Read Imbabura Highland Quichua MARCOS 9 Bible Online

MARCOS 9 - Imbabura Highland Quichua bible

MARCOS 9

¹Jesusca, cashnatapash nircarami: —Na llullashpami, cangunataca cashna nini: Taita Dios ninan ushaihuan mandajujtami ricunguichi. Chaitaca, caipi shayanajuj puramanda huaquingunaca, nara huañushpallatami ricunguichi— nircami.

²Shina villajushpami, sucta punlla jipaca Pedrotapash, Jacobotapash, Juandapash, paicunatalla pushashpa Jesusca urcuman rirca. Paicunapaj ñaupajpimi, punchapamba tucushpa Jesusca ricurirca.

³Pai churajushcapash, yura yura rasushna punchapamba tucushpami ricurirca. Cai pachapica, pipash na chashna yuraj yurajtaca tajshai ushanllu.

⁴Shinallata Eliaspash, Moisespash Jesushuan parlanajujtami, paipaj yachajujcunaca ricurca.

⁵Shina ricushpami Pedroca, Jesusta cashna nirca: —Ñucanchica, alipajmari shamupashcanchi, Yachachij. Cunanga, quimsa chugllagutami rurapashun ninchi. Shujtaca canman, shujtaca Moisesman, shujtaca Eliasmanmi ruragrinchi— nircami.

⁶Chai quimsa yachajujcunaca, ninanda manllarishpa ricunajushpami, Pedroca paillata imata nijushcatapash na yachai usharca.

⁷Shina nijujpillatami, fuyu llandushpa paicunataca, ñapash quilparca. Chai fuyu ucumandaca, cashna rimajmi uyarirca: —Caimi, ñuca juyashca Churigu. Paitami uyana canguichi— nircami.

⁸Shina nishca jipami, chai yachajujcunaca muyundi ricunajurca. Shina ricushpaca pipash illajpi, Jesuslla paicunahuan shayajushcatami ricunajurca.

⁹Chai urcumanda urai shamunajushpami Jesusca, chai quimsa yachajujcunataca cashna nirca: —Canguna ricushcataca, pimambash na villanachu canguichi. Runa Aichayu tucushca ñucami, huañuchi tucushpapash, huañushcacunapaj chaupimanda causarina cani. Chai jipaca, canguna ricushcataca villanguichilla— nircami.

¹⁰Shina nishcata cazushpami, pimambash na villanajurca. Ashtahuangarin paicunapura parlarishpami: —‘Huañuchi tucushpapash causarishami’ nishpaca, ¿imamandashi shina nijun?— ninajurca.

¹¹Shina ninajushpami: —Mandashca shimita yachachijcunaca, ¿imashpata: ‘Eliasrami punda shamunga’ ninajun?— nishpa, Jesustaca tapunajurca.

¹²Shina tapujpimi Jesusca, cashna nishpa tigrachirca: —Na llullashpami nini: Elías ñaupashpa shamushpami, tucui imagutapash alichijunga. Runa Aichayu tucushca ñucata ninanda na ricunayachishpa llaquichinamandaca, ¿imashnata escribishca tiajun?

¹³Ashtahuangarin canguna yachachunmi, cashna villani: Eliasca ñami shamurca. Paitaca, escribishcapi nijunshnallatami, paicuna tucui ima munashcata ruranajurca— nijurcami.

¹⁴Jesusca, paita shuyanajuj yachajujcunapajman chayamushpami, ashtaca gentecuna paicunataca chaupipi churashca shayanajujta ricurca. Chai yachajujcunahuanga, mandashca shimita yachachijcunapash fiñanajushpa rimarinajujtami ricurca.

¹⁵Chai tucuilla gentecunaca, Jesús shamujujta ricushpami, manllarishpa tuparingapaj calpanajurca. Paita tuparishpaca, alillachu shamujupangui ninajurcami.

¹⁶Chai jipami: —¿Imatata chaicunahuanga nirinajunguichi?— nishpa Jesusca, paipaj yachajujcunata tapurca.

¹⁷Shina tapujpimi, chai gentecunamanda shuj runaca, Jesustaca cashna nijurca: —Yachachij, ñuca churigutami upayachij aya jundashca cajpi, cambajman apamuparcani.

¹⁸Chai ayami, maipi cashpapash juizuta tucuchishpa alpapi urmachin. Quirutapash canirishpami, babasta shimiman shitapan. Shina cashpami, ashtahuan tulluyashpa catijupan. Ayata llujchipaichi nishpami, cambaj yachajujcunaman mingajuparcani. Ashtahuangarin paicunaca, na llujchi usharcachu— nijurcami.

¹⁹Shina nijpimi Jesusca, paicunata cashna nirca: —¡Ñucata napacha ali crij miraicunalla. ¿Ima horascamanda cangunahuanga, cashna cashayari? ¿Ima horascamanda cangunahuanga llaquirijushallayari? Chai huambragutaca, caiman apamugrichi— nircami.

²⁰Shina apamujpi chai aya, Jesusta ricushpaca, chai huambrataca alpapi urmachishpami, ninanda chujchuchirca. Chai huambraca, shimipash babasapami caiman chaiman shitarijurca.

²¹Shina sirijujpimi, chai huambrapaj taitataca: —¿Ñachu unaita cashna causajun?— nishpa, Jesusca tapurca. Shina tapujpimi chai taitaca, cashna nijurca: —Huahuamandapachami cashna causajupan.

²²Ayaca, huañuchingapaj munashpami ninacunapi, yacucunapi cutin cutin shitajunlla. Can imashnallapash alichi ushashpaca, ñucanchita llaquishpa ayudahuayari— nijurcami.

²³Shina nijpimi Jesusca, cashna nirca: —Can ali crijpica, ali tucungallami. Maijambash ali crijpaca, imatapash rurai ushanallami— nircami.

²⁴Shina nijpimi chai huambrapaj taitaca, cashna nishpa caparirca: —Ari, crinipachami. Ashtahuan tucui shunguhuambacha cringapaj ayudahuai— nircami.

²⁵Jesusca, ashtaca gentecuna jundamujta ricushpami, mapata rurachij ayataca ninanda rimashpa cashna nirca: —Cai huambrata upayachishpa, rinripash ama uyachun charij aya, candaca llujshi ninimi. Cutinga, na tigrashpa yaicunguichu ninimi— nircami.

²⁶Shina nijpimi, chai huambrataca ninanda caparichishpa, ninanda chujchuchishpa ayaca llujshirca. Shina llujshijpimi, chai huambraguca huañushcashna sirijurca. Chashna sirijujta ashtaca gentecuna ricushpaca: —Huañushcamari— ninajurcami.

²⁷Chashna ninajujpipash chai huambragutaca, maquimanda aisashpami Jesusca jatarichirca. Shina jatarichijpica, aliguta shayarircallami.

²⁸Chai jipami Jesusca, shuj huasiman yaicurca. Chaipimi: —¿Imashpata ñucanchica, chai ayataca na llujchi usharcanchi?— nishpa, paipaj yachajujcunaca tapunajurca.

²⁹Shina tapunajujpimi Jesusca, cashna tigrachirca: —Na micushpa ninanda Diosta mañashpallami, chashna ayataca llujchi ushana— nircami.

³⁰Chaimanda llujshishpaca, Galilea llactatami yalinajurca. Chaita yalijujtaca, pipash ama yachachunmi Jesusca munarca.

³¹Jesusca, paipaj yachajujcunaman yachachishpandi rijushpami, cashna nirca: —Runa Aichayu tucushca ñucataca, runacunapaj maquipi japichihuangami. Paicunami ñucataca huañuchihuanga. Huañuchijpipash, quimsa punllahuanga causarishallami— nircami.

³²Ashtahuangarin imamanda chashna yachachijujtapash, paipaj yachajujcunaca na ali yachai usharcachu. Na yachai ushashpa manllashpami, na tapui ushanajurca.

³³Jesusca, Capernaum shuti puebloman chayashpami, huasiman chayarca. Chai huasipi cashpami: —Cangunaca, ¿imatata ñandaca parlashpandi catimurcanguichi?— nishpami Jesusca, paipaj yachajujcunata tapurca.

³⁴Ashtahuangarin paicunaca: “¿Maijanshi ashtahuan yali ali canchi?” nishpandi, ñanda shamunajushca cashpami, upalla uyanajurca.

³⁵Shinamandami Jesusca tiarishpa, paipaj chunga ishcai yachajujcunata cayashpa cashna nirca: —Maijambash punda cangapaj munashpaca, tucuicunapaj jipa tucushpa tucuillapaj servij cachun— nircami.

³⁶Shina nijushpami, shuj huahuata paicunapaj chaupiman churamurca. Chai huahuata marcashpami, Jesusca paicunata cashna nirca:

³⁷—Maijambash ñuca shutipi, shuj huahuaguta cai huahuatashna chasquishpaca, ñucatami chasquin. Shina chasquishpaca, na ñucatalla chasquinllu. Ashtahuangarin ñucata cachamuj Taitatapashmi chasquin— nircami.

³⁸Shina nijujpimi Juanga, cashna nishpa tigrachirca: —Yachachij. Cambaj shutipi rimashpami, shuj runaca ayacunata gentecunamanda llujchijurca. Paica, ñucanchihuanga na cumba tucushpa, canda catijunllu. Shinata ricushpami, ama chashna ruraichu nishpa jarcarcanchi— nircami.

³⁹Shina nijpimi Jesusca, cashna nirca: —Na jarcashpa saquinallami canguichi. Maijan runapash, ñuca shutipi rimashpa, pipash na rurai ushanallata rurashca jipaca, ñucata nalicachishpaca napacha rimai ushangachu.

⁴⁰Maijambash ñucanchita na fiñashpa purijushpaca, ñucanchi purallatami.

⁴¹Canguna Cristopaj cajpimi, maijan cashpapash shuj pilchi yacugutallapash ñuca shutipi caranga. Na llullashpami, cangunataca cashna nini: Cangunaman chashna carajcunaca, Dios carajpi paicuna japinataca napacha chingachingachu.

⁴²Maijambash cai uchillagucunashna ñucata crishpa catinajujta nitijachinshna pandachij runataca, molino jatun rumita cungapi huatashpa, mama cuchapi shitashpachari ashtahuan ali canman.

⁴³Cambaj maqui imatapash nalita rurachingapaj munajpica, muchunguilla. Chashna shujlla maquihuan causaita causangapaj rinami, cambaca ashtahuan ali. Ashtahuangarin pipash na huañuchi ushanalla ucu pacha ninapi ishcandi maquihuan rupangapaj rinaca, napacha alichu.

⁴⁴Ucu pachapica, jurucunapash na huañunllu, ninapash rupaita rupajunllami.

⁴⁵Shinallata cambaj chaqui, nalita rurachun pushajujpica, chaquitapash muchunguilla. Chashna shujlla chaquihuan causaita causangapaj rinami, cambaca ashtahuan ali. Ashtahuangarin pipash na huañuchi ushanalla ucu pacha ninapi ishcandi chaquihuan rupangapaj shitai tucunaca, napacha alichu.

⁴⁶Ucu pachapica, jurucunapash na huañunllu, ninapash rupaita rupajunllami.

⁴⁷Shinallata cambaj ñavi, imatapash nalita rurachingapaj munajpica, surcushpa shitangui. Taita Dios mandajuj llactaguman, shujlla ñavihuan yaicunami, cambaca ashtahuan ali. Ashtahuangarin ishcandi ñavihuan, ucu pachaman shitai tucunaca, napacha alichu.

⁴⁸Ucu pachapica, jurucunapash na huañunllu, ninapash rupaita rupajunllami.

⁴⁹Ninahuanmi, tucuicuna cachihuan javi tucushcashna canga. Diosman animalta carashpa huañuchishpa, cachihuan javishcashnami canga.

⁵⁰Cachica aligumi. Ashtahuangarin cachi amindayajpica, ¿imahuanshi mishquiyachi ushanguichiman? Cachigushnami, cangunallata aligutapacha causana canguichi. Caishuj chaishuj na fiñanajushpa, aligutapachami causana canguichi— nijurcami.