Read Imbabura Highland Quichua LUCAS 5 Bible Online

LUCAS 5 - Imbabura Highland Quichua bible

LUCAS 5

¹Genesaret shuti cucha manñapimi Jesusca, Diospaj Shimita villajurca. Shina villajujta uyangapajmi, ashtaca gentecuna llapiripi jundamurca.

²Shina jundamujpimi, cucha manñapica ishcai canoacuna chai ladollapi tianajujta, Jesusca ricurca. Pijita japijcunaca, chai canoacunamanda llujshishpami, paicunapaj linllicunata tajshanajurca.

³Shuj canoapimi, Jesús yaicurca. Chai canoaca, Simonbaj canoami carca. Chaipi cashpami: —Cai manñamanda ashaguta suchuchipai— nishpami, Simondaca mañarca. Chai canoata suchuchijpi tiarishpami Jesusca, ashtaca gentecunaman yachachijurca.

⁴Ña villaita tucuchishpallami, Simondaca: —Jacuchi, chaupi cuchaman. Linllita shitashpa, pijicunata japinguichi— nircami.

⁵Shina nijpimi Simonga, cashna nirca: —Yachachij, ñucanchica tucui tutami pijita mascashpa pacaripanchi. Ashtahuangarin shuj pijitallapash na tarishpami pacaripanchi. Cunanga, can mandajpillami, linllita shitagripani— nircami.

⁶Linllita shitajpica, ashtaca pijicuna jundajpimi, linllica ñalla liquirirca.

⁷Chaimandami, shuj canoapi purinajuj cumbacunata ayudaj shamuchun maquihuan cayanajurca. Paicuna shamushpa, ishcandi canoapi jundachinajujpimi, ña huashajugrinajurca.

⁸Chaita ricushpami Simón Pedroca, Jesuspaj ñaupajpi ñapash cungurishpa, cashna nirca: —Juchayu runamari capani. Ñuca ñaupajmandaca anchuripailla, Apunchi Jesús— nircami.

⁹Ashtaca pijicunata japishpa tandachishcamandami Simondapash, paipaj cumbacunatapash ninan mallai japirca.

¹⁰Zebedeo shuti runapaj churicunaca Jacobopash, Juanbashmi, Simonbaj cumbacuna carca. Paicunatapashmi, ninan manllai japirca. Shinamandami Jesusca, Simonda cashna nirca: —Ama manllaichu. Canga, cunanmandapachami pijita japinshna, gentecunata tandachishpa causangui— nircami.

¹¹Canoacunata alpaman llujchimushpaca, tucuita saquishpami, Jesusta catishpa rinajurca.

¹²Shuj pueblopi Jesús purijujpimi, cashna tucurca: Lepra ung:ui jundashca shuj runami ricurimurca. Paica, Jesusta ricushpami cungurishpa, alpaman chayajta cumurishpaca: —Apunchi Jesuslla, can munashpaca mapa illajta saquihuai— nishpa, ninanda mañajurca.

¹³Shina nijpimi Jesusca, maquita chutashpa chai runataca tacarirca. Shina tacarishpami: —Ari, mapa illaj cachunmi munani— nirca. Shina nijpimi chai lepra ung:uica, chai runamandaca ñapash anchurirca.

¹⁴Shinamandami Jesusca, chai runataca cashna nijurca: —Ali tucushcata pimambash ama villanguichu. Ashtahuangarin curapajman rishpa ricuchigri. Chaipica, can mapa illaj tucushcamandaca, Diosman cuchun Moisés mandashcashnallata, curacuna ricushpa yachanajuchun Diosman imagutapash cugri— nijurcami.

¹⁵Ashtahuangarin Jesús chashna rurashcacunaca, ashtahuan ashtahuanmi uyarishpa catijurca. Chaimandami Jesús villajujta uyangapajpash, paicunapaj nanaicunata alichihuai ningapajpash, ashtaca gentecuna tandanajunajurca.

¹⁶Ashtahuangarin Jesusca, jichushca pambacunaman rishpami, Diosta mañajurca.

¹⁷Shuj punllami, cashna tucurca: Jesús yachachijujpica fariseocunapsh, mandashca shimita yachachijcunapashmi uyashpa tianajurca. Paicunaca, Galilea llactapi, Judea llactapi tiaj uchilla llactacunamandapash, Jerusalenmandapash shamushcami tianajurca. Huañujujcunata alichi ushachunga Jatun Diosmi, Jesusman ushaita carashca carca.

¹⁸Chaimanmi huaquin runacunaca, na cuyuri ushajuj runaguta, pai mandashpa sirijushcapillata apamunajurca. Paicunaca, huasi ucuman yaicushpa, Jesuspaj ñaupajpi churangapajmi munarca.

¹⁹Shina munashpapash, ashtaca gentecuna jundariajpimi, maita yaicuitapash na usharca. Chaimandami huasi jahuaman vitsiashpa, tejacunata pascashpa, chai na cuyuri ushajuj runagutaca mandashpa sirijushcapillata gentecunapaj chaupipi, Jesuspaj ñaupajman uriajuchirca.

²⁰Tucui shunguhuan crishpa paicuna shamushcata Jesús ricushpami, cashna nirca: —Ñuca huahualla, cambaj juchacunataca ñami anchuchishca cangui— nircami.

²¹Shina nijpimi mandashca shimita yachachijcunapash, fariseocunapash, paicunapaj shungu ucupilla cashna ninajurca: “¿Diosta nali shimicunata rimaj cai runaca, imatayari? Juchacunataca, pipash na anchuchi ushanllu. Diosllamari anchuchi ushan” ninajurcami.

²²Chashna yarinajujta Jesús yachashpami, paicunataca cashna nirca: —¿Imashpata cangunapaj shungupica, chashnatara yarinajunguichi?

²³Cai runagutaca: ‘Cambaj juchacunataca, ñami anchuchishca’ ¿ninachu ali? Na cashpaca: ‘Jatarishpa rilla’, ¿ninachu ashtahuan ali canga?

²⁴Runa Aichayu tucushca ñucaca, juchacunata anchuchingapaj ushaita cai pachapi charijta canguna yachachunmi, (chai na cuyuri ushajuj runataca): “Candaca cashnami nini: ‘Can mandashpa sirijushcataca apashpa, huasiman rilla’ ninimi” nircami.

²⁵Shina nijhuan chai tucuicunapaj ñaupajpi jatarishpami, pai sirijushca jatacunataca japirca. Shina japishpami, Taita Diosta ninanda alicachishpandi, chai runaca paipaj huasiman rijurca.

²⁶Shina alichijta ricushpami, gentecunaca tucuilla manllarishpa, Taita Diostaca ninanda alicachinajurca. Ninandapacha manllarinajushpami: “Cunan punllamari, cashna juyaillataca ricunchi” ninajurca.

²⁷Chai jipa llujshishpa rijushpami, impuestota japishpa causaj Leví shuti runaguta Jesusca ricurca. Paica, impuestota japij huasipimi tiajurca. Paitami Jesusca: “Ñucata catihuai” nirca.

²⁸Shina nijpica, ima tiashcatapash saquishpa jatarishpami, Jesustaca catishpa rirca.

²⁹Chai Leví runaguca, Jesusta paipaj huasiman pushashpami, jatun micuita rurarca. Chai huasipica, impuestota japishpa causaj ashtaca cumbacunapash, shuj gentecunapashmi, paicunahuan micungapaj tiarirca.

³⁰Shina tianajujpimi fariseocunapash, mandashca shimita yachachijcunapash, Jesuspaj yachajujcunataca ninanda nalicachishpa, cashna ninajurca: —¿Imashpata impuestota japishpa causajcunahuan, juchayu runacunahuan micushpa, ufiashpa tianajunguichi?— ninajurcami.

³¹Shina ninajujpimi Jesusca, paicunata cashna nirca: —Nanaita na charijunaca, jambij runataca na mascanllu. Huañunajuj gentecunallami, jambijtaca mascan.

³²Imatapash cashcatapacha rurajcunata cayangapaca, na shamurcanichu. Ashtahuangarin juchayu gentecuna ninanda llaquirishpa Diospajman tigrarichun cayangapajmi shamurcani— nijurcami.

³³Chai jipallami, chai runacunaca Jesustaca, cashna ninajurca: —Bautizaj Juanbaj yachajujcunapash, fariseocunapaj yachajujcunapash, tauca punllacunatami na micushpa, Diosta mañashpa chishanajun. Ashtahuangarin ¿imashpata cambaj yachajujcunaca, na chashna rurashpa micunajun, ufianajun?— ninajurcami.

³⁴Shina nijpimi Jesusca, paicunata cashna nirca: —¿Boda huasipica, cazarajuj noviota cumbashpa tianajujcunataca, na micushpa chishaichi ni ushanguichimanllu?

³⁵Ashtahuangarin cusata apana punllacunaca chayamungami. Chai punllacunami, na micushpa chishanajunga— nircami.

³⁶Jesusca, cashnatapashmi chimbapurashpa parlajurca: —Pipash mushuj churajunata rutushpaca, na mauca churajunapi siranllu. Shina rurajpica, mushuj churajunapash huaglingami. Shinallata chai mauca churajunapi mushujta sirashcapash, napacha ali ricunrillu.

³⁷Shinallata chaira rurashca vinotaca, mauca cara muchilapica, pipash na churanllu. Chashna rurajpica, chaira rurashca vinoca muchilata liquishpa jicharishpami, muchilandi tucuringa.

³⁸Ashtahuangarin chaira rurashca vinotaca, mushuj cara muchilapimi churana. Shina rurajpica vinopash, muchilapash tiajunllami.

³⁹Fucushca vinota ufiajcunaca, chaira rurashca vinotaca na munanllu. Paicunaca: ‘Fucushca vinomari ashtahuan ali’ nishpami, na munan— nijurcami.