Read Imbabura Highland Quichua LUCAS 24 Bible Online

LUCAS 24 - Imbabura Highland Quichua bible

LUCAS 24

¹Domingo tutamandatami chai huarmicuna, Jesusta pambashca utujuman chayanajurca. Paicuna alichishca mishquillagu ashnajuj jambicunata apashpami shamunajurca. Paicunataca, shuj huarmicunapash cumbashpami shamunajurca.

²Paicuna chayashpaca, utujuta jarcashca rumita suchuchishcatami tupagrirca.

³Utujuman paicuna yaicushpaca, Apunchi Jesús huañushcagutaca na tarircachu.

⁴Paicuna ninandapacha manllarishpa shayanajujpimi, cashna tucurca: Ishcaipura runacunami, juyailla punchapamba churajunata churajushca ñapash shayarimurca.

⁵Chai huarmicunaca, ninandapacha manllarishpami, alpaman urai cumurinajurca. Chai runacunaca, cashnami ninajurca: —Causajujtaca, ¿imapashpata huañushcacunapaj chaupipi mascaj shamunguichi?

⁶Paica na caipichu, ñami causarishca. Galilea llactapi cangunahuan purijushpa, cashna villashcataca yaripaichiyari:

⁷‘Runa Aichayu tucushca ñucataca, juchayu runacunaman japichijpi, chacatai tucushpa huañunapachami cani. Chashna huañuchijpipash, quimsa punllahuanga causarishallami’ nishpami villajurca— ninajurcami.

⁸Shina nijpimi chai huarmicunaca, Jesús villajushcata yarinajurca.

⁹Shina nijpi paicuna tigrashpami, Jesuspaj chunga shuj yachajujcunaman, cumbashpa purinajushca caishujcunamambash tucuita villanajurca.

¹⁰Magdala shuti pueblomanda Mariapash, Juanapash, Jacobopaj mama Mariapash, shuj huarmicunapashmi, villachun cachashcacunaman chashna villanajurca.

¹¹Chai huarmicuna villajpica, juizu illanshnallami ninajun yashpami, paicunaca na crinajurca.

¹²Ashtahuangarin Pedroca, ucha jatarishpami, Jesusta pambashca utujuta ricungapaj calparca. Utuju ucuta ricushpaca, fachacunalla tianajujtami ricurca. Shina ricushpaca, ninanda manllarishpami Pedroca, huasiman tigrajurca.

¹³Chai punllallatami, Jesusta crij puramanda ishcaipura runacunaca, Emaús shuti uchilla llactaman rinajurca. Chai puebloca, Jerusalenmandaca chunga kilómetro, pusaj patsaj metropimi tiajun.

¹⁴Paicuna purami chai punllacunapi, tucui ima tucushcatapash parlashpandi rinajurca.

¹⁵Paicunapura parlarishpa imatapash nirishpandi rinajujpimi, Jesusca paicunapajman quimirishpa, cumba tucushpa ri callarirca.

¹⁶Ashtahuangarin paicunapaj ñavica quilpashcashna cashpami, Jesustaca na rijsirca.

¹⁷Paicunahuan rijushpami Jesusca, cashna nishpa tapurca: —¿Imamandata cangunapura chashna parlarishpandi rinajunguichi? ¿Imashpata chashna llaqui llaqui canguichi?— nircami.

¹⁸Shina nijpimi, paicuna puramanda Cleofas shuti runaca, cashna nirca: —Cunan punllacunapi, Jerusalenbi ima tucushcatapash tucuicunami yachan. ¿Canllachu caru llactamanda shamushca cashpa, na imatapash yachangui— nircami.

¹⁹Shina nijpica: —¿Imata tiarca?— nishpami, Jesusca tapurca. Shina tapujpimi, cashna ninajurca: —Nazaret pueblomanda Jesusmandamari parlanajunchi. Paica, Dios ima nishcata villaj runagumi carca. Paica, Taita Diospaj ñaupajpipash, tucui gentecunapaj ñaupajpipash, aliguta rurangapaj, villangapajpash, ninan ushaitami charirca.

²⁰Paitaca huañunapachami nishpa, curacunata mandajcuna, ñucanchi llactata mandajcuna cujpimi, chacatashpa huañuchirca.

²¹Ñucanchica, paimi israelcunata quishpichinga yashpami shuyanajurcanchi. Shina yajpicarin, cunanga ñami paita huañuchishcapash quimsa punlla tucun.

²²Shina cajpipash ñucanchi puramanda huaquin huarmicunami nara ali punllayajpillata, Jesusta pambashca utujuta ricungapaj rishca. Paicuna villangapaj shamushpami manllachin.

²³Jesuspaj cuerpoguta na tarishpa shamushpami: ‘Angelcunatapashmi muscuipishna ricurcanchi’ nishpa villanajurca. Chai angelcunami: ‘Jesusca ña causajunmari’ nishpa villarca.

²⁴Shina villajpimi, ñucanchi puramanda huaquingunaca, chai utujuta ricungapaj rirca. Chaipica, chai huarmicuna villashcashnallatami ricushca. Ashtahuangarin Jesustaca, na ricushcachu— ninajurcami.

²⁵Shina nijpimi Jesusca, paicunata cashna nirca: —¡Juizu illajcunami! ¡Dios ima nishcata villajcuna, imata villashcatapash na tucui shunguhuan crijcunamari canguichi!

²⁶Punchapamba llactaman Quishpichij Cristo yaicugringapaca, ¿nachu chashna llaquita apanapacha carca?— nircami.

²⁷Shina nishpallami, Dios escribichishca Shimipi Jesusmanda tucui imata nijushcatapash, Moisés escribishca shimicunamanda callarishpa, Dios ima nishcata villajcuna imata villashpa escribishcatapash, tucuita paicunaman villajurca.

²⁸Paicunaca, ñami chai uchilla llactaguman chayarca. Ashtahuangarin Jesusca, ashtahuan caruman rijunshnallami, chai llactata yalishpa ringapaj munarca.

²⁹Shina rigrijpica, paicunaca ama richun munashpami: —Caipi pacarilla. Ñami chishashca, amsayagrinmari— ninajurca. Shina nijpimi Jesusca, paicunapaj huasipi mingaringapaj yaicurca.

³⁰Micungapaj ña tiarishpaca, tandaguta japishpami, Diosta pashi nishpa Jesusca, tandaguta chaupishpa paicunaman cararca.

³¹Shina carajpimi, paicunapaj ñavica pascarinshna ricushpa, Jesús cajta rijsinajurca. Ashtahuangarin Jesusca, paicunapaj ñavimanda ñapash chingarcallami.

³²Shina chingajpimi, caishuj chaishuj cashna ninajurca: —¿Nachu Dios escribichishca Shimiguta ñucanchiman villashpandi shamujushpaca, ñucanchi shungupi aligutapacha yarijta rimarca?— ninajurcami.

³³Shina nishpallami paicunaca chai horasllata, Jerusalenman ucha tigranajurca. Ña chayashpaca, Jesuspaj chunga shuj yachajujcunandi, shuj cumbacunandi tandanajushpa tianajujtami japigrirca.

³⁴Paicunapash cashnami ninajurca: —Apunchi Jesusca causarishcapachamari. Simonmambash ricurishcami— ninajurcami.

³⁵Shina nijpimi, ñambi Jesushuan tuparishpa parlashpandi rishcatapash, tandata chaupishpa carajpira rijsishcatapash villanajurca.

³⁶Paicunapura chashna parlanajujpimi Jesusca, paicunapaj chaupipi ñapash shayarimurca. Shina shayarishpami: —Cangunapaca, casilla ali causaigu tiachun— nirca.

³⁷Jesusta ricushpaca, espiritumari shamun yashpami, paicunaca ninanda manllarishpa chujchunajurca.

³⁸Ashtahuangarin Jesusca, cashnami nirca: —¿Imashpata cangunaca, cashna musparinguichi? ¿Imashpata ishcai shungu tucushpa, chashnatara yarinajunguichi?

³⁹Ñuca maquita, ñuca chaquita ricuichi. Ñucallatami cani. Tacarishpapash ricuichilla. Aichayu, tulluyu cajtami ñucataca ricunajunguichi. Ashtahuangarin espirituca, aichatapash, tullutapash na charinllu— nircami.

⁴⁰Shina nishpallami, Jesusca maquitapash, chaquitapash paicunaman ricuchijurca.

⁴¹Shina ricuchijpipash, paicunaca ninanda cushijushpa ricunajushca cashpami, nara crishca carca. Shina cajpimi: —Ima micunagupash, ¿nachu tian?— nishpa, Jesusca tapurca.

⁴²Shina tapujpimi, piji aicha cusashcata, balun mishqui shinlliyashcaguta caranajurca.

⁴³Jesusca chaita japishpami, paicunapaj ñaupajpi micurca.

⁴⁴Chai jipami, Jesusca cashna nirca: —Cangunahuan purijushpallatami, cashna nishpa villajurcani: ‘Moisés mandashca shimicunapipash, Dios ima nishcata villajcuna villashca shimicunapipash, Salmocunapipash, ñucamanda villajunmi. Chaicunapi imata nijushcapash pactangapachami’ nishpami villajurcani— nircami.

⁴⁵Shina nishpami, Dios escribichishca Shimicunapi imata nijushcatapash yachai ushachun, paicunapaj yuyaita pascarca.

⁴⁶Paicunataca cashnami nijurca: —Escribishcapica, chashnapacha tucunatami villajun. Chashna villajushcashnami, Quishpichij Cristoca huañuchi tucushpa quimsa punllahuanga, huañushcacunapaj chaupimanda causarina.

⁴⁷Chai jipaca, Jerusalenmanda callarishpa, tucui llactacunapi causajcunaman, paipaj shutipi cashna villachunmi, paica cachanga: ‘Ninanda llaquirishpa, Taita Diospajman tigrarichi. Shina rurajpica, Taita Diosmi cangunapaj juchacunata anchuchinga’ nijunmi.

⁴⁸Chai tucui villashcacuna pactajtaca, cangunami ricurcanguichi.

⁴⁹Ricuichi, ñuca Taita cangunaman ninan ushaita carashapachami nishcataca, ñucami cangunapaj jahuapi cachamusha. Ashtahuangarin jahua pachamanda chai ushaita cangunaman caramungacaman, Jerusalén pueblopi shuyanguichi— nijurcami.

⁵⁰Chai jipami, Jerusalenmandaca Betania pueblocaman Jesusca, paicunata pushashpa rirca. Chaiman chayashpaca, maquita vichai alsashpami, paicunata bendiciajurca.

⁵¹Shina bendiciajujpimi, cashna tucurca: Paicunamanda anchurishpami, jahua pachaman apai tucurca.

⁵²Paicunaca, Jesusta ninanda alicachishca jipami, ninanda cushijushpa, Jerusalenman tigranajurca.

⁵³Paicunaca punllandimi, Diospaj huasipica Taita Diosta ninandapacha alicachinajurca. Shina cachun.