitita rurashpami shitan carca. Shina cajpimi paita charitacarin, pipash na ushan carca.

⁵Chai runaca tutapash, punllapash urcucunapi, pambana utujucunapi ninanda caparishpalla purijmi carca. Paillata rumicunahuan huactarishpami, chugririn carca.

⁶Chai runaca, Jesusta carumanda ricushpa calpamushpami, Jesuspaj ñaupajpi cungurirca.

⁷Shina cungurishpami, cashna nishpa ninanda caparirca: —Jahua pachapi tiajuj Taita Diospaj Churi Jesús, canga ñucahuanga, ¿imatata ricunata charingui? Taita Diospaj shutipimi, ama llaquichihuaichu nishpa juramentuchini— nircami.

⁸—Mapata rurachij aya, cai runamanda llujshi ninimi— nishpa Jesús mandajpimi, chashna caparijurca.

⁹Jesusca, chashna nishpallami: —¿Ima shutita cangui?— nishpa tapurca. Shina tapujpimi chai runaca, cashna nirca: —Huaranga Huaranga shutimi cani. Ñucanchica, ashtaca ashtacacunamari canchi— nircami.

¹⁰Shina nishpami cai llactamandaca, ama caruman llujchishpa cachahuaichu— nishpa, Jesustaca mañajurca.

¹¹Chai urcu ladollapimi, ashtaca ashtaca cuchicuna micushpa purinajurca.

¹²Shina cajpimi, chai ayacunaca: —Chai cuchicunapi yaicuchun, ñucanchitaca cachahuai— nishpa, Jesustaca mañanajurca.

¹³Shina nijpimi, chai cuchicunapi yaicuchun saquirca. Mapacunata rurachij chai ayacuna chai runamanda llujshishpaca, cuchicunapi yaicujhuanmi chai cuchicunaca, jaca jahua patamanda cuchaman huashajushpa huañurca. Chai cuchicunaca, ishcai huarangashnami carca.

¹⁴Cuchicunata michijcunaca, paicuna causanajuj pueblopipash, llactacunapipash villangapajmi ninanda calpanajurca. Shina villajpimi, ima tucushcatapash ricungapaj, tucuilla gentecuna shamunajurca.

¹⁵Jesuspajman chayamushpaca, ashtaca ashtaca aya jundashpa llaquichijpi causajuj runa ali tucushca tiajujtami ricunajurca. Chai runaca, churajunatapash aliguta churajushca, ali juizupimi tiajurca. Shinata ricushpami gentecunaca, ninanda manllarinajurca.

¹⁶Chai gentecunamanmi, aya jundashca runa imashna ali tucushcatapash, cuchicuna imalla tucushcatapash ricushcacunaca villanajurca.

¹⁷Chaimandami Jesustaca: —Cai ñucanchi llactamandaca ripailla— ninajurca.

¹⁸Shina nijpimi Jesusca, canoapi tiarirca. Shina tiarijpimi, ayacunata llujchi tucushca runaca: —Ñucatapash pushahuayari— nijurca.

¹⁹Ashtahuangarin Jesusca, chai runataca na paihuan richun saquishpami, cashna nirca: —Cambaj huasiman rilla. Cambaj familiapajman rishpa, canman Jatun Dios cai jatun alita rurashcata villagri— nircami.

²⁰Shina nijpi chai runa rishpaca, paiman Jesús imashna chai jatun alita rurashcatami, tucuilla Decápolis shuti pueblocunapi villai callarirca. Shina villajpimi, tucuicuna ninanda manllarinajurca.

²¹Jesusca, canoapi tiarishpami, cutin chai cuchataca chimbarca. Chai cucha manñapi shayajujpimi, ashtaca ashtaca gentecuna paipajman tandanajumurca.

²²Chaimanmi, tandanajuna huasipi mandaj puramanda Jairo shuti runapash shamurca. Jesusta chai runa ricushpaca, ñapashmi paipaj ñaupajpi cungurirca.

²³Paica cashna nishpami, Jesustaca ninanda mañajurca: —Ñuca ushigumi ña huañugrijupan. Paipaj umapi cambaj maquita churangapaj ripashunyari. Shina churajpica, quishpirishpa causangallami— nircami.

²⁴Shina nijpimi, Jesusca chai runapaj huasiman rirca. Paitaca, ashtaca ashtaca gentecunami saruripi catishpa rinajurca.

²⁵Chaipica, yahuar shamujuj ung:uihuan chunga ishcai huatata huañujujlla causajuj huarmipashmi rijushca carca.

²⁶Chai huarmica, chashna nanaillahuan causajushpami, jambijcunapajman caita chaita rijun carca. Shina jambirijushpallami, imaguta charishcatapash tucuillata tucuchishca carca. Ima jambipash na chayajpimi, ashtahuan ashtahuan anllayajurca.

²⁷Chai huarmica, Jesusmanda parlanajujta uyashpami, gentecunapaj chaupita yaicushpa, Jesús jahualla churajushcapica huashamanda tacarirca.

²⁸Chai huarmica: “Jesús churajushcapi tacarishpalla ali tucushallami” yashpami tacarirca.

²⁹Jesuspaj churajushcapi tacarijhuanga, yahuar shamujujca ñapash chaquircallami. Shina tucushpami chai huarmica, astinshna llaquichijuj chai nanaimanda ali tucushcata yacharca.

³⁰Shina ali tucujpica, ñuca ushaihuan maijandachari ñami alichini yashpami, Jesusca tigrarishpa ricurca. Shina ricushpaca: —¿Maijanda ñuca churajushcapi tacarircanguichi?— nishpami, chai tucui gentecunataca tapurca.

³¹Shina tapujpimi paipaj yachajujcunaca, cashna ninajurca: —Cai tucui gentecunami, candaca saruripi catimunajun. ¿Chaitaca, na ricunshnachu: ‘¿Pita ñucapi tacarircanguichi?’ nishpa tapujungui?— ninajurcami.

³²Ashtahuangarin maijan paita tacarishcatapash ricungapajmi, Jesusca muyundita ricujurca.

³³Shina ricujujpimi chai huarmica, ñami ali tucurcani yashpa, ninanda manllarishpa chujchurirca. Shina ali tucushca cashpami, Jesuspaj ñaupajpi cungurishpaca, na llullashpa tucuita villajurca.

³⁴Shina villajpimi Jesusca, cashna nirca: —Ñuca huahualla, ñucata tucui shunguhuan crishpami quishpirishcangui. Cunanga, ninanda cushijushpa rilla. Astinshna llaquichijuj chai nanaica, cutinga na llaquichingachu— nircami.

³⁵Shina nijujpillatami, tandanajuna huasipi mandaj Jairopaj huasimandaca, ñapash huaquin runacuna shamushpa, cashna ninajurca: —Cai Yachachijtaca, ¿imapajta yanga yanga fiñachijungui? Cambaj ushiguca, ñamari huañurca— ninajurcami.

³⁶Ashtahuangarin chashna ninajujta Jesús uyashpami, tandanajuna huasipi mandaj chai runataca: —Ama manllaichu, ñucatalla ali crihuai— nirca.

³⁷Jesusca, tucuicunata saquishpami Pedrota, Jacobota, chai Jacobopaj huauqui Juandalla pushashpa rirca.

³⁸Tandanajuna huasipi mandaj runapaj huasiman Jesús chayashpaca, gentecuna ninanda caparishpa huacanajujta, llaqui llaqui tianajujtami ricurca.

³⁹Huasi ucuman Jesús yaicushpaca, cashnami nirca: —¿Imashpata cangunaca, cashna caparishpa huacanguichi? Cuitsaguca, na huañushcachu, puñuitallami puñujun— nircami.

⁴⁰Shina nijpimi, Jesustaca asishpa ricunajurca. Ashtahuangarin Jesusca, tucuillata canllaman llujchishpami, chai cuitsagupaj taitata, mamata, chai quimsa yachajujcunatalla pushashpa, chai cuitsagu sirijuj ucuman yaicurca.

⁴¹Chaipica, chai cuitsagupaj maquita japishpami: —Talita cumi— nirca. Chashna nishpaca: “Cuitsagu, candaca jatari ninimi” nijunmi.

⁴²Shina nijpica, chai chunga ishcai huatata charij cuitsaguca, jatarishpa puri callarircallami. Shina purijujta ricushpami, gentecunaca ninanda manllarirca.

⁴³Ashtahuangarin Jesusca, pai chashna rurashcataca pimambash ama villachun nishpami, cutin cutin nijurca. Shina nishpallami: —Cai cuitsaguman micunaguta carapaichi— nishpa mandarca.