Read Imbabura Highland Quichua LUCAS 14 Bible Online

LUCAS 14 - Imbabura Highland Quichua bible

LUCAS 14

¹Samana punllapimi, cashna tucurca: Fariseocunata mandaj runapaj huasipi micungapajmi, Jesusca yaicurca. Shinamandami fariseocunaca, Jesús imata rurajpipash juchachingapaj, pacalla ricurianajurca.

²Chaipimi, punguishpa llaquinayaita causajuj runagu Jesuspaj ñaupajpi tiajurca.

³Chai runaguta ricushpami, mandashca shimita yachachijcunatapash, fariseocunatapash, Jesusca cashna nishpa tapurca: —Samana punlla cajpipash huañujujtaca, ¿alichinallachu, na cashpaca saquinallachu? Mandashca shimipica, ¿imashnata nijun?— nircami.

⁴Ashtahuangarin paicunaca, upalla tianajurcallami. Shina upalla uyajpimi, chai huañujuj runagutaca, maquimanda japishpa, Jesusca alichirca. Shina alichishpaca, cayacaman nishpami cacharca.

⁵Shina cachashpami Jesusca, chai fariseocunata cashna nirca: —Cangunapaj burro, na cashpaca cangunapaj huagra pugyupi huashajujpica, ¿nachu samana punlla cajpipash, ucha llujchinguichiman?— nircami.

⁶Shina nijpica, imatapash na tigrachi usharcachu.

⁷Boda huasiman cayajpi shamuj runacunaca, alicachishpa ricuchunmi, juyaillagupi tiaringapaj mascanajurca. Shinata ricushpami Jesusca, cashna chimbapurashpa parlajurca:

⁸—Cazarai bodaman shamupai nijpi rishpaca, ama punda ashtahuan ali tiarinapi tiaringuichu. Chaipi tiarichunga, candapash yali alicachi tucushca runa tiarichun, cayai tucushca tianman.

⁹Ña shamujpica candapash, chai runatapash cayaj runaca candaca: ‘Pai tiarichun, caimanda anchuripai’ ninman. Shina nijpirami, pingai tucushpa, huashaman tiaringapaj ringuiman.

¹⁰Ashtahuangarin chai bodaman cayajpi rishpaca, huashagupilla tiaringui. Chaipi tiajujta huasiyu runa ricushpami: ‘Caiguman tiarij shamupairi, cumbagu’ nishpa pushanga. Shina tiachijpimi, canhuan micushpa tiajcunaca, alicachishpa ricunga.

¹¹Chashnallatami jatun tucushpa causajtaca, Diospash pingaichinga. Ashtahuangarin na jariyashpa causajtaca, jatumbimi churanga— nijurcami.

¹²Cayaj runamandapash, Jesusca cashna nishpami yachachijurca: —Bodata rurashpaca, cambaj cumbacunata, cambaj huauquicunata, cambaj familiacunata, cambaj ladollapi tiaj charijcunataca, na cayanachu cangui. Paicunaman carashcataca, candapash cayashpami chashnallata tigrachinga. Shina carajpimi, cutin tigrashpa japijungui.

¹³Ashtahuangarin jatun micuita rurajushpaca, imagutapash na charijcunata, shuj maqui cashpa, shuj chaqui cashpapash illajcunata, jangacunata, ñausacunatami micungapaca shamupaichi nishpa carana cangui.

¹⁴Shina rurashpaca, ninandami cushijungui. Paicunaca, canman cutin tigrachishpa caraitaca na ushangachu. Ashtahuangarin can carashcamandaca, imatapash cashcatapacha rurajcunahuan causarishpami japingui— nijurcami.

¹⁵Jesús chashna nijpimi, chaipi micushpa tianajuj puracunamanda shuj runaca, cashna nirca: —Taita Dios mandajuj llactagupi micungapaj rijcunaca, maijan cashpapash ninandami cushijunga— nircami.

¹⁶Shina nijpimi Jesusca, chai runataca cashna nijurca: —Shuj runaguca, jatun micuita rurajushpami ashtacacunata cayachirca.

¹⁷Ña micuna horas chayajpica: ‘Tucuita alichishcallami tiajun. Micungapaj shamupaichilla’ nigrichunmi, paipaj servijta cacharca.

¹⁸Shamupaichi nijpica, tucuillami caita chaita ninajurca. Shuj runaca, cashnami nirca: ‘Shuj jazindatami randiparcani. Chaita ricungapajmi rijuni. Na shamui ushapanichu ninmi nigripailla’ nircami.

¹⁹Shuj runapash, cashnami nirca: ‘Picha yunta huagratami randircani. Chaicunahuan yapushpa ricugrijunirami. Chaimandami, na shamui ushapani ninmi nigripailla’ nircami.

²⁰Cutin shuj runaca chayajpica: ‘Chairallami cazararcani. Chaimandami na shamui ushani ninmi nigripailla’ nircami.

²¹Chashna nijpi tigrashpami, chai servij runaguca, amoman tucuita villagrijpi amoca, ninanda fiñarishpa chai servijtaca, cashna nishpa mandarca: ‘Shina cashpaca cunanga, ñangunaman, plazacunaman rishpa, imagutapash na charijcunata, maqui cashpa, chaqui cashpapash illajcunata, jangacunata, ñausacunata ucha pushamugripai’ nircami.

²²Chai jipami, chai servij runaguca: ‘Amo, can mandashcashna ñami pushamuni. Ucupica nara jundanllu’ nishpami villarca.

²³Shina nijpimi amoca, chai servij runaguta, cashna nishpa mandarca: ‘Ñangunaman jarcashca pata ladocunaman rishpa, cai ñuca huasipi jundamuchun, munai na munai pushamugri’ nircami.

²⁴Cangunataca cashnami nini: ‘Ñuca cayashca runacunaca, cai micunagutaca napacha micuj shamungachu’ nishpami cachajurca— nijurcami.

²⁵Ashtaca ashtaca gentecuna catishpa rinajujpimi Jesusca, paicunata tigrashpa ricushpa, cashna nijurca:

²⁶“Maijan cashpapash ñucata catingapaj munashpaca, paipaj taitata, mamata, paipaj huarmita, huahuacunata, paipaj huauquicunata, panicunata, paipaj causaitapash na llaquishpa na ricunayachishpallami, ñucapaj yachajuj tucunga.

²⁷Maijan cashpapash paipaj cruzta aparinshna ñucata na catishpaca, napacha ñucapaj yachajuj cai ushangachu.

²⁸Canguna puramanda maijambash huasiguta rurangapaj munashpaca, culquigutaca pactana, na pactanatapash, ¿nachu chaitara cuentanguichiman?

²⁹Na cuentashpa yangata huasichi callarijpica, culqui na pactajpimi, ashata callarishcalla shayajunga. Shina tucujpica tucuicunami, chai runataca asishpa ricunga.

³⁰Shina asishpami: ‘Cai runaca, huasichingapajmi callarirca. Ashtahuangarin huasichitaca, na ushashpami saquin’ ninajungami.

³¹Shinallata shuj llactata jatun mandajca, chunga huaranga soladadocunahuanmi, caishuj llactata jatun mandajhuanga macanajungapaj rijunman. Ashtahuangarin caishuj mandajca, ishcai chunga huaranga soldadocunahuan shamujujpica, ¿nachu chai rijuj runaca, aliguta yaringapaj tiarinman?

³²Na macanajui usharina cajpica, caishuj mandaj caru caruta shamujujpillatami, imashnallapash ali tucupashun nigrichun, jatun mandajpaj randi rimajcunata cachanman.

³³Chashnallatami maijambash canguna puramanda imata charishcata na tucuita saquishpaca, na ñucapaj yachajuj tucui ushanguichi.

³⁴Cachica aligumi. Ashtahuangarin cachi aminda cajpica, ¿imahuanshi mishquiyachinga?

³⁵Aminda cajpica, alpapi shitangapajpash, huanuta tandachishcapi churangapajpash, na alichu. Canllapimi yanga shitanga. Uyangapaj rinrita charishpaca, aliguta uyaichi” nijurcami.