Read Imbabura Highland Quichua DEUTERONOMIO 27 Bible Online

DEUTERONOMIO 27 - Imbabura Highland Quichua bible

DEUTERONOMIO 27

¹Moisesca, israelcunata mandaj rucucunahuanmi, israelcunataca cashna nishpa mandarca: “Tucui mandashca shimicunata cunan ñuca villashcataca, pactachinami canguichi.

²Canda Mandaj Taita Dios carashca llactaman yaicungapaj, Jordán yacuta ña chimbashca punllallatami shuj jatun rumicunata shayachishpa, calhuan yurajyachina cangui.

³Chai rumicunapica, ñuca mandashca cai tucui shimicunatami escribina cangui. Lechepash, balun mishquipash ashtacapacha tiaj chai llactaman, canda Mandaj Taita Dios carashca llactaman chimbashpami, shina escribina cangui. Cangunapaj ñaupa taitacunata Mandaj Taita Dios nishcashnallatami, chai llactataca caranga.

⁴Jordán yacuta chimbashpa, Ebal shuti urcuman ña chayashpaca, ñuca nishcashnallatami rumicunata shayachishpa, calhuan yurajyachina cangui.

⁵Chaipillatami, canda Mandaj Taita Diosman, rumicunahuan shuj altarta rurana cangui. Chai altarta pircajushpaca, na jirruhuan tacashpa ruranachu cangui.

⁶Canda Mandaj Taita Diospaj altartaca, faquishca rumicunahuanga na ruranachu cangui. Chai altarpimi, canda Mandaj Taita Diosman animalcunata cushpa tucuillata rupachingui.

⁷Shinallata Dioshuan ali cangapajpash, animalcunata cushpa huañuchingui. Chai aichataca, chaipillata micungui. Shina rurashpami, canda Mandaj Taita Diospaj ñaupajpi cushijungui.

⁸Chai rumicunapica, ñuca mandashca tucui shimicunataca, ali ricunallatami escribina cangui” nishpami mandarca.

⁹Chai jipami Moisesca, levita curacunandi, tucuilla israelcunata cashna nirca: “Israelcuna, upalla uyaichi. Cunanmi cangunaca, cangunata Mandaj Taita Dios agllashcacuna tucushcanguichi.

¹⁰Shina cashcamanda, canda Mandaj Taita Dios rimashca shimicunata uyai. Shinallata pai mandashcacunata, pactachinajuchun pai cushca shimicunata cunan ñuca yachachishcataca pactachinami cangui” nircami.

¹¹Chai punllallatami Moisesca, israelcunataca cashna nishpa mandarca:

¹²“Jordán yacuta chimbashpaca, caicunami isarelcunata bendiciangapaj Gerizim shuti urcupi shayaringa: Simeón, Leví, Judá, Isacar, José, Benjamín shuti aillucunami shayaringa.

¹³Ima llaquipash japishpaca, alimi canman ningapaca, caicunami Ebal shuti urcupi shayaringa: Rubén Gad, Aser, Zabulón, Dan, Neftalí shuti aillucunami shayaringa.

¹⁴Levitacunaca, tucuilla Israel runacunatami ninanda caparishpa, cashna ninajunga:

¹⁵‘Labrashpa rurashca diosta, na cashpaca jirruta yacuyachishpa imamambash rijchaj diosta rurashpa, imatapash ruranata ali yachaj runashnallata, Mandaj Dios millanayachishcata rurashpa pacallapi churaj runaca, ninanda llaquichi tucuchun’ ninajungami. Shina nijpica, tucui gentecunami: ‘Shina cachun’ ninajunga.

¹⁶‘Paipaj taita na cashpaca, paipaj mama alicachi tucushcata huaglichij runaca, ninanda llaquichi tucuchun’ ninajungami. Shina nijpica, tucui gentecunami: ‘Shina cachun’ ninajunga.

¹⁷‘Paipaj cumba runagupaj alpa mujunda suchuchishpa, chai alpata uchillayachij runaca, ninanda llaquichi tucuchun’ ninajungami. Shina nijpica, tucui gentecunami: ‘Shina cachun’ ninajunga.

¹⁸‘Ñausa runaguta shuj ñanda cachaj runaca, ninanda llaquichi tucuchun’ ninajungami. Shina nijpica, tucui gentecunami: ‘Shina cachun’ ninajunga.

¹⁹‘Shuj llactamanda shamushca runagu, sapalla mamagu, taita mama illaj huahuagu japina cashcata shujman tigrachij runaca, ninanda llaquichi tucuchun’ ninajungami. Shina nijpica, tucui gentecunami: ‘Shina cachun’ ninajunga.

²⁰‘Taitapaj huarmihuan siririshpa, paipaj taitapaj lluchullata ricushcamandami chai runataca, ninanda llaquichi tucuchun’ ninajunga. Shina nijpica, tucui gentecunami: ‘Shina cachun’ ninajunga.

²¹‘Maijan animalhuambash chayarij runaca, ninanda llaquichi tucuchun’ ninajungami. Shina nijpica, tucui gentecunami: ‘Shina cachun’ ninajunga.

²²‘Taitamanda, na cashpaca mamamanda panihuan chayarij runaca, ninanda llaquichi tucuchun’ ninajungami. Shina nijpica, tucui gentecunami: ‘Shina cachun’ ninajunga.

²³‘Paipaj suedrahuan chayarij runaca, ninanda llaquichi tucuchun’ ninajungami. Shina nijpica, tucui gentecunami: ‘Shina cachun’ ninajunga.

²⁴‘Paipaj cumba runaguta cungashcapi pacalla japishpa chugrichij runaca, ninanda llaquichi tucuchun’ ninajungami. Shina nijpica, tucui gentecunami: ‘Shina cachun’ ninajunga.

²⁵‘Ima nali rurashcapash na ricurishca runata huañuchingapaj culquita pacalla japij runaca, ninanda llaquichi tucuchun’ ninajungami. Shina nijpica, tucui gentecunami: ‘Shina cachun’ ninajunga.

²⁶‘Cai mandashca shimicunata na cazushpa, na pactachishpa causaj runaca, ninanda llaquichi tucuchun’ ninajungami. Shina nijpica, tucui gentecunami: ‘Shina cachun’ ninajunga.