Read Imbabura Highland Quichua DEUTERONOMIO 11 Bible Online

DEUTERONOMIO 11 - Imbabura Highland Quichua bible

DEUTERONOMIO 11

¹Cangunaca, cangunata Mandaj Taita Diostami juyana canguichi. Pai mandashcacunata, pactachinajuchun pai cushca shimicunata, imata rurachun mandashcacunataca, punllandi pactachishpami causana canguichi.

²Cangunata Mandaj Taita Dios llaquichishcatapash na yachaj, chaitaca ricuitapash na ricushca, cangunapaj huahuacunataca na rimajunichu. Cunanga, chaita yachanami canguichi. Paicunaca, pipash na rurai ushanallacunata rurajtapash, ninan ushaita charij, paipaj maquihuan imata rurajtapash, paipaj rigrata chutashcatapash na ricushcachu.

³Egiptopica, Egipto llactata jatun mandaj Faraonmambash, tucuilla gentecunamambash, imatapash rurashpa ricuchinacunata, pai imatalla rurajtaca na ricushcachu.

⁴Egipto llacta soldadocunata, caballocunata, macanajuna carretacunata imata rurajtapash na ricushcachu. Cangunata catishpa shamunajujpi Puca Cucha ninanda jatarishpa paicunata imashna quilpajtapash na ricushcachu. Mandaj Diosmi paicunataca, cunangaman tucuchirca.

⁵Cai pushtuman chayamungacaman, jichushca pambapi cangunata imatalla rurashcatapash na ricushcachu.

⁶Rubenbaj mirai Eliab shuti runapaj churi Datán shuti runata, Abiram shuti runata, imata rurajtapash na ricushcachu. Paicunataca, alpa mama pascarishpami paicunatapash, paicunapaj tucuilla familiacunatapash, paicunapaj carpacunandi, tucuilla animalcunandi, tucui israelcunapaj chaupimanda langarca.

⁷Ashtahuangarin cangunami, pipash na rurai ushanacunata, Mandaj Dios tucuita rurashcataca, cangunapaj ñavihuambachami ricurcanguichi.

⁸Cangunaman cunan ñuca villashca cai tucui mandashcacunataca pactachinami canguichi. Ali shinllicuna tucushpa, canguna japingapaj rinajuj llactata japingapajmi, chashna pactachina canguichi.

⁹Shina pactachishpami cangunapaj ñaupa taitacunaman, paicunapaj miraicunamambash carashami nishpa Mandaj Dios juramentushca llactapica, unai huatacunata causanguichi. Chai llactapica lechepash, balun mishquipash ashtacapachami tian.

¹⁰Canguna japingapaj yaicunajuj llactaca, na canguna llujshimushca Egipto llactashnachu. Chaipica muyucunata tarpushpami, micuna muyucunata tarpushca huertapishnalla cangunapaj chaquihuan jichashpa tarpun carcanguichi.

¹¹Ashtahuangarin canguna japingapaj rinajuj llactaca urcucunapash, pugru pambacunapash jahua pachamanda tamiashca yacuhuan fucuj llactamari.

¹²Chai llactataca, cangunata Mandaj Taita Diosmi huacaichijun. Cangunata Mandaj Taita Diosca, huata callarimanda huata tucuringacamanmi, ricuriashpa ima horapash huacaichijun.

¹³Cunan cangunaman ñuca mandashpa yachachishcata yariashpa, pactachishpa causanguichi. Cangunata Mandaj Taita Diosta juyashpa, tucui shunguhuan, tucui almahuan servishpa causanguichi.

¹⁴Shina causajpica, pundalla tamiatapash, jipalla tamiatapashmi tamiana punllacunapillata cangunapaj alpacunapi tamiachisha. Shina tamiachijpimi granotapash, vinotapash, aceitetapash tandachinguichi.

¹⁵Shinallata cambaj pambapipash, cambaj animalcunamanmi, ashtaca jihuacunata viñachisha. Cambash, na munangacamanmi micungui.

¹⁶Shina cashcamanda cangunapaj shungupi pandarinata, Diosmanda anchurishpa, shuj dioscunatara servishpa, paicunapaj ñaupajpi cungurinataca cuidarinami canguichi.

¹⁷Chashna rurajpica, Mandaj Diosca nina japirinshna ninandapacha fiñarishpami, jahua pachata vichashpa na tamiachinga. Shinallata alpapica, granopash na fucungachu. Shinamandami, Mandaj Dios carashca ali llactapica, ñapash huañunguichi.

¹⁸Shinamandami, ñuca mandashpa yachachishca cai shimicunataca, cangunapaj shungupi, cangunapaj almapi huacaichina canguichi. Shinallata shuj ricuchina cachunmi, chai mandashcacunataca cangunapaj maquipi, cangunapaj frentepi huatarina canguichi.

¹⁹Cai shimicunacunataca, huasipi tianajushpapash, ñambi purinajushpapash, puñungapaj siririnajushpapash, jatarinajushpapashmi, cangunapaj huahuacunaman yachachina canguichi.

²⁰Cangunapaj huasi pilarcunapipash, pungucunapipashmi escribina canguichi.

²¹Cangunapaj ñaupa taitacunaman carashami nishpa Mandaj Dios juramentushca llactapi cangunapash, cangunapaj miraicunapash, ashtaca huatacunata causangapajmi chashna rurana canguichi. Chai llactapica, jahua pachapishna ashtaca punllacunatami causanguichi.

²²Tucui cai mandashcacunata, canguna pactachinajuchun ñuca mandashpa yachachishcataca, na cungashpa yariashpami pactachina canguichi. Cangunata Mandaj Taita Diosta juyashpami, paita catishpa, paipaj ñambi purina canguichi.

²³Chashna causajpimi, Mandaj Diospash cai llactapi tucui causajcunataca, cangunapaj ñaupajmanda llujchishpa cachanga. Shinallata, cangunatapash yali ushaita charij, ninan shinlli cai gentecunata mishashpami, paicunapaj llactacunataca quichunguichi.

²⁴Canguna maipi sarushca pushtucunapash, cangunapajmi canga. Chai llactaca, jichushca pambamanda Líbano shuti llactacaman, Eufrates shuti jatun yacumanda, indi huashajuj lado mama cuchacamanmi, cangunapaj llacta canga.

²⁵Cangunahuanga, pipash na chimbapura shayari ushangachu. Canguna maijan llactaman sarushpa yaicujpipash, pai imashna nishcashnallatami, chai llactapi causajcunapica, cangunata Mandaj Taita Diosca jatun manllaita churanga.

²⁶Ricuichi cunanmi ñucaca, bendiciai tucunata, llaquichi tucunata cangunapaj ñaupajpi churani.

²⁷Cangunata Mandaj Taita Dios mandashcacunata uyashpa, ali causachun ñuca mandashcacunashcata cazushpaca, bendiciai tucunguichimi.

²⁸Ashtahuangarin cangunata Mandaj Taita Dios mandashcacunata na uyashpami, ali causachun cunan ñuca mandashcamanda anchuringuichi. Canguna na rijsishca shuj dioscunatara catingapajmi, chashna anchuringuichi. Shina causashpaca, llaquichi tucunguichimi.

²⁹Can japingapaj rijuj llactamanmi, canda Mandaj Taita Diosca pushanga. Chaipica, Gerizim shuti urcupimi, bendiciai tucunata ricuchingui. Llaquichi tucunataca, Ebal shuti urcupimi ricuchingui.

³⁰Chai urcucunaca, Jordán yacu chimba ladoman, indi huashajuj ladoman rishpa, cananeocunapaj llactapimi. Chai Canaán llactaca, encina nishca quirucuna tiaj More shuti pamba ladollapi tiaj Gilgal shuti pueblo ladopimi.

³¹Cangunata Mandaj Taita Dios carashca llactata japingapajmi, Jordán yacuta chimbanguichi. Chai llactata japishpami, chai llactapi causanguichi.

³²Pactachinajuchun cushca tucui shimicunata, imata rurachun ñuca mandashcacunata cangunaman ricuchishpa, cunan ñuca mandashcataca yariashpami pactachina canguichi.