Read Imbabura Highland Quichua DEUTERONOMIO 16 Bible Online

DEUTERONOMIO 16 - Imbabura Highland Quichua bible

DEUTERONOMIO 16

¹Abib shuti quilla chayamujpica, canda Mandaj Taita Diosta yarishpa, pascua punllapi micuita rurangui. Canda Mandaj Taita Diosca, Abib shuti quillapimi, Egiptomandaca tuta llujchimurca.

²Llamacunata, huarmi huagracunatami, canda Mandaj Taita Diosman cushpa, pascua punllapi huañuchina cangui. Chaitaca, paipaj shuti chaipi causachun Mandaj Dios agllashca pushtupimi huañuchina cangui.

³Chai aichataca, levadurahuan rurashca tandahuanga, na micunachu cangui. Chai aichataca, canchis punllacamanmi, levadura illaj tandahuan, llaquilla causashcata yarichij tandahuan micuna cangui. Egipto llactamandaca, uchami llujshimurcangui. Egipto llactamanda llujshimushca punllataca, tucui causaipi yariashpa causangapajmi, chashna rurana cangui.

⁴Cambaj tucui llactapica, canchis punllacamanmi ima levadurapash na ricuringa. Shinallata callari punlla chishipi huañuchishca aichataca, cayandi punllapaca na saquinachu cangui.

⁵Pascua punllacunapica, canda Mandaj Taita Dios carashca maijan pueblopipash, animalcunataca paiman cushpa na huañuchi ushanguichu.

⁶Ashtahuangarin paipaj shuti causachun, canda Mandaj Taita Dios agllashca pushtupimi, chaitaca rurana cangui. Ña chishajpi indi huashajujpi, Egiptomanda llujshimushca horaspimi, animalta Diosman cushpa huañuchina cangui.

⁷Chai aichataca, canda Mandaj Taita Dios agllashca pushtupillatami, cusashpa micuna cangui. Ña cayandi tutamandaca, can causajuj huasiman tigranguilla.

⁸Levadura illaj tandataca, sucta punllacamanmi micuna cangui. Ña canchis punllapica, canda Mandaj Taita Diosmanmi jatun fiestata rurana cangui. Chai punllapica, imatapash na ruranachu cangui.

⁹Canchis semanatami cuentana cangui. Granocunata tandachingapaj hoceshuan cuchui callarishca punllamandapachami, canchis semanata cuentana cangui.

¹⁰Shina cuentashpami, canda Mandaj Taita Diosman jatun fiesta semanacunata rurana cangui. Chai punllapica, canda Mandaj Taita Dios bendiciashcashnallata, na mitsashpa carangui.

¹¹Shina rurashpami, canda Mandaj Taita Diospaj ñaupajpica, cambaj churicunandi, ushicunandi, canda servij jaricunandi, canda servij huarmicunandi, cambaj pueblocunapi causanajuj levitacunandi, shuj llactamanda runacunandi, taita mama illaj huahuacunandi, cangunahuan causanajuj sapalla huarmicunandi cushijungui. Paipaj shuti causachun, canda Mandaj Taita Dios agllashca pushtupimi, chashna cushijungui.

¹²Egiptopi servishpa causashcataca, yarinami cangui. Chaimandami, pactachinajuchun cushca cai shimicunataca pactachishpa causana cangui.

¹³Trillana pambamanda granota tandachishca jipa, uvasta cutana pushtumanda vinota tandachishca jipami, chugllacunata rurai jatun fiestataca, canchis punllacaman rurana cangui.

¹⁴Chai jatun fiestatapica, cambaj churicunandi, ushicunandi, canda servij jaricunandi, canda servij huarmicunandi, levitacunandi, shuj llactamanda shamushca runacunandi, taita mama illaj huahuacunandi, cambaj pueblocunapi causanajuj sapalla huarmicunandimi cushijungui.

¹⁵Canda Mandaj Taita Dios agllashca pushtupica, canchis punllacamanmi Mandaj Diosman jatun fiestata rurana cangui. Canda Mandaj Taita Diosca, cambaj granotapash, cambaj maquihuan imatalla rurashcatapash bendiciashcamandami, chashna cushijuna cangui. Canga, ninandapachami cushijushca cangui.

¹⁶Cambaj llactapi causanajuj tucui jaricunaca, canda Mandaj Taita Diospaj ñaupajpimi, paillata agllashca pushtupi, huatapi quimasacaman ricurimunga. Levadura illaj tandata micuna punllacunapi, fiestata rurana semanacunapi, malquicunahuan chugllacunata rurana jatun fiesta punllacunapimi, shina tandanajunga. Chaiman shamushpaca, Mandaj Diospaj ñaupajpica, pipash chushaj maquihuanga na ricurimungachu.

¹⁷Tucuicunami, canda Mandaj Taita Dios bendiciashcashnallata, imagutapash carangapaj apamunga.

¹⁸Cambaj aillu purapi canda Mandaj Taita Dios carashca tucui pueblocunapimi juezcunata, shuj mandajcunatapash churana cangui. Paicunami israelcunataca, imatapash cashcatapacha rurashpa, aliguta ricushpa mandanajunga.

¹⁹Alita ruranataca, na shujman tigrachinachu cangui. Ama ñavita ricushpalla alita ruranguichu. Pacalla imata carajpipash, na japinachu cangui. Pacalla imatapash japinaca, alipacha yachajushca ruranatapash ñausatashna saquinllami. Imatapash cashcatapacha ruraj runagupash alita ruranataca, shujman tigrachishpa rimanllami.

²⁰Imatapash cashcatapachallami rurashpa causana cangui. Canda Mandaj Taita Dios carashca llactata japishpa, chaipi causangapajmi chashna causana cangui.

²¹Canda Mandaj Taita Diospaj altar ladopica, can rurashca Asera shuti huarmi diospaca, ima yuratapash na tarpunachu cangui.

²²Chaipica, rumi diostapash na shayachinachu cangui. Chaicunataca, canda Mandaj Taita Diosca na ricunayachinllu.