Read Imbabura Highland Quichua LUCAS 2 Bible Online

LUCAS 2 - Imbabura Highland Quichua bible

LUCAS 2

¹Chai punllacunapimi, cashna tucurca: Augusto Cesar shuti jatun mandajca, tucui gentecuna paicunapaj shuticunata churachinajuchun nishpami, shuj mandashcata churashpa villachijurca.

²Siria llactata, Cirenio shuti runa mandajujpimi, mashna gentecuna tiajta yachangapaj cuentachishpa punda callarirca.

³Tucui gentecunami, shuticunata churachingapaca, paicunapaj llactacunaman rinajurca.

⁴Shinamandami Joseca, Galilea llactapi tiaj Nazaret pueblomanda llujshishpa, Judea llactapi tiaj Belén puebloman rijurca. Chai pueblopimi, jatun mandaj Davidca huacharishca carca. Davidpaj familiamanda mirai cashpami, Joseca chaiman rina tucurca.

⁵Chai pueblopi shutita churachingapajmi Joseca, paihuan cazarana Mariandi rinajurca. María huarmiguca, vijsayu ungunallami carca.

⁶Paicuna chaipi cajpimi, cashna tucurca: Chaipimi, unguna punlla pactarca.

⁷Paicuna mingarina huasipica junda junda cajpimi, animalcuna shayaj ucupi paipaj punda jari huahuagutaca ungurca. Chaipi ungushpami, animalcuna micuchun churana jahuapi, huahuaguta maitushpa sirichirca.

⁸Chai muyundi llactapimi, llamacunata michij runacuna paicunapaj llamacunata cuidana horaspi cati cati cuidashpa pacarinajurca.

⁹Shina cuidanajujpimi, Jatun Diospaj shuj angelca, paicunaman ñapash ricurimurca. Jatun Diospaj punchapambagumi, paicunapaj muyundipi punchayachijurca. Chaita ricushpami michijcunaca, ninanda manllarinajurca.

¹⁰Shina manllarijpimi angelca, cashna nijurca: “Na manllarinachu canguichi. Ricuichi, tucui gentecuna ninanda cushijuna, shuj ali villaitami villaj shamuni.

¹¹Jatun mandaj David huacharishca pueblopimi, cangunapaj ali cachun, shuj Quishpichij cunan huacharishca. Paica Mandaj CRISTOMI.

¹²Caimi, cangunaman ricuchina canga: Animalcuna micuchun churana jahuapi, maitushca sirijujtami, chai huahuagutaca tarigringuichi” nijurcami.

¹³Shina nijujpi, jahua pachamanda ashtaca angelcuna shamushpa, chai angelhuan ñapash ricurirca. Paicunami, Taita Diosta cashna nishpa alicachinajurca:

¹⁴“¡Jahua pachapi Taita Diosca, punchapambagumi cangui ni tucushca cachun! ¡Alpapi causaj gentecunapash, casilla ali causaita, Diospaj ali munaita charichun!” ninajurcami.

¹⁵Shina nishpa, chai angelcuna paicunapaj ñaupajmanda, jahua pachaman tigrajhuanmi, cashna tucurca: Chai michijcunaca, caishuj chaishujmi cashna ninajurca: —Belén puebloman rishpa, cashna tucushcata Jatun Dios ñucanchiman villashcata jacuchi, ricushunchi— ninajurcami.

¹⁶Paicunaca, ucha rishpami Mariatapash, Josetapash tarigrirca. Huahuagutaca, animalcuna micuchun churana jahuapi sirijujtami tarigrirca.

¹⁷Huahuaguta ricushpami, chai huahuamanda paicunaman imatalla nishcata villanajurca.

¹⁸Michijcuna chashna villanajujpica, tucui uyajcunami manllarinajurca.

¹⁹Ashtahuangarin María huarmiguca, tucui chai villashcacunataca aligutapacha yarishpami, paipaj shungupilla alichijurca.

²⁰Chai michijcunaca, paicunaman ángel villashcashna, tucuita uyashpa ricushpami, Taita Diostaca punchapambagumi cangui nishpa, alicachishpa tigranajurca.

²¹Pusaj punlla pactajpimi huahuagutaca, circuncisión nishcata rurarca. Nara vijsayu tucujpillata, Mariaman ángel nishcashnami, chai huahuagutaca, JESÚS shutita churanajurca.

²²Moisés mandashca shimipi nishcashnami, Diospaj ñaupajpi paicuna alipi ricurina punlla chayamurca. Shinamandami huahuagutaca, Jatun Diosman mingangapaj, Josendi Mariandi, Jerusalenman apamunajurca.

²³(“Punda jari huahuaguta ungujpica, Jatun Diospajlla causachun shicanyachinami canguichi” nishpami, Jatun Diosca mandashpa escribichirca).

²⁴“Ishcai urpiguta cashpa, na cashpaca ishcai palomaguta cashpapash cuchun” nishpa, Diosca mandashca carca. Chai mandashcapi nijunshnallatami, Diosman cushpa huañuchinajuchun, apashpa rinajurca.

²⁵Chai punllacunapica, Simeón shuti runagumi, Jerusalenbi causajurca. Paica, imatapash cashcatapacha ruraj runagu cashpami, Diosta yariashpa causajurca. Shinallata israelcuna cushichinajuchumbashmi shuyajurca. Diospaj jucha illaj Espirituca, Simeón runagupajmanmi shamushca carca.

²⁶Diospaj jucha illaj Espiritumi, Simeonman cashna villashca carca: “Jatun Dios, aceiteta talishpa javishca Quishpichijta nara ricushpaca, na huañunguichu” nishcami carca.

²⁷Diospaj Espíritu yarichijujpimi, Diospaj huasiman shamurca. Moisés mandashca shimipi nijujta pactachingapajmi, Diospaj huasiman huahua Jesusta apashpa taitandi, mamandi paipajman chayamunajurca.

²⁸Simeonga, huahuaguta paipaj rigrapi marcashpami, Taita Diostaca aligumi cangui nishpa, cashna nijurca:

²⁹“Jatun Dioslla, can nishcashnallata, cunanga canda servij ñucataca, cushijushpa huañuchun saquihuailla.

³⁰Quishpichijuchun can cachamushcataca, ñuca ñavihuambacha ricuparcanimi.

³¹Paitaca, tucui gentecuna ricuchunmi cachamupashcangui.

³²Na israelcunamambash michagushna punchayachijuchun, can agllashca israelcunapash juyaillagu ricurichumi cachamushcangui” nijurcami.

³³Huahua Jesusmanda tucui imata Simeón nishcamandami Josendi, huahuagupaj mamandi manllarishpa uyarca.

³⁴Simeonga, paicunata bendiciashpami, Jesuspaj mama Mariataca, cashna nijurca: —Ricui, cai huahuagutaca ashtaca israelcuna chingagrichun, na cashpaca quishpirichunmi, Taita Diosca cachamushca. Paillatami, ashtaca gentecuna Diosta na ricunayachishpa causanataca ricuchijunga.

³⁵Ashtacacuna paicunapaj shungupi imata yarinajujtami ricuchijunga. (Cambaj shungupica, espadahuan tujsijpishnami, ninanda llaquiringui)— nijurcami.

³⁶Shinallata Dios ima nishcata villaj Ana shuti huarmigupashmi, chaipi carca. Paica, Aser shuti aillupura, Fanuel shuti runapaj ushimi carca. Paica, chaira viñai cuitsagu cazarashca cashpapash, canchis huatacamanllami cusayu causarca.

³⁷Shina cashpapash paica, pusaj chunga chuscu huatatami sapalla causajurca. Paica, Diospaj huasi ucumandaca, llujshitapash na llujshishpami, chaipi servishpa tutandi punllandi na micushpa, Diosta mañashpa causajurca.

³⁸Chai huahuagumanda Simeón villajujpillatami, Ana shuti mamaguca chayamushpa, Taita Diosta pashi nijurca. Chai huahua Jesusmandaca, Jerusalenbi causajcuna quishpichi tucunata shuyanajuj tucui gentecunamambashmi villajurca.

³⁹Jatun Dios mandashcata tucuita pactachishpami, paicuna causanajushca Galilea llactapi tiaj Nazaret pueblomanllata tigranajurca.

⁴⁰Chai huahuaguca, Taita Diospaj ninan juyai paihuan cajpimi, ashtahuan viñashpa, ashtahuan ña shinlli tucushpa, aligutapacha yachajushpa viñajurca.

⁴¹Jesuspaj taita, mamaca, Pascua fiesta chayajpica, cada huatami Jerusalenman rinata yacharca.

⁴²Chai fiestaman rinata yachashpami Jesusca, ña chunga ishcai huatata charijpi, Jerusalenman vichai rinajurca.

⁴³Chai fiesta punllacuna yalijpimi, huasiman tigranajurca. Ashtahuangarin paipaj mamapash, Josepash na yachajtami Jesusca, Jerusalenbi quedashca carca.

⁴⁴“Gentecunapaj chaupipimi catimujunga” yashpami, shuj punlla chishangacaman rinajurca. Na ricurijpica, paicunapaj familiacunata, cumbacunata tapushpami mascanajurca.

⁴⁵Ashtahuangarin na tarishpallatami, Jerusalenman mascashpandi tigranajurca.

⁴⁶Quimsa punllata mascashca jipami, cashna tucurca: Diospaj huasi ucupimi, mandashca shimita yachachijcuna villajpi uyashpa, imagutapash tapushpa, paicunapaj chaupipi tiajujta tarigrirca.

⁴⁷Paita tapujpica, aligutapacha yarishpa tigrachijpimi, tucuicuna manllarishpa uyanajurca.

⁴⁸Chaipi tiajujta paipaj taitapash, mamapash ricushpaca, ninandami manllarirca. Shina ricushpami, paipaj mamaca cashna nirca: —Ñuca huahua, ¿imashpata ñucanchitaca cashna ninanda llaquichingui? Taitandi ñucandimari, ninanda llaquirishpa mascashpa shamunchi— nircami.

⁴⁹Shina nijpimi Jesusca, cashna nirca: —Ñucataca, na mascanachu carcanguichi. Ñuca Taitapajta ruranapacha cajtaca, ¿nachu yacharcanguichi?— nircami.

⁵⁰Ashtahuangarin imamanda chashna nijtaca taitapash, mamapash na atinarcachu.

⁵¹Paipaj taitahuan, mamahuan urai rishpa Nazaret puebloman tigrashpapash, aliguta cazushpami causajurca. Tucui ima tucushcatapash, paipaj mamaca na cungashpami, paipaj shungupilla yarijurca.

⁵²Jesusca viñashpandi, aliguta yachajushpandimi catijurca. Shinallata Taita Diospash, gentecunapash ninanda juyajpimi causajurca.