Read Imbabura Highland Quichua LUCAS 10 Bible Online

LUCAS 10 - Imbabura Highland Quichua bible

LUCAS 10

¹Chai jipami, canchis chunga runacunata Jesusca agllarca. Paicunataca, pai yalina pueblocunapi, llactacunapi villashpa ñaupachunmi, ishcai ishcailla agllashpa cacharca.

²Shina cachajushpami Jesusca, paicunata cashna nijurca: “Granota tandachinaca, ashtaca ashtacamari. Shina cajpipash, tandachijcunaca huaquinllami. Chaimandami, granota tandachijcunata cachamuchun, chagrayu Dueñota ninanda mañana canguichi.

³Cunanga, richilla. Cangunataca, atujcunapaj chaupipi llamagucunata cacharinshnami cachajuni.

⁴Cucavi muchilatapash, culqui muchilatapash, chaquipi churajunatapash na apashpa rinachu canguichi. Ñambi maijanhuan tuparishpapash, alillachu canchi nishpaca, na shayarinachu canguichi.

⁵Maijan huasiman chayashpapash: ‘Cangunaman Taita Dios ali causaita carachun’ ninami canguichi.

⁶Maijambash chaipi aliguta chasquij tiashpaca, casilla aligutapachami causanajunga. Ashtahuangarin chai shimita na chasquijpica, cangunamanllatami tigranga.

⁷Cangunata aliguta mingachishpa, imaguta carajpipash micushpa, ufiashpa chai huasipilla mingarishpa tianajunguichilla. Imaguta rurashpapash, chaimandallata japinatami charin. Huasin huasinga, na purinachu canguichi.

⁸Maijan puebloman chayajpipash, cangunata chasquishpa micunaguta carajpica, imaguta cashpapash micunallami canguichi.

⁹Huañujujcuna chaipi tiajpica, alichinguichilla. Shinallata: ‘Taita Dios mandanaca, ñami pactamushca’ nishpa villanguichi.

¹⁰Maijan puebloman chayajpipash, cangunata na mingachingapaj munajpica, ñanman llujshishpa, cashna ninguichi:

¹¹‘Cangunapaj puebloman chayamujpi, ñucanchi chaquipi alpa catijushcatapash, cangunaca nalicuna cajpimi chafsinchi. Taita Dios mandanaca ñami pactamushca. Chaitaca yarianguichi’ nishpa ringuichi.

¹²Cangunataca cashnami nini: Dios ricuchijui punllapimi, chai pueblopi causajcunataca, Sodoma shuti pueblopi causashca gentetapash yali ashtahuan llaquichinga.

¹³Corazín shuti pueblopi causajcunalla, ¡aij imachari tucunguichi! Betsaida shuti pueblopi causajcunalla, ¡aij imachari tucunguichi! Cangunahuan cashpami, pipash na rurai ushanallacunata rurajurcani. Tiro shuti, Sidón shuti pueblocunapi cashna rurashca cajpica, ninanda llaquirishpa uchami, Diospajman tigrarinman carca. Paicuna ninanda llaquirishcata ricuchingapaca, cañamuta churajushpami, uchufahuan shitarinman carca.

¹⁴Dios llaquichijui punllapimi, Tiro shuti, Sidón shuti pueblocunapi causashca gentecunatapash yali ashtahuan cangunataca llaquichinga.

¹⁵Capernaum pueblopi causajcuna, cangunaca jahua pachaman apai tucushunllami yanguichimi. Ashtahuangarin, ucu pachamanmi shitai tucunguichi.

¹⁶Canguna villajpi uyashpa cazujcunaca, ñucatami cazunajun. Ashtahuangarin cangunata yangapi churajcunaca, ñucatami yangapi churanajun. Ñucata yangapi churajcunaca, ñucata cachamuj Taitatami yangapi churanajun” nijurcami.

¹⁷Chai canchis chunga villajcunaca, ninanda cushijushpa Jesuspajman tigramushpami: —Cambaj shutipi ñucanchi rimajpica, ayacunapash cazushpa gentecunamanda llujshircallami— ninajurca.

¹⁸Shina nijpimi Jesusca, paicunata cashna nirca: —Satanastaca, jahua pachamanda, punchapamba shitamunshna urmajtami ricurcani.

¹⁹Cangunamanmi, culebracunata, alacrangunata sarushpa, cangunata na ricunayachijpaj ushaita mishachumbash, ushaita cararcani. Chaicunaca, cangunata imata ruraitapash na ushangachu.

²⁰Cangunaca, ayacunata cazuchishpa llujchishpalla, na cushijunachu canguichi. Ashtahuangarin cangunapaj shuticuna, jahua pachapi escribishca tiajujpimi, cushijuna canguichi— nijurcami.

²¹Shina nishpallami Jesusca, Diospaj Espíritu yarichijpi ninanda cushijushpa, cashna nijurca: “Jahua pachatapash, cai pachatapash Mandajuj, ñuca Taitalla. Canga, alipacha yachajushca gentecunaman, alita yarishpa causanajuj gentecunamambash, cai yachajunataca na ricuchircanguichu. Ashtahuangarin huahuashna causajcunaman yachachishcamandami, candaca ninanda alicachini. Ari ñuca Taitalla, canga chashnatami munarcangui.

²²Ñuca Taitami, imagutapash tucuita ñucamanlla carahuashca. Pipaj Churi cajtapash, gentecunaca na yachahuanllu, ñuca Taitallami yachan. Ñuca Taitatapash, pipash na rijsinllu. Ñucallami, paipaj Churi cashpa rijsini. Shinallata paipaj Churi paipaj Taitata maijanmambash rijsichijpillami, Taitataca rijsinajun” nijurcami.

²³Shina nijushpami Jesusca, paipaj yachajujcunata tigrarishpa ricushpa, paicunatalla cashna nijurca: “Canguna ricunajushcata shujcuna paicunapaj ñavihuambacha ricushpaca, ninanda cushijuchun ninimi.

²⁴Shinamandami cangunataca, cashna nini: Canguna cunambi ricunajunguichi, chaitaca Dios ima nishcata tauca villajcunapash, jatun mandajcunapash, ninandami ricungapaj munarca. Shina ricungapaj munashpapash, paicunaca na ricurcachu. Shinallata canguna cunambi uyanajujtapash, ninandami uyanayachirca. Shina uyanayachishpapash, paicunaca na uyarcachu” nijurcami.

²⁵Ricuichi, mandashca shimita yachachij shuj runami, Jesús imata tigrachijpipash, juchachingapaj cashna nishpa shayarirca: —Causaita causagrinata ñuca japingapaca, ¿imatata rurana capani, Yachachij?— nircami.

²⁶Shina nijpimi Jesusca, cashna nirca: —Mandashcapica, ¿ima nishpata escribishca? ¿Imata nijujtata leyishcangui?— nishpami, Jesusca tapurca.

²⁷Shina tapujpimi chai runaca, cashna nishpa tigrachirca: —Mandashcapica cashnami nijun: ‘Canda Mandaj Taita Diostaca, tucui shunguhuan, tucui almahuan, cambaj tucui ushaihuan, cambaj tucui yuyaihuanmi juyana cangui. Cambaj cumba runagutapash, can juyarinshnallata juyangui’ nijunmi— nircami.

²⁸Shina nijpimi Jesusca, cashna nirca: —Aligutapachami canga tigrachingui. Chaita rurashpaca causanguipachami— nircami.

²⁹Ashtahuangarin chai runaca, imatapash cashcatapacha rurashcashnalla paillata ricuringapaj munashpami, Jesustaca: —¿Pita ñuca cumba runaguyari?— nishpa tapujurca.

³⁰Shina tapujpimi Jesusca, cashna nishpa tigrachirca: —Shuj runagumi Jerusalenmanda, Jericó shuti puebloman urai rijurca. Paitaca, shuhuacuna japishpami, imaguta charishcatapash, churajushcatapash tucuilla quichurca. Chashna quichushpaca, chaupita huañungacaman macashpami, saquishpa rirca.

³¹Chai ñandallatami, shuj curapash urai shamujurca. Ashtahuangarin chai runaguta ricushpapash, yalishpa rircallami.

³²Shinallata shuj levita nishca runapash, chai ñandallatami rijurca. Chai runapash, chai macai tucushca runaguta ricushpapash, yalishpa rircallami.

³³Ashtahuangarin Samaria llactamanda shuj runaguca, chai ñanda rijushpaca, macai tucushca runagupajman quimirishpami, sirijujta ricushpa ninanda llaquirca.

³⁴Shina llaquishpami, chai runagupajman quimirishpa, chugricunapica aceitehuan, vinohuan javishpa, finduhuan pilluchirca. Chai jipaca, paipaj burrogupi tiachishpami, mingarij huasiman apashpa cuidashpa tiajurca.

³⁵Samaria llactamanda runaguca, chai cayandi punlla rigrijushpaca, chai huasiyu runagumanmi, ishcai denario culquiguta saquirca. Shina saquishpaca, cashnami nirca: ‘Cai runaguta ali cuidapangui. Cai culquigu na pactajpipash, ñuca tigramushpaca cupashallami’ nircami.

³⁶Shuhuacuna macajpi sirijushca runagutaca, chai quimsa runacunamandaca, ¿maijanda ali cumbagushna juyashcanga?— nishpami Jesusca, chai yachachij runataca tapurca.

³⁷Shina nijpimi, chai runaca: —Macai tucushca runaguta llaquij runami canga yanimi— nijurca. Shina nijpimi, Jesusca: —Cambash, chashnallata shujcunata llaquishpa causagrilla— nirca.

³⁸Jesús rijushpaca, shuj uchilla llactamanmi chayarca. Chai llactapimi, Marta shuti shuj huarmica, paipaj huasipi Jesusta mingachirca.

³⁹Chai huarmica, María shuti ñañatami charirca. Chai Mariami, Jesuspaj ñaupajpi tiarishpa, pai villajujtaca aligutapacha uyajurca.

⁴⁰Ashtahuangarin Martaca, Jesusman micunaguta carangapajmi, alichishpa musparijurca. Shina purijushpami, Jesuspaj ñaupajman chayamushpa, cashna nirca: —Apunchi Jesús, ñucalla tucuita rurajuchun saquishpa, ñuca ñaña tiajujtaca, ¿nachu ricungui? Ayudagri nipairi— nircami.

⁴¹Shina nijpimi Jesusca, cashna nirca: —Marta, Marta. Canga, imatapash ruranatalla yariajllami musparishpa purijungui.

⁴²Ashtahuangarin shujtallami, imaguta cashpapash rurana cangui. María huarmiguca, ashtahuan aliguta ruranata yarishpami, caipi tiajun. Ama chashna tiajuchun nitaca, pipash na ushangachu— nircami.