Read Imbabura Highland Quichua MARCOS 8 Bible Online

MARCOS 8 - Imbabura Highland Quichua bible

MARCOS 8

¹Chai punllacunapimi, ashtaca gentecunaca ima micunatapash na apashpa, Jesuspajman shamushca carca. Chaimandami Jesusca, paipaj yachajujcunata cayashpa cashna nirca:

²—Cai tucui gentecunatami, ninanda llaquini. Ña quimsa punllatami, paicunaca ñucahuan caipi. Paicunaca, ima micunagutapash na charinllu.

³Ashtacacunami, caru llactacunamanda shamushca. Paicunata na micuchishpa, yarjaita huasiman tigrachijpica, chaupi ñambillami na ri ushashpa urmanga— nircami.

⁴Shina nijpimi, paipaj yachajujcunaca: —Cai jichushca pambapica, ¿maimandata micunata carashun nipangui?— nishpa tapunajurca.

⁵Shina tapujpimi: —Cangunaca, ¿mashna tandatata charinguichi?— nishpa, Jesusca tapurca. Shina tapujpimi, paipaj yachajujcunaca: —Canchis tandagullami tian— ninajurca.

⁶Shina nijpimi Jesusca, chai tucui gentecunata: “Alpagupi tiaripaichi” nirca. Ña tiarijpica, chai canchis tandaguta japishpami Jesusca, Diosta pashi nirca. Chai tandaguta asha asha chaupishpaca, tucuicunapaj ñaupajpi churachunmi, paipaj yachajujcunaman curca. Paicunaca, tucuilla gentecunamanmi caranajurca.

⁷Shinallata paipaj yachajujcunaca, uchilla pijicunatapash huaquingutallami charishca carca. Chai pijimandapash, Diosta pashi nishpa mañashpami: —Caigutapash carapaichi— nishpa Jesusca, paipaj yachajujcunaman curca.

⁸Shina carajpimi chai gentecunaca, na munangacaman micunajurca. Paicuna na micui ushashcataca, canchis canasta jundatami, paipaj yachajujcunaca tandachirca.

⁹Chai micushpa tianajuj gentecunaca, chuscu huarangashnami carca. Paicunataca tucuillata cayacaman nishpami, Jesusca cacharca.

¹⁰Chai jipaca Jesusca, paipaj yachajujcunandi canoapi tiarishpami, Dalmanuta shuti llactaman rirca.

¹¹Chai jipami fariseocunaca, Jesuspajman shamushpa ninanda nalicachishpa rimai callarirca. Imata tigrachijpipash juchachingapaj munashpami, jahua pachamanda imatapash rurashpa ricuchijuchun mañanajurca.

¹²Shina nijpimi Jesusca, paipaj espiritupi ninanda llaquirishpa, cashna nirca: —Cunan viñaicunaca, ¿imashpata imatapash rurashpa ricuchijuchun mañan? Na llullashpami, cangunataca cashna nini: Cunan miraicunamanga, imatapash na rurashpa ricuchishcachu canga— nircami.

¹³Shina nishpallami fariseocunataca saquishpa, cutinllata Jesusca canoapi tiarishpa, cucha caishuj manñaman chimbarca.

¹⁴Jesuspaj yachajujcunaca, tandacunata apanata cungashpami, shujlla tandagutalla apashpa canoapi rinajushca carca.

¹⁵Ña cuchata rijushpami Jesusca, paipaj yachajujcunata cashna nishpa mandarca: —Aliguta uyahuaichi. Pactarallapash fariseocunapaj, Herodespaj levaduratara chasquinguichiman— nircami.

¹⁶Shina nijpi paicunapura parlarishpaca: —Tandata na apamushcata yachashpami, shina nijun— ninajurca.

¹⁷Paipaj yachajujcuna chashna parlanajujta yachashpami, Jesusca cashna nirca: —¿Imashpata tandaca illanchimari ninajunguichi? Ñuca imata rurashcatapash, ¿narachu entendi ushanguichi, narachu yachai ushanguichi? ¿Cunangaman shinlli shungurachu canguichi?

¹⁸Ñavita charishpapash, ¿nachu ricunguichi? Rinrita charishpapash, ¿nachu uyanguichi? ¿Nachu yaringuichi?

¹⁹Picha tandata chaupishpaca, picha huaranga runacuna micuchunmi cararcani. Chai puchushcataca, ¿mashna canasta jundatata tandachircanguichi?— nijurcami. Shina nijpica: —Chunga ishcai canasta jundatami tandachircanchi— ninajurcami.

²⁰Jesusca cashnatapashmi nirca: —Canchis tandata chaupishpami, chuscu huaranga gentecuna micuchun cararcani. Chai puchushcataca, ¿mashna canasta jundatata tandachircanguichi?— nircami. Shina nijpimi: —Canchis canasta jundatami tandachircanchi— ninajurca.

²¹Shina nijpimi: —¿Chashna cajpitachu nara ali yachai ushanguichi?— nishpami Jesusca, paipaj yachajujcunataca tapurca.

²²Chai jipami, Betsaida shuti puebloman Jesusca chayagrirca. Chaipica, shuj ñausa runaguta apamushpami, maquihuan tacarichun Jesustaca mañanajurca.

²³Shina mañajpimi, chai ñausa runagutaca, maquimanda aisashpa, chai uchilla llactamanda shuj ladoman pusharca. Shina pushashpami Jesusca, chai ñausa runagupaj ishcandi ñavipi t'ucata churashpa, umapi maquita churashpa: —¿Imagutapash ricui ushanguichu?— nishpa tapurca.

²⁴Shina nijpimi, chai ñausa runagu ricushpaca: —Quirucunashna purinajujtami, gentecunataca ricuni— nijurca.

²⁵Shina nijpimi Jesusca, chai runapaj ñavi jahuapi cutin maquita churarca. Shina churajpi ali tucushpaca, ñavi pactashcacaman aligutapacha tucuita ricurcallami.

²⁶Shina alichishpaca: —Cai uchilla llactapica, ama yaicunguichu. Pimambash, ama chaipica villanguichu— nishpami Jesusca, chai runataca huasiman cacharca.

²⁷Chai jipami, Cesarea Filipo shuti pueblo ladolla uchilla llactacunaman Jesusca, paipaj yachajujcunandi rijurca. Ña chaupi ñanda rijushpami: —Gentecunaca ñucataca, ¿maijan yashpashi ricuhuan?— nishpa, paipaj yachajujcunataca tapurca.

²⁸Shina nijpimi paicunaca, cashna nishpa tigrachinajurca: —Huaquingunaca, Bautizaj Juanmi canga ninajunmi. Huaquingunaca, Profeta Eliasmi canga ninajunmi. Shujcunaca, Profeta puramanda maijambashmi canga ninajunmi— ninajurcami.

²⁹Shina ninajujpimi: —¿Cangunaca, cutin maijan nihuanguichita?— nishpa, Jesusca tapurca. Shina tapujpimi: —Canga, Quishpichij Cristomi cangui— nishpa, Pedroca tigrachirca.

³⁰Shina nijpimi, Jesusca: —Ñuca maijan cajtapash, pimambash na villanachu canguichi— nijurca.

³¹Shina nishpallami Jesusca, paipaj yachajujcunaman cashna nishpa yachachi callarirca: —Runa Aichayu tucushca ñucaca, ninanda llaquichi tucunapachami cani. Mandaj rucucunapash, curacunata mandajcunapash, mandashca shimita yachachijcunapash, ñucataca na ricunayachishpa huañuchijpi huañunapachami cani. Shina huañushpapash, quimsa punllahuanga causarishallami— nijurcami.

³²Chaitaca, paipaj yachajujcuna aligutapacha yachachunmi villajurca. Shina nijpimi Jesustaca, paitalla shujman pushashpa, Pedroca ninanda jarcashpa rimajurca.

³³Ashtahuangarin Jesusca, paipaj yachajujcunata tigrarishpa ricushpami, Pedrotaca ninanda jarcashpa rimashpa cashna nirca: —¡Ñuca ñaupajmanda anchuri, Satanás! Canga, Taita Dios imata pactachigrijujtaca na yachanguichu. Ashtahuangarin gentecuna imata yarijujtallami nijuhuangui— nircami.

³⁴Shina nishpallami Jesusca, paipaj yachajujcunatapash, caishuj gentecunatapash cayashpa cashna nijurca: —Maijan cashpapash ñucata catingapaj munashpaca, paipaj causaita na llaquishpa, paipaj cruzta aparinshna ñucata catihuachun.

³⁵Maijan cashpapash paipaj causaitalla quishpichingapaj munashpaca, chingaitami chinganga. Ashtahuangarin ñucata catijushcamanda, ali villaita villajushcamanda huañuchi tucushpaca, quishpiringapachami.

³⁶Shuj runa cai pachapi ima tiajta tucuita japishpapash, paipaj alma chingaita chingagrishpaca, ¿ima alita canga?

³⁷Chashna chingashpaca, paipaj almamandaca runaca, ¿imatashi cui ushanga?

³⁸Cazarashca jahua shujcunahuan causanshna juchayu cai gentecunapi ñucamandapash, ñuca villashca shimicunatapash villanata pinganayachijpica, Runa Aichayu tucushca ñucapashmi, jucha illaj angelcunahuan, ñuca Taita punchapamba tiajunshna shamushpa, paitaca pingaichisha— nijurcami.