Read Imbabura Highland Quichua DEUTERONOMIO 18 Bible Online

DEUTERONOMIO 18 - Imbabura Highland Quichua bible

DEUTERONOMIO 18

¹Leví shuti aillu puramanda tucui levita curacunaca, imata cashpapash, alpata cashpapash, Israel llactapica na japingachu. Paicunaca, Mandaj Diosman carashpa rupachishcacunata, paipaj cachun carashcacunatami micushpa causanga.

²Paicunapaj huauquicunahuanga, ima japinatapash, paicunaca na charingachu. Paicunapaj japinaca, Dios imashna nishcashnallata, Mandaj Diosmi paicuna japina canga.

³Gentecuna Diosman carashpa huañuchishca huagramanda, jari llamamandaca, caicunatami curacunaca japinata charin: Rigra aichata, quijadas aichata, puzungunatami paicuna japinata charin.

⁴Punda fucushca cambaj granocunata, vinota, aceiteta, punda rutushca llama milmatapashmi cuna canguichi.

⁵Levitacunataca, canda Mandaj Diosllatami paicunapaj churicunandi, Mandaj Diospaj shutipi tucui causaipi paipajta rurashpa causachun, cambaj tucui aillu puramanda agllarca.

⁶Tucui Israel puramanda, cangunapaj maijan pueblopi pai causajushpapashmi, shuj levita runa llujshinga. Paica, Mandaj Dios agllashca pushtuman, tucui shunguhuan shamujushpaca shamuchunlla.

⁷Chaipica, canda Mandaj Taita Diospaj shutipi, paipaj huauqui levitacuna Diospajta ruranajunshnallata, paipash Mandaj Diospajta rurangallami.

⁸Micunatapash, caishujcuna japinshnallatami japinga. Taitamanda imagutapash chasquishca jahuami, chashna japinga.

⁹Canda Mandaj Taita Dios carashca llactaman yaicushpaca, chai llactapi causajcuna millanayaicunata rurashpa causashcataca, na yachajunachu cangui.

¹⁰Canguna purapica, paipaj churita, paipaj ushita cashpapash, rurashcalla diosman carashpa rupachij runaca na tianachu. Shinallata yachaj cangapaj, brujo cangapaj, jipa punlla ima tucunata yachaj cangapaj, yumbu cangapaj yachajuj runapash na tianachu.

¹¹Yumbu canata, yachaj canata, ayacunata mañaj canata, huañushcacunata tapuj canata yachajuj runapash na tianachu.

¹²Imatapash chashna nalicunata ruranaca, Mandaj Diospaj ñaupajpica millanayaimi. Canda Mandaj Taita Diosca, chai llactapi causajcunataca, chashna millanayaicunata rurashcamandami, cambaj ñaupajmanda llujchinga.

¹³Canda Mandaj Taita Diospaj ñaupajpica, ima pandatapash na ruranachu cangui.

¹⁴Can japigrijuj cai llactapi causajcunaca, brujocunata, yachajcunatami uyashpa causanajun. Ashtahuangarin canda Mandaj Taita Diosca, candaca napacha chaita rurachun saquishcachu.

¹⁵Canda Mandaj Taita Diosca, cangunapaj chaupimandami pai ima nishcata ñucashnalla villachunga, shuj villajta churanga. Paitami, uyana cangui.

¹⁶Horeb shuti urcupi tandanajushca punllapi, canda Mandaj Taita Diosta can mañashcashnallatami chashna ruranga. Canga, cashna nishpami mañarcangui: ‘Ñuca ama huañungapaca, ñucata Mandaj Taita Dios rimajtaca, cutinga na uyai ushashachu. Chashna jatun ninataca, na ashtahuan ricungapaj munapanichu’ nijurcanguimi.

¹⁷Shinamandami Mandaj Diosca, cashna nihuarca: ‘Paicunaca, chashna nishpaca alitami mañanajun.

¹⁸Shinamandami, paicunapaj huauqui purapica, ñuca ima nishcata villaj runata canshnalla villachun churasha. Paimi, tucui ñuca imata villachun mandashcata villajunga.

¹⁹Ashtahuangarin ñuca shutipi pai villajujpi, ñuca shimicunata na cazujtaca, imamanda na cazushcatami tapuchisha.

²⁰Ashtahuangarin napash ñuca villachun mandajpita, ñuca shutipi villaj runa, na cashpaca na rijsishca dioscunapaj shutipi villaj runaca, huañuchi tucungami’ nihuarcami.

²¹Canga, cambaj shungupica cashnami ningui: ‘¿Imashnata Mandaj Dios na villachishca shimi cajtaca yachashunyari?’ ninguimi.

²²Mandaj Diospaj shutipi villaj runa villashca na pactajpi, na imapash tucujpimi, Mandaj Dios napash villachijpita villajushcata yachangui. Chai villaj runaca, paipaj yuyaimandalla llujchishpami villajunga. Shina cashcamanda paitaca, na manllanachu cangui.