Read Imbabura Highland Quichua LUCAS 19 Bible Online

LUCAS 19 - Imbabura Highland Quichua bible

LUCAS 19

¹Jericó shuti puebloman Jesús chayashpaca, pueblo chaupitami yalijurca.

²Chai pueblopimi, Zaqueo shuti runaguca causajurca. Paica, impuestota japishpa causanajuj runacunata mandajmi carca. Paica, charij runami carca.

³Paimi, Jesustaca maijan cajta rijsingapaj ninanda ricunayachirca. Ashtahuangarin gentecuna ninanda jundariajpimi, Zaqueo shuti runaguca uchilla cashpa, na ricui usharca.

⁴Shina cashpami, sicómoro nishca quiru jahuamanda Jesusta ricungapaj, ñaupashpa calparca. Jesusca, chaitapachami yalina carca.

⁵Chai quiruman Jesús chayashpa vichai ricushpami, Zaqueo runagutaca ricushpa cashna nirca: —Zaqueo, ucha uriajumui. Cunanga, cambaj huasipi mingachigrihuai— nircami.

⁶Shina nijpi ucha uriajushpami, Zaqueo runaguca ninanda cushijushpa, Jesusta mingachigrirca.

⁷Chaita ricushpami, tucuicuna ninanda nalicachinajurca. Juchayu runapaj huasipirachu mingarin nishpami nalicachinajurca.

⁸Ashtahuangarin Zaqueo shuti runaguca shayarishpami, Apunchi Jesustaca cashna nirca: —Apunchi Jesús, cashnatami ruragripani. Ñuca imata charishcatapash chaupitami, imagutapash na charijcunaman caragripani. Maijandapash umashpa, culquita japijushcatapash, chuscucamambachami tigrachigrini— nircami.

⁹Shina nijpimi Jesusca, cashna nirca: —Cunanmi, cai huasipi causajcuna quishpirina punlla chayamushca. Paipash, ñaupa taita Abrahambaj mirai purami.

¹⁰Runa Aichayu tucushca ñucami, chingashca causajcunata mascashpa, quishpichingapaj shamurcani— nircami.

¹¹Chashna nijujta uyanajujpimi Jesusca, ashtahuan chimbapurashpa parlajurca. Paica, Jerusalenman ñami chayagrijurca. Shinamandami gentecunaca: “Taita Dios mandai callarinaca, ñallami chayamunga” yanajurca.

¹²Shinamandami cashna nijurca: “Ninanda alicachi tucushca runaguca, caru llactapi pai mandanata chasquishca jipa, tigramungapajmi rirca.

¹³Paica, nara rishpallatami, paipaj chunga servijcunata cayashpa, ninan valishca mina nishca culquicunata, paicunaman shuj shujlla mingarca. Shina mingashpami: ‘Cai culquihuanga, ñuca tigramungacaman randishpa, jatushpa mirachinguichi’ nirca.

¹⁴Ashtahuangarin paipaj llactapi causajcunaca, ninanda na ricunayachishpami: ‘Chai runa ñucanchita mandaj cachunga, napacha munanchica’ nichunmi, villaj runacunata cachanajurca.

¹⁵Shina cajpipash, cashnami tucurca: Chai runaguca, pai mandanata chasquishca jipami tigramurca. Shina tigramushpami, pai mingashca culquita mashnata mirachishcatapash yachangapaj, paita servijcunata cayachun cacharca.

¹⁶Paita servij runagu, pundalla chayamushpami: ‘Can mingashca mina culquigutaca, chungacamanmi mirachiparcani, taita’ nirca.

¹⁷Shina nijpimi chai mandaj runaguca, cashna nirca: ‘Canga, aliguta ruraj runagumi cashcangui. Ashagutalla mingajpipash, aliguta cuidashpa pactachin cashcamandami, chunga pueblocunata mandajuchun, candaca churasha’ nircami.

¹⁸Chai jipami, caishuj servij runa chayamushpaca: ‘Can mingashca mina culquigutaca, pichacamanmi mirachiparcani, taitalla’ nirca.

¹⁹Shina nijpimi: ‘Picha pueblocunata mandajuchunmi, candapash churasha’ nirca.

²⁰Chai jipaca, shuj servij runa chayamushpami cashna nirca: ‘Taitalla, can mingashca mina nishca culquica caipimi. Shuj findupi huatashpami alichiriarcani.

²¹Candaca, fiñajlla runa cajpimi manllarcani. Canga, tarpuchun muyuta na cushpapash, tandachijpi chaupingapaj shamuj runami cangui’ nircami.

²²Shina nijpimi, chai mandaj runaguca, paita cashna nirca: ‘Canga, nali runamari cashcangui. Canllata chashna nirijushcamandami, llaquichi tucungui. Fiñajlla runa cajtapash, ñucataca yachashcanguimi. Tarpuchun muyuta na cushpapash, tandachijpi chaupingapaj shamuj cashcatapash yachahuashcanguimi.

²³Shina yachashca jahuaca, ¿imashpata ñuca culquitaca, bancopi na churagrircangui? Bancopi churajpica ñuca tigramushpaca, mirashca culquindimi japiman carcani’ nircami.

²⁴Shina nishpallami chaipi shayajcunataca, cashna nishpa mandarca: ‘Cunanga, cai runa charijuj mina culquita quichushpa, chunga mina culquicunata charij runaman cuichi’ nircami.

²⁵Shina nijpimi paicunaca, cashna ninajurca: ‘Paica, ñamari chunga mina culquicunata charin, taitalla’ ninajurca.

²⁶Shina nijpimi chai mandaj runaguca, cashna nirca: ‘Cangunataca, cashnami nini: Ashtacata charij runami carajpi, ashtahuan charinga. Ashtahuangarin na charij runataca, ashata charishcatapashmi quichunga.

²⁷Paicunata mandachun, ñucata na munashpa fiñajcunataca, cai ñuca ñaupajman apamushpa, cungata muchupaichi’ nishpami mandarca” nijurcami.

²⁸Chashna villaita tucuchishpallami Jesusca, Jerusalenman ashtahuan vichai rijurca.

²⁹Betfagé shuti, Betania shuti pueblo ladomanmi, Jesusca chayajurca. Chai ladopillatami, Olivos shuti urcupash tian. Chaiman chayajushpami Jesusca, paipaj yachajuj puramanda ishcai runacunata cacharca.

³⁰Paicunataca, cashna nishpami cachajurca: —Chai chimba uchilla llactaguman ripaichi. Chaiman chayashpaca, pipash nara tiarishca maltun burroguta huatashca shayajujtami taringuichi. Chai burrogutaca, cacharishpa apamupanguichilla.

³¹Canguna cacharijujpica: ‘¿Imapajta cacharinajunguichi?’ ningami. Shina nijpica: ‘Apunchi Jesusmi apamugri’ nijpi apanajunchi ninguichi— nishpami cacharca.

³²Shina cachajpimi, chai ishcai yachajujcuna rishpaca, Jesús imashna nishcashna tarigrirca.

³³Maltun burroguta cacharijujpi, dueñocuna ricushpami: —¿Imapajta chai maltun burrogutaca cacharinajunguichi?— nishpa tapunajurca.

³⁴Shina tapujpica: —Apunchi Jesús apamugri nijpimi apanajupanchi— ninajurcami.

³⁵Ña Jesuspajman chai maltun burroguhuan chayamushpaca, paicunapaj jahualla churajushcatami, lomopi churanajurca. Shina churashpami, Jesustaca chai maltun burro jahuapi tiachirca.

³⁶Jesús ña yalijujpica gentecunaca, paicunapaj jahualla churajunacunatami, ñambi mandanajurca.

³⁷Olivos urcumandami, ña urai rinajurca. Jerusalenman ña chayagrijujpica, Jesusta catishpa rinajuj tucuilla gentecunami, ninanda cushijushpa capari callarinajurca. Paicunaca, imagutapash Jesús juyailla rurashpa purijujta ricushca cashpami, Taita Diostaca ninanda alicachishpa,

³⁸cashna ninajurca: —¡Jatun Diospaj shutipi shamujuj jatun mandajca, aligumari cangui ni tucushca cachun! ¡Jahua pachamandaca, casilla ali causaiguta caramuchun! ¡Jahua pachapi tiajuj Diosca, punchapambagumi cangui ni tucushca cachun!— ninajurcami.

³⁹Shina ninajujpimi, chai ashtaca gentecunapaj chaupipi rinajuj, huaquin fariseocunaca cashna nirca: —Yachachij, cambaj yachajujcunataca, upalla caichi niyari— ninajurca.

⁴⁰Shina nijpimi Jesusca, cashna nirca: —Cangunataca cashnami nini: Cai gentecuna upallayajpica, rumicunarami caparinga— nircami.

⁴¹Jerusalenman Jesús ña chayajushpaca, chai pueblota ricushpami, chai pueblomanda huacarca.

⁴²Shina huacashpami, cashna nijurca: “¡Cangunamambash, ali causaita caramujujta cunanllata yachashpaca, alichari canguichiman! Ashtahuangarin cangunapaj ñavitaca quilpashcashna cajpimi, cunambica imatapash na yaringuichi.

⁴³Cangunata llaquichina punllacunaca chayamungami. Chai punllacunapimi, cangunata fiñajcunaca, chaupipi churashpa patata ruranga. Shina rurashpami, cangunataca caimanda, chaimanda japij shamunga.

⁴⁴Shina shamushpaca, huasicunata urmachishpa ñutushpami, rumicunatapash tucuillata alpapi shitanga. Cangunatapash, huañuchishpami tucuchinga. Dios llaquishpa quishpichingapaj shamushcata imatapash na yarishcamandami, chashna llaquichi tucunguichi” nijurcami.

⁴⁵Diospaj huasiman Jesús yaicushpaca, jatushpa tiajcunatapash, randishpa purijcunatapashmi llujchishpa calpachirca.

⁴⁶Shina calpachishpami, Jesusca cashna nirca: —Escribishcapica cashnami nijun: ‘Ñuca huasiguca, ñucata mañana huasimi ni tucushcami canga’ nijunmi. Ashtahuangarin cangunaca, shuhuacuna pacajuj utujutashnami, cai huasitaca rurashcanguichi— nircami.

⁴⁷Diospaj huasipica, punllandimi Jesusca yachachijurca. Ashtahuangarin curacunata mandajcuna, mandashca shimita yachachijcuna, gentecunata mandajcuna huañuchingapajmi munanajurcami.

⁴⁸Ashtahuangarin Jesús villajujtaca, tucuilla gentecuna aligutapacha uyanajujpimi, imatapash na rurai usharca.