Read Imbabura Highland Quichua LUCAS 9 Bible Online

LUCAS 9 - Imbabura Highland Quichua bible

LUCAS 9

¹Jesusca, paipaj chunga ishcai yachajujcunatalla tandachishpami, gentecunamanda tucui ayacunata llujchishpa cachana ushaitapash, huañujujcunata alichina ushaitapash paicunaman cararca.

²Taita Dios mandajujmanda villanajuchun, huañujujcunata alichinajuchunmi cacharca.

³Shina cachajushpami Jesusca, paicunataca cashna nijurca: “Ñanda ringapaca, imatallapash na apanachu canguichi. Tauna caspitapash, cucavi muchilatapash, tandatapash, culquitapash na apanachu canguichi. Túnica nishca churajunatapash, na ishcaita apanachu canguichi.

⁴Maijan huasiman yaicushpapash, shuj llactaman yalingacaman, chai huasipillami mingarina canguichi.

⁵Maijan pueblopi cashpapash, cangunata na chasquingapaj munajpica, llujshishpa ringuichilla. Chai pueblopi causajcuna, napacha ali cajta ricuchingapajmi, cangunapaj chaquipi churajushcapi catijuj alpatapash chafsishpa rina canguichi” nijurcami.

⁶Shina nijpi paipaj yachajujcuna rishpaca, ali villaita villashpandi, huañujujcunatapash alichishpandimi, tucuilla uchilla llactacunata purinajurca.

⁷Jesús tucuita rurashpa purijujtaca, Galilea llactata mandaj Herodesmi uyarca. “Bautizaj Juanmi, huañushcacunapaj chaupimanda causarimushca” nishpa huaquinguna parlanajujpimi, Herodesca imata ruraitapash na ushajurca.

⁸Huaquingunaca: “Dios ima nishcata villaj Eliasmari ricurimushca” nishpami parlanajurca. Ashtahuan shujcunaca: “Dios ima nishcata Profeta puracunamanda, maijambashmi causarimushca yarin” ninajurcami.

⁹Ashtahuangarin Herodesca, cashnami nirca: —Juanbaj umata fitichunga, ñucami mandarcani. Cunanga, shuj runami juyailla rurashpa purijun nijtami uyani. ¿Chai runaca, pita cangayari?— nircami. Shina nijushpami Herodesca, Jesusta ricungapaj ninanda munarca.

¹⁰Villachun cachashcacuna tigramushpaca, paicuna imaguta rurashcatami, tucuita Jesusman villanajurca. Shina villajpica, Betsaida shuti pueblo ladomanmi, jichushca pambaman, paipaj yachajujcunatalla pushashpa rirca.

¹¹Chaiman rinajujta gentecuna yachashpa catimujpimi, Jesusca chasquirca. Paicunamanmi, Taita Dios mandajujmandaca villajurca. Shinallata huañujujcuna ali tucucunata munajcunatapashmi alichijurca.

¹²Ña tutayajujpica, Jesuspaj chunga ishcai yachajujcunaca, paipajman quimirishpami cashna ninajurca: —Cai gentecunataca, chai uchilla llactacunapi, chai muyundi huasicunapi mingarishpa pacarigrichun, micunatapash mascagrichun cachailla. Caipica, jichushca pambapimi canchi— ninajurcami.

¹³Shina nijpimi, Jesusca: —Cangunallata micunataca caraichilla— nirca. Shina nijpimi, cashna ninajurca: —Ñucanchica, picha tandaguta, ishcai pijigutallami charinchi. ¿Cai tucui gentecunaman micunata carangapachu, randigrichi ningui?— ninajurcami.

¹⁴Chai gentecunaca, picha huarangashnami tandanajushca carca. Shina tandanajushca cajpimi: —Gentecunataca, picha chunga, picha chunga chaupishpa tiachipaichi— nishpa Jesusca, paipaj yachajujcunata mandarca.

¹⁵Paicuna tiaripaichi nijpica, tucuilla tiarircallami.

¹⁶Ña tiarijpimi, picha tandagutapash, ishcai pijigutapash, Jesusca japirca. Shina japishpallami, jahua pachata ricushpa, Diosta pashi nirca. Chai tandatapash, pijitapash asha asha chaupishpami, chai gentecunaman carachun, paipaj yachajujcunaman curca.

¹⁷Shina carajpimi tucuicunallata, na munangacaman micurca. Paicuna na micui ushashcataca, chunga ishcai canasta jundatami, paipaj yachajujcunaca tandachirca.

¹⁸Jesusca, pailla Diosta mañashpa tiajujpimi, paipaj yachajujcunapash, chaipi tianajurca. Shina tianajujpimi: —Gentecunaca ñucataca, ¿maijan yashpashi ricuhuan?— nishpa, paipaj yachajujcunataca tapurca.

¹⁹Shina nijpimi paicunaca, cashna ninajurca: —Huaquingunaca: ‘Bautizaj Juanmi canga’ ninajunmi. Huaquingunaca: ‘Dios ima nishcata villaj Eliasmi canga’ ninajunmi. Shujcunaca: ‘Dios ima nishcata Profeta puracunamanda maijambashmi causarimushcanga’ ninajunmi— nishpami tigrachinajurca.

²⁰Shina ninajujpimi: —Cangunaca cutin, ¿maijan nihuanguichita?— nishpa, Jesusca tapurca. Shina tapujpimi: —Taita Dios cachamushca Quishpichij Cristomi capangui— nishpa, Pedroca tigrachirca.

²¹Pedro chashna nijpimi: —Ñuca maijan cajtapash, pimambash napacha villanachu canguichi— nishpa Jesusca, paipaj yachajujcunata shinllitapacha mandarca.

²²Shinallata cashnatapashmi nijurca: —Runa Aichayu tucushca ñucaca, ninanda llaquichi tucunapachami cani. Mandaj rucucunapash, curacunata mandajcunapash, mandashca shimita yachachijcunapash, ñucataca ninandami na ricunayachishpa, huañuchijpi huañunapachami cani. Shina huañushpa, quimsa punllahuanga causarishallami— nijurcami.

²³Shina nishpallami Jesusca, tucuilla gentecunata cashna nijurca: —Maijan cashpapash ñucata catingapaj munashpaca, paipaj causaita na llaquishpa, paipaj cruzta punllandi aparinshna ñucata catihuachun.

²⁴Maijan cashpapash paipaj causaita quishpichingapaj munashpaca, chingaitami chinganga. Ashtahuangarin ñucata catijushcamanda huañuchi tucushpaca, quishpiringapachami.

²⁵Shuj runaca, cai pachapi ima tiajtapash, tucuita japishpa charijyashpapash, paillata huaglishpa, na cashpaca chingaita chingagrishpaca, ¿ima alita canga?

²⁶Maijan cashpapash ñucamanda, ñuca villashca shimicunamanda, pinganayachishpa shujcunaman na villajpica, ñucapash ninandami pingaichisha. Runa Aichayu tucushca ñucami, jucha illaj punchapamba angelcunahuan, ñuca Taita punchapamba tiajunshna punchapamba shamushpa, chai pinganayachijtaca pingaichisha.

²⁷Na llullashpami, cangunata cashna nini: Caipi shayanajuj puramanda huaquingunaca, Taita Dios mandajujtaca, nara huañushpallatami ricunguichi— nijurcami.

²⁸Shina villajushca pusaj punllashna jipami, cashna tucurca: Pedrota, Juanda, Jacobota pushashpami Jesusca, Diosta mañangapaj urcuman vichai rirca.

²⁹Chaipi mañajujpimi, ñavipash shujman tigrashpa, churajushcapash yuraj yuraj punchapamba ricurirca.

³⁰Chaipica, ishcai runacuna Jesushuan parlanajujmi, ñapash ricurirca. Shujca Moisés, shujca Eliasmi carca.

³¹Paicunaca, punchapamba chaupipi shayanajushpami, Dios munashcata pactachingapaj, Jerusalenbi huañuchi tucunami cangui nishpa villanajurca.

³²Pedroca, paipaj cumbacunandimi, ninanda puñuihuan na ushashpa puñunajurca. Ña rijcharishpaca, Jesús punchapamba shayajujta, ishcai runacuna paihuan shayanajujtapashmi ricunajurca.

³³Jesushuan cashcamanda shayanajushcacuna anchurishpa rijpimi Pedroca, Jesusta cashna nirca: —Ñucanchica, alipajmari shamupashcanchi, Yachachij. Cunanga, quimsa chugllagutami rurashun ninchi. Shujtaca canman, shujtaca Moisesman, shujtaca Eliasmanmi ruragrinchi— nircami. Shina nishpami Pedroca, paillata imata nijushcatapash na yacharca.

³⁴Shina nijujpillatami fuyu pillushpa, paicunataca ñapash quilparca. Chai fuyu ucuman yaicunataca, chai quimsa yachajujcunaca ninandami manllarca.

³⁵Chai fuyu ucumandaca, cashna rimajmi uyarirca: —Caimi, ñuca juyashca Churigu. Pai imata yachachishcatami, aliguta uyana canguichi— nircami.

³⁶Shina rimamuj uyarishca jipaca, Jesuslla shayajushcatami ricunajurca. Paicunaca, imata ricushcatapash chai punllacunapica, pimambash na villashpami, upalla purinajurca.

³⁷Cayandi punllami, urcumanda urai shamunajujpica, ashtaca gentecuna Jesusta tuparingapaj shamunajurca.

³⁸Paicunapaj chaupimanda, shuj runa ninanda caparishpaca, cashnami nirca: —Yachachij, ñuca churiguta alichipai. Cai huahuatallami charipani.

³⁹Paitaca, aya jundashpami, cungashcapi ninanda caparichin. Shinallata ninandapacha chujchuchishpami, babasta shitachimupan. Caiman chaiman shitashpami, ashacamanlla saquishpa rin.

⁴⁰Ayata llujchipaichi nishpami, cambaj yachajujcunapajman apamuparcani. Ashtahuangarin paicunaca, na llujchi usharcachu— nijurcami.

⁴¹Shina nijpimi Jesusca, cashna nirca: —Ñucata nali crij miraicuna, jatun nalicuna. ¿Ima horascamanda cangunahuanda cashna cashayari? ¿Ima horascamanda cangunamandaca llaquirijushallayari?— nishpallami: —Cambaj churiguta apamui— nirca.

⁴²Jesuspajman chai huambragu quimirijujpimi, alpapi urmachishpa ayaca, ninandapacha chujchuchirca. Ashtahuangarin Jesusca, mapata rurachij ayata ninanda rimashpami, chai huambramandaca llujchirca. Shina rurashpami, chai taitataca: —Cambaj churigutaca pushailla— nirca.

⁴³Taita Dios ninan ushaihuan chashna rurashcata ricushpami, tucuicuna manllarinajurca. Tucui imagutapash rurajta ricushpa, tucuicuna manllarijpimi Jesusca, paipaj yachajujcunata cashna nirca:

⁴⁴—Cashna ñuca villashcataca, na cungashpami, aligutapacha yarina canguichi. Ashtahuangarin Runa Aichayu tucushca ñucataca, runacunapaj maquipi japichihuangami— nijurcami.

⁴⁵Ashtahuangarin ima nishpa Jesús chashna nijtapash, paicunapaj yuyaica quilpashcashna cashpami, paipaj yachajujcunaca na yachai usharca. Imashpa chai shimicunata nishcata tapungapajpash manllarcami.

⁴⁶Chai jipami, Jesuspaj yachajujcunaca: —¿Maijanshi ashtahuan yali ali canchi?— nishpa, paicunapura parlai callarirca.

⁴⁷Paicunapaj shungupi chashna yarinajushcata yachashpami Jesusca, shuj huahuata maquimanda aisamushpa, paicunahuan shayachirca.

⁴⁸Shina shayachishpami, paicunataca cashna nirca: —Maijambash cai huahuaguta ñuca shutipi chasquijca, ñucatami chasquin. Shinallata maijambash ñucata chasquishpaca, ñucata cachamuj Taitatapashmi chasquin. Ashtahuangarin maijanmi canguna purapi huahuagushna causan, chaimi ashtahuan yali jatun— nircami.

⁴⁹Chai jipami Juanga, Jesusta cashna nishpa tigrachirca: —Yachachij. Cambaj shutipi rimashpami shuj runaca, ayacunata gentecunamanda llujchijurca. Paica, ñucanchihuanga na cumba tucushpa, canda catinllu. Shinata ricushpami: ‘Ama chashna ruraichu’ nishpa jarcarcanchi— nircami.

⁵⁰Shina nijpimi Jesusca, cashna nirca: —Na jarcashpa, saquinallami canguichi. Maijambash ñucanchita na fiñashpa purijushpaca, ñucanchi purallatami— nircami.

⁵¹Jahua pachaman apai tucuna punllacuna chayamujujpimi Jesusca, Jerusalenman rinapachami cani nishpa ri callarirca.

⁵²Shina rijushpami, Jesusta ñaupashpa villagrichun cacharca. Paicunaca, Samaria llactaman chayashpami, shuj uchilla llactapi Jesús mingarichun, huasita mascanajurca.

⁵³Ashtahuangarin Jerusalenman rijujta yachashpami, Samaria llactapi causajcunaca, na mingachingapaj munanajurca.

⁵⁴Chaitaca, Jesuspaj yachajujcuna ricushpami Jacobondi, Juandi cashna ninajurca: —Apunchi Jesús. Eliaspaj punllacunapi ninahuan tucuchishcashna, ¿nachu chai gentecunapaj jahuapi jahua pachamanda nina urmamuchun mañashun?— ninajurcami.

⁵⁵Shina nijpimi Jesusca, tigrarishpa ricushpa shinllita rimashpa, cashna nirca: —Cangunaca, Diospaj Espiritupaj cajta na yachashpami, chashna ninguichi.

⁵⁶Runa Aichayu tucushca ñucami, gentecunata quishpichingapaj shamurcani, na tucuchingapaj shamurcanichu— nircami. Shina nishpallami paicunaca, shuj uchilla llactaman yalirca.

⁵⁷Paicuna rinajujpimi shuj runaca, ñambi cashna nirca: —Apunchi Jesús, can maita rijujpipash catipashallami— nircami.

⁵⁸Shina nijpimi Jesusca, cashna nirca: —Añascunapash, paicuna causana utujuta charinmi. Jahuata rij alasyu animalcunapash, tazinda charinmi. Ashtahuangarin Runa Aichayu tucushca ñucaca, maigupi siririshpa samanatallapash na charinichu— nircami.

⁵⁹Shina nishpami Jesusca, shuj runataca: —Ñucata catihuai— nirca. Shina nijpimi chai runaca, cashna nirca: —Canda cantingapaca, ñuca taitata pambashpara tigramugripasha. ¿Ñacha saquihuanguiman, Apunchi Jesús?— nircami.

⁶⁰Shina nijpimi Jesusca, cashna nirca: —Huañushcashna causajcunaca, paicuna purallata huañushcataca pambanajuchun saquilla. Ashtahuangarin canga, Taita Dios mandajujmanda villangapaj ri— nijurcami.

⁶¹Shina nijpimi, shuj runapash cashna nirca: —Apunchi Jesús, canda catisha nipanimi. Ñuca huasipi causajcunatara, cayacaman nishpa tigramugripasha. ¿Nacha saquihuanguiman?— nircami.

⁶²Shina nijpimi Jesusca, chai runatapash cashna nirca: —Maijan runapash yapujushpaca, na huashaman tigrashpa ricushpandi yapunllu. Chashna yapuj runashna cashpaca, Taita Dios mandajuj llactapaj ruraitaca, napacha ushangachu— nircami.