Read Imbabura Highland Quichua LUCAS 11 Bible Online

LUCAS 11 - Imbabura Highland Quichua bible

LUCAS 11

¹Jesusca, shuj pambapi Diosta mañajujpimi, cashna tucurca: Jesús mañaita tucuchishca jipami, paipaj yachajuj puramanda shujca cashna nirca: —Bautizaj Juanbash, paipaj yachajujcunataca, Diosta mañachun yachachinmi carca. Shinallata ñucanchitapash, Diosta imashna mañanata yachachihuai, Apunchi Jesús— nircami.

²Shina nijpimi Jesusca, cashna nishpa yachachirca: —Diosta ima hora mañashpapash, cashna ninguichi: ‘Jahua pachapi tiajuj ñucanchi Taitalla, cambaj jucha illaj shutiguca, alicachi tucushca cachun. Can mandanaca, ucha chayamushpami ali canman. Imashnami jahua pachapica can munashcashna ruranajun, chashnallata cai pachapipash can munashcashna ruranajushpami ali canman.

³Punllandi ñucanchi micunagutaca, cunan punllagupash carahuailla.

⁴Ñucanchica, ñucanchita imatapash nalita rurashcacunataca ñami cungarcanchi. Chashnallata ñucanchi ima juchata rurashcatapash cungahuailla. Imatapash rurana munaicunamandapash, ucha jarcahuangui. Ashtahuangarin ima nalimandapash huacaichihuangui’ ninguichi— nijurcami.

⁵Shina nishpallami Jesusca, cashnatapash nijurca: “Cangunapaj huasiman shuj cumba runagu chaupi tuta shamushpami, cashna nijunman: ‘Taitalla, ¿nacha quimsa tandaguta mañachihuanguiman?

⁶Ñucapaj rijsij runagumi, caru llactamanda chaira chayamun. Imagutapash na carai ushashpami shamupani’ nijunmanmi.

⁷Shina nijpica, ucumanda cashna nishpami tigrachinman: ‘Ama fiñachihuaichu. Pungutapash, ña ali vichashcami. Huahuacunapash, ñucahuanmi ali puñunajun. Canman mañachingapaj jataritaca, na ushanichu’ nijunmanmi.

⁸Cangunataca, cashnami nini: Cumba cashpapash mañachingapaj na jatarijushpapash, ama yapata fiñachijuchunmi, imata mañashcata cungapaj jatarinman.

⁹Cashnatapashmi nini: Diosta mañaichi, paica carangallami. Mascaichi, taringuichimi. Punguta huactachishpa cayaichi, paica pascangallami.

¹⁰Diosta tucui mañajcunaca japingami. Mascajpash taringami. Punguta huactachishpapash, pascajpi yaicungami.

¹¹¿Maijan taitata cangunapaj huahuacuna tandaguta carahuai nishpa mañajpica, rumita caranguichiman? Na cashpaca, piji aichaguta carahuai nijpipash, ¿maijanda culebrataca caranguichiman?

¹²Shinallata lulunguta carahuai nijpica, ¿maijanda alacrandaca caranguichiman?

¹³Cangunaca nalicuna cashpapash, huahuacuna mañajpica, imatapash aligutami caranata yachanguichi. Jahua pachapi cangunapaj Taitacarin, paipaj jucha illaj Espirituta mañajpica, ¿nachu caranman?” nijurcami.

¹⁴Shuj runaguta upaman tigrachishpa charijuj ayatami, Jesusca llujchirca. Chai ayata llujshijpimi, chai runaguca ñapash rimarca. Chaita ricushpami, gentecunaca ninanda manllarirca.

¹⁵Ashtahuangarin chai puracunamanda huaquingunaca, cashnami ninajurca: —Cai runaca, ayacunata mandaj Beelzebú shuti diablopaj ushaita charishpami, ayacunataca llujchishpa cachan— ninajurcami.

¹⁶Huaquingunaca, imata tigrachijpipash juchachingapajmi, jahua pachamanda imagutapash rurashpa ricuchijuchun mañanajurca.

¹⁷Ashtahuangarin Jesusca, paicuna maitapash yarinajujta yachashpami, cashna nijurca: —Shuj llactapi mandajcuna, paicunapura fiñanajushpa shicanyarishpaca, chai llactaca llaquinayaitami tucurinman. Shinallata huasi ucu puracuna fiñanajushpaca, shicanyarishpami maitapash rishpa tucurinman.

¹⁸Chashnallata Satanás mandajuj ayacuna, paicunapura fiñanajushpa shicanyajpica, ¿pai mandashpa tiajunaca tiajunmanllachu? ‘Beelzebú shuti diablopaj ushaihuanmi, ayacunata llujchishpa cachan’ ninajujpimi, cashnaca nijuni.

¹⁹Beelzebú shuti diablopaj ushaihuan ayacunata ñuca llujchishpa cachajujpica, ¿pipaj ushaihuanda cangunapaj yachajujcunaca, ayacunata llujchishpa cachan? Shinamandami, cangunapaj yachajujcunallata cangunapaj juezcuna tucunga.

²⁰Ashtahuangarin Taita Diospaj maquihuan ushaita carajpi, ayacunata ñuca llujchijushpaca, cangunapaca Taita Diospacha mandajpi causana pactamushcatami ricuchijuni.

²¹Shuj ninan shinlli runa macanajunahuan alichirishcalla, paipaj huasita cuidajujpica, imaguta charishcapash ali tiajunllami.

²²Ashtahuangarin paitapash yali shuj ninan shinlli runa shamushpaca, yalishpa macashpami, macanajungapaj pai cushijushpa charijushcatapash quichushpa apanman. Pai imatalla charishcatapash quichushpami, cumbacunaman chaupishpa caranman.

²³Maijambash na ñucahuan cashpaca, ñucata fiñajmi. Maijambash na ñucahuan tandachishpaca, ñuca tandachingapaj munashcatapash, calpachishpami saquin.

²⁴Mapata rurachij aya shuj runamanda llujshipaca, chaquishca pambacunapimi causangapaj mascashpa purijun. Shina mascashpapash, na tarishpami: ‘Ñuca punda causajushca runapajmanllata, cutin tigrashalla’ nishpa tigran.

²⁵Shina tigrashpaca, aliguta fichashca, juyailla alichishca huasitashnami, chai runataca tarin.

²⁶Chashna tarishpaca, chai ayaca paitapash yali millai ayacunata, canchis purata pushangapajmi rin. Chai ayacunaca, tucuilla chai runapi yaicushpaca, chai runataca, punda causajushcatapash yali nalimanmi tigrachin— nijurcami.

²⁷Chashna nishpa Jesús villajujpimi: —Canda ungushpa chuchuchishpa viñachij mamaca, ninandami cushijun— nishpa shuj huarmica, gentecunapaj chaupimanda shinllita caparirca.

²⁸Shina nijpimi Jesusca, cashna nirca: —Taita Diospaj Shimita yachachijpi uyashpa pactachijcunaca, ashtahuan ninandami cushijun— nircami.

²⁹Ashtaca gentecuna tandanajushpa jundamujpimi, Jesusca cashna nijurca: —Cunan miraicunaca, nali gentecunamari. Chaimandami, imatapash juyailla rurashcata ricungapaj munashpapash, napacha ricunga. Dios ima nishcata villaj Jonás imashnami tucurca, chashnatallami ricunga.

³⁰Imashnami Nínive pueblopi causajcunapaca, Jonasca shuj ricuchina carca, chashnatallami cunan viñaicunapash Runa Aichayu tucushca ñucataca ricuhuanga.

³¹Jatun mandaj Salomón runaguca, alipacha yachajushcami carca. Pai yachachijujta uyangapaca, urai llactata jatun mandaj huarmimi, caru caru llactamanda shamurca. Chai huarmimi, Dios llaquichijui punllapica, cunan miraicunataca ninanda llaquichi tucunapachami canguichi nishpa jataringa. Ñucami, Salomondapash yali caipi cani.

³²Nínive shuti pueblopi causajcunaca, Jónas villajpimi, ninanda llaquirishpa Diospajman tigrarirca. Dios llaquichijui punllapimi, Nínive shuti pueblopi causashca gentecunaca, cunan miraicunataca ninanda llaquichi tucunapachami canguichi nishpa jataringa. Ñucami, Jonastapash yali caipi cani.

³³Michata maijan japichishpaca na pacanllu, cajón ucupillapash na churanllu. Ashtahuangarin huasi ucuman yaicujcuna micha punchayachijujpi ricushpa yaicuchunmi, michataca candeleropi churan.

³⁴Cambaj cuerpopaj michaguca, ñavimi. Shinamandami, cambaj ñavi ali cajpica, cuerpogupash tucuilla michagushnallapacha punchayachijun. Ashtahuangarin cambaj ñavi nali cajpica, cambaj tucuilla cuerpomi yana yanapi causajun.

³⁵Ricui, cambaj shungupi tiajuj michagu ama chashna yanaman tigrachunmi, aliguta yariashpa causana cangui.

³⁶Cambaj tucuilla cuerpogu michashna punchalla cashpami, na yanapishna causashpa, micha ucupishna tucuilla punchalla causangui— nijurcami.

³⁷Chashna parlashpa Jesús tucuchijpimi, shuj fariseo runaca: —Micungapaj ñuca huasiguman ripashun— nirca. Chai fariseopaj huasiman Jesús chayashpaca, micungapaj tiarircallami.

³⁸Paica, maquita na maillashpami, micungapaj tiarirca. Chaita ricushpami, fariseo runaca manllarirca.

³⁹Shina manllarijpimi Apunchi Jesusca, cashna nijurca: —Can fariseocunaca vasotapash, platopapash huashatalla maillanatami yachanguichi. Ashtahuangarin cangunapaj shungupica macashpa shuhuana yuyaihuan, imatapash nalita rurana yuyaihuanlla jundami canguichi.

⁴⁰Juizu illajcuna. ¿Nachu ima tiachumbash churaj Diosllata, shungutapash churarca?

⁴¹Canguna imata charishcatapash, shujcunaman caranami canguichi. Shina carajpimi, mapacunataca tucuilla maillanga.

⁴²¡Aij fariseocuna, ashtahuangarin cangunaca imachari tucunguichi! Cangunaca mentatapash, rudatapash, micunapi chapuna verdecunatapash, chungamanda shujgutami, Diosman caranata yachanguichi. Shina cashpapash imatapash cashcatapacha ruranataca na rurashpami, Taita Diostaca na juyashpa causanguichi. Chashna ruranataca, aliguta pactachishpami, Diosman caranatapash na saquishpa causana canguichi.

⁴³¡Fariseocuna, cangunaca aij imachari tucunguichi! Cangunaca, tandanajuna huasicunapipash, ñaupajpi tiaringapaj munanguichi. Shinallata plazacunapipash, alillachu capanguichi ninajuchunmi munanguichi.

⁴⁴Mandashca shimita yachachijcuna, fariseocuna, ¡aij imachari tucunguichi! Cangunaca mishqui shimi, jayaj shungucunami canguichi. Cangunaca, huañushcata pambashpa, gentecuna ama ricuchun imatapash na churashcashnamari canguichi. Chashna cajpimi gentecunaca, chai jahuata purinajushpapash, imatapash na yachan— nijurcami.

⁴⁵Shina nijpimi, mandashca shimita yachachij puracunamanda shuj runaca, cashna nirca: —Can cashna nishpaca, ñucanchitapashmari pingaichijungui, Yachachij— nircami.

⁴⁶Shina nijpimi Jesusca, cashna nijurca: —Mandashca shimita yachachij cangunapash, ¡aij imachari tucunguichi! Cangunaca, shuj runaman jatun quipita na ushajta apachinshnami, na pactachi ushanallata ninanda yachachinguichi. Chashna yachachishpapash, cangunallata chai quipitaca dedohuanllapash na tacarinshnami, na pactachingapaj munanguichi.

⁴⁷¡Aij cangunaca, imachari tucunguichi! Dios ima nishcata villajcunata cangunapaj ñaupa taitacuna huañuchishpa pambashca bovedacunataca, cangunami shayachinajunguichi.

⁴⁸Chashna rurashpami, cangunapaj ñaupa taitacuna huañuchishcata alicachishpa cushijunajushcataca, chashnapachami nishpa ricuchinajunguichi. Paicuna huañuchishca villajcunata pambashca bovedacunatami, cangunaca mushujyachishpa ruranajunguichi.

⁴⁹Shina cajpimi, Taita Diosca tucuita ali yachashpa, cashna nirca: ‘Ñuca ima nishcata villajcunatapash, ñucamanda villachun agllashcacunatapash cachamushami. Paicunataca, huaquingunataca huañuchingami, huaquingunataca catiriashpami llaquichinga’ nircami.

⁵⁰Cai pachata Dios rurashca punllamandapacha callarishpami, Dios ima nishcata villajcunataca huañuchinajurca. Chashna rurashcamandami Diosca, cunan viñaicunataca ninanda llaquichijunga.

⁵¹Abel runaguta huañuchi callarishpaca, Zacarías runagucamanmi huañuchinajurca. Chai runagutaca, altarhuan, Diospaj huasihuan chaupipimi huañuchinajurca. Cangunataca, cashnami nini: Paicunata huañuchishcamandaca Diosca, cunan viñaicunataca ninanda llaquichingapachami.

⁵²Mandashca shimita yachachijcuna cangunaca, ¡aij imachari tucunguichi! Diospaj Shimita gentecuna ama yachajuchunmi, cangunaca yachana llavetapash quichunshna charinguichi. Chashna cashpami, cangunapash na yachajushpa, shujcuna yachajungapaj munajcunatapash jarcanguichi— nijurcami.

⁵³Shina nijujpimi, mandashca shimita yachachijcunapash, fariseocunapash Jesustaca ninanda fiñai callarirca. Chashna fiñashpami, imatapash caita chaita tapuj tucushpa parlachinajurca.

⁵⁴Imatapash nalita tigrachijpica, Jesustaca juchachishpa llaquichingapajmi, pacalla chapariashpa chashna tapuj tucunajurca.