Read Imbabura Highland Quichua LUCAS 17 Bible Online

LUCAS 17 - Imbabura Highland Quichua bible

LUCAS 17

¹Jesusca, paipaj yachajujcunatami cashna nijurca: “Gentecuna nitijachinshna pandachinaca tiangapachami. Ashtahuangarin maijan pandachijca, ¡aij imachari tucunga!

²Maijandapash cai huahuagushna ñucata crijcunata pandachij runataca, jatun molino rumita cungapi huatashpa, mama cuchapi shitashpachari ashtahuan ali canman.

³Cangunallata aliguta yarishpami, causana canguichi. Maijan crijpash, canda fiñashpa juchata rurajpica, jarcashpa rimangui. Shina rimajpi ninanda llaquirijpica, pai canda imata rurashcatapash cungangui.

⁴Shinallata chai punllalla canchiscaman canda fiñachishpami, juchata ruranga. Chashna rurashpapash: ‘Ninanda llaquiripanimi’ ningapaj, canchiscaman shamujpica cunganguilla” nijurcami.

⁵Villachun Apunchi Jesús agllashcacunami: —Ashtahuan ali crina ushaita carahuai— ninajurca.

⁶Shina nijpimi Apunchi Jesusca, cashna nirca: —Jamzi mostaza muyu valigutallapash crishpa, cai sicómoro nishca quiruta: ‘Sapindi llujshishpa, mama cuchapi shayaringapaj ri’ nijpica, cazushpa rinmanllami.

⁷¿Canguna purapica maijanda, yapushpa causaj, na cashpaca michishpa causaj shuj servij runaguta charinguichi? Pambamanda pai muyumujpica, ¿maijanda: ‘Shamupai, micungapaj caigupi tiaripai’ ninguichi?

⁸¿Nacha ashtahuangarin cangunaca: ‘Ucha yanushpa, ali chumbilirishpa ñuca micuchun ufiachun carahuai. Chai jipami, cambash micushpa ufiashpa tiajungui’ ninguichi?

⁹¿Chashna mandashcata tucuita rurajpipash, chai servij runataca pashi ninllu? Na chashna ninmanllu yanimi.

¹⁰Mandashcata tucuita pactachishpaca, cangunapash shinallatami cashna nina canguichi: ‘Ñucanchica, yanga servij runacunami canchi. Imata rurana cashcatallami rurarcanchi’ ninami canguichi— nijurcami.

¹¹Jerusalenman Jesús rijushpaca, Samaria shuti llactahuan, Galilea shuti llactahuan chaupitami yalijurca.

¹²Shuj uchilla llactaguman Jesús chayajujpimi, lepra ung:uihuan huañunajuj, chungapura runacuna tuparingapaj shamunajurca. Paicunaca, carullapimi shayarinajurca.

¹³Shina shayarishpami: —¡Ñucanchita llaquihuayari, Yachachij, Apunchi Jesús!— nishpa caparinajurca.

¹⁴Shina caparijpi, Jesús ricushpaca: —Curacunapajman rishpa ricurigri— nircami. Shina nijpi rinajushpami, chai ung:uimanda mapa illaj tucurca.

¹⁵Shinamandami, paicuna puramanda shuj runaguca, ña ali tucushcata ricushpa, Taita Diostaca punchapambagumi cangui nishpa caparishpa, Jesuspajman tigramurca.

¹⁶Shina tigramushpaca, cungurishpa alpaman chayajta cumurishpami, pashi nijurca. Chai runaguca, Samaria llactamandami carca.

¹⁷Shinamandami Jesusca, cashna nirca: —Lepra ung:ui illaj tucushcacunaca, ¿nachu chungapura carca? ¿Iscun puracunaca maipita?

¹⁸Taita Diosta punchapambagumi cangui ningapaca, ¿nachu maijambash tigramuna carca? ¿Shuj llactamanda cai runagullachu tigramuna carca?— nircami.

¹⁹Shina nishpallami Jesusca, cashna nirca: —Jatarishpa rilla. Canga, ñucata crishcamandami quishpirishcangui— nircami.

²⁰—Taita Dios mandanaca, ¿ima punllata callaringa?— nishpa, huaquin fariseocuna tapujpimi Jesusca, cashna nijurca: —Taita Dios mandanaca, imatapash ricuchishpami shamunga yanguichiman.

²¹‘Caipimi mandajun, chaipimi mandajun’ nitallapash, pipash na ningachu. Ricuichi, Taita Dios mandajuca cangunapimi— nijurcami.

²²Shina nishpallami Jesusca, paipaj yachajujcunaman cashna nijurca: —Runa Aichayu tucushca ñucata, shuj punllagullapash caipi mandajushcanman nishpa, canguna ricunayachina punllacunami chayamunga. Ashtahuangarin na ricushpami causanguichi.

²³Cangunataca cashnami ninajunga: ‘Caipimi mandajun, chaipimi mandajun’ ninajungami. Chashna nijpipash, na catishpa rinachu canguichi.

²⁴Runa Aichayu tucushca ñuca tigramuna punlla chayamujpica, jahua pachamanda tucui cai pachapi punchapamba shitamunshnami shamusha.

²⁵Ashtahuangarin pundaca, cunan cai viñaicuna ninanda na ricunayachishpa llaquichijpi, llaquita apanarapachami cani.

²⁶Runa Aichayu tucushca ñuca shamui punllapica, ñaupa taita Noé causajui punllacunapi tucushcashnami tucunga.

²⁷Chai punllacunapica, jatun huambuna huasiman Noé yaicungacamanmi, gentecunaca micushpa, ufiashpa, cazarashpa, cazarachishpa causanajurca. Shina causanajujpimi, Taita Diosca yacuhuan tucuilla tucuchirca.

²⁸Shinallatami, ñaupa taita Lot causajui punllacunapipash tucurca. Chaipica, gentecunaca micushpa, ufiashpa, imatapash randishpa, jatushpa, tarpushpa, huasichishpami causanajurca.

²⁹Ashtahuangarin Sodoma shuti pueblomanda Lot shuti runa llujshijpica, jahua pachamandami ninahuan, azufrehuan tamiamushpa tucuillata tucuchirca.

³⁰Chashnallatami, Runa Aichayu tucushca ñuca tigramui punllapipash tucunga.

³¹Chai punlla chayamujpica, huasi jahuapi tiajushpaca, huasi ucumanda imata apangapajpash, ama yaicuchun ninimi. Pambapi purijushpapash, huasiman ama tigrachun ninimi.

³²Lot runapaj huarmi ima tucushcata yaringuichi.

³³Maijambash paipaj causaita quishpichingapaj munashpaca, chingaitami chingagringa. Ashtahuangarin paipaj causaita na llaquishpa huañushpaca, quishpiringami.

³⁴Cangunataca cashnami nini: Chai tutapica, ishcai purami shujlla camapi puñunajunga. Paicunataca shujtallami apanga, shujtaca saquingami.

³⁵Shinallata ishcai huarmicunami cutanajunga. Paicunatapash shujtallami apanga, shujtaca saquingami.

³⁶Shinallata ishcai runacunami, pambapi purinajunga. Paicunatapash shujtallami apanga, shujtaca saquingami— nijurcami.

³⁷Shina nijpimi, paipaj yachajujcunaca: —¿Maipita chashna tucunga, Apunchi Jesús?— nishpa tapunajurca. Shina tapujpimi Jesusca, paicunata cashna nirca: —Huañushcacuna maipi sirijpipash, chaipimi jatun angacunaca jundanga— nircami.