Read Imbabura Highland Quichua LUCAS 20 Bible Online

LUCAS 20 - Imbabura Highland Quichua bible

LUCAS 20

¹Shuj punllami, cashna tucurca: Diospaj huasi ucupi gentecunaman Jesús yachachijushpa, ali villaitapash villajujpimi, curacunata mandajcunapash, mandashca shimita yachachijcunapash, mandaj rucucunapash, Jesuspajman ñapash chayamurca.

²Paicuna chayamushpami, Jesustaca cashna nishpa tapurca: —¿Pipaj ushaihuanda caicunataca, cashna rurajungui? ¿Pita chashna rurachun, candaca mandarca? Villahuai— ninajurcami.

³Shina nijpimi Jesusca, paicunatapash cashna nirca: —Ñucapashmi, cangunataca shujta tapugrini. Ñuca tapushcata tigrachihuaichi.

⁴Juan bautizachunga, ¿jahua pachamandachu cachamushcanga, na cashpaca runacunachu cachamushcanga?— nircami.

⁵Shina nijpimi, paicunapura cashna nishpa parlarinajurca: “¿Ima nishunchita? ‘Juanga, jahua pachamanda cachamujpimi shamurca’ nijpica: ‘¿Imashpata pai villajujta na crircanguichi?’ ningami.

⁶‘Runacuna cachamujpillami shamurca’ nijpipash, rumicunahuanmi tucuilla gentecuna ñucanchitaca huañuchinga. Chai gentecunaca: ‘Juanga, Dios ima nishcata villajmi’ ninajunmari” nishpami parlarinajurca.

⁷Shina parlarishpami: “Maimandacha shamurcapash, na yacharipanllu” ninajurca.

⁸Shina nijpimi Jesusca, cashna nirca: —Ñucapash, maijambaj ushaihuan chashna rurajujtaca, na villashachu— nircami.

⁹Chashna nishpallami Jesusca, cashna chimbapurashpa parlai callarirca: —Shuj runagumi, paipaj alpapi uvasta tarpurca. Alpata trabajaj shuj runacunaman chai alpata partido cushpami, unai unaipi tigramungapaj rirca.

¹⁰Ña fucuna punllacuna pactajpimi, chai alpayu runaca, chai runacunataca uvas fucushcata carahuai nishpa apamugrichun, paipaj servijta cacharca. Ashtahuangarin chai servij runagutaca macashpami, imatapash na cushpa, chai runacunaca tigrachirca.

¹¹Chashna tigrachijpimi, chai alpayu runaca, cutin shuj servijta cacharca. Paitapash macashpa, ninanda rimashpa pingaichishpami, imatapash na cushpa, chai runacunaca tigrachirca.

¹²Chashna tigrachijpica, caihuanga ña quimsatami cutin shuj servij runaguta cacharca. Ashtahuangarin paitapash chugringacaman macashpami, chagra ucumanda llujchishpa shitarca.

¹³Chashna rurajpimi, uvas chagrayu runaca, cashna yarirca: ‘¿Cunanga, imatata rurasha? Ñuca juyashca churigutami cachagrini. Ñuca churiguta ricushpaca, napashchari imatapash rurangachu’ yajurcami.

¹⁴Ashtahuangarin alpata trabajaj chai runacunaca, chai churigu shamujujta ricushpami, paipura cashna ninajurca: ‘Paimi, cai alpataca japinga. Cai alpata ñucanchi japingapaj, paita huañuchingapaj shamuichi’ ninajurcami.

¹⁵Chai churigutacarin, uvas chagramanda llujchishpami huañuchirca. Chashna rurashcamandaca, chai alpayu runaca, ¿imatashi ruranga?

¹⁶Pai shamushpaca, chai runacunataca huañuchishpa tucuchishpami, uvas chagratapash shujcunaman cunga— nijurcami. Jesús chashna nijta uyashpami, gentecunaca: —¡Chashna rurachunga, Taita Diospash ama saquishcanman!— ninajurcami.

¹⁷Ashtahuangarin Jesusca, paicunata ricushpami cashna nirca: —Dios escribichishca Shimipica, cashnami nijun: ‘Huasichij runacuna na munashpa shitashca rumillatami, huasichi pirca tigranapi churana rumi tucushca’ nijunmi. Chaitaca, ¿imashpashi chashna nijun?

¹⁸Maijambash chai rumipi urmashpaca, faquiringami. Shinallata maijambaj jahuapipash, chai rumi urmashpaca, ñutuitami ñutunga— nircami.

¹⁹Paicunata uyachishpa, Jesús chashna chimbapurashpa parlashcata yachashpami curacunata mandajcunapash, mandashca shimita yachachijcunpash Jesustaca, chaipillata japingapaj munanajurca. Ashtahuangarin gentecunata manllashpami, na japi ushanajurca.

²⁰Paicunaca japingapaj munashpami, pacalla imatapash cashcatapacha rurajcunashnalla purishpa, Jesusta catiriashpa ricuchun runacunata cacharca. Imatapash Jesús nalita tigrachijpica, llactata mandashpa ushaita charijman japichingapaj nishpami, chashna cacharca.

²¹Paicunaca, cashna nishpami Jesustaca tapunajurca: —Yachachij, canga imatapash cashcatapacha rimashpa yachachijujtami yachapanchi. Canga, nali causaj gentecunamambash, na agllashpami yachachijungui. Ashtahuangarin Taita Diospaj ñambi causachunmi, tucuicunaman na llullashpa yachachijungui.

²²Cesarman impuestota cunaca, ¿ñucanchita mandashca shimipi nijunshna alichu, nachu ali?— nishpami tapunajurca.

²³Ashtahuangarin imata tigrachijpipash juchachingapaj, chashna tapunajujta yachashpami, Jesusca cashna nirca: —¿Imashpata cangunaca, cashna pandachij shamuhuanguichi?

²⁴Culquita apamuichi, ricusha. ¿Pipaj ñavita, pipaj shutita cai culquipica tiajun?— nishpa tapujpimi: —Cesarpajmi— ninajurca.

²⁵Shina nijpimi Jesusca, cashna nirca: —Cesarpaj cajpica, Cesarmanllatami cuna canguichi. Ashtahuangarin Taita Diospaj cajtaca, Taita Diosmanmi cuna canguichi— nircami.

²⁶Paicuna Jesusta chashna tapushpapash, tucuicunapaj ñaupajpi ima nalita tigrachishcatapash na tarishpami, manllarishpa upalla shayanajurca.

²⁷Chai jipami, Jesusta tapungapajmi huaquin saduceocunaca shamurca. Paicunaca: “Huañushcacunaca na causaringachu” nishpa purijcunami.

²⁸Paicunami, Jesustaca cashna nishpa tapunajurca: —Yachachij. Ñucanchita mandashpami, Moisesca cashna escribishpa saquishca: ‘Shuj runaca, huahuacunata nara charishpami, paipaj huarmitaca saquishpa huañunga. Chai huarmitaca, paipaj cati huauqui cazarashpa, punda huauquipaj randi huahuacunata charichun’ nishcami.

²⁹Ñucanchi llactapimi, canchis huauqui puracuna tiarca. Punda huauqui cazarashpaca, huahuacunata nara charishpallatami, huarmitaca saquishpa huañurca.

³⁰Chai huarmitaca, cati huauquimi cazararca. Paipash, huahuacunata nara charishpallatami huañurca.

³¹Chaipaj jipa huauquipash, chashnallatami chai huarmihuan cazarashpalla huañurca. Chashnami, chai canchispura huauquicunaca, chai huarmihuan cazarashpapash, huahuata nara charishpallata huañurca.

³²Paicuna tucuilla huañushca jipami, chai huarmipash huañurca.

³³Chashnami chai canchispura huauquicunaca, chai huarmihuanlla cazaranajurca. Huañushcacuna causarimui punllapica chaicunapaca, ¿maijambajta huarmi canga?— nishpami tapunajurca.

³⁴Shina tapujpimi Jesusca, cashna nishpa tigrachirca: —Cai causaipillami cazarashpa causanajun.

³⁵Ashtahuangarin jipa causaiman apai tucujcuna, huañushcacunapaj chaupimanda causachi tucujcunaca, na cazarangachu. Cazaranaca, napacha tiangachu.

³⁶Paicunaca, cutinga na huañushpami, angelcunashna causanajunga. Taita Dios causachijpimi, paipajlla huahuacuna causanajunga.

³⁷Huañushcacuna causarinataca, Moisespashmi yachachirca. Chaitaca, zarza yuramanda parlashpa pai escribishcapimi yachachijun. Chaipimi cashna nijun: ‘Jatun Diosca, Abrahambaj, Isaacpaj, Jacobopaj Taita Diosmi’ mijunmi.

³⁸Taita Diosca, huañushcacunapaj Taita Diosca na canllu. Ashtahuangarin causajcunapaj Diosmi. Diospaj ñaupajpica, tucuicunami causanajun— nijurcami.

³⁹Shina nijpica: —Yachachij, canga aligutamari ningui— nishpami, mandashca shimita yachachijcunaca, huaquingunaca ninajurca.

⁴⁰Jesús chashna nijpimi, pipash ashtahuan tapuitaca, na usharca.

⁴¹Jesusca, paicunataca cashna nishpami tapurca: —Gentecunaca, ¿imashpata Quishpichij Cristoca: ‘Ñaupa taita Davidpaj churimi canga’ ninajun?

⁴²Davidllatami, Salmos libropica cashna nijurca: Jatun Diosca, ñucata Mandajtami cashna nirca: ‘Canga, ñuca ali ladoman tiajuilla.

⁴³Canda na ricunayachijcunata can saruchun, cambaj chaquipi ñuca churangacaman tiajuilla’ nijurcami.

⁴⁴Quishpichij Cristotaca, Davidllatami: ‘Jatun Diosmi cangui’ nijujpica, ¿imashpata Davidpaj churi cangayari?— nircami.

⁴⁵Tucuilla gentecuna uyanajujpimi Jesusca, paipaj yachajujcunaman cashna nishpa villajurca:

⁴⁶“Mandashca shimita yachachijcunataca, napacha catinachu canguichi. Paicunaca, chaqui pundacaman churajunata churajushpami, cushijushpa purinajun. Paicunataca, plazacunapipash alillachu capanguichi ninajuchunmi munan. Tandanajuna huasicunapipash, paicunata alicachishpa ricunajuchunmi, ñaupajpi tiarinajun. Shinallata boda huasicunapipash, alipilla tiarishpami purinajun.

⁴⁷Sapalla huarmicunapaj huasicunatapashmi, langanshna tucuchinajun. Chashna rurashpaca, alipi ricuringapaj yashpami, Diostaca unai unaita mañaj tucunajun. Paicunaca, chashna cashcamandami, ashtahuan ninanda llaquichi tucunajunga” nijurcami.