Read Imbabura Highland Quichua LUCAS 6 Bible Online

LUCAS 6 - Imbabura Highland Quichua bible

LUCAS 6

¹Samana punllapimi, cashna tucurca: Jesusca, paipaj yachajujcunandimi, trigo pambata yalinajurca. Chaipica, paipaj yachajujcunaca trigo umata fitishpami, maquihuan jacushpa granogutaca micunajurca.

²Huaquin fariseocunaca, cashnami ninajurca: —¿Imashpata samana punllapica, na chashna ruranachu nishpa mandashcata na cazushpa, cangunaca chashna ruranajunguichi?— ninajurcami.

³Shina nijpimi Jesusca, cashna nishpa tigrachirca: —Davidca, paihuan purijcunandi ninanda yarjachishpaca, imata rurashcatapash, ¿nachu leyishcanguichi?

⁴Chashna yarjachishpaca Davidca, Taita Diospaj huasimanmi yaicurca. Chaipica, Diosman carashca tandacunatami, paihuan purijcunandi micunajurca. Chai tandataca, mandashca shimipi nishcashnaca, na micunallachu carca. Chaitaca, curacunallami micui ushana carca— nijurcami.

⁵Shinallata cashnatapashmi nirca: —Runa Aichayu tucushca ñucami, samana punllatapash mandaita ushani— nircami.

⁶Samana punlla cutin chayajpimi, cashna tucurca: Jesusca, tandanajuna huasiman yaicushpami yachachijurca. Chai ucupica, ali lado maqui chaquishca runagupashmi tiajurca.

⁷Chaipica, mandashca shimita yachachijcunapash, fariseocunapashmi tianajurca. Paicunaca, samana punllapi cai runata alichijpica, imashnallapash juchachishpa llaquichishun yashpami, Jesustaca ricurianajurca.

⁸Ashtahuangarin paicuna imata yarinajujtapash, Jesusca yacharcami. Shina yachashpami, maqui chaquishpa curparishca tiajuj runataca: —Jatarishpa, cai chaupiman shamui— nirca. Shina nijpimi, chai runaguca jatarishpa shayarirca.

⁹Chai jipami Jesusca, paita ricurianajuj runacunataca, cashna nirca: —Cangunataca caitami tapuni: Mandashcapi nijunshnaca samana punllapica, ¿alita ruranachu ali, na cashpaca nalita ruranachu ali? ¿Causaita caranachu ali, na cashpaca huañuchinachu ali?— nishpami tapurca.

¹⁰Jesusca, chashna tapushca jipami, muyundi tucuilla gentecunata ricushpa, chai runagutaca: —Maquita chutai— nirca. Shina nijpi chutajpica, ñapash ali tucurcallami.

¹¹Paicunaca, ninandapacha fiñashpami: —Cai runataca, ¿imatata rurashunchi?— nishpa, paicunapura parlarinajurca.

¹²Chai punllacunapimi Jesusca, Diosta mañangapaj urcuman rirca. Chai urcupimi, Taita Diosta mañashpa pacarirca.

¹³Ña punllayajpimi Jesusca, paita catijcunata cayashpa, paicuna puramanda chunga ishcaita agllarca. Shina agllashpami paicunataca, ñucamanda villajcunami canguichi nirca.

¹⁴Jesusca, paicunata agllashpami, Simón runataca, Pedro nishpa shutichirca. Paipaj huauqui Andrestapashmi agllarca. Shinallata Jacobo, Juan, Felipe, Bartolomé shuti runacunata agllarca.

¹⁵Mateo shuti, Tomás shuti runacunatapash, Alfeo shuti runapaj churi Jacobotapash, Zelote nishca Simón runatapashmi agllarca.

¹⁶Jacobopaj huauqui Judas shuti runatapashmi agllarca. Shinallata Judas Iscariote runatapashmi agllarca. Chai runami, Jesusta japichirca.

¹⁷Jesusca, paipaj yachajujcunandi urcumunda urai shamushpami, shuj pambaman chayarca. Chaipimi, paita catijcunahuan tandanajurca. Paicunaca, tucui Judea llactamanda, Jerusalenmanda, mama cucha manñapi tiaj Tiro shuti, Sidón shuti pueblocunamandapashmi, ashtaca gentecuna shamushca carca. Paicunaca, Jesús villajujta uyangapajpash, paicunapaj nanaicunata alichi tucungapajpashmi shamunajurca.

¹⁸Chaipica, nali ayacuna llaquichijpi causajcunatapashmi, Jesusca alichijurca.

¹⁹Jesusca, ninan ushaita charishpa tucuicunata alichijujpimi, paitaca tucuilla gentecuna tacaringapaj munarca.

²⁰Chai jipami Jesusca, paipaj yachajujcunata ricushpa, cashna nijurca: “Imagutapash na charij cangunaca, ninanda cushijuichi. Taita Dios mandanaca cangunapajmi.

²¹Cai causaipi yarjachishpa causajcunaca, ninanda cushijuichi. Diosmi, ashtacata cangunaman caranga. Cunambi huacashpa causajcunaca, ninanda cushijuichi. Cangunaca, jipamanmi asishpa causanguichi.

²²Runa Aichayu tucushca ñucata catishcamanda, cangunata millanayachijpi, paicunahuan ama tandanajuchun cangunata caruyachijpi, nalicachishpa rimanajujpi, cangunapaj shutitapash nalita rurajcunapaj shutitashna yangapi churanajujpica, ninanda cushijuichi.

²³Chashna llaquichijui punllacunapica, ninandapacha cushijunguichilla. Ricuichi, canguna juyailla japinaca, jahua pachapimi. Chashnallatami paicunapaj ñaupa taitacunapash, Dios ima nishcata villajcunataca llaquichinajurca.

²⁴Ashtahuangarin ninan charijcunaca, ¡aij imachari tucunguichi! Cangunaca, ñami caipillata cushijushpa causanajunguichi.

²⁵Cunambi na ushangacaman micushpa causajcunaca, ¡aij imachari tucunguichi! Cangunaca, jipamanmi yarjachinguichi. Cai causaipi cushijushpa asijcuna, ¡aij imachari tucunguichi! Cangunaca, jipamanmi ninanda llaquirishpa huacanguichi.

²⁶Tucuicuna alicachijpi causajcunaca, ¡aij imachari tucunguichi! Chashnallatami paicunapaj ñaupa taitacunapash, llullashpa villajcunatara alicachishpa causanajurca.

²⁷Ñuca villajujta uyanajuj cangunatami, cashna nini: Cangunata fiñajcunatapash, juyanami canguichi. Cangunata na ricunayachij runacunamambash, imatapash aligutami rurana canguichi.

²⁸Imapash tucushpaca alichari canman nijcunatapash, bendicianami canguichi. Cangunata yangamanda juchachishpa rimajcunamandapash, Diosta mañanami canguichi.

²⁹Pipash canda lado ñavipi huactajpica, caishuj ladotapash ricuchinguilla. Cambaj jahualla churajunata maijambash quichujpica, túnica nishca churajunatapash apachun saquinguilla.

³⁰Pipash imagutapash mañaj shamujpica caranguilla. Shinallata cambajta imatapash apajpica, ama tigrachihuai ninguichu.

³¹Imashnami shuj gentecuna cangunaman imatapash aliguta rurachun munanguichi, chashnallatami cangunapash paicunaman alita rurana canguichi.

³²Cangunata juyajcunatalla juyashpa causashpaca, ¿ima alitata ruranguichi? Juchata rurajcunapash, paicunata juyajcunatalla juyashpami causan.

³³Shinallata cangunaman aliguta rurajcunatalla aliguta rurashpaca, ¿ima alitata ruranguichi? Juchata rurajcunapash, paicuna puralla aliguta rurashpami causanajun.

³⁴Pimambash imata mañachishpapash, ucha tigrachinata yachajcunamanlla mañachishpaca, ¿ima alitata ruranguichi? Juchata rurajcunapash, paicuna purallami ashtacata japishallami yashpa mañachirinajun.

³⁵Ashtahuangarin cangunata fiñajcunatapash, juyanami canguichi. Paicunaman alita rurashpa imagutapash mañachishpaca, imatapash japinataca na yarinachu canguichi. Shina rurajpimi, canguna japinaca ashtaca tianga. Shinallata jahua pachapi causajuj Diospaj huahuacunapachami canguichi. Paica, pashi ninata na yachajcunatapash, nalita rurashpa causajcunatapash llaquijunmi.

³⁶Cangunapaj Taitaca, cangunata llaquishpami juyajun. Chashnallatami cangunapash shujcunataca, llaquishpa juyana canguichi.

³⁷Na yangamanda juchachishpa causanachu canguichi. Na chashna rurajpimi, cangunatapash na llaquichinga. Ninandapacha llaquichi tucunami cangui nitallapash, na ninachu canguichi. Na chashna rurajpimi, cangunatapash ninandapacha llaquichi tucunaman na cachanga. Imata nalita rurajpipash, cunganami canguichi. Shina cungajpimi, cangunapaj juchacunatapash Diosca cunganga.

³⁸Shujcunaman caraichi, Diospash cangunaman carangami. Ali medishpa churashpa, tushuchishpa, jicharijta jundachishpami cangunaman migllachinga. Shujcunaman imashna medishpa carajpipash, chashnallatami Diospash cangunaman caranga” nijurcami.

³⁹Jesusca, cashnatapashmi chimbapurashpa parlajurca: “¿Ñausa runaca, shuj ñausa runatallata pushashpa ri ushanmanllu? ¿Nacha paicunaca ishcandillata utujupi huashajunman?

⁴⁰Yachajuj runaca, paita yachachijtaca na yalichu. Ashtahuangarin maijambash aligutapacha tucuita yachajushpaca, paita yachachij runashnallatami tucun.

⁴¹Cambaj huauquipaj ñavipi uchilla jupashna tiajujtara ricungapaj randica, ¿imashpata cambaj ñavipi caspishna tiajujtara, na tigrashpa ricungui?

⁴²Cambaj ñavipi shuj jatun caspishna tiajujtara nara anchuchishpaca, ¿imashnata cambaj huauquipaj ñavipi uchilla jupashna tiajujtara: ‘Huauquigu, shuyai anchuchisha’ nitaca ushanguiyari? Mishqui shimi, nali shungumi cangui. Cambaj ñavipi jatun caspishna tiajujtara anchuchiyari. Chai jipami, cambaj huauqipaj ñavipi uchilla jupashna tiajujtaca, ali ricushpa anchuchi ushangui.

⁴³Na ali yurapica, alica na fucunllu. Ali yurapipash, imapash nalica na fucunllu.

⁴⁴Ima yura cajtapash, granota ricushpami rijsirin. Jigostaca, casha yuramandaca na cozechanalla. Uvastapash, casha yuramandaca na pallanllu.

⁴⁵Ali runaguca, imapash juyaillacunata alicachinshna, aligutalla ruranata paipaj shungupi yarijushpami, imatapash aligutalla riman. Ashtahuangarin nali runaca, imapash juyaillacunata alichinshna nalita ruranatalla, paipaj shungupi yarijushpami, imatapash nali shimicunatalla riman. Imata rimachumbash, shungu ninanda yarichijpimi, shimica riman.

⁴⁶Ñucataca, ¿imashpata: ‘Apunchi Jesús, Apunchi Jesús’ nihuanguichi? Shina ninajushpaca, ¿imashpata ñuca mandashcataca, na ruranguichi?

⁴⁷Ñucapajman shamushpa, ñuca yachachishcata uyashpa tucui pactachijcunaca, piman rijchaj cajtami cangunaman villagrini:

⁴⁸Paicunaca, ucu ucuta allashpa ucuman jatun rumicunatara churashpa, chai jahuapi huasichij runashnami. Chaitaca, yacu ninanda jatarishpa jatun yacu shamushpami, ninanda huactarimurca. Ashtahuangarin chai huasitaca, jatun rumi jahuapi shayachishca cashcamandami, na cuyuchi usharca.

⁴⁹Ashtahuangarin ñuca yachachishcata uyashpapash na cazujca, na ucuta allashpa jahualla huasichij runashnami. Chai huasica, yacu ninanda shamushpa huactarimujpica urmarcallami. Chai huasica, tucuilla t'unirishpami urmashpa tucurirca” nijurcami.