Read Imbabura Highland Quichua LUCAS 3 Bible Online

LUCAS 3 - Imbabura Highland Quichua bible

LUCAS 3

¹Tiberio Cesar shuti runa, chunga picha huatata mandajui huatapimi, Poncio Pilatoca, Judea llactata mandajurca. Herodesca, Galilea llactatami mandajurca. Paipaj huauqui Felipe shuti runaca, Iturea shuti, Traconite shuti llactacunatami mandajurca. Shinallata Lisanias shuti runaca, Abilinia shuti llactatami mandajurca.

²Anás shuti, Caifás shuti curacunaca, curacunata mandajcunami carca. Chai punllacunami, Zacariaspaj churi Juanga, jichushca pambapi causajurca. Chaipi causajujpimi Taita Diosca, Juanman rimamurca.

³Shinamandami Juanga, Jordán shuti yacu manñacunapi tiaj tucui llactacunaman rirca. Chai llactacunapimi, cashna villajurca: “Juchayu cashcamanda ninanda llaquirishpa, Diospajman tigrarichi, bautizarichi. Shina rupajpica, Diosmi cangunapaj juchacunata anchuchinga” nishpami villajurca.

⁴Dios ima nishcata villaj Isaías escribishcapi, imashna nishcashnallatami pactarca. Chai escribishcapica, cashnami nijun: “Jichushca pambapi caparij runaguca, cashnami nin: ‘Jatun Diosman ñanda alichipaichiyari. Quingu quingu chaqui ñangunatapash derechapaichiyari.

⁵Tucui pugru pambacunapipash, alpata jundachingami. Tucui urcucunapash, lomacunapashmi urai tiachi tucunga. Quingu quingu ñangunatapash derechangami. Utujuyashca ñangunatapash alichingami.

⁶Tucui gentecunami, Taita Dios quishpichinata ricunajunga’ ninmi” nijunmi.

⁷Bautizahuai nishpa ashtaca gentecuna paipajman shamunajujpimi Juanga, paicunata cashna nijurca: “Cangunaca, culebrashna nali gentecunapaj miraicunamari canguichi. ¿Pita cangunataca Dios ninanda fiñarishpa llaquichinamandaca pacajunguichillami nishpa yachachircayari?

⁸Cangunaca, tucui shunguhuan ninanda llaquirishcatami, grano fucunshna ricuchina canguichi. Cangunaca, na cangunapaj shungu ucupilla: ‘Abrahammi ñucanchi ñaupa taita’ ninajunachu canguchi. Cangunataca cashnami nini: Taita Diosca, caipi sirij rumicunatapash, Abrahambaj huahuacuna cachun rurai ushanmi.

⁹Quirucunapaj sapipi jachata churashcallami tiajun. Nali fucuj tucui quirucunataca, jachahuan fitishpami, ninapi shitanga” nijurcami.

¹⁰Shina nijpimi: —¿Imatata rurana capanchi?— nishpa, gentecunaca tapunajurca.

¹¹Shina tapujpimi Juanga, cashna nirca: —Túnica nishca churajunata ishcaita charishpaca, shujguta na charijman carana canguichi. Micunaguta charishpapash, chashnallatami rurana canguichi— nircami.

¹²Shinallata impuestota japishpa causaj huaquin runacunapash, bautizaringapaj shamushpami: —Ñucanchica, ¿imatata rurana capanchi, Yachachij?— nishpa, Juandaca tapunajurca.

¹³Shina tapujpimi Juanga, cashna nirca: —Impuestota japichun mandashca cajpipash, chaitallami japina canguichi, na yapalla japinachu canguichi— nircami.

¹⁴Shinallata huaquin soldadocunapash shamushpami: —Ñucanchica, ¿imatata runana capanchi?— nishpa, Juandaca tapunajurca. Shina tapujpimi Juanga, cashna nirca: —Pitapash na imahuambash manllachishpa quichunachu canguichi. Pitapash na yangamanda juchachinachu canguichi. Canguna mashnaguta japinajushpapash, chaihuanllami cushijuna canguichi— nircami.

¹⁵Quishpichij shamunata tapushpa shuyanajuj gentecunaca, Juanda ricushpami: “Caimi Quishpichij Cristo canga” yashpa ricunajurca.

¹⁶Juanga, tucuicunamanmi cashna nijurca: “Ñucami cangunataca, yacupilla bautizajuni. Ashtahuangarin ñucatapash yali ushaita charijmi shamunga. Ñucaca, paipaj chaquipi churajushpa huatarishcata pascaitallapash na ushanachu cani. Paimi cangunataca, Diospaj jucha illaj Espirituhuan, ninahuan bautizanga.

¹⁷Paica, trigota huairachina palata chaririajmi shayajun. Chaihuanmi, trillana pambapi jupata agllanshna trigota huairachinga. Shina huairachishpami, granota alichina huasipi trigota alichinshna alichinga. Jupataca, na huañushpa rupajuj ninapimi rupachinga” nijurcami.

¹⁸Juanga cai shimicunahuan, shuj ashtahuan shimicunahuambash aliguta yarichishpami, ali villaita gentecunaman villajurca.

¹⁹Mandaj Herodesca, paipaj huauqui Felipe runapaj Herodías shuti huarmihuanmi causajurca. Ashtahuan imatapash nalicunata rurashpami causajurca. Shinamandami Herodestaca, ninanda nalicachishpa Juanga rimajurca.

²⁰Herodesca, chai tucui nalicunata rurashca jahuami Juandaca, prezuna huasipi vichachishpa ashtahuan nalita rurarca.

²¹Tucui gentecunata bautizajujpimi, cashna tucurca: Jesuspash bautizarishpami, Diosta mañajurca. Shina mañajujpimi, jahua pachaca ñapash pascarirca.

²²Shina pascarijpimi, Diospaj jucha illaj Espirituca, shuj palomagushnallapacha Jesuspaj uma jahuaman urai shamurca. Jahua pachamandapash, cashna rimajmi uyarimurca: “Canga, ñuca juyashca Churigumi cangui. Canmandami, ninanda cushijuni” nijmi uyarimurca.

²³Quimsa chunga huatatashna charishpami, Jesusca yachachi callarirca. Gentecunaca Jesustaca, Josepaj churipachami yashpami ricujurcami. Joseca, Elí shuti runapaj churimi carca.

²⁴Elí runaca, Matat shuti runapaj churimi carca. Matat shuti runaca, Leví shuti runapaj churimi carca. Leví runaca, Melqui shuti runapaj churimi carca. Melqui runaca, Jana shuti runapaj churimi carca. Jana shuti runaca, Josepaj churimi carca.

²⁵Joseca, Matatías shuti runapaj churimi carca. Matatías runaca, Amospaj churimi carca. Amós runaca, Nahum runapaj churimi carca. Nahum runaca, Esli shuti runapaj churimi carca. Esli shuti runaca, Nagai shuti runapaj churimi carca.

²⁶Nagai shuti runaca, Maat shuti runapaj churimi carca. Maat shuti runaca, Matatías runapaj churimi carca. Matatías runaca, Semei shuti runapaj churimi carca. Semei runaca, Josepaj churimi carca. Joseca, Judá shuti runapaj churimi carca.

²⁷Judaca, Joana shuti runapaj churimi carca. Joana runaca, Resa shuti runapaj churimi carca. Resa shuti runaca, Zorobabel shuti runapaj churimi carca. Zorobabel shuti runaca, Salatiel shuti runapaj churimi carca. Salatiel runaca, Neri shuti runapaj churimi carca.

²⁸Neri shuti runaca, Melqui shuti runapaj churimi carca. Melqui shuti runaca, Adi shuti runapaj churimi carca. Adi runaca, Cosam shuti runapaj churimi carca. Cosam shuti runaca, Elmodam shuti runapaj churimi carca. Elmodam shuti runaca, Er shuti runapaj churimi carca.

²⁹Er shuti runaca, Josuepaj churimi carca. Josueca, Eliezer runapaj churimi carca. Eliezer runaca, Jorim shuti runapaj churimi carca. Jorim shuti runaca, Matat shuti runapaj churimi carca.

³⁰Matat shuti runaca, Leví shuti runapaj churimi carca. Leví runaca, Simeón shuti runapaj churimi carca. Simeón runaca, Judá shuti runapaj churimi carca. Judá shuti runaca, Josepaj churimi carca. Joseca, Jonán shuti runapaj churimi carca. Jonán runaca, Eliaquim shuti runapaj churimi carca.

³¹Eliaquim runaca, Melea shuti runapaj churimi carca. Melea shuti runaca, Mainán shuti runapaj churimi carca. Mainán shuti runaca, Matata shuti runapaj churimi carca. Matata shuti runaca, Natán shuti runapaj churimi carca.

³²Natán runaca, Davidpaj churimi carca. Davidca, Isaí shuti runapaj churimi carca. Isaí runaca, Obed shuti runapaj churimi carca. Obed runaca, Booz shuti runapaj churimi carca. Booz shuti runaca, Salmón shuti runapaj churimi carca. Salmón shuti runaca, Naasón shuti runapaj churimi carca.

³³Naasón shuti runaca, Aminadab shuti runapaj churimi carca. Aminadab shuti runaca, Aram shuti runapaj churimi carca. Aram shuti runaca, Esrom shuti runapaj churimi carca. Esrom runaca, Fares shuti runapaj churimi carca. Fares shuti runaca, Judá shuti runapaj churimi carca.

³⁴Judá shuti runaca, Jacobopaj churimi carca. Jacoboca, Isaacpaj churimi carca. Isaac runaca, Abrahambaj churimi carca. Abrahamga, Taré shuti runapaj churimi carca. Taré shuti runaca, Nacor shuti runapaj churimi carca.

³⁵Nacor runaca, Serug shuti runapaj churimi carca. Serug shuti runaca, Ragau shuti runapaj churimi carca. Ragau shuti runaca, Peleg shuti runapaj churimi carca. Peleg shuti runaca, Heber shuti runapaj churimi carca. Heber runaca, Sala shuti runapaj churimi carca.

³⁶Sala runaca, Cainán shuti runapaj churimi carca. Cainán runaca, Arfaxad shuti runapaj churimi carca. Arfaxad shuti runaca, Sem shuti runapaj churimi carca. Sem runaca, Noé runapaj churimi carca. Noé runaca, Lamec shuti runapaj churimi carca.

³⁷Lamec runaca, Matusalén shuti runapaj churimi carca. Matusalén shuti runaca, Enoc shuti runapaj churimi carca. Enoc runaca, Jared shuti runapaj churimi carca. Jared shuti runaca, Mahalaleel shuti runapaj churimi carca. Mahalaleel shuti runaca, Cainán shuti runapaj churimi carca.

³⁸Cainán shuti runaca, Enós shuti runapaj churimi carca. Enós shuti runaca, Set shuti runapaj churimi carca. Set runaca, Adán runapaj churimi carca. Adanga, Taita Diospaj churimi carca.