Read Imbabura Highland Quichua DEUTERONOMIO 19 Bible Online

DEUTERONOMIO 19 - Imbabura Highland Quichua bible

DEUTERONOMIO 19

¹Canda Mandaj Taita Diosca, shuj llactacunapi causajcunata tucuchingami. Canda Mandaj Taita Diosca, chai llactacunata canman cujpimi, canga chai llactacunata japingui. Shina japishpami, paicuna causashca pueblocunapi huasicunapi causangui.

²Cambaj cachun, canda Mandaj Taita Dios carashca llacta chaupipica, quimsa pueblocunatami shicanyachina cangui.

³Canda Mandaj Taita Dios canman carashca llactataca, quimsapi shicanyachishpa, pueblocunaman rina ñangunatapash alichingui. Chaicunaca, huañuchijcuna pacajungapaj richunmi canga.

⁴Huañuchij runa chaipi pacajungapaj rishpa chaipi causanaca, cashnami canga: Na fiñanajushca purijushpata, napash yashcapi huañuchishca cashpallami, chaipi causai ushanga.

⁵Shuj runami, paipaj cumba runaguhuan yamdangapaj urcuman ringa. Chaipimi yamdata jachahuan fitijujpi, jacha jirruca caspimanda llujshishpa, paipaj cumba runagupi chayajpi, chai runaguca huañunga. Shinamandami, chai runaca chai pueblocunamanda maijan pueblopipash pacajungapaj rishpa, chaipi causanga.

⁶Chai pueblocuna yapa carupi cajpira, huañuchishcamanda fiñarishpa randi huañuchingapaj munaj runara, chai huañuchij runata catishpa japiman. Shina japishpara napash huañuchina cajpita chugrichishpa huañuchinman. Huañuchij runaca, paipaj cumba runaguhuanga pundacunaca na fiñajushcachu carca.

⁷Chaimandami candaca: ‘Quimsa pueblocunata shicanyachingui’ nishpa mandani.

⁸Canda Mandaj Taita Diosca, cambaj ñaupa taitacunaman juramentushpa villashcashnallatami, cambaj llactataca ashtahuan mirachinga. Shinallata cambaj taitacunaman carasha nishca tucui llactatami caranga.

⁹Cai mandashcacunata rurangapaca, can pactachijuchun cunan ñuca mandashcatallami pactachina cangui. Canda Mandaj Taita Diosta juyashpa, punllandi paita catishpa causangui. Shina causashpami, cai quimsa pueblocunata shicanyachishcamanda, cutin shuj quimsa pueblotapash shicanyachina cangui.

¹⁰Canda Mandaj Taita Dios canman carashca llacta chaupipica, ima nalitapash na ruraj runapaj yahuarta ama jichachunmi, chashna shicanyachina cangui. Shinallata huañuchishpa yahuarta jichashcamanda ama juchachi tucuchunmi, chashna rurana cangui.

¹¹Ashtahuangarin maijan cashpapash, paipaj cumba runaguta na ricunayachishpami, huañuchingapaj pacalla chapashpa purijunga. Shinamandami huañuchingapaj jatarishpa, huañungacaman chugrichijpi chai cumba runaguca huañunga. Shinamandami chai huañuchij runaca, maijan pueblopi cashpapash pacajungapaj calpanga.

¹²Paitaca, chai pueblopi causanajuj mandaj rucucunami, chai pueblomanda llujchinajuchun cachanga. Shina llujchishpami, huañuchishcamanda randi huañuchingapaj munaj runapaj maquipi huañuchun churanga.

¹³Chai runataca, na llaquishpa huañuchinallami cangui. Shina rurashpami Israel purapica, ima nalitapash na ruraj runaguta huañuchinata anchuchishpa, tucuipi ali ringui.

¹⁴Canda Mandaj Taita Dios canman carashca llactapi causajushpaca, cambaj cumba runagupaj alpa mujundaca, na suchuchishpa uchillayachinachu cangui. Chaitaca, ñaupa taitacuna churashpa saquishcami.

¹⁵Ima nalita, ima juchata rurashcata, shujlla runa villajpica, pitapash na imatapash ruranachu cangui. Ashtahuangarin ishcaipura, na cashpaca quimsapura ricushpa villajpillami, imatapash rurai ushangui.

¹⁶Chashnapachami nishpa villaj runaca, chai juchachi tucuj runata llullashpami, villangapaj jataringa.

¹⁷Shinamandami juchachij runapash, juchachi tucuj runapash, Mandaj Diospaj ñaupajman, curacunapaj ñaupajman, chai punllacunapi mandanajuj juezcunapaj ñaupajman shamunga.

¹⁸Juezcunaca alipachami tapuchinajunga. Shina tapuchijpica, chashnapachami nishpa villaj runa villashca shimicunaca, paipaj huauquita juchachishpa villashcami llujshinga.

¹⁹Shina cajpimi, chai llullashpa villaj runataca, paipaj huauquita imashna llaquichingapaj munashcashnallata, paitapash llaquichina cangui. Shina rurashpami, cangunapaj chaupimandaca nalita anchuchinguichi.

²⁰Shina rurashcata huaquin puchushcacuna uyashpa manllarishpami, cangunapaj chaupipica na cutinga ashtahuan chashna nalicunatalla ruranajunga.

²¹Chashna nalita ruraj runataca, na llaquinachu cangui. Huañuchijpica, paitapashmi huañuchina. Ñavita surcujpica, paitapashmi ñavita surcuna. Quiruta surcujpica, paitapashmi quiruta surcuna. Maquita faquijpica, paitapashmi maquita faquina. Chaquita faquijpica, paitapashmi chaquita faquina.