Read Imbabura Highland Quichua LUCAS 8 Bible Online

LUCAS 8 - Imbabura Highland Quichua bible

LUCAS 8

¹Chai jipami, Taita Dios mandajujmanda ali villaita villashpa, tucui pueblocunapipash, uchilla llactacunapipash Jesusca purijurca. Paitaca, paipaj chunga ishcai yachajujcunapash, cumbashpami purinajurca.

²Shinallata nali ayacunata Jesús llujchishca huarmicuna, shuj nanaicunamandapash alichi tucushca huarmicunapashmi cumbanajurca. Magdalena ni tucushca Mariapashmi purijurca. Jesusca, chai Mariamandami, canchis ayacunata llujchishca carca.

³Shinallata mandaj Herodespaj huasipi tucuita ricushpa tiajuj, Chuza shuti runapaj huarmi Juanapashmi purijurca. Shinallata Susana shuti huarmipash, ashtahuan shuj ashtaca huarmicunapashmi, Jesustaca imaguhuanllapash servishpa purinajurca.

⁴Tucui pueblocunamanda shamushpami, ashtaca gentecuna Jesuspajman tandanajumurca. Chaicunamanmi Jesusca, cashna chimbapurashpa parlajurca:

⁵“Shuj tarpuj runami, muyuta tarpungapaj llujshirca. Shina tarpujpimi, huaquin muyuca ñambi urmarca. Chai muyutaca, gentecunapashmi sarurca, alasyu animalcunapash micurcami.

⁶Shinallata huaquin muyucunaca, rumilla alpapimi urmarca. Chaquishca alpa cajpimi, viñashpapash ñapash chaquirca.

⁷Shinallata huaquin muyucunaca, casha viñana chaupipimi urmarca. Cashacunaca, muyuta yalishpa viñashpami, llapishpa ismuchirca.

⁸Shinallata huaquin muyucunaca, ali alpapi urmashpami, juyailla viñarca. Shina viñashpami, shujmandalla patsaj patsaj granushpa fucurca” nijurcami. Shina nishpallami, cashna nirca: “Uyangapaj rinrita charishpaca, aliguta uyaichi” nishpa Jesusca, shinllitapacha rimarca.

⁹Chai jipami paipaj yachajujcunaca, Jesusta cashna tapunajurca: “Chimbapurashpa cai parlashcacunaca, ¿imatata nijupan?” ninajurcami.

¹⁰Shina tapujpimi Jesusca, cashna nirca: “Taita Dios mandajuj llactagumandaca, pundacunaca pipash na yachai ushashcatami cangunamanlla yachachishca. Ashtahuangarin caishuj gentecunataca, ricushpapash ama ricuchun, uyashpapash ama yuyaita japichunmi, chimbapurashpalla parlajuni.

¹¹Chimbapurashpa parlashpaca, cashna yachachijuni: Muyugutaca, Taita Diospaj Shimigumi.

¹²Ñambi urmashca muyucunaca, caicunami: Huaquingunaca, Diospaj Shimita uyanmi. Shina uyajpipash, paicuna crishpa ama quishpirichunmi, diablo shamushpaca, Diospaj Shimita uyashcatapash shungupi cungachin.

¹³Rumilla alpapi urmashca muyucunaca, caicunami: Huaquingunaca, Diospaj Shimita villajpi cushijushpami chasquin. Shina chasquishpapash paicunaca, sapita na charij yurashna cashpami, huaquin huatacamanlla crishpa catinajun. Shina cashpami, ali crij cajta ricungapaj llaquicuna japijpica, huashaman tigranlla.

¹⁴Casha chaupipi urmashca muyucunaca, caicunami: Paicunaca, Diospaj Shimita uyashpapash, cai causaipilla charijyangapaj munashpami, imatapash rurashpa musparinajun. Shina causanajushpallatami, cai causaipajtalla imatapash rurashpa ninanda cushijushpa, paicunaca na fucuj granoshna tucunajun.

¹⁵Ashtahuangarin ali alpapi tarpushca muyucunaca, caicunami: Paicunaca, Diospaj Shimita uyashcataca, tucui shunguhuan aliguta catishpami, juyailla fucuj granoshna causanajun.

¹⁶Pipash michata japichishpaca, na mangahuan quilpanllu, cama ucupipash na churanllu. Ashtahuangarin huasi ucuman yaicujcuna michata ricushpa yaicuchunmi, candeleropi churan.

¹⁷Na ricurishpa pacalla tiajcunaca, imapash na tianllu. Pipash ama rijsichun, michamambash ama llujshichun pacashcallapash imapash na tianllu.

¹⁸Shina cashcamandaca, ñuca villajujta uyashcata aliguta yarichi. Ashtacata charijmanmi, ashtahuan caranga. Ashtahuangarin na charijpica, charingapaj munajushcatapash tucuillami quichunga” nijurcami.

¹⁹Chai jipami, paipaj mamapash, huauquicunapash, Jesuspajman shamurca. Ashtahuangarin gentecuna ninanda jundariajpimi, paipajman chayamuitaca, na ushanajurca.

²⁰Chaimandami Jesustaca: —Cambaj mamapash, huauquicunapash, canda ricungapajmi shamushca. Paicunaca canllapimi shayanajun— nishpa villanajurca.

²¹Shina nijpimi Jesusca, cashna nirca: —Diospaj Shimita uyashpa pactachijcunallami ñuca mama, ñuca huauquicuna— nishpa Jesusca, tucuicunaman villarca.

²²Shuj punllami, cashna tucurca: Jesusca, paipaj yachajujcunandi, canoapi tiarishpaca: —Cai cuchata chimbashunchi— nircami. Shina nishpaca rircallami.

²³Ashtahuangarin canoapi ña rijushpami, Jesusca puñurca. Shina puñujujpica ninan huaira ñapash shamushpami, cucha yacuta jatarichirca. Shina jatarichijpi, canoapi yacu jundai callarijpimi canoaca ña huashajugrijurca.

²⁴Shinamandami, Jesusta rijchachingapaj shamushpaca: —¡Yachachij, Yachachij, ñucanchica huashajushpa huañugrinchimari!— ninajurca. Shina nijpi jatarishpami huairatapash, yacu quilpamujujtapash, Jesusca jarcashpa rimarca. Shina rimajpica chulunlla, casilla tucurcallami.

²⁵Chai jipami paicunataca: —Canguna ñucata crishcapash, ¿maipitayari?— nirca. Shina nijpi ninanda manllarishpa, paipura ricunman quedashpami, caishuj chaishuj cashna ninajurca: —Cai runataca, ¿ima cajpita huairapash, cuchapash pai rimajpica, cazunllayari?— ninajurcami.

²⁶Paicuna chai cuchata ña chimbashpaca, Galilea llacta chimbaman tiaj Gadara shuti llactamanmi chayarca.

²⁷Ña chayashpa manñaman Jesús llujshijhuanmi, chai pueblopi causajushca shuj runaca, Jesusta tuparingapaj shamurca. Chai runaca, ña unaita aya jundashca causajushpami, churajunatapash na churajushpa, huasipipash na causashpa, pambana utujupilla causajurca.

²⁸Chai runaca, Jesusta ricushpami, paipaj ñaupajpi cungurishpa, cashna nishpa ninandapacha caparijurca: —Jahua pachapi tiajuj Taita Diospaj Churi Jesús, canga ñucahuanga, ¿imatata ricunata charingui? Ama ñucataca llaquichihuaichu nipanimi— nijurcami.

²⁹(Chai runamanda nali ayata llujshi nijpimi, Jesustaca chashna ninajurca. Ña unai huatata aya jundashca causajujpimi, gentecunaca cadenacunahuan, grillocunahuan huatan carca). Ashtahuangarin aya apajpimi, chai runaca cadenacunata fitishpa, jichushca pambacunapilla purijurca.

³⁰Chai runataca: —¿Ima shutita cangui?— nishpa Jesús tapujpimi: —Huaranga Huaranga shutimi cani— nirca. Ashtaca ashtaca ayacuna jundashca causajushpami, chashna nijurca.

³¹Chai ayacunaca: —Ñucanchitaca, ama chai manllanayai ucu ucuman cachahuaichu— nishpami, Jesustaca ninanda mañanajurca.

³²Chai urcupica, ashtaca ashtaca cuchicunami micushpa purinajurca. Shinamandami chai ayacunaca: —Chai cuchicunapi yaicuchun, ñucanchitaca cachahuai— nishpa, Jesustaca ninanda mañanajurca. Shina mañajpimi, chai cuchicunapi yaicugrichun saquirca.

³³Chai runamanda ayacuna llujshishpaca, cuchicunapimi yaicugrirca. Shina yaicujhuanmi, chai ashtaca cuchicunaca jaca jahua patamanda cuchaman huashajushpa huañunajurca.

³⁴Cuchicuna chashna huañujta ricushpami michijcunaca, paicuna causanajuj pueblopipash, pambacunapi causajcunamambash villangapaj, ninanda calpanajurca.

³⁵Shina villajpimi, ima tucushcatapash ricungapaca, tucuilla gentecuna shamunajurca. Jesuspajman chayamushpaca, ayacuna jundashca causajuj runaca, ayacuna llujshijpi ali tucushca tiajujtami ricunajurca. Chai runaca, churajunatapash aliguta churajushca, ali juizupimi tiajurca. Shinata ricushpami, gentecunaca ninanda manllarinajurca.

³⁶Chai gentecunamanmi, aya jundashca runata Jesús imashna alichijta ricushcacunaca villanajurca.

³⁷Shina villajpimi, Gadara llacta tucui ladomanda shamushcacunaca, ninanda manllarishpa: —Cai ñucanchi llactamandaca ripailla— ninajurcami. Shina nijpimi Jesusca, canoapi tiarishpa rigrijurca.

³⁸Shina rigrijujpimi, ayacunata llujchi tucushca runaca: —Ñucatapash pushahuayari— nijurca. Ashtahuangarin Jesusca cayacaman nishpami, chai runataca cashnami nirca:

³⁹Taita Dios canman cashna jatun alita rurashcataca, cambaj huasiman rishpa chaipi villagri— nircami. Shina nijpi chai runa rishpaca, paiman chai alita Jesús rurashcataca, pueblopi tucui causajcunamambash villashpandimi rijurca.

⁴⁰Jesús cutin chimbamujujpica, ashtaca gentecuna shuyanajushpami Jesustaca, ninanda cushijushpa chasquinajurca.

⁴¹Chai jipaca, tandanajuna huasipi mandaj Jairo shuti runapashmi chayamurca. Paica, Jesuspaj ñaupajpi cungurishpami: —Ñuca huasiguman yaicupashunyari— nijurca.

⁴²Chai runaguca, chunga ishcai huatata charij, shujlla ushigutami charirca. Chai ushiguca, ña huañunallapachami carca. Jairo runaguhuan Jesús rijujpica, ashtaca gentecunami llapiripi catishpa rinajurca.

⁴³Chai rinajuj puracunapica, yahuar shamujuj ung:uihuan chunga ishcai huatata huañujujlla causajuj huarmipashmi rijurca. Chai huarmica, jambijcunapajman rishpa, pai imaguta charishcatapash, tucuitami tucuchishca carca. Paitaca, maijan jambijpash alichitaca, na ushashcachu carca.

⁴⁴Shina rinajujpica, huashata catimushpami chai huarmica, Jesús jahualla churajushca pundagupi tacarirca. Shina tacarijhuanmi yahuarca, na ashtahuan shamushpa ali tucurca.

⁴⁵Shina tacarijpimi, Jesusca: —¿Pita ñucata tacarirca?— nishpa tapurca. Shina tapujpipash, pipash na villajpimi Pedroca, paipaj cumbacunandi, cashna nijurca: —Yachachij, candaca cai tucui gentecunamari saruripi, llapiripi catimunajun. ¿Chaita ricushpatachu: ‘¿Pita ñucata tacarirca?’ nishpa tapujungui?— ninajurcami.

⁴⁶Ashtahuangarin Jesusca, cashnami nirca: —Maijanllari ñucataca tacarircami. Ñuca ushaihuan maijandachari ñami alichini— nircami.

⁴⁷Chai ali tucushca huarmica, na pacalla chashna tacarishcanichu yashpami chujchurishpa, Jesuspaj ñaupajpi cungurimurca. Paica, Jesusta imamanda tacarishcatapash, imashna ñapash ali tucushcatapash, tucuitami gentecuna uyajta villajurca.

⁴⁸Shina villajpimi Jesusca, chai huarmitaca cashna nirca: —Ñuca huahualla, ñucata tucui shunguhuan crishcamandami, ña ali tucushcangui. Cunanga, cushijushpa rilla— nircami.

⁴⁹Shina nijujpillatami, tandanajuna huasipi mandaj Jairopaj huasimanda, shuj runa shamushpaca, cashna nirca: —Yachachijtaca, ama yanga yanga fiñachijuichu. Cambaj ushica, ñami huañurca— nircami.

⁵⁰Ashtahuangarin chashna ninajujta Jesús uyashpami, Jairo runataca cashna nirca: —Ama manllaichu. Ñucata alipacha crihuai. Cambaj ushiguca causaringami— nircami.

⁵¹Jairopaj huasiman Jesús yaicushpaca, pitapash shujcuna yaicuchunga na saquircachu. Pedrota, Jacobota, Juanda, chai cuitsagupaj taitata, mamatallami paihuan yaicuchun saquirca.

⁵²Tucuicunami, chai ushigu huañushcamandaca, ninanda llaquirishpa huacanajurca. Ashtahuangarin Jesusca, paicunataca cashnami nirca: —Na cashna huacanachu canguichi. Paica, na huañushcachu. Puñuitallami puñujun— nircami.

⁵³Shina nijpimi huañushcatapacha yachashpa, Jesustaca asishpa ricunajurca.

⁵⁴Ashtahuangarin chai huañushcapaj maquita japishpami: —Cuitsagu, jatari— nishpa, Jesusca shinllita rimarca.

⁵⁵Shina nijpimi chai cuitsagupaj alma tigramujpi, ñapash causarishpa jatarirca. Shina jatarijpimi: —Cai cuitsaguman micunaguta carapaichi— nishpa, Jesusca mandarca.

⁵⁶Chai cuitsagupaj taitapash, mamapash ninandapachami manllarinajurca. Ashtahuangarin Jesusca: —Pimambash cashna tucushcataca, na villanachu canguichi— nishpami mandarca.