Read Imbabura Highland Quichua LUCAS 23 Bible Online

LUCAS 23 - Imbabura Highland Quichua bible

LUCAS 23

¹Chashna nishpallami, tucuilla chai gentecunaca jatarishpa, Pilatopaj ñaupajman Jesusta apashpa rinajurca.

²Pilatopajman chayashpaca, Jesusta juchachishpami, cashna villai callarirca: —Cai runataca, ñucanchi llactapi causajcuna fiñanajui jatarichun yachachijujtami japircanchi. Paica, cashna nishpami yachachishpa purijun: ‘Cesarman impuestotaca, na cunachu canguichi. Ñucamari, jatun mandaj Quishpichij Cristo cani’ nijunmi— ninajurcami.

³Shina ninajujpimi: —¿Canllu Judea llactapi causajcunata Jatun Mandaj cangui?— nishpa, Pilatoca tapurca. Shina tapujpica, Jesusca: —Canllata ñamari chashna ningui— nircami.

⁴Shina nijpimi: —Cai runataca, ima nalita rurashcatapash na japinichu— nishpa, curacunata mandajcunamambash, gentecunamambash Pilatoca villarca.

⁵Shina nijpicarin ashtahuan ninanda juchachishpami, cashna ninajurca: —Gentecuna fiñanajui jatarichunga, Galilea llactapimari, cai runaca caparishpa yachachishpa callarirca. Cunanga, cai Judea llactapipash, tucui muyundipimari chashnallata rurajun— ninajurcami.

⁶“Galilea” ninajujta Pilato uyashpami: —¿Cai runaca, Galilea llactamandachu?— nishpa tapurca.

⁷Jesustaca, Galilea llactamanda cajta yachashpami, chai Galilea llactata mandaj Herodespajman, Pilatoca cacharca. Herodespash, chai punllacunapica, Jerusalenbimi carca.

⁸Herodesca, Jesusta ricushpami, ninandapacha cushijurca. Jesusmanda imatapash parlanajujta uyashpami Herodesca, Jesusta ricungapaj munashpa, unaitapacha shuyajurca. Paica, Jesús imatapash rurajtaca ricushallatami yashpami shuyajurca.

⁹Herodesca, Jesusta ricushpaca ninandami imatapash tapujurca. Ashtahuangarin Jesusca, imatapash na tigrachircachu.

¹⁰Chaipica, curacunata mandajcunapash, mandashca shimita yachachijcunapash, ninandapachami Jesustaca juchachishpa rimanajurca.

¹¹Shinamandami Herodespash, paipaj soldacunapash Jesustaca, punchapamba churajunata churachishpa, yangapi churashpa na cazushpa asinajurca. Chashna rurashpami, Pilatopajman cutin tigrachishpa, Jesustaca cacharca.

¹²Chai punllami Pilatohuan, Herodeshuanga cutin ali tucunajurca. Paicunaca, pundaca fiñanajushpami causashca carca.

¹³Chai jipami, curacunata mandajcunapash, llactata mandajcunapash, gentecunapash tandanajuchun, Pilatoca cayachun mandarca.

¹⁴Chaicuna tandanajujpimi, Pilatoca cashna nirca: —Cangunami cai runataca: ‘Gentecuna fiñanajui jatarichunmi yachachijun’ nishpa apamurcanguichi. Cangunapash uyajtami, canguna juchachishcataca, cai runata tapuchircani. Ashtahuangarin nalita rurashcataca, imatapash na tarinichu.

¹⁵Cai runa nalita rurashcataca, Herodespash na tarishpami, ñucanchipajmanllata tigrachimushca. Ricuichi, cai runaca pai huañuchi tucungapaca, ima nalitapash na rurashcachu.

¹⁶Cunanga, astichishpallami cacharigrini— nijurcami.

¹⁷Pascua fiesta punllacuna chayamujpica, shuj prezu tiajuj runata cacharishpami Pilatoca, gentecunata cushichinata yacharca.

¹⁸Ashtahuangarin: —¡Chai runataca huañuchilla, Barrabás shuti runatami cacharichun munanchi!— nishpami, tucuilla gentecuna ninanda caparinajurca.

¹⁹Chai Barrabás shuti runaca, pueblopi macanajuchishcamanda, shuj runata huañuchishcamandami, prezuna huasipi tiajurca.

²⁰Pilatoca, Jesusta cacharingapaj munashpami, gentecunata cutin tapurca.

²¹Chashna tapujpicarin: —¡Chai runataca, cruzpi chacatailla, chacatailla!— nishpami, gentecunaca ninandapacha caparinajurca.

²²Shina caparinajujpimi, caihuanga ña quimsacaman tapushpa, Pilatoca cashna nirca: —¿Cai runaca, ima nalitata rurashcayari? Pai huañuchi tucungapaca, ima nalita rurashcatapash na tarinichu. Cunanga, astichishpallami cachagrini— nircami.

²³Ashtahuangarin gentecunapash, curacunata mandajcunapash: —Chacataipacha— nishpa ninandapacha caparishpami, Pilatotaca misharca.

²⁴Shinamandami Pilatoca, paicuna imata rurangapaj mañashcata rurachun saquirca.

²⁵Shina nishpallami, paicuna cacharipai nishpa mañashca runatara cacharirca. Chai runaca, shujcunata macanajuchishcamanda, huañuchishcamandami, prezuna huasipi tiajurca.

²⁶Jesusman cruzta apachishpa rinajushpami, pambamanda tigramujuj shuj runata tuparirca. Chai runamanmi, cruzta aparishpa Jesusta catishpa richun apachinajurca. Chai runaguca, Cirene pueblomanda Simón shuti runami carca.

²⁷Jesusta catishpa rinajuj ashtaca gentecunaca, huarmicunapash ashtacacunami rinajurca. Paicunami, Jesustaca ninanda llaquishpa, caparishpa huacashpa catinajurca.

²⁸Ashtahuangarin Jesusca, paicunata tigrarishpa ricushpami, cashna nijurca: —Jerusalenmanda huarmicuna, ñucamandaca na huacanachu canguichi. Ashtahuangarin cangunamanda, cangunapaj huahuacunamandami, huacana canguichi.

²⁹Ricuichi: ‘Na vijsayu tucushpa, huahuata na tarij huarmicunaca, ninanda cushijunguichi’ nina punllacunami chayamunga.

³⁰Chai punllacuna chayamujpica, huañungapaj munashpami, urcucunataca: ‘Llapihuaichi’ ninajunga. Lomacunatapash: ‘Pambahuaichi’ ninajungami.

³¹Verde quirushna causajujtapash cashna llaquichinajushpaca, ¿chaquishca quirushna causajcunatacarin, imashnashi ashtahuan llaquichinga?— nijurcami.

³²Jesusta huañuchingapaj apanajushpaca, huañuchij runacunatapash, ishcai puratami huañuchingapaj apanajurca.

³³Uma Tullu shuti lomaman chayashpami, Jesustaca cruzpi chacatanajurca. Jesustaca chaupipi churashpami, shujtaca ali ladoman, shujtaca lluqui ladoman churashpa, huañuchij runacunatapash chacatanajurca.

³⁴Chashna ruranajujpimi Jesusca, cashna nirca: —Ñuca Taitalla, caicunaca na yachaimandami cashna ruranajun, cungapailla— nircami. Soldadocunaca, paicunapura suerteta rurashpami, Jesuspaj churajunataca chaupirinajurca.

³⁵Gentecunaca, imashna rurajtami ricushpa shayanajurca. Mandajcunapash, Jesustaca nalicachishpa asishpa ricushpami, cashna ninajurca: —Shujcunataca quishpichircallami. Ñucanchita quishpichijuchun, Taita Dios agllashca Quishpichij Cristo cashpaca, paillata quishpiri ushanmanmi— ninajurcami.

³⁶Soldadocunapash, Jesustaca na cazushpa asishpami, paipajman quimirishpa, vinagreta ufiachingapaj munanajurca.

³⁷Chashna rurashpami: —Judea llactapi causajcunata jatun Mandaj cashpaca, canllata quishpiriyari— ninajurca.

³⁸Jesús chacatariajuj jahuapipash: “CAICA, JUDEA LLACTAPI CAUSAJCUNATA JATUN MANDAJMI” nishpami, tablapi escribishcata churashca carca. Chai shimicunataca griego, latín, hebreo rimaicunapi escribishcami carca.

³⁹Jesushuan chacatai tucushpa huarcurianajuj puramanda nalita ruraj shuj runaca, paita ninanda nalicachishpami, cashna nijurca: —Canga, Quishpichij Cristo cashpaca, canllata quishpirishpa, ñucanchitapash quishpichiyari— nircami.

⁴⁰Shina nijpimi caishuj runaca, chai runata jarcashpa rimashpa cashna nirca: —Taita Diostaca, ¿nachu canga manllangui? Cambash, chashnallatami ninanda llaquichi tucujungui.

⁴¹Ñucanchica nalita rurashcamanda, ninanda llaquita apanapacha cashpami, cashna llaquichi tucunajunchi. Ashtahuangarin cai runaguca, ima nalitapash na rurashcachu— nircami.

⁴²Shina nishpallami, Jesustaca: —Can mandangapaj shamushpaca, ñucata yarihuangui— nirca.

⁴³Shina nijpimi Jesusca, chai runagutaca cashna nirca: —Na llullashpami, candaca cashna nini: Cunanllatami, paraíso juyailla llactagupi ñucahuan cangui— nircami.

⁴⁴Chaupi punllamandaca, chishi quimsa horascamanmi, tucui cai pachaca yana yana tucurca.

⁴⁵Indipash yanayarcami. Diospaj huasi ucupi huarcushpa quilpashca jatun fachapash, chaupipimi liquirirca.

⁴⁶Chai jipaca Jesusca, ninanda caparishpami: —Ñuca Taitalla, cambaj maquipimi, ñuca espiritutaca mingapani— nirca. Shina nishpalla huañurcallami.

⁴⁷Chashna tucujujta patsaj soldadota mandaj ricushpaca, Taita Diosta ninanda alicachishpami: —Cai runaguca, imatapash cashcatapacha rurajmi cashca— nirca.

⁴⁸Ricungapajlla rishca gentecunapash, chashna tucujujta ricushpaca, ninanda llaquirishpa pechotapash huactarishpami tigranajurca.

⁴⁹Ashtahuangarin Jesusta rijsijcunaca, Galilea llactamandapachami tucuilla paita cumbashpa shamurca. Chai huarmicunaca, chashna tucujtaca carumandami ricushpa shayanajurca.

⁵⁰Judea llactapi tiaj Arimatea shuti pueblomanda José runagupash, chaipimi carca. Paica, ali runagu cashpami, imatapash cashcatapacha rurashpa causajurca. Paica, mandaj puralla tandanajuj purami carca.

⁵¹Chaipura cashpapash Joseca, paicunalla parlarishpa nalita rurajpimi, napacha alichu nijurca. Paica, Taita Dios mandajuna punllacuna chayamunatami, cushijushpa shuyajurca.

⁵²Chai runagumi, Pilatopajman rishpa, Jesús huañushcaguta pambangapaj mañarca.

⁵³Paimi, Jesús huañushcaguta cruzmanda uriajuchishpa, jatun fachahuan pilluchishpa, jaca rumipi rurashca utujupi churarca. Chaipica, pitapash nara pambashcachu carca.

⁵⁴Chai punllapica, samana punlla chayajujpi, imatapash tucuita aliguta alichina punllami carca.

⁵⁵Galilea llactamandapacha Jesusta cumbashpa shamushca huarmicunapashmi, Jesús huañushcaguta apajujpica, catishpa rinajurca. Paicunami, Jesús huañushcata maijan utujupi churajtapash ricunajurca.

⁵⁶Paicuna chaimanda tigrashpaca, mishquillagu ashnajuj jambicunatapash, aceitetapash aliguta alichishpallami, mandashca shimipi nijunshna samana punllapica samanajurca.