Read Imbabura Highland Quichua LUCAS 15 Bible Online

LUCAS 15 - Imbabura Highland Quichua bible

LUCAS 15

¹Impuestota japishpa causajcunapash, juchayu gentecunapash, Jesús villajujta uyangapajmi, tucuicuna quimirimunajurca.

²Chaita ricushpami, fariseocunapash, mandashca shimita yachachijcunapash, Jesusta fiñashpa nalicachishpa cashna parlanajurca: —Cai runaca, juchayu gentecunahuan cumba tucushpami, chaicunahuan micushpa tiajun— ninajurcami.

³Shina ninajujpimi Jesusca, cashna chimbapurashpa yachachijurca:

⁴—Canguna puramanda maijambash, patsaj llamaguta charijpi, shuj llamagu chingajpica, ¿nacha iscun chunga iscun llamacunataca, jichushca pambapillata saquishpa, chai chingashca llamagutara taringacaman mascangapaj ringuichiman?

⁵Ña tarishpaca, ninanda cushijushpami, rigrapi churanguichiman.

⁶Ña huasiman chayashpaca cumbacunatapash, ladolla causajcunatapash: ‘Shamupaichi cushijungapaj. Chingashca llamagutaca ñami tariparcani’ nishpami tandachinguichiman.

⁷Cangunataca cashnami nini: Diospajman shuj juchayu gente tigrarijpica, jahua pachapi causajcunami ninanda cushijunga. Imatapash cashcatapacha rurashpa causaj, Diospajman na tigrarinata na minishtij, iscun chunga iscunmandapash yalitami cushijunga.

⁸Dracma nishca culquita chungata charijushpami, shuj huarmica shujguta chingachinman. Shina chingachishpaca, ¿nacha michata japichishpa taringacaman, ucutapash fichashpa ninanda mascanman?

⁹Ña tarishpaca cumbacunatapash, ladolla causajcunatapash: ‘Shamupaichi cushijungapaj. Chingashca dracma culquigutaca, ñami tariparcani’ nishpami tandachinman.

¹⁰Cangunataca cashnami nini: Ninanda llaquirishpa Diospajman shuj juchayu tigrarijpica, Taita Diospaj angelcunaca, ninanda cushijun— nijurcami.

¹¹Jesusca cashnatapashmi nijurca: —Shuj runagumi, ishcai churita charirca.

¹²Jipa churimi, taitataca cashna nirca: ‘Taiticu, ñucaman caranataca, cunanda carahuailla’ nircami. Shina nijpimi taitaca, imata charishcatapash chaupishpa cararca.

¹³Asha punlla jipami, taita imata carashcatapash, jipa churica tucuilla tandachishpa, caru llactaman rirca. Chaipimi, tucui nalicunata rurashpa, pai ima charishcataca, yanga yanga tucuchijurca.

¹⁴Pai charishcata yanga tucuchishca jipaca, chai llactapica ninan yarjaimi shamurca. Chaipimi, paica imagupash illajpi na pactai callarirca.

¹⁵Shinamandami, chai llactapi causajuj shuj runapajpi imatallapash rurangapaj yaicurca. Chai runaca, paipaj jazindapimi cuchicunata michishpa causachun cacharca.

¹⁶Ña yarjachishpaca, cuchicuna micunajuj micunatami micungapaj ninanda munarca. Ashtahuangarin chaitallapash, pipash na cararcachu.

¹⁷Shina purijushpami, paillata paipaj shungupi cashna yajurca: ‘Ñuca taitapaj huasipi mashna trabajaj runacunapash, micunataca ashtacatapachami charin. Paicunaca, micunatapash na munangacamanmi micunajun. ¡Ñucaca caipica, yarjaimandamari huañugrini!

¹⁸Cunanga jatarishpa, ñuca taitapajman tigrashpami, cashna nigrisha: Taiticu, ñucaca jahua pacha Diostapash, candapashmari fiñachipashcani.

¹⁹Shinamandami, ñuca churigumi cangui ni tucunataca, napacha charini. Cunanga, cambajta ruraj runashna causachunlla chasquihuayari nishami’ yajurcami.

²⁰Shina yajushpa jatarishpami, taitapaj huasiman tigrajurca. Paipaj churigu caruta shamujujta taita ricushpaca, ninandami llaquirca. Shina llaquishpaca, calpashpa tuparishpami, ugllarishpa mucharca.

²¹Shina chasquijpimi churiguca, cashna nirca: ‘Taiticu, ñucaca jahua pacha Diostapash, candapashmari fiñachipashcani. Shinamandami, ñuca churigumi cangui ni tucunataca, napacha charini’ nircami.

²²Ashtahuangarin taitaca, paipaj servijcunataca, cashnami nirca: ‘Ashtahuan juyailla ali churajunaguta llujchimushpa churachipaichi. Maquipipash surtijasguta churachipaichi, chaquipi churajunatapash churachipaichi.

²³Juyailla racu shicuta apamushpa, huañuchipaichi. Cunanga, fiestata rurashpa micushpa cushijupashunchi.

²⁴Cai ñuca churiguca, huañushcami carca. Cunanga cutin causarimushcami. Chingashcami carca, cutin taririmushcami’ nishpami, ninanda cushijushpa micui callarirca.

²⁵Punda churica, pambapi imatapash tucuita rurashpami purijurca. Ña huasiman shamujushpa chayamushpaca, ninanda tocanajujta, danzanajujtami uyarca.

²⁶Shina uyashpami, chaipi tiaj puramanda servij runata cayashpaca: ‘Huasipica, ¿imatata ruranajun?’ nishpa tapurca.

²⁷Shina tapujpica, cashnami nirca: ‘Cambaj huauquimi muyumushca. Na imapash tucushpa, ali shamushca cajpimi, cambaj taitaca chai juyailla racu shicuta huañuchigrichun mandarca’ nircami.

²⁸Shina nijpica, ninanda fiñarishpami huasiman yaicungapaca, na munarca. Shina shayajujpimi, taita llujshishpaca ucuman yaicuchun, ninanda mañajurca.

²⁹Ashtahuangarin chai churica, taitataca cashnami nirca: ‘Taiticu, ñucacarin tauca huatacunatami, candalla servishpa causajuni. Can imata mandajpipash, upallamanda rurajunillami. Shina rurajujpipash, ñuca cumbacunahuan cushijushpa micuchunga, shuj chivotallapash na carahuashcanguichu.

³⁰Cai cambaj churica, culquimanda huainayaj huarmicunahuan purishpami, can imata charishcatapash tucuchishca. Chashna rurashpa muyumujpipash, canga chai juyailla racu shicutami huañuchigrichun mandashcangui’ nircami.

³¹Shina nijpimi taitaca, cashna nirca: ‘Ñuca churigu, can ñucahuan tiajushcamandaca, ñuca imata charishcapash cambajllami.

³²Ashtahuangarin cai cambaj huauquiguca huañushcami carca, cunanga cutin causarimushcami. Chingashcami carca, cutin taririmushcami. Shina shamushca cajpimi, ninanda cushijushpa fiestataca ruranapacha tucurcanchi’ nircami” nishpami yachachijurca.