Read Imbabura Highland Quichua DEUTERONOMIO 21 Bible Online

DEUTERONOMIO 21 - Imbabura Highland Quichua bible

DEUTERONOMIO 21

¹Cambaj cachun canda Mandaj Taita Dios, canman carashca llactapi cashpaca, pambapi huañushca sirijujta taringuipashchari. Paitaca, pi huañuchishcatapash na yacharingachu.

²Shina cajpica, canda mandaj rucucunapash, juezcunapashmi, chai huañushca sirijushca ashtahuan ladolla muyundi pueblocunacaman, imashna caru cajta medishpa ricungapaj llujshinga.

³Chaita ricushpaca, chai huañushcata tarishca ladomandaca, ashtahuan ladolla pueblopi causanajuj mandaj rucucunami, huarmi huagra puramanda nara yapushca, nara yugushca huarmi shicuta japinga.

⁴Chai pueblopi mandaj rucucunaca, chai huagrataca yacu tiaj pugru pambamanmi apanga. Chai pambaca, nara yapushca, nara imatapash tarpushcami canga. Chai pugru pambapimi, huarmi shicupaj cunga tulluta faquinga.

⁵Chai jipaca, levita nishca runapaj churi curacunami chaiman shamunajunga. Canda Mandaj Taita Diosca, paicunatami paita servishpa causanajuchun, Mandaj Diospaj shutipi bendicianajuchun agllashca. Ima fiñanajui tiajpipash, ima llaquicuna tiajpipash, paicuna ricushpa mandajpimi, imata cashpapash ruranajunga.

⁶Huañushca sirijushcata tarishca ladomandaca, ashtahuan ladolla pueblopi causaj mandaj rucucunami, huarmi shicupaj jahuapi maquita maillanajunga. Chai shicutaca pugru pambapimi, cunga tulluta faquishpa huañuchirca.

⁷Chaipaj jipaca, cashnami ninajunga: ‘Cai runapaj yahuartaca, na ñucanchi maquihuan jichurcanchichu. Ñucanchi ñavihuambash, na ricurcanchichu.

⁸Mandaj Dioslla, can agllashpa can quishpichishca israelcunapaj juchataca cungapairi. Cai runapaj yahuarmandaca, ima nalita rurashcapash na ricurij israelcunataca ama juchachipaichu’ ninajungami. Shinamandami, yahuarta jichashpa juchata rurashcataca cunganga.

⁹Mandaj Diospaj ñaupajpi imapash alitalla can rurashpami, ima nalita rurashcapash na ricurishca runapaj yahuarta jichashcata cangunapaj chaupimanda anchuchingui.

¹⁰Canda fiñajcunahuan macanajuiman llujshijpimi, canda Mandaj Taita Diosca, paicunataca cambaj maquipi churanga. Shina churajpimi, paicuna puramanda huaquingunataca prezu japingui.

¹¹Chai, prezu japi tucushca puracunapi, maijan huarmitapash juyaillagu cajta ricushpa munashpaca, cambaj huarmi cachun japinguilla.

¹²Shina japishpa cambaj huasiman pushajpimi, chai huarmica ajchatapash ruturishpa, sillutapash ruturinga.

¹³Shinallata prezu cashpa churajushca churajunata llujchishpa, shuj churajunata churajushpami, cambaj huasipi causanga. Paipaj taita mamamandaca, shuj quillacamanmi huacanga. Chaipaj jipaca, chai huarmipi chayanguilla. Canga, paipaj cusami cangui. Paipash, cambaj huarmimi canga.

¹⁴Chai huarmita na munashpaca, canllata cacharishpa richun saquinguilla. Culquipaca na jatunachu cangui, gañandapash na ruranachu cangui. Paita pingaichishcamandami, na chashna rurana cangui.

¹⁵Shuj runa, ishcai huarmita charishpaca, shujtaca juyangami, shujtaca na ricunayachingachu. Shina cajpipash juyashca huarmipash, na ricunayachishca huarmipashmi, churicunata paiman ungunga. Na ricunayachishca huarmimi, punda churita ungunga.

¹⁶Imatalla charishcata churicunaman chaupina punllapica, na ricunayachishca huarmihuan charishca punda churiman cunata na cushpa, juyashca huarmihuan charishca churimanlla cuitaca na ushangachu. Na ricunayachishca huarmihuan charishca churimi, paipaca punda churi.

¹⁷Ashtahuangarin tucui churicunaman cunamanda, chaupita yalishpa cungapaca, na ricunayachishca huarmipaj churimanmi, paipaj punda churi cajta yarishpa tucuita cunga. Paimi, shinllipacha cashpa chari callarishca churi. Punda churi japina cashcata japinaca, paipajmi.

¹⁸Maijanga, taita mama rimashca shimitapash na cazuj, shinlli shungupacha tucushca, na cazuj churitami charinga. Paita llaquichijpipash, na cazungachu.

¹⁹Shina cajpica, paipaj taita mamami, paicuna causanajuj pueblota mandaj rucucunapajman llujchishpa apanga. Puebloman yaicuna pungupi paicuna tianajuj ñaupajmanmi apanga.

²⁰Pueblota mandaj rucucunamanmi, cashna ninajunga: ‘Cai ñucanchi churica, ñucanchi rimashca shimitapash na cazuj, shinlli shungupacha tucushca, na cazuj churimi. Paica ninanda micushpa, machashpallami purin’ ninajungami.

²¹Shina villajpimi, pai causajuj pueblopi causanajuj tucui runacuna rumicunahuan huañuchijpi, paica huañunga. Shina rurashpami, nalita rurajcunataca cangunapaj chaupimanda anchuchingui. Chaita uyashpaca, tucui israelcunami ninanda manllaringa.

²²Maijan runapash jatun nalita rurashcamanda huañunapacha cajpi huañuchishpaca, caspipi huarcungui.

²³Chai runapaj cuerpotaca, caspipi huarcushca tucui tuta pacarichunga, na saquinachu cangui. Caspipi huarcushca runataca, Taita Dios ninanda nalicachishcamandami, na cungashpa chai punllallata pambana cangui. Cambaj cachun canda Mandaj Taita Dios canman carashca llactataca, na mapayachinachu cangui.