Read Imbabura Highland Quichua LUCAS 21 Bible Online

LUCAS 21 - Imbabura Highland Quichua bible

LUCAS 21

¹Jesusca, charij runacuna Diosman culquita carashpa churana cajonbi culquita churanajujtami ricujurca.

²Shina ricujushpaca imagutapash na charij, sapalla mamagupash, ishcai yuraj culquiguta churajujtami ricurca.

³Shina ricushpami Jesusca, cashna nirca: —Na llullashpami, cangunataca cashna nini: Cai sapalla mamaguca, imagutapash na charij cashpapash, caishuj gentecuna culquita carashpa churashcatapash yalitami cararca.

⁴Ashtahuangarin caishujcunaca, charij cashpapash, puchutallami churanajurca. Chai sapalla mamaguca, imagutapash na charij cashpapash, micunaguta pai randingapaj charijushca culquigutami, tucuillata Taita Diosman carashpa churarca— nircami.

⁵Diospaj huasitaca, juyailla rumicunahuan rurashcata Diosman imatapash carashpa juyailla alichishcatami, huaquingunaca parlanajurca. Chai parlajcunatami, Jesusca cashna nirca:

⁶—Canguna cunan ricunajuj chaicunata tucuchina punllacuna na chayamungami. Caipica, shuj rumillapash chai jahuan, chai jahuan na quedangachu. Tucuillami urmachi tucunga— nircami.

⁷Chai jipami Jesusta paipaj yachajujcunaca, cashna nishpa tapurca: —Yachachij, ¿ima horata chashna ninan llaquicunaca tianga? ¿Imata ricushpata, can villashcacuna ña pactamujushcataca yachana canchi?— ninajurcami.

⁸Shina nijpimi Jesusca, cashna nijurca: —Ricuichi, ama umachi tucungapajmi, aliguta yarishpa causana canguichi. Ashtacacunami: ‘Ñucami, Quishpichij Cristo cani’ nij tucushpa, ñuca shutipi shamunajunga. Paicunami: ‘Cunanga, chai punllacunaca ñami chayamujun’ ninajunga. Ashtahuangarin chashna nijpica, na catinallachu canguichi.

⁹‘Ninanda macanajushpami huañunajun, llactapi causaj puracunallatami macanajunajun’ nijta uyashpapash, na manllarinachu canguichi. Chai llaquicunarami, punda pactanapacha. Chashna cashpapash, tucurimui punllapachaca nara chayamungachu— nijurcami.

¹⁰Shina nishpallami Jesusca, cashnatapash nijurca: —Shuj llactapi causajcunahuan, caishuj llactapi causajcunahuanmi macanajunga. Shinallata llactata jatun mandaj puracunapashmi macanajunga.

¹¹Shinallata alpa mama ninanda chujchushpa tucuchijuipash, ninan yarjaipash, millai ung:uicunapash, shuj shuj llactacunapimi tianga. Shinallata jahua pachamandaca, jatun manllanayaimi imapash ricurimunga.

¹²Chashna llaquicunaca nara tiajpillatami, cangunataca japishpa, catiriashpa llaquichinajunga. Shina rurashpami cangunataca, tandanajuna huasicunapi saquiringa. Shinallata prezuna huasipipash churagringami. Ñucata catinajushcamandami, llactata mandajcunapaj ñaupajmambash, jatun mandajcunapaj ñaupajmambash apai tucunguichi.

¹³Chaipica, paicunamambash ñucamanda villanguichi.

¹⁴Cangunata apajpica, ñucanchita cacharichun imatashi nishun yashpaca, na chaitara punda yarinachu canguichi.

¹⁵Ñucami, canguna imata rimanatapash, ali yachaitapash carasha. Chashna rimajpimi, cangunata fiñajcunaca na chashnachu nishpa upallayachitaca na ushanga.

¹⁶Cangunataca, cangunapaj taita, mamallata, huauquicunallata, familiacunallata, cangunapaj ali cumbacunallatami, huañuchijcunaman japichinga. Chashna rurajpimi cangunataca, huaquingunataca huañuchinga.

¹⁷Ñuca shutipi catinajujpimi cangunataca, tucui gentecuna na ricunayachinga.

¹⁸Ashtahuangarin cangunapaj umamandaca, shuj ajchallapash na chingangachu.

¹⁹Chai llaquicunata ali shunguhuambacha apanajushpallami, cangunapaj almata quishpichinguichi.

²⁰Jerusalendaca, ashtaca soldadocunami, chaupipi churanga. Chaita ricushpaca, tucuchigrimbachami yanguichilla.

²¹Judea llactapi causajcuna chaita ricushpaca, urcucunapi pacajungapaj richun ninimi. Jerusalenmandapash, tucuilla richun. Pambacunapi purinajujcunapash, puebloman cutinga ama tigrachun ninimi.

²²Chai punllacunapica, Dios escribichishca Shimipi villajunshna, Dios ninanda llaquichina punllacunami pactamunga.

²³Chai punllacunapica, vijsayu huarmicunapash, llullu huahuata viñachinajuj huarmicunapash, ¡aij imachari tucunga! Cai llactapi causajcunata Dios ninanda fiñashpa llaquichijujpimi, ninan llaquicunata apanajunga.

²⁴Paicunaca, espadahuanmi huañuchi tucunga. Shinallata, tucui llactacunamanmi prezu apanajunga. Jerusalendaca, na israelcuna tucuchinajuchun Dios paicunaman saquijpimi, chai punllacuna pactangacaman mandashpa tianajunga.

²⁵Chai jipami indipash, lunapash, luzerocunapash manllanayai tucushpa ricuringa. Mama cuchapash ninanda huacajushpami, caiman chaiman shitarijunga. Chaimandami cai pachapi causajcunaca, ninan llaqui japijpi pandarinajunga.

²⁶‘Cai pachapica, manllanayai llaquicunami ashtahuan tiagrin’ nishpa manllarishpami, gentecunaca ña huañugrijunshna tucunajunga. Shinallata ninan ushaihuan jahua pachapi tiajcunapash, ninandami cuyunga.

²⁷Chai jipallami, Runa Aichayu tucushca ñucataca, fuyupi shamujujta tucuicuna ricunga. Ninan ushaihuan, punchapamba shamujujtami ricunga.

²⁸Chashna llaquicuna ricuri callarijpica, cangunata quishpichina punllami ñalla chayanga. Shinamandami, ashtahuan shinlli tucushpa vichai ricuna canguichi— nijurcami.

²⁹Jesusca, cashnatapash chimbapurashpami parlajurca: —Jigos yuratapash, shuj yuracunatapash ricushpami, cashnata yarina canguichi:

³⁰Chai yuracunapi fangacuna jundajta ricushpaca, tamia pascarina punllacuna chayamujtami yachanguichi

³¹Chashnallatami chai tucui llaquicunata ricushpaca, Taita Dios mandana ña pactamujujta yachana canguichi.

³²Na llullashpami, cangunataca cashna nini: Cunan viñaicuna nara huañujpillatami, ñuca villajushca shimicunaca pactanga.

³³Jahua pachapash, cai pachapash tucuringami. Ashtahuangarin ñuca rimashca shimicunaca, napacha tucuringachu.

³⁴Ricui, cangunallata aliguta yarishpami, causana canguichi. Cangunapaj shungu ama shinlliyachunmi, ninanda micushpa, machashpa, cai causaipilla imatapash ninandapacha rurashpa charijyangapaca, napacha munana canguichi. Ñuca shamuna punllara cungashcapi, cangunata japij shamunman.

³⁵Chai punllami, tucui cai pachapi causanajuj gentecunataca, tuglla japinshna tucuillata japinga.

³⁶Ashtahuangarin cangunaca na puñushpami, Diostaca mañariana canguichi. Shina causashpami, chai tucui llaquicuna japij shamujujmandaca, canguna quishpirishpa, Runa Aichayu tucushca ñucapaj ñaupajpi shayarimui ushanguichi— nijurcami.

³⁷Jesusca punllapica, Diospaj huasipimi yachachijurca. Tutayajpica, Olivos shuti urcupi pacaringapajmi rin carca.

³⁸Diospaj huasi ucupi Jesús yachachijujta uyangapaca, tucuilla gentecunami paipajman tutamandata tandanajumun carca.