Read Imbabura Highland Quichua DEUTERONOMIO 20 Bible Online

DEUTERONOMIO 20 - Imbabura Highland Quichua bible

DEUTERONOMIO 20

¹Canda fiñajcunahuan jatun macanajuiman llujshishpaca, paicunapaj caballocunata, macanajuna paicunapaj carretacunata, cangunata yali ashtaca soldadocunata ricushpaca, na manllanachu cangui. Canda Egipto llactamanda llujchimuj Mandaj Taita Diosmi, canhuan canga.

²Macanajungapaj ña quimirinajujpimi, shuj cura shayarishpa soldadocunata rimashpa,

³cashna ninga: ‘Uyahuaichi israelcuna cangunaca, cangunata fiñajcunahuan macanajungapajmi tandanajunguichi. Cangunapaj shungupica, na shaijunachu canguichi, na manllanachu canguichi. Musparitallapash, na musparinachu canguichi. Paicunapaj ñaupajpica, na chujchunachu canguichi.

⁴Cangunata Mandaj Taita Diosmi, cangunahuan ringa. Paimi, cangunata fiñajcunahuan cangunamanda macanajushpa, cangunata quishpichinga’ ningami.

⁵Chaipaj jipami mandajcunaca, soldadocunata cashna ninga: ‘¿Maijanda mushuj huasita huasichishca cashpapash, chai huasipi nara causashcanguichi? Chashna cashpaca, huasiman tigraichilla. Pactara macanajuipi huañujpira, shuj runara chai huasipi causagrinman.

⁶Shinallata maijambash uvasta tarpushpa, chai chagramanda nara micushpa cushijushca cashpaca, huasiman tigraichilla. Pactara macanajuipi huañujpira, shuj runara chai chagramanda micushpa cushijunman.

⁷Na cashpaca, maijambash cazarangapaj ari nishca cashpa, nara cazarashca cashpaca, huasiman tigraichilla. Pactara macanajuipi huañujpira, chai cazarana huarmihuan shuj runara cazaranman’ ninajungami.

⁸Mandajcunami, soldadocunataca cutin cashna ninajunga: ‘¿Maijan runacunata manllai shunguta charishpa chujchunajunguichi? Chashna cashpaca, huasiman tigrashpa richilla. Pactara cangunapaj cumbacunapaj shungutapash, cangunapaj shungutashna manllaj shunguta ruranguichiman’ ninajungami.

⁹Mandajcuna, soldadocunaman chashna rimashca jipami, soldadocunata mandajcunaca, soldadocunata pushashpa, paicunata ñaupashpa ringa.

¹⁰Shuj pueblopi causajcunahuan macanajungapaj ña chayajushpaca, casilla ali causai tiachunra parlangui.

¹¹Shina parlajpimi, chai pueblopi causajcunaca: ‘Casilla ali causai tiachun’ nishpa, pueblo punguta pascanga. Shina pascashpaca, chai pueblopi tucui causajcunami impuestota cushpa, cangunata servishpa causanga.

¹²Ashtahuangarin chai pueblopi causajcunaca, canhuan casilla ali causai tiachun na munashpa macanajushunlla nijpica, pueblota chaupipi churanguilla.

¹³Canda Mandaj Taita Diosmi, paicunataca cambaj maquipi churanga. Shina churashca jipaca, chaipi causanajuj tucui jaricunata espadahuan chugrichishpa huañuchinguilla.

¹⁴Huarmicunata, huahuacunata, animalcunata, chaipi tucui imalla tiajcunata, chaipi imatalla charishcacunatami, cambaj cachun japina cangui. Canda fiñajcunata quichushcatami, micuna cangui. Chaicunataca, canda Mandaj Taita Diosmi canman cunga.

¹⁵Na cai llactamanda pueblocunata, canmanda carupi tiaj pueblocunataca, shinami rurana cangui.

¹⁶Ashtahuangarin canda Mandaj Taita Dios canman carashca cai llactapi tiaj pueblocunapi causajcunataca, shujtallapash causajtaca, na saquinachu cangui.

¹⁷Heteo, amorreo, cananeo, ferezeo, heveo, jebuseo nishca gentecunataca, canda Mandaj Taita Dios mandashcashnallata, tucuicunatami tucuchina cangui.

¹⁸Paicunapaj dioscunaman imatapash rurashpa, tucui millanayaicunata paicuna rurashcashnallata ama yachachinajuchunmi, chashna tucuchina canguichi. Chashna yachachijpica, canda Mandaj Taita Diosta fiñashpami, juchata ruranguichi.

¹⁹Maijan pueblopi causajcunahuambash macanajushpa, chai pueblota japingapaj, tauca punllacunata chaupipi churashca cashpaca, quirucunataca na jachahuan fitinachu canguichi. Chai quirucunamandallata micuna cashpami, na fitina cangui. Chai quirucunataca, na fitishpa tucuchinachu cangui. Pambapi quirucunaca, na runacuna cashcamandami, canda fiñashpa, canda chaupipi churangapaj shamuitaca na ushanga.

²⁰Ashtahuangarin granota na fucuj quirucunata rijsishpaca, fitishpa urmachinguilla. Chai caspicunahuanga, baluarte nishcata rurashpa shayachishpa, chai pueblota japingacaman macanajunguilla.