Read Imbabura Highland Quichua LUCAS 22 Bible Online

LUCAS 22 - Imbabura Highland Quichua bible

LUCAS 22

¹Levadura illaj tandata micuna pascua fiesta punllami, ña chayamujurca.

²Curacunata mandajcunapash, mandashca shimita yachachijcunapash, gentecuna fiñanata manllashpami, Jesusta imashna japishpa huañuchinata parlarinajurca.

³Iscariote nishca Judas shuti runapaj shungumanmi, Satanasca ñapash yaicura. Chai runaca, Jesuspaj chunga ishcai yachajuj purami carca.

⁴Paimi, curacunata mandajcunapajman, Diospaj huasita cuidajcunata mandajcunapajman rirca. Shina rishpami, paicunaman Jesusta imashna japichinatapash parlajurca.

⁵Chashna parlajpimi ninanda cushijushpa: “Canmanga, culquiguta cupashunllami” ninajurca.

⁶Shina nijpica ari nishpami, gentecunamanda huashalla, imashna Jesusta japichinata yariashpa, Judas runaca purijurca.

⁷Levadura illaj tandata micuna fiesta punllami chayarca. Chai punllapica, pascua punllata yarishpa llamaguta huañuchinapachami carca.

⁸Chai punllapimi: —Pascua punllapi micungapaj alichigrichi— nishpa Jesusca, Pedrotapash, Juandapash cacharca.

⁹Shina cachajpimi: —Pascua punllapi micungapaca, ¿maipita alichinajuchun munangui?— nishpa Jesustaca tapunajurca.

¹⁰Shina tapujpimi Jesusca, paicunata cashna nijurca: —Ricuichi. Jerusalén puebloman canguna chayanajushpaca, yacu funduta aparishca shuj runagutami tuparinguichi. Chai runaguta catishpa, pai maijan huasiman yaicujpipash, yaicunguichilla.

¹¹Chai huasiyu dueñotaca, cashna ninguichi: Ñucanchita Yachachijmi: ‘Pascua punllapi micunataca, ¿maijan ucupita ñuca yachajujcunandi micupashun?’ nishpa cachamupan ninguichi.

¹²Shina nijpimi, chai huasiyu dueñoca, jahua altibajopi ña alichishcalla, shuj jatun ucuta cangunaman ricuchinga. Chai ucupica, ñucanchi micungapaj alichinguichilla— nishpami cacharca.

¹³Paicuna rishpaca, Jesús imashna nishcashnami tarigrirca. Chai huasi ucupimi, pascua punllapi micunataca alichinajurca.

¹⁴Ña micuna horas chayajpica, paimanda villajcunandimi, Jesusca micungapaj tiarirca.

¹⁵Chaipimi Jesusca, cashna nirca: —¡Nara ñuca llaquichi tucushpallata, cai pascua punllapi cangunahuan micungapaca, ninandapachami munarcani!

¹⁶Cangunataca, cashnami nini: Cai micunagutaca, Taita Dios mandajuj llactagupi micuna punlla chayangacaman, cutinga na micushachu— nircami.

¹⁷Jesusca copata japishpa, Diosta pashi nishca jipaca, cashnami nirca: —Cai copata japishpa, cangunapura asha ashagu ufiaichi.

¹⁸Cangunataca cashnami nini: Uvas vinotaca, Taita Dios mandana punlla chayamungacaman, cutinga na ufiashachu— nircami.

¹⁹Shina nishpallami Jesusca, tandatapash japishpa, Diosta pashi nirca. Chai tandata chaupishpami, paipaj yachajujcunaman carashpa, cashna nirca: —Caica, cangunapaj ali cachun chaupirina ñuca cuerpomi. Ñucata yarishpa, cashnata rurashpa catinguichilla— nijurcami.

²⁰Ña micushca jipaca, copatapash japishpami, Jesusca cashna nijurca: —Cai vino copaca, cangunapaj ali cachun jicharina ñuca yahuarmi. Caihuanmi Diosca, gentecunahuan shuj mushujta ari nishcata pactachigrin.

²¹Ashtahuangarin ñucata japichigrijuj runaca, ñucahuanmi caipi micushpa tiajun.

²²Na llullashpami nini. Runa Aichayu tucushca ñucataca, Dios munashcashnami huañuchinajunga. Ashtahuangarin ñucata japichij runaca, ¡aij imachari tucunga!— nircami.

²³Jesús chashna nijpimi: —¿Maijanshi paitaca japichigrinchi?— nishpa, paicunapura nirinajurca.

²⁴Chai jipami, Jesuspaj yachajujcunaca: —¿Maijanshi ashtahuan alicachi tucushpa causanchi?— nishpa, paicunapura nirinajurca.

²⁵Ashtahuangarin Jesusca, paicunataca cashnami nijurca: —Llactacunata jatun mandajcunami, llactapi causajcunataca, ninanda mandashpa charin. Shinallata llactacunata mandajcunami: ‘Aligutami mandajun’ ni tucushca causan.

²⁶Ashtahuangarin cangunaca, na chashna causanachu canguichi ninimi. Canguna purapi maijambash punda cashpaca, jipa huambrashnalla imatapash rurachun ninimi. Mandaj cashpapash, servij runashnalla servishpa causachun ninimi.

²⁷¿Micungapaj tiarijchu jatun canga? Na cashpaca, ¿micunata yalichijujchu jatun canga? Micungapaj tiarijmi jatun. Ashtahuangarin ñucami, canguna purapica servij runagushna tiajuni.

²⁸Cangunami ñucahuanga, ima llaquicunata cashpapash, apashpa purircanguichi.

²⁹Chaimandami, ñuca Taita ñuca mandajuchun ushaita carashcashnallata, cangunamambash mandachun ushaita carani.

³⁰Ñuca mandajuj llactapi cangunapash ñucahuan tiarishpa micugrichun, ufiagrichunmi chashna carani. Chaipimi, mandangapaj tiarinapi tiarishpa, chunga ishcai Israel aillucuna imata rurashcatapash ricuchinguichi— nijurcami.

³¹Apunchi Jesusca, cashnatapashmi nirca: —Simón, Simón ricui, Satanasmi cangunataca, trigotashna shushungapaj ña mañagrishca.

³²Ashtahuangarin ñucata crishpa aliguta catichunmi, canmandaca Diosta ninanda mañarcani. Ñucata aliguta crishpa cutin tigrarishpaca, cambaj huauquicuna ñucata tucui shunguhuan catichun yachachipangui— nircami.

³³Shina nijpimi Simonga, cashna nirca: —Apunchi Jesús, prezuna huasiman canda apajpipash, catiriami ripasha. Huañuchi tucugrina cajpipash, canhuan huañuchi tucugrishallami— nircami.

³⁴Shina nijpimi Jesusca, cashna nirca: —Pedro, candaca cashnami nini: Nara gallo candajpillatami, ñucataca na rijsinichu nishpa canga, quimsacaman cunan tutallata nigrihuangui— nircami.

³⁵Paipaj yachajujcunataca, cashnami nirca: —Cangunataca, cucavi muchilatapash, culqui muchilatapash, chaquipi churajunatapash ama apashpa richunmi mandarcani. Shina cachajpica, ¿imagupajpash illajchu purircanguichi?— nishpami tapurca. Shina tapujpica: —Imagupajpash na illaparcachu— ninajurcami.

³⁶Shina nijpimi Jesusca, paicunata cashna nirca: —Ashtahuangarin cunanga, cucavi muchilata charishpaca apanguichilla. Culqui muchilata charishpapash, apanguichilla. Espadata maijambash na charishpaca, jahualla churajuriajta jatushpa randichi.

³⁷Cangunataca, cashnami nini: Dios escribichishca Shimipica: ‘Nalita rurajcunahuanmi, tandachishca canga’ nijunmi. Chaica ñucapi pactanarami. Ñucamanda imata villashpa escribishcapash, pactanapachami— nircami.

³⁸Shina nijpimi, paipaj yachajujcunaca: —Ishcai espadata ñami charinchi, Apunchi Jesús— ninajurca. Shina nijpimi, Jesusca: —Shinalla saquichi— nirca.

³⁹Jesús chaimanda llujshishpaca, Olivos shuti urcuman rishpa purij cashpami, chaiman rirca. Paipaj yachajujcunapashmi, catishpa rinajurca.

⁴⁰Chai pushtuman chayashpami, cashna nirca: —Cangunata imapash nalita rurana munai ama japij shamuchun, Diosta mañaichi— nircami.

⁴¹Shina nishpallami, paicunapaj ñaupajmanda rishpaca, rumita huaracahuan shitajpi urmanacamanshna rishpa, Diosta mañangapaj Jesusca cungurirca.

⁴²Cashna nishpami mañarca: —Ñuca Taitalla, jayajta ufianshna cai llaquita na apachun munashpaca, yalichihuai. Ashtahuangarin ama ñuca munashcata rurapaichu, cambaj munaita pactachipai— nircami.

⁴³Shina mañajujpimi, jahua pachamanda shuj ángel ricurishpa shinllichirca.

⁴⁴Paica, ninanda llaqui llaqui tucushpami, Diostaca ashtahuan tucui shunguhuan mañarca. Shina mañajpimi jumbipash, yahuarshnalla alpaman ninanda shutujurca.

⁴⁵Shina mañajushpa jatarishpaca, paipaj yachajujcunapajmanmi shamurca. Paicunataca, llaquihuan puñushpa yalishcatami japij shamurca.

⁴⁶Shinamandami paicunataca, cashna nirca: —¿Imashpata puñunajunguichi? Cangunata imapash nalita rurana munai ama japij shamuchun, jatarishpa Diosta mañaichi— nircami.

⁴⁷Chashna nijpimi, chunga ishcai yachajuj puramandallata, Judas shuti runaca, ashtaca runacunahuan Jesustaca, alillachu capangui nishpa muchangapaj quimirirca.

⁴⁸Shina rurajpimi Jesusca, cashna nirca: —Judas. ¿Runa Aichayu tucushca ñucataca, muchashpachu japichihuangui?— nircami.

⁴⁹Chai paihuan shayanajuj puramandaca, Jesusta imata ruragrinajujta ricushpami, cashna ninajurca: —¿Caicunataca, espadahuan chugrichishunllachu, Apunchi Jesús?— ninajurcami.

⁵⁰Shina nishpallami, paicuna puramanda shuj runaca, curacunata mandajta servij runataca, ali lado rinri muchurijta huactarca.

⁵¹Shina muchujpimi Jesusca, cashna nirca: —Ña shinalla saquichi— nishpami, chai runapaj rinripi tacarishpa alichirca.

⁵²Jesusta prezu apangapaca, curacunata mandajcunapash, Diospaj huasita cuidajcunata mandajcunapash, mandaj rucucunapashmi shamushca carca. Paicunatami, Jesusca cashna nijurca: —¿Shuhuatashnachu japingapaj espadacunahuan, caspicunahuan cangunaca shamunguichi?

⁵³Punllandi Diospaj huasipi cangunahuan cajpipash, ñucata na japishpami purircanguichi. Ashtahuangarin yana yana tutapi mandajuj yarichijpimi, cunanga cashna japij shamuhuashcanguichi— nijurcami.

⁵⁴Jesusta japishpaca, curacunata mandajpaj huasimanmi apanajurca. Ashtahuangarin Pedroca, caru carullami catishpa rijurca.

⁵⁵Chai huasi chaupi patiopi ninata japichishpa muyundi tiarinajujpimi, Pedropash paicunahuan tiarirca.

⁵⁶Chai nina ladopi Pedro tiajujpimi, shuj servij cuitsa ricushpaca, cashna nirca: —Cai runapashmi, chai runahuan purijurca— nircami.

⁵⁷Ashtahuangarin paica: —Jala, chai runataca rijsitapash na rijsinica— nishpami llullarca.

⁵⁸Chai jipallami, shuj runapash Pedrota ricushpaca: —Cambashmi, chai runata catij purallata cangui— nirca. Shina nijpimi, Pedroca: —Jala, ñucaca na canichu— nirca.

⁵⁹Shuj horas jipallami, shuj runapash shinllitapacha cashna nirca: —Cai runatapashmi, chai runahuan purijujtapacha ricurcani. Paipash Galilea llactamandami— nircami.

⁶⁰Shina nijpimi, chai runataca Pedroca: —Runacarin, imatachari nijunguipash, na yachanichu— nirca. Chashna nijujpillatami, galloca ñapash candarca.

⁶¹Shina candajhuanmi Apunchi Jesusca, Pedrota tigrarishpa ricurca. Shina ricujpimi, Apunchi Jesús villashca shimicunata yarirca. Jesusca, cashnami nishca carca: “Narapash gallo candajpillatami, canga ñucataca quimsacaman, na rijsinichu nigrihuangui” nishcami carca.

⁶²Shina yarishpami, canllaman llujshishpa Pedroca, ninandapacha llaquirishpa huacarca.

⁶³Jesusta cuidashpa charinajuj runacunaca, pugllashpa asishpami huactanajurca.

⁶⁴Paicunaca, Jesuspaj ñavita finduhuan huatashpami: —¿Pita huactarcanchi? Villayari— ninajurca.

⁶⁵Jesustaca, ashtahuan nalicachishpami, shimi llujshishcata rimanajurca.

⁶⁶Ña punllayajpimi, israelcunata mandaj rucucunapash, curacunata mandajcunapash, mandashca shimita yachachijcunapash tandanajurca. Paicunami, mandaj puracunalla tandanajushcapaj ñaupajman Jesustaca apanajurca. Chaipimi cashna ninajurca:

⁶⁷—¿Canllu, Quishpichij Cristo cangui? Villairi— ninajurcami. Shina nijpimi Jesusca, paicunata cashna nirca: —Chaimi cani nijpipash, cangunaca na crinachu canguichi.

⁶⁸Cangunata ñuca tapujpipash, upalla uyanguichimanllami, cacharitallapash na cacharihuanguichimanllu.

⁶⁹Ashtahuangarin Runa Aichayu tucushca ñucami, ninan ushaita charij Taita Diospaj ali lado maquipi cunanmandaca tiajugrisha— nircami.

⁷⁰Shina nijpimi: —Shinaca, ¿canga Taita Diospaj Churipachachu cangui?— nishpa, tucuicuna tapunajurca. Shina tapujpimi, Jesusca: —Ñuca chaipacha cajtaca, cangunallatami ninajunguichi— nirca.

⁷¹Shina nijpimi, paicunapura cashna ninajurca: —¿Shujcuna ashtahuan villachun minishtinchirachu? Paipaj shimihuanllata chashna nirijujtaca, ñucanchillata ña uyanchimi— ninajurcami.