Read Imbabura Highland Quichua LUCAS 18 Bible Online

LUCAS 18 - Imbabura Highland Quichua bible

LUCAS 18

¹Diosta mañanataca, na shaijushpa mañashpa causachunmi, Jesusca cutin cashna chimbapurashpa parlajurca:

²“Shuj pueblopi causajuj juezca, Taita Diostapash na manllashpa, gentecunatapash na cazushpami causajurca.

³Chai pueblopillatami, shuj sapalla mamagupash causajurca. Chai mamaguca: ‘Ñucata na ricunayachij runamanda mitsashpa, imatapash cashcatapacha rurashpa carai’ nishpami, juezpajman rijurcalla.

⁴Shina rijujpipash chai juezca, unaita na uyashpa causarcallami. Ña unaipimi, paipaj shungupi cashna yajurca: ‘Diostapash na manllanichu, gentecunatapash na cazunichu.

⁵Ashtahuangarin cai sapalla huarmica, ñucata fiñachij shamujuhuanllami. Chaimandallami, imatapash cashcatapacha paiman ruragrini. Na chashna rurajpica, fiñachij shamujushpallata shaijuchihuangami’ yajurcami” nijurcami.

⁶Shina nishpallami Apunchi Jesusca, cashnatapash nirca: “Imatapash cashcatapacha na ruraj chai juez imata nishcatapash uyaichi.

⁷Taita Dioscarin, ¿nachu pai agllashcacuna tutandi, punllandi caparishpa mañanajujta uyashpaca, imatapash cashcatapacha ruranman? ¿Uyashpapash, na tigrachishpa shuyajungallachu?

⁸Cangunataca cashnami nini: Diosca, paicunamanga uchami imatapash cashcatapacha ruranga. Ashtahuangarin Runa Aichayu tucushca ñuca shamushpaca, ¿cai pachapica cashna ali crijcunata japij shamushachu, imashi?” nircami.

⁹Ñucanchillami imatapash cashcatapacha ruranchi nishpa, shujcunata yangapi churashpa purijcunamanmi, Jesusca cashna chimbapurashpa parlajurca:

¹⁰“Ishcaipura runacunami, Diospaj huasiman Diosta mañangapaj vichai rinajurca. Shujca, fariseomi carca. Shujca, impuestota japishpa causajmi carca.

¹¹Chai fariseo runa shayarishpaca, cashna nishpami mañajurca: ‘Taita Dioslla, candaca pashi nipanimi. Na caishuj gentecunashna shuhua, imatapash cashcatapacha na rurajpash, cazarashca jahua shujcunahuan causajpash na capanichu. Impuestota japishpa causaj cai runashnapash na causapanichu.

¹²Canda yarishpami semanapica, ishcai punllacaman na micushpa chishapani. Imaguta charishpapash, chungamanda shujgutaca canmanmi carapani’ nishpami mañajurca.

¹³Ashtahuangarin impuestota japishpa causaj runaguca carullaman rishpami, vichai ricuitapash na ushashpa, llaquirishpa, pechota huactarishpa: ‘Ñuca Taita Dioslla, ñuca juchasapa runata llaquihuayari’ nijurca.

¹⁴Cangunataca, cashnami nini: Impuestota japishpa causaj runagurami, imatapash cashcatapacha rurashcatashna Dios chasquijpi, huasiman tigrarca. Ashtahuangarin fariseotaca, na chasquircachu. Maijambash jatun tucushpa purijca, pingaichi tucungami. Shinallata na jariyashpa causajca, jatunyachi tucungami” nijurcami.

¹⁵Huahuacunapaj uma jahuapi maquita churachun nishpami, Jesuspajman apamunajurca. Shina apamujta paipaj yachajujcuna ricushpami, jarcashpa rimanajurca.

¹⁶Ashtahuangarin Jesusca, paicunata cayashpami, cashna nirca: —Huahuacuna ñucapajman shamunajujtaca, na jarcashpa saquinallami canguichi. Taita Dios mandajuj llactaguca, cai huahuacunashna shamujcunapajllami.

¹⁷Na llullashpami, cangunataca cashna nini: Taita Dios mandajujta shuj huahuashna na chasquishpaca, Dios mandajuj llactaman yaicuitaca, napacha ushangachu— nircami.

¹⁸Mandaj puramanda shuj runami, Jesustaca cashna tapurca: —Causaita causagrinata ñuca charingapaca, ¿imatata runana capani, aliguta Yachachij?— nishpami tapurca.

¹⁹Shina nijpimi Jesusca, chai runata cashna nirca: —¿Imashpata ñucataca, ali runagumi cangui nihuangui? Pipash alica na tianllu, Taita Diosllami alica tian.

²⁰Dios mandashca shimicunapi nijujtaca, canllata ñami yachangui. Chaipica cashnami nijun: ‘Cazarashca jahua ama shujhuan causanguichu, pitapash ama huañuchinguichu, ama shuhuanguichu. Chashnapachami nishpa ama juchachishpa villanguichu. Cambaj taitata, mamatapash ninanda alicachingui’ nijunmi— nircami.

²¹Shina nijpimi Jesusca, cashna nirca: —Mandashca shimipi chashna nijujtaca, huahuamandapachami tucuita pactachijupani— nircami.

²²Shina nijta Jesús uyashpami, cashna nirca: —Cashnata pactachinarami cangui: Can imata charishcatapash, tucuilla jatushpa, chai culquitaca imagutapash na charijcunaman caragri. Chashna carashpaca, jahua pachapimi ninan charij cangui. Chai jipaca, ñucata catingapaj tigramugrilla— nircami.

²³Jesús chashna nijta uyashpami chai runaca, ninan charijpacha cashcamanda, ninanda llaquirirca.

²⁴Shina ninanda llaquirijta Jesús ricushpami, cashna nirca: —¡Ninan charijcunapaca, Taita Dios mandajuj llactaguman yaicunaca, ninan shinllipachami!

²⁵Dios mandajuj llactaguman, ninan charij shuj runa yaicungapaj randica, camello nishca animalrapashmi, auja utujuta fangalla yalinman— nircami.

²⁶Shina nijta uyajcunaca: —Shinaca, ¿pita quishpiri ushangayari?— nishpami tapunajurca.

²⁷Shina tapujpimi Jesusca, paicunata cashna nirca: —Gentecunapaca, caica napacha ushanallachu. Ashtahuangarin Taita Diospaca, rurai ushanallami— nircami.

²⁸Shina nijpimi Pedroca, cashna nirca: —Ricui, ñucanchica imaguta charishcatapash, tucuita saquishpami, candaca catinajunchi— nircami.

²⁹Shina nijpimi Jesusca, cashna nirca: —Na llullashpami, cangunataca cashna nini: Taita Dios mandajuj llactagupaj ali cachunmi, paipaj huasita, paipaj taitata, paipaj mamata, paipaj huauquicunata, paipaj huarmita, paipaj huahuacunata pipash saquinga.

³⁰Shina saquishpaca, cai pachapimi ashtahuan japijunga. Jipa causaipicarin, causaita causagrinatami japinga— nircami.

³¹Jesusca, paipaj chunga ishcai yachajujcunatalla, ashaguta pushashpami, cashna nijurca: —Ricuichi, Jerusalenmanmi vichai rinajunchi. Dios ima nishcata villajcuna, Runa Aichayu tucushca ñucamanda imata escribishcapash, tucuimi chai pueblopica pactanga.

³²Chaipimi ñucataca, na israelcunaman japishpa cuhuanga. Paicunami, ñucataca pugllashpa asinajunga. Nalicachishpa rimashpa, t'ucashpami churahuanga.

³³Ña astishca jipaca, huañuchihuangami. Ashtahuangarin quimsa punllahuanga causarishallami— nijurcami.

³⁴Ashtahuangarin Jesús imata nijujtapash, paipaj yachajujcunaca, na yachai usharcachu. Imamanda chashna nishcatapash na villashca cajpimi, paicunaca na entendinajurca.

³⁵Jericó shuti puebloman Jesús ña chayajujpica, cashna tucurca: Shuj ñausa runagumi, culquita mañashpa ñambi tiajushca carca.

³⁶Chai ñausa runaguca, ashtaca ashtaca gentecuna yalinajujta uyashpami: —¿Imashpata chashna yalinajun—? nishpa tapurca.

³⁷Shina tapujpica: —Nazaret pueblomanda Jesusmari yalijun— nishpami villanajurca.

³⁸Shina villajpimi: —¡Ñaupa taita Davidpaj Churi Jesús, ñucataca llaquihuayari!— nishpa, capari callarirca.

³⁹Shina caparijujpimi, ñaupashpa rinajujcunaca: —Ama chashna caparichu— nishpa jarcanajurca. Shina jarcajpipash, ashtahuanmi: —¡Ñaupa taita Davidpaj Churi, llaquihuayari ninimari!— nishpami, ninanda caparirca.

⁴⁰Shina caparijujpimi, Jesusca shayarishpa: —Chai runaguta ñuca ñaupajman pushamupaichi— nishpa mandarca. Chai runagu shamujpimi, Jesús tapushpaca:

⁴¹—Canga, ¿imagutata rurachun munangui?— nishpa tapurca. Shina nijpimi, chai ñausa runaguca: —Ñuca ñavigu ricuchun alichihuai, Apunchi Jesús— nircami.

⁴²Shina nijpimi Jesusca, cashna nirca: —Ali tucui ninimi. Tucui shunguhuambacha crishcamandami, ña quishpirishcangui— nircami.

⁴³Shina nijpi ricushpami, Taita Diostaca ninanda alicachishpandi, Jesusta catishpa rirca. Shina alichijta ricushpami gentecunaca, Taita Diosta tucuilla alicachinajurca.