Read Imbabura Highland Quichua LUCAS 7 Bible Online

LUCAS 7 - Imbabura Highland Quichua bible

LUCAS 7

¹Jesusca, paita uyanajuj gentecunaman cai tucuita yachachishca jipami, Capernaum puebloman yaicurca.

²Chaipimi, patsaj soldadota mandaj runa causarca. Paipaj ninan juyashca servij huambragumi, ungushca ña huañunalla sirijurca.

³Jesusmanda parlanajujta uyashpami, chai mandaj runaca: “Ñucata servij huambraguta alichij shamupai” nigrichun, huaquin mandaj rucucunata cacharca.

⁴Jesuspajman paicuna chayamushpaca, shamupai nishpami cashna ninanda mañanajurca: —Chai runagu mañajujtaca rurapaillayari.

⁵Chai runaguca, ñucanchi llactapi causajcunataca, ninandami llaquin. Ñucanchi tandanajuna huasitapash, paimi rurachirca— ninajurcami.

⁶Shina ninajujpimi Jesusca, paicunahuan rijurca. Ashtahuangarin Jesusca, ña huasiman chayagrijujpimi, patsaj soldadocunata mandaj runaca huaquin cumbacunata, cashna nichun cacharca: “Apunchi Jesús, ama yapata shaijumupaichu. Ama ñuca huasiman chayajta shamupaichu. Jatun pinganayaimi capani.

⁷Shina cashpami, cambajman ñucapacha shamuitaca, na ushaparcani. Ali tucui nishpa chaimanda rimajpillata, ñucata servij huambraguca ali tucupangallami.

⁸Shuj mandajcuna mandajpimi, ñucapash causajupani. Shinallatami ñucapash, soldadocunataca mandajuni. Shuj soldadota: ‘Ri’ nishpa mandajpica, rinllami. Shinallata: ‘Shamui’ nijpipash, shamunllami. Ñucata servijtapash: ‘Caita rurai’ nijpica, ruranllami” nigrichunmi cacharca.

⁹Shina nijta uyashpami Jesusca, ninanda cushijushpa paita catinajuj gentecunata tigrarishpa ricushpa, cashna nijurca: —Cangunataca cashnami nini: Israel llactapipash, cai runagushna alipacha crijtaca, shujtallapash na tarishcanichu— nircami.

¹⁰Shina nijpimi chai runacunaca, chai mandaj runapaj huasiman tigranajurca. Paicunaca, chai servij huambragutaca ña ali tucushcatami tuparirca.

¹¹Chai jipami, Naín shuti puebloman Jesusca rijurca. Paitaca, paipaj yachajujcunapash, shuj gentecunpash, ashtacacunami cumbashpa rinajurca.

¹²Chai puebloman yaicuna punguman ña chayagrijushpaca, huañushcata pambangapaj rinajuj gentecunatami ñapash ricurca. Chai huañushca huambraguca, sapalla mamagupaj shujlla churigumi carca. Chai mamagutaca, chai pueblopi causanajuj ashtaca gentecunami cumbashpa rinajurca.

¹³Chai mamaguta Apunchi Jesús ricushpaca, ninanda llaquishpami: —Ama huacaichu— nirca.

¹⁴Shina nishpalla, huañushcata apanajujpaj caja ladoman quimirishpa tacarijpimi, huandushpa rinajuj runacunaca shayarirca. Shina shayarijpimi, Jesusca: —Huambragu, candami jatari nini— nirca.

¹⁵Shina nijpimi, chai huañushca huambraguca tiarishpa, rimai callarirca. Jesusca chai mamagutaca: —Cambaj churigutaca pushailla— nishpami curca.

¹⁶Tucuicuna ninanda manllarishpami, Taita Diosta ninanda alicachishpa, cashna ninajurca: —Ñucanchi puramandami, Dios ima nishcata aligutapacha villaj runaguca llujshishca. Taita Diosca, pai agllashca gentecuna cajpimi, ñucanchita ninanda llaquishpa shamushca— ninajurcami.

¹⁷Jesús chashna rurashcataca, tucui Judea llactapi causajcunapash, chai tucuilla muyundi llactacunapi causajcunapash, tucuillami yachanajurca.

¹⁸Tucui chaicunata Jesús rurajujtaca, Bautizaj Juanbaj yachajujcunami, paiman villanajurca. Shina villajpimi Juanga, paipaj yachajuj puramanda ishcai purata cayarca.

¹⁹Shina cayashpami, cashna nishpa tapuchun cacharca: “¿Canllu, ñucanchi shuyanajushca Quishpichij Cristo capangui? Na cashpaca, ¿shujtachu shuyapashun?” nichunmi cacharca.

²⁰Paicuna Jesuspajman chayamushpaca, cashnami ninajurca: —Bautizaj Juanmi, cashna tapuchun cachamun: ‘¿Canllu, ñucanchi shuyanajushca Quishpichij Cristo capangui? Na cashpaca, ¿shujtachu shuyapashun?’ nishpa tapuchunmi cachamun— ninajurcami.

²¹Paicuna chayajhuanmi huañujujcunata, nanaicunahuanlla llaquinayaita causajcunata, nali aya jundashca gentecunata, ñausacunatapash ashtacunata Jesusca alichijurca.

²²Shina alichijushpami Jesusca, Juan cachamushca runacunataca cashna nijurca: —Canguna imata uyashcata, imata ricushcatapash, Juanman cashna nishpa villagrichi: ¿Ñausacunapash ricunajunmi. Jangacunapash, alimi purinajun. Lepra nishca ung:uihuan causajcunapash, ali tucunajunmi. Rinri na uyajcunapash uyanajunmi. Huañushcacunatapash, causachijunmi. Imagutapash na charijcunamambash, ali villaitami villajun’ nigrichi.

²³Ñuca maijan cajta crishpa na pandajcunaca, ninandami cushijun— nijurcami.

²⁴Juan cachamushca runacuna rijpimi, Jesusca gentecunaman Juanmanda cashna villai callarirca: “Jichushca pambapica, ¿imata ricungapajta llujshircanguichi? Ninanda huairashpa sucusta cuyuchijujta, ¿ricungapajchu rircanguichi?

²⁵Shina cashpaca, ¿imata ricungapajta llujshircanguichi? ¿Punchapamba churajushca runatachu ricungapaj rircanguichi? Ricuichi, ninan valishca churajunata churajushpa ninanda cushijujcunaca, jatun mandajcunapaj huasicunapimi.

²⁶Ashtahuanga, ¿imatata ricungapaj rircanguichi? ¿Dios ima nishcata villaj runagutachu ricungapaj rircanguichi? Ari, cangunataca cashnami nini: Cangunaca, profeta runatapash yalitami ricungapaj rircanguichi.

²⁷Juanmanda villashpami, cashna nishpa escribishca tiajun: ‘Ricui, ñucamanda villajtaca, canda ñaupashpa rishpa, can purina ñanda punda alichijuchunmi cachamugrini’ nijunmi.

²⁸Cangunataca cashnami nini: Huarmimanda huacharishca purapica, Bautizaj Juanda yali, profeta ali runaguca, shujllapash na tianllu. Ashtahuangarin Taita Dios mandajuj llactagupica, tucuita yali uchillashna causaj runagumi, Juandaca ashtahuan yali” nijurcami.

²⁹Shina villajujpimi, chai tucuilla gentecunapash, impuestota japishpa causanajuj runacunapash, Taita Diostaca: “Canga, imatapash cashcatapachamari rurapashcangui” ninajurca. Shinamandami paicunaca, Juan bautizashcata catishpa bautizarinajurca.

³⁰Ashtahuangarin fariseocunahuan, mandashca shimita yachachijcunahuanga, Juan bautizajujpi na bautizarishpami, paicunaman Taita Dios aliguta rurangapaj munashcataca, yangapi churanajurca.

³¹Apunchi Jesusca, cashnatapashmi nirca: “Cunan viñaicunataca, ¿imahuanda chimbapurashayari? ¿Paicunaca, imashnata causanajun?

³²Cunan viñaicunaca, plazacunapi tiarishpa, caishuj chaishuj caparishpa pugllanajuj huambracunashnami causanajun. Paicunaca, cashna nishpa caparinajun: ‘Canguna bailachun gaitata gaitajpipash, na bailashpami purircanguichi. Yarishpa yarishpa huacajpipash, na huacashpami purircanguichi’ ninajunmi.

³³Bautizaj Juan shamushpaca, micuitapash na micushpa, vinotapash na ufiashpami purijurca. Shina cajpimi paitaca: ‘Aya jundashca runamari’ ninajunguichi.

³⁴Runa Aichayu tucushca ñuca shamushpaca, micunatapash micushpa, vinotapash ufiashpami purijuni. Chaimandami cashna nihuanguichi: ‘Cai runaca yapata micujmi, vinotapash ufiajmi. Impuestota japishpa causanajuj runacunahuan, juchata rurajcunahuanmi, cumba tucushpa tandanajun’ nihuanguichimi.

³⁵Ashtahuangarin Taita Diospaj ali yachaitaca, tucui paipaj huahuacunallami imatapash cashcatapacha rurashpa ricuchinajun” nijurcami.

³⁶Fariseo puramanda shuj fariseo runami, Jesustaca: “Ñuca huasigupi micungapaj ripashun” nirca. Chai fariseopaj huasiman Jesús chayashpaca, micungapaj tiarircallami.

³⁷Chai fariseopaj huasipi Jesús micujujta yachashpami, alabastro nishcamanda rurashca uchilla fundugupi, shuj huarmica mishquillagu ashnajuj jambita apashpa shamurca. Chai huarmica, chai pueblopi juchata rurashpa causaj huarmimi carca.

³⁸Paica, Jesuspaj chaquiman quimirishpami, huacashpa tiarirca. Jesuspaj chaquitaca, chai viquihuanmi maillachishpa, ajchahuan fichachishpa, chaquitaca muchajurca. Shinallata mishquillagu ashnajuj aceiteta talishpami, Jesuspaj chaquipi javirca.

³⁹Shina rurajujtaca, Jesusta pushaj fariseo runa ricushpami, cashna yajurca: “Dios ima nishcata villaj cashpaca, imashna causaj huarmi paipaj chaquita tacarijujtapash yachanmanmi. Chai huarmica, juchata rurashpamari causan” yajurcami.

⁴⁰Shina yarijujta Jesús yachashpami: —Simón, canmanmi shuj villanata charini— nishpa tigrachirca. Shina nijpica: —Villahuailla, Yachachij— nircami.

⁴¹Shina nijpimi Jesusca, cashna nirca: —Culquita mañachij shuj runami, ishcaipura divi tucushca runacunata charirca. Shuj runaca, picha patsaj denario culquita, shuj runaca picha chunga denario culquitami nara tigrachishca carca.

⁴²Imagutapash na tigrachi ushashpa purijpimi, culquita mañachij runaguca, ishcanditallata saquinguichilla nirca. Shina saquijpica, chai ishcaipura runacunamandaca, ¿maijanda ashtahuan juyashcanga?— nishpami tapurca.

⁴³Shina tapujpimi, Simonga: —Culquita yapalla mañaj runagumi, saquilla nijpica, ashtahuan juyashcanga yanimi— nirca. Shina nijpimi, Jesusca: —Aliguta yarishpami, shina tigrachingui— nirca.

⁴⁴Shina nishpallami, chai huarmita tigrarishpa ricushpaca Jesusca, Simonda cashna nirca: —Cai huarmi, cunan imata rurajujta ricunguimi. Paica, viquihuan ñuca chaquita maillachishpaca, ajchahuanmi fichachihuan. Ashtahuangarin cambaj huasiman ñuca yaicumujpica, chaquita maillachun yacutallapash, na carahuarcanguichu.

⁴⁵Canga, ñucata mingachishpapash, na muchahuarcanguichu. Ashtahuangarin cai huarmica, ñuca yaicumushpa tiarishcamandapacha, ñuca chaquita muchanataca na shaijunllu.

⁴⁶Canga, aceitetallapash ñuca umapica na talishpa javihuarcanguichu. Ashtahuangarin cai huarmica, mishquilla ashnajuj aceitetami talishpa, ñuca chaquipica javihuarca.

⁴⁷Shinamandami candaca, cashna nini: Juchacunata cai huarmi ninanda rurashcapash, ñucata ninanda juyashpa llaquishcamandami, ña anchuchi tucushca. Ashtahuangarin ashallata juchacunata anchuchi tucushcacunaca, ashallatami juyahuan— nircami.

⁴⁸Shina nishpallami: —Cambaj juchacunataca, ñami anchuchishca cangui— nishpa Jesusca, chai huarmita nirca.

⁴⁹Shina nijpimi: —Cai runaca, ¿ima cashpata juchacunataca anchuchin?— nishpa, Jesushuan mezapi tianajuj runacunaca, paicunapura parlarinajurca.

⁵⁰Ashtahuangarin Jesusca, chai huarmitaca cashnami nirca: —Tucui shunguhuan crishpami, ña quishpirishcangui. Cunanga, ninanda cushijushpa rilla— nircami.