Read Imbabura Highland Quichua LUCAS 13 Bible Online

LUCAS 13 - Imbabura Highland Quichua bible

LUCAS 13

¹Chai punllacunapillatami, huaquin runacunaca Jesuspajman shamushpa, cashna nishpa villanajurca: “Galilea llactamanda runacuna rishpa, Diosman animalcunata carashpa huañuchinajujpimi, Pilatoca paicunatapash huañuchinajuchun cacharca. Chaimandami chai runacunapaj yahuarca, animalcunapaj yahuarhuan chapurirca” ninajurcami.

²Shina villajpimi Jesusca, paicunata cashna nijurca: “Galilea llactamanda runacunaca, chai llactapi tucui causajcunata yali ashtahuan juchayu cashpami, huañuchi tucushcanga, ¿yashpachu puringuichi?

³Cangunataca cashna nini: Na chashnachu. Ashtahuangarin ninanda llaquirishpa Diospajman na tigrarishpaca, tucuicunallatami paicunashnallata chingagringuichi.

⁴Shinallata Siloé shuti jatun pata urmashpaca, chunga pusaj runacunatami llapishpa huañuchirca. Paicunaca, Jerusalenbi causajcunata yali ashtahuan juchayu cashpami, huañuchi tucushcanga, ¿yashpachu puringuichi?

⁵Cangunataca cashnami nini: Na chashnachu. Ashtahuangarin ninanda llaquirishpa Diospajman na tigrarishpaca, tucuicunami paicunashnallata chingagringuichi” nijurcami.

⁶Jesusca, cashnahuambash chimbapurashpami parlajurca: “Shuj runaguca, paipaj alpapica jigostami tarpushcata charirca. Ña fucushcami canga yashpa, pallangapaj rishpaca, imatapash na tarircachu.

⁷Shinamandami chagrata cuidaj runataca, cashna nirca: ‘Uyapai, ña quimsa huatatami, cai yuramanda pallangapaca shamujunilla. Ashtahuangarin shuj jigostallapash na tarinichu, cuchupailla. Yangallatami, alpata huaglichishpa shayajun’ nircami.

⁸Shina nijpimi, chagrata cuidaj runaguca, cashna nirca: ‘Cunan huatagutaca saquipaira, taitalla. Chai yura siquita allashpa, huanuguta churapasha.

⁹Shina rurajpica, aliguta fucungapashchari. Na fucujpica, cuchui nihuanguilla’ nishpami tigrachirca” nijurcami.

¹⁰Samana punllapimi Jesusca, tandanajuna huasipi yachachijurca.

¹¹Chai ucupica, ña chunga pusaj huatata huañujujlla huarmimi tiajurca. Chai huarmica, aya jundashpa curcuyachishca cajpimi, imashna derecharitaca napacha usharca.

¹²Chai huarmita ricushpami Jesusca, paipaj ñaupajman cayarca. Shina cayashpami: —Cunanga, ñami chai ung:uimandaca cachari tucushca cangui— nirca.

¹³Shina nishpami Jesusca, chai huarmipaj uma jahuapi maquita churarca. Shina churajhuan derecharishpami, Taita Diostaca ninanda alicachijurca.

¹⁴Samana punllapi Jesús chashna alichijpimi, tandanajuna huasipi mandaj runaca, ninandapacha fiñashpa gentecunataca cashna nijurca: —Imata rurangapajpash, sucta punllatami charinchi. Chai punllacunapimi, alichihuai ningapaca shamuna canguichi. Samana punllapica, na shamunachu canguichi— nircami.

¹⁵Shina nijpimi Apunchi Jesusca, chai runataca cashna nijurca: —Mishqui shimi, jayaj shungu runa. Samana punlla cajpipash, maijan cashpapash, ¿nachu huagrata cashpapash, burrota cashpapash corralmanda cacharishpa, yacuta ufiachingapaj rin?

¹⁶Cai huarmica, Abrahambaj mirai purami. Satanás huatashca charijujpimi, paica ña chunga pusaj huatata huañujujlla causajushca. Samana punlla cajpipash, ¿nachu paitaca huatashcashna charijujmanda cacharichina carcani?— nijurcami.

¹⁷Jesús chashna nijpimi, paita na ricunayachij runacunaca, tucuilla pingai tucurca. Ashtahuangarin tucuilla gentecunami, Jesús chashna juyailla rurajta ricushpaca, ninanda cushijunajurca.

¹⁸Jesusca cashnatapashmi nijurca: “Taita Dios mandajujtaca, ¿imahuan chimbapurashpata yachachisha?

¹⁹Dios mandajujca, shuj runa paipaj alpapi mostaza muyuguta tarpushcashnami. Chai muyugu viñashpa, jatun quiru tucujpimi, alasyu animalcunaca malquicunapi tazinda rurashpa causanajun” nijurcami.

²⁰Jesusca cashnatapashmi nirca: “Taita Dios mandajujtaca, ¿imahuan chimbapurashpata yachachisha?

²¹Dios mandajujca, shuj huarmi quimsa batea junda jacupi levadurata chapushpa, tucuilla masa punguingacaman pacashpa saquin, chashnapachami” nijurcami.

²²Jerusalenman Jesús rijushpaca, pueblocunapipash, uchilla llactacunapipash, yachachishpandimi rijurca.

²³Paita shuj runa tapushpaca: —¿Huaquingunallachu quishpiringa, imashi, Apunchi Jesús?— nircami. Shina nijpimi Jesusca, cashna nijurca:

²⁴—Quichiji punguta yaicungapaca, shinlli tucunami canguichi. Cangunataca, cashnami nini: Ashtacacunami, chaiman yaicungapaca munanga. Shina munashpapash, na ushangachu.

²⁵Huasiyu runa jatarishpa punguta vichajpirami, cangunaca canllapi cashpaca: ‘Mingachihuai taita, punguta pascapai’ nishpa, punguta huactachishpa caparinguichi. Ashtahuangarin huasiyu runaca: ‘Cangunaca maimandachari canguichipash, na rijsinichu’ ningami.

²⁶Shina nijpimi cangunaca, cashna ni callaringuichi: ‘Canhuanmi micushpa, ufiashpa tianajun carcanchi. Ñucanchi plazacunapimi, canga yachachishpa purircangui’ ninguichimi.

²⁷Shina nijpimi cangunataca, cashna ninga: ‘Cangunataca, maimanda cajtapash na rijsinichu nijunica. Cangunaca, tucuillamari nalita rurajcuna canguichi. Caimandaca anchurichi’ ningami.

²⁸Taita Dios mandanapica, ñaupa taita Abrahambash, Isaacpash, Jacobopash, Dios ima nishcata villajcunapash, tucuillami chaipi canga. Paicunata ricushpami, cangunaca shitai tucushca cashpa, quirutapash canirishpa, ninanda huacashpa causanguichi.

²⁹Indi llujshimujmanda, indi huashajujmandapash, vichaimanda, uraimandapash gentecunaca, Taita Dios mandajujpi micungapajmi tandanajunga.

³⁰Ricuichi, huashaman churai tucushcacunaca, pundapimi churai tucunajunga. Shinallata pundapi churai tucushcacunaca, huashamanmi churai tucunajunga— nijurcami.

³¹Chai punllapimi, fariseo puracunamanda huaquin runacuna shamushpa, Jesustaca cashna ninajurca: —Herodesca, canda huañuchingapajmi munajun. Caimandaca, llujshishpa ucha ri— ninajurcami.

³²Ashtahuangarin Jesusca, paicunataca cashnami nijurca: —Richi, atujshna yachaj tucushca runaman, cashna nishpa villanguichi: ‘Cunan punllapash, cayapash gentecunamanda ayacunata llujchinami cani. Huañujujcunatapash alichinarami cani. Quimsa punllapica, ñuca imata ruranatapash tucuchishallami’ nijunmi nishpa villanguichi.

³³Ashtahuangarin cunambash, cayapash, cayandi punllapash, cai ñandaca purijunarapachami cani. Dios ima nishcata villajcunaca, Jerusalenmanda llujshishpa huañunataca na charinllu.

³⁴¡Jerusalén, Jerusalén! ¡Cangunaca, Dios ima nishcata villajcunata huañuchijcunamari canguichi! ¡Cangunaman villachun paillata cachamushca runacunatapash, rumicunahuan huañuchijcunamari canguichi! ¡Shuj atalpa, paipaj huahua pollocunata ugllanshnami, cangunataca cutin cutin tandachingapaj munarcani! Ashtahuangarin na munashpami puringuichi.

³⁵Ricui, cangunapaj huasica jichushcamari. Cangunataca, cashnami nini: ‘Jatun Diospaj shutipi shamujujtaca, Dios bendiciashca cachun’ ninajuna punllacamanmi, cunanmandapacha cangunaca ñucataca na ricuhuanguichi— nijurcami.