Read Imbabura Highland Quichua DEUTERONOMIO 14 Bible Online

DEUTERONOMIO 14 - Imbabura Highland Quichua bible

DEUTERONOMIO 14

¹Cangunaca, cangunata Mandaj Taita Diospaj huahuacunami canguichi. Shina cashcamanda maijambash huañujpica, cangunaca na chugririnachu canguichi. Ajchatapash, na ruturinachu canguichi.

²Cangunaca, cangunata Mandaj Taita Diospajlla shicanyachishca gentecunami canguichi. Mandaj Diosmi cangunataca, paipajlla gentecuna cachun, tucui cai pachapi causajcunapaj chaupimanda cangunatalla agllarca.

³Mapami nishcataca, imatallapash na micunachu canguichi.

⁴Canguna micui ushana animalcunaca, caicunami: Huagrata, llamata, chivota,

⁵ciervo nishca, gacela nishca, corzo nishca animalcunata, urcu chivota, íbice nishca, antílope nishca animalcunata, urcupi causaj jari llamatami micui ushanguichi.

⁶Micushcata tigrachishpa acuj tucui animalcunata, parca silluta charij animalcunatallami, micui ushanguichi.

⁷Ashtahuangarin micushcata tigrachishpa acuj puracunamanda, parca sillucunata charij puracunamandaca, cai animalcunatami na micuna canguichi: Camellota, liebre nishca animalta, conejotami na micui ushanguichi. Chai animalcunaca, micushcata tigrachishpa acuj cashpapash, na parca sillucunata charinllu. Chaicunaca mapami canga.

⁸Cuchitapash, na micunachu canguichi. Cuchica, parca sillucunata charishpapash, micushcata tigrachishpa na acuj animal cashcamanda, chaica mapami canga. Chai tucui animalcunapaj aichataca, na micunachu canguichi. Chaicunataca, huañujpipash na tacarinachu canguichi.

⁹Yacupi causaj tucui animalcunamandaca, caicunatallami micui ushanguichi: Alascunata, escamacunata charij tucui animalcunatallami micui ushanguichi.

¹⁰Ashtahuangarin alasta, escamata na charij tucui animalcunataca, na micunachu canguichi. Chaicunaca mapami canga.

¹¹Alasyu tucui animalcunata, na mapachu nishcacunataca micunallami canguichi.

¹²Caicunatami, na micui ushana canguichi: Jatun angata, quebrantahuesos nishca, azor nishca animalcunatami, na micui ushanguichi.

¹³Gallinazota, milano nishca animalcuna, pai puralla imashna mirashcata,

¹⁴cuervo nishca tucui animalcuna, pai puralla imashna mirashca animalcunatami, na micui ushanguichi.

¹⁵Avestruz nishcata, lechuzata, gaviota nishca animalcuna, pai puralla imashna mirashcata, gavilangunatami, na micui ushanguichi.

¹⁶Shinallata chushij, ibis, calamón,

¹⁷pelícano, cundur, somormujo nishca animalcunatami na micui ushanguichi.

¹⁸Shinallata cig:ueña, garza nishca animalcuna, pai puralla imashna mirashcata, abubilla, murciélago nishca animalcunatami, na micui ushanguichi.

¹⁹Alasyu tucui jurucunami, mapa canga. Chaicunataca, na micunachu.

²⁰Jahuata rij alasyu tucui animalcunata, na mapachu nishcacunataca micunguichilla.

²¹Ima animal huañushcatapash, na micunachu canguichi. Chaitaca, shuj llactamanda shamushpa cangunapaj pueblopi causanajuj runacunamanmi cuna canguichi. Paicunaca micungallami. Na cashpaca, shuj llactamanda shamushca shuj runacunamanmi jatuna canguichi. Cangunaca, Mandaj Taita Diospajlla cachun shicanyachishca gentecunami canguichi. Huahua chivopaj aichataca, mamapaj lechepica ama yanuguichu.

²²Cambaj pambapi huatapi huatapi fucushca tucui granocunamandami, chungamanda shujguta na cungashpa cuna cangui.

²³Chungamanda shicanyachishcataca trigota, vinota, aceiteta, punda huacharishca huagracunata, llamacunatapash, canda Mandaj Taita Diospaj ñaupajpimi, paipaj shutita chaipi churangapaj agllashca pushtupi micuna cangui. Canda Mandaj Taita Diosta, punllandi manllashpa causanata yachajungapajmi, chashna rurana cangui.

²⁴Canda Mandaj Taita Dios bendiciajpica, canda Mandaj Taita Dios paipaj shutita chaipi churangapaj agllashca pushtuman ringapaj carupacha cajpi na apai ushashpaca, na chaiman apanachu cangui.

²⁵Shina cajpica, chungamanda shujguta cushcacunataca jatushpa, canllata alichishpa charijunguilla. Chai jipaca, canda Mandaj Taita Dios agllashca pushtuman apashpa shamunguilla.

²⁶Chai culquihuanga, can ima munashcata randinguilla. Huarmi huagracunata, llamacunata, vinota, sidrata randinguilla. Can imata munashcaguta randishpa, canda Mandaj Taita Diospaj ñaupajpi cambash, cambaj familiacunapash micushpa cushijunguichilla.

²⁷Cambaj pueblocunapi causanajuj levitacunataca, na jichushpa saquinachu cangui. Paicunaca, canhuanga imata japinatapash, alpata japinatapash na charinllu.

²⁸Cada quimsa huata tucuripimi, huatapi huatapi canguna tandachishca granocunamanda chungamanda shujguta shicanyachina cangui. Chaitaca, cambaj pueblocunapillata alichinguilla.

²⁹Chashna charijpimi, cambaj pueblocunapi causanajuj canhuan imata japinatapash, alpata japinatapash na charij levitacuna, shuj llactamanda shamuj runacuna, taita mama illaj huahuacuna, sapalla mamagucunaca, cambajman shamunga. Shina shamushpami paicunaca, na munangacaman micunga. Can imata ruranapipash, canda Mandaj Taita Dios bendiciachunmi, chashna rurana cangui.