Read Imbabura Highland Quichua DEUTERONOMIO 15 Bible Online

DEUTERONOMIO 15 - Imbabura Highland Quichua bible

DEUTERONOMIO 15

¹Culquita mañachishcataca, cada canchis huata chayashcatami, na cutin mañashpa saquinalla cangui.

²Culquita mañachishcataca, cashnami rurana: Maijan cashpapash paipaj cumba runaguman culquita mañachishca cashpa, chai culquita cuhuai nijujpipash, na tigrachi ushajpica, saquinallami. Paipaj cumba runaguta cashpa, na cashpaca paipaj huauquita cashpapash na tapujungallachu. Culquita mañachishcata na tigrachi ushajpica, saquinallami nishpa Mandaj Dios mandashca huata pactashcamandami, na ashtahuan tapunga.

³Shuj llactamanda runa canda culquita mañashcata charijpica, paitaca cutin mañanguilla. Ashtahuangarin cambaj huauquillata canda culquita mañashcata charijpica, paitaca ama cutin tigrachihuai nishpa saquinguilla.

⁴Canguna purapica, mañashpa purij runa ama tiachunmi, chashna rurana canguichi. Pai Mandaj Taita Diosca, canda Mandaj pai Taita Diosllata carajpi canguna japishpa causana llactapimi, ninanda bendicianga.

⁵Canda Mandaj Taita Dios mandashcata uyashpa, aliguta cazushpami, ñuca cunan canman tucui mandashcacunataca pactachina cangui.

⁶Canda Mandaj Taita Dios bendiciajpi, pai villashcashnallata ashtaca llactacunapi causajcunaman can mañachingapajpash charinguimi. Ashtahuangarin canga, pitapash na mañanguichu. Canga, ashtaca llactacunatami mandashpa charingui. Ashtahuangarin candaca, na mandai ushangachu.

⁷Canda Mandaj Taita Dios canman carashca llactapi maijan pueblopi cashpapash, cambaj huauqui purallata maijan cashpapash imagupash illaj tiajpica, ama shinlli shungu tucunguichu. Imagutapash na charij cambaj huauquita ricushpaca, ama cambaj maquita vichashpa, shinlli shungu tucunguichu.

⁸Ashtahuangarin imata munajpipash, na mitsashpa cambaj maquita pascashpa mañachinguilla.

⁹Cambaj shungupira: ‘Mañachishcata saquina canchis huataca ñami pactamujun’ nishpa, jatun nalita yarijunguiman. Shina yarijushpara, imagutapash na charij cambaj huauquiman imagutapash carangapaj na munashpa, fiña ñavihuan ricunguiman. Chashna rurajpica canda fiñashpami, Mandaj Diosman caparishpa villanga. Diosmi, candaca juchata rurashcata ricunga.

¹⁰Canga, na cungashpallami carana cangui. Carashpaca, cambaj shungupi na mitsarinachu cangui. Shina aliguta carajpimi, canda Mandaj Taita Diosca candaca, tucui imatalla rurashcacunapi bendicianga.

¹¹Cai llacta chaupipica, mañashpa purijcunaca na illangachu. Chaimandami candaca, cashna mandani: ‘Cambaj huauquita, imagutapash na charij runaguta, imagupash illaj runagutaca, cambaj maquita pascashpa ayudanguilla’ ninimi.

¹²Hebreo purallata cambaj huauquicuna jari cashpa, na cashpaca huarmi cashpapash canman jaturijpica, sucta huatatallami servichishpa charina cangui. Canchis huatapica, cacharishpa cachanguilla.

¹³Ña cacharishpa cachashpaca, na chushaj maquita cachanachu cangui.

¹⁴Mandaj Dios canda bendiciajpi charishcataca, cambaj llamacunamandapash, trillana cambaj pambamandapash, uvasta cutana pushtumandapash, canllata carashpa cachanguilla.

¹⁵Egipto llactapi servishpa causashcatapash, canda Mandaj Taita Dios candaca cacharichishcatapash yarinami cangui. Shinamandami cunanga, caita rurachun mandani.

¹⁶Candapash, cambaj huasi ucu puratapash juyashcamanda, canhuan causajujpi tucui imapash ali llujshishcamandami, canda servishpa causajuj runaca: ‘Na saquishpa rinayanllu’ ninga.

¹⁷Shina nijpica paitaca, huasi pungu caspipi quimichishpami, rinrita utujuna jirruhuan rinrita utujuna cangui. Chashna rurajpimi paica, tucui causaipi canda servishpa causajunga. Canda servij huarmitapash, chashnallatami rurana cangui.

¹⁸Canda servij runaca, caipi chaipi trabajaj runa japinatapash chaupitalla japishpami, sucta huatata canda servishpa causarca. Chashna causashcamanda paita cacharishpa cachana chayajpica, na cachai ushanringachu yashpa ama llaquiringuichu. Ashtahuangarin canda Mandaj Taita Diosmi, can tucui imatalla rurashcamandaca bendicianga.

¹⁹Cambaj huagracuna, cambaj llamacuna punda huachashca jari animalcunataca, canda Mandaj Taita Diosman shicanyachingui. Cambaj huagracuna punda huachashca jari shicuhuanga, na yapunachu cangui. Cambaj llamacuna punda huachashca llamapaj milmatapash, na rutunachu cangui.

²⁰Chaicunataca, canda Mandaj Taita Diospaj ñaupajpimi micuna cangui. Mandaj Dios agllashca pushtupimi, cambaj tucui familiacunandi, huatapi huatapi micuna cangui.

²¹Chai animalcunapi ima nalipash tiajpi, na cashpaca ñausa, na cashpaca janga cajpi, na cashpaca imapash nali cajpica, canda Mandaj Taita Diosman cushpa na huañuchinachu cangui.

²²Chaicunataca, can causajuj pueblocunapimi micuna cangui. Chaitaca, mapa cashpapash, mapa illaj cashpapash, gacela nishca animalpaj, tarugapaj aichata micunshnallata micungallami.

²³Yahuartallami na micuna cangui. Yahuartaca, yacutashnami alpapi talina cangui.