Read Imbabura Highland Quichua DEUTERONOMIO 12 Bible Online

DEUTERONOMIO 12 - Imbabura Highland Quichua bible

DEUTERONOMIO 12

¹Cangunapaj ñaupa taitacunata Mandaj Taita Dios, cangunaman carashca llactata japishpami, chaipi causanguichi. Chaipimi, pactachinajuchun cushca cai shimicunata, imata rurachun cai mandashcacunata yariashpa pactachishpa causana canguichi. Cai pachapi canguna causanajui tucui punllacunapi pactachishpa causachun mandashcacunaca, caicunami.

²Canguna japigrijuj llactacunapi causajcuna, paicunapaj dioscunata servishpa causanajushca pushtucunataca, tucuillatami tucuchina canguichi. Paicunaca, urcucunapi, lomacunapi, fanga junda quiru ucucunapimi servishpa causanajurca.

³Paicunapaj altarcunata urmachishpa, rumi dioscunata faquishpa, Asera shuti huarmi diosman rijchaj paicunapaj dioscunatapash, rupachishpa tucuchinguichi. Labrashpa rurashca paicunapaj dioscunataca tucuillata tucuchinguichi. Shina rurashpami, chaicunapaj shutitaca chai llactamanda chingachinguichi.

⁴Cangunata Mandaj Taita Diostaca, na chashna ruranachu canguichi.

⁵Ashtahuangarin cangunata Mandaj Taita Diosca, cangunapaj tucui aillu puramandaca, paipaj shutita chaipi churangapaj, pai causangapajmi, shuj pushtuta agllanga. Chaitami mascana canguichi. Paita yaringapaca, chaimanmi rina canguichi.

⁶Chaimanmi, tucuillata rupachina animalcunatapash, Diosman cushpa huañuchina animalcunatapash, apana canguichi. Shinallata chungamanda shujguta cunatapash, cangunapaj maquihuan vichai ricuchishpa cunatapash, carashumbachami nishca caranatapash, cangunapaj tucui munaihuan imaguta caranatapash, chaimanmi apana canguichi. Shinallata punda huachashca huagracunatapash, llamacunatapashmi apana canguichi.

⁷Chaipimi, cangunata Mandaj Taita Diospaj ñaupajpi cangunapash, cangunapaj familiacunapash micushpa cushijunguichi. Cangunapaj maquihuan imatalla rurashcapipash, cangunata Mandaj Taita Dios bendiciashcamandami, ninanda cushijunguichi.

⁸Cunanmi caipica, ñucanchi munaita imatapash alitashnalla rurashpa causanajunchi. Ashtahuangarin chaipica, na shinallata rurashpa catinachu canguichi.

⁹Canguna samachun, cangunata Mandaj Taita Dios carashca llactamanga, cunangaman nara yaicushpachu purinajunguichi.

¹⁰Ashtahuangarin Jordán yacuta chimbashpami, cangunata Mandaj Taita Dios carajuj llactaman yaicushpa causanguichi. Chaipica, paillatami cangunapaj muyundipi causaj cangunata tucui fiñajcunamanda samachinga. Chaipica, imatapash na manllashpami causanguichi.

¹¹Cangunata Mandaj Taita Diosllata, paipaj shutita chaipi churangapaj agllashca pushtumanmi, ñuca tucui ima mandashcacunata apana canguichi: Tucuillata rupachina animalcunatapash, Diosman cushpa huañuchina animalcunatapash, chaimanmi apana canguichi. Shinallata chungamanda shujguta cunatapash, cangunapaj maquihuan vichai ricuchishpa cunatapash, cangunapaj shimihuambacha Mandaj Diosman carashami nishpa agllashcatapash chaimanmi apana canguichi.

¹²Chashna apashpami cangunata Mandaj Taita Diospaj ñaupajman cangunapaj churicunandi, ushicunandi, cangunata servij jaricunandi, paicunapaj huarmicunandi, cangunapaj llactapi causaj tucuilla levitacunandi tandanajushpa, jatun micuita rurashpa cushijuna canguichi. Levitacunaca, canguna purapica ima alpatapash na charingachu.

¹³Diosman cushpa tucuillata rupachina animalta, maipipash rupachinamandaca cuidarinami canguichi.

¹⁴Ashtahuangarin cangunapaj aillu puracunapi, Mandaj Dios agllashca pushtupillami, tucuillata rupachina canguichi. Chaipimi, tucui ñuca mandashcacunata rurana canguichi.

¹⁵Shina cashpapash imashna can munashcaguta, canda Mandaj Taita Dios imashna bendiciashpa carashcashnallata, canguna causanajuj pueblocunapillata huañuchishpa, aichataca micunguilla. Chai aichataca, mapa cashpapash, mapa illaj cashpapash, gacela nishca, ciervo nishca tarugacunapaj aichata micunshnallata micungallami.

¹⁶Ashtahuangarin yahuartallami, na micuna canguichi. Yahuartaca, yacutashnami alpapi talina canguichi.

¹⁷Can causajuj pueblocunapica, chungamanda shujguta Diosman cushca granocunatapash, aceitetapash, vinotapash na micunachu cangui. Shinallata punda huacharishca huagracunatapash, llamacunatapash, cambaj shimihuambacha Diosman carashami nishcatapash, cambaj tucui munaihuan imaguta carashcatapash, cambaj maquihuan vichai ricuchishpa carashcacunatapash na micunachu cangui.

¹⁸Ashtahuangarin canda Mandaj Taita Dios agllashca pushtupimi, canda Mandaj Taita Diospaj ñaupajpi micuna cangui. Chaipica, cambaj churicunandi, ushicunandi, canda servij jaricunandi, canda servij huarmicunandi, cambaj pueblocunapi causanajuj levitacunandi tandanajushpami micuna canguichi. Chashna rurashpami, canda Mandaj Taita Diospaj ñaupajpica, cambaj maquihuan imatalla rurashcamandapash cushijungui.

¹⁹Cai pachapi can causajui punllacunapi, levitacunata jichushpa saquinamandaca, cuidarinami cangui.

²⁰Canda Mandaj Taita Diosca, pai imashna nishcashnallatami, cambaj llactataca ashtahuan jatunyachinga. Shina rurajpica: ‘Aichata micungapajmi munani’ ninguimi. Shina micunayachishpaca, imashna munashcashnallata micunguilla.

²¹Canda Mandaj Taita Dios paipaj shutita chaipi churangapaj agllashca pushtuca, can causajuj pushtumanda carupimi canga. Shina cajpica, Mandaj Dios carashca cambaj huagracunata, llamacunataca, ñuca mandashcashna cambaj huasipillata huañuchishpa, can munashcaguta micunguilla.

²²Chai aichataca, gacela nishca, ciervo nishca tarugacunapaj aichata micunshnalla micunguilla. Chaitaca mapa cashpapash, mapa illaj cashpapash micunguilla.

²³Ashtahuangarin yahuarta micuna yuyaitaca, napacha japinachu cangui. Yahuarpimi causai tian. Shinamandami aichataca, yahuar illajta micuna cangui.

²⁴Yahuartaca na micunachu cangui, yacutashnami alpapi talina cangui.

²⁵Cambash, cambaj cati huahuacunapash, tucuipi ali llujshingapajmi, chai yahuartaca na micuna cangui. Mandaj Diospaj ñaupajpi aliguta rurashpa causashpami, chashna ali causangui.

²⁶Ashtahuangarin Mandaj Diosman carangapaj shicanyachishcacunata, cambaj shimihuambacha Diosman carashami nishcacunatapash, paita yarichun agllashca pueblomanmi apashpa shamuna cangui.

²⁷Tucuillata rupachina animalcunataca aichatapash, yahuartapash, canda Mandaj Taita Diospaj altarpi cunguilla. Diosman cushpa huañuchishca animalcunapaj yahuartaca, canda Mandaj Diospaj altarpi talichingui. Chaipaj jipami, aichataca micui ushangui.

²⁸Ñuca mandashca shimicunata cazushpa pactachishpa causangui. Canda Mandaj Taita Diospaj ñaupajpica, imatapash aliguta rurashpami cambash, cambaj cati huahuacunapash, tucui causaipi ali causanguichi.

²⁹Cangunapaj cachun japina llactacunapi causajcunataca, cangunata Mandaj Taita Diosca, tucuillatami cangunapaj ñaupajmandaca tucuchinga. Chai jipami, cangunaca chai llactapi causanguichi.

³⁰Cangunapaj ñaupajpi paicuna tucuchi tucushca jipa, paicunata catishpa nitijanshna pandarinamandaca cuidaringuichi. Chai gentecunapaj dioscunamandaca: ‘Imashna chai gentecuna, paicunapaj dioscunata servishpa causanshnallata, ñucanchipash servishunchi’ nishpallapash, na parlanachu canguichi.

³¹Cangunata Mandaj Taita Diostaca, na chashna ruranachu canguichi. Chai gentecunaca, Mandaj Dios na ricunayachishcatami, paicunapaj dioscunaman millanayaicunata ruranajurca. Paicunapaj churicunata, paicunapaj ushicunatallatami, paicunapaj dioscunaman cushpa rupachinajurca.

³²Tucui ñuca mandashcacunataca, aliguta yarishpami rurana canguichi. Shuj shimitallapash chaipica, na mirachinachu canguichi. Anchuchitapash, na anchuchinachu canguichi.